Yunus 4
4
Yunus iatamisi ruai
1Yahweh iatikohu kota Niniwe tewa reiso Yunus iatamisi ruai. Anoi resaa mainae. 2Oyo iainisi. Iahata, “Yahweh. Ano aisosiku na ueuku mai rei mataanoe oni urueku pan we niane asi. Uanei nea ata areini sahoro mka aunai. Reini sahoro reunaku nanie urumaku na pan kota Tarsis. Tau uanei ata Ano mo, anom runa mansiau. Masike ami apalalosa iae, arui iake nai osa osima sirinia. Me sate resaa rapu tewa. Anom runama na arime sae waron atotoe osima rei sirinia. Reiso asaka aneni me anamanae wan nanie apasanama rei. 3Reiso, Yahweh, atapiku umataku man nea! Tau nene iake mo, umataku uarihon tuniai reini nea.”
4Ne Yahweh iahata, “Ano me sae na anom resaa rei?”
5Iatinu san rei oyo ieui arihoni kota rei, na ria rani mata saae. Hoka pan oyo, iuna ne wanane isa na iaraonoi. Irue inapa, nanie inoo mka sae ereyari tau kota Niniwe. 6Oyo sira tau Yahweh Anahatana iuna ai isa sani hunanene reruhu haineke Yunus ne wanane rei. Reraonoi na reuna anoi wani mtinte rei karahirine mkane. Reiso anoi mirike nai osa.
7Ne nene hanroe san rei wapan reputi-puti asi oyo, Anahatana iaisosi une hatae isa reai ai rei rotu-tu ai rei rematai. 8Taa ranie resaa oyo, Anahatana iuna ihute wan titie reuhona on pan rani mata saae. Ran titie repana Yunus unui reiso iahana imankaei mainae. Oyo iahata, “Nene iake mo, umataku man nea na pene unoo tuniai reini nea tea!”
9Ne Anahatana iahata, “Nanie anom resaa noso ai rei nan tahae?”
Iahata, “Nanie umataku nea reini tau ranie titie mainae! Reiso anoku resaa tea!”
10Iahata, “Anom runa ai reini si? Aikee me kausa wanaya rahoka tanui tewa oi rei! Asakai tewa rei! Ai reini reruhui tau onone hatae man. Han roe rematai nea rei! 11Ano man anom runa ai reini! Reiso Au sapan runa kota Niniwe reini? Sio nihun nihu utun hutu ua nesi wason orueso poe kota rei. Samatoro no makapanau iae panesi oi. Oanei sae wan manisate runa sae wani kahatene tewasi! Reiso Au iae kahurae anoku runaso oi tea!”
Currently Selected:
Yunus 4: ANA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc., All rights reserved.
