Yohanis 10

Yesus mo, nooi sani ia mamsaka rompau wan iake

1Yesus iasau ata, “Atinu mai ia-ia, nanie uasau osimo. Ia sia wain inusui pani rompau nene koka ne ipusu mitanunue tewa, ne isaai pusu koka iauhun mo, ia rei nanie ikimanaka rompau rai. 2Ne ia wain inusui pani rompau nene koka pusu mitanunue, ia reimo, ia mamsaka rompau. 3Ia wain isaka koka nene mitanunue ihuka mitanunue osi ia mamsaka rei. Ia mamsaka ioi nanaya sana osa-osa, rationa nioi. Pusi, oyo iautunure rahoka arihon koka. 4Ihoka pusi ne rompau arihon nene koka nea, oyo ieu roe uae sui osa iautunure. Rompau rai rationa nioi reiso raeu rapusu-pusui hae muie. 5Ne rompau rai raeu rapusu ia tamene wain rationai tewa. Ne mka rarumaso arihoni ia rei. Tea mo, rationa nioi tewa.”

6Yesus iruni matieue rerihon ia mamsaka rompau rei ne olai kua Yesus anoi tewa sirinia.

7Reiso iahata, “Oatinu mai ia-ia, nanie uasau osimo. Au reini mo, sani koka nene mitanunue wan rompau ranusu pan koka anoe. Tea mo, Au mo, mitanunue na mansiau oeuso mai Anahatana. 8Mansiau umau ohokaso oanaoneku na oasau ata sio mo, sio mamsaka rompau. Sio reimo, sio kimanakana. Ne rompau rai rapeneso rapusu sio. 9Au reini mo, sani mitanunue. Mka Anahatana iapuheu ia sia man wain ihokai mai tanui inusu pusu Au. Mka inusu hoka sae isa remunai tewa sani rompa renusu hoka koka renina nene muaina mo, iake. 10Sio kimanakana ohoka tau hasae okimanaka, ohunu, na ouna akahate. Ne Au mo, uhokaku mai tuniai reini na mansia oamahaiso okata Anahatana rotu-tu ria supan na urui iake osiso.

11Au reini mo, Au sani mamsaka rompau wain isaka ne rompau ia-ia. Isaka ne rompau ia-ia mo, masike nanie imatai iae, hete sae ne rompau ramahaiso. 12Ne ia wain isupu seha-seha na inoo na rompau rai mo, noo sani mamsaka rompau rai tewa. Mamsaka rompau mo, rompau nene upue. Ia wain isupu seha-seha rei inoo asu wesie rehokai, oyo irumai arihoni rompau rai. Oyo asu wesie rei reoto rompa isa na nesia raruma rawena-wenaso. 13Ia wain isupu seha-seha rei irumai, areimo tau ia mo, hasae isupu seha-seha man. Reiso anoi runare tewa.

14-15Au reini mo, Au sani mamsaka rompau wain isaka ne rompau ia-ia. Au sahoro unoo runare ia-ia. Masike mka umataku iae hete sae we rompa ramahaiso. Uationa we rompau. We rompau iae rationaku oi. Noo sani Amaku iationa Au na Au uationa Amaku oi. 16Au iae we rompau tamena wason oamanouso tewasi na we rompau waron mai koka. Reiso Au iae kahurae urorire na uamanou pusire tau osa. Rompau tamena rai oi mka raatinu nioku. Rompau rai pusire mka ramanouso tau osa. Au mka una mamsakae tau pusire.

17Amaku anoi runaku. Areimo tau urui ruaku na umataku hete sae we rompau ramahaiso. Ne umataku, mka uamahaiku honu. 18Ia isa ihunu Au mo, tewa. Ne Au ruaku sahoro urui ruaku na sio ohunuku. Au we kawasa urui ruaku na umataku runa we kawasa uamahaiku honu. Amaku iaisosiku na una san rei.”

19Sio ona Yahudiu oatinu Yesus iasau san rei, oyo otuntana na umau honu. 20Sio panesi oasau ata, “Sakahatene remasuniki reiso imukei. Pene atinu tau Ia!”

21Ne sio umau oasau ata, “Tumata waini sakahatene remasuniki mo, ianamana san rei tewa. Tumata wain sakahatene remasuniki mo, ne kawasa isuisene ia mata putie tewa.”

Sio Yahudiu oparisaa tewa ata Yesus mo Anahatana Anai

22Nene onone tau karisaa anoo rapeka runa oseka tau Anahatana ne numa mainisie wan no nisa iuna apaputiki roe kota Yerusalem.#10:22 Sio Yahudiu anoo rapeka runa naone no nisa isa iapaputi Anahatana ne numa mainisie tau iakanupu hahu osi ne anahatanau wason titue tewa. Sio Yahudiu onesi no nisau, oneiso, oyo ereeu rotu-tu musum tonu, samatoro ouna karisaa oseka tau no numa mainisie tau sio una apaputiki nea. Karisaa rei reeu rotu-tu onona wanu. Tau rei mo, mahatane nanie. 23Yesus ieu roe Anahatana ne numa mainisie ieu sui Salomo ne teune. 24Oyo sio ona Yahudiu oo ohoriki. Oyo oahata, “Munata titue Ano mo, Ia Aia waini Anahatana Ihitiki na Iapuheu Mansiau mo, asau osima mai nea. Pene unama asei-asei pan anoma.”

25Oyo Yesus iahata, “Uasau osimo nea rei. Ne oparisaa tanuku tewa. Au una sima-simana panesi osimo nea. Tea mo, Amaku irui kawasa osiku na una rai pusire nea. Sima-simana waroni unare reimo na ratuhete osimo ata Au reini Au seia. 26Ne oparisaa tanuku tewa. Tau omi mo, omi sani rompau waron nene mamsaka tamene. 27Au we mansiau oatinu tanuku sani rompau oatinu tau no mamsaka rompau. Uationa we mansiau na opusuku. 28Au unaso oamahaiso kata Anahatana rotu-tu ria supan. Reiso mka omata rotu-tu ria supan tewa. Ia seia man iwahuso arihoni hanaku anoe tewa. 29Amaku sahoro iruiso osiku. Amaku mo, Ia mainae inesi ia seia man. Reiso ia seia man iwahuso arihon Amaku hanai anoe tewa. 30Au na Amaku mo, uama osa.”

31Oyo sio ona Yahudiu oroma hatu honu nanie oraui na ohunui.

32Ne Yesus iahata, “Omi onoo sima-simana panesi nea waron Amaku iaisosiku na unare. Reiso arihon sima-simana rai mo, sima-simane sae sahoro reunamo na nanie orauku tau hatu na ohunuku?”

33Oyo oasau ata, “Araua tau hatu pusu sima-simana tewa. Ne Ano anamana sani Ano mo, Anahatana rei. Aikee Ano mo, Ano mansia sani ami oi. Ne auna ruam sani ano mo, Anahatana rei.”

34Oyo Yesus iahata, “Sio okanu tau Anahatana ne anamanaya#10:34 Yesus inana Anahatana ne anamanaya raini arihon Sura Ahinaya 82:1-2. ata Anahatana iasau osi sio Yahudiu no sio mainaya ata, ‘Au uanamana osimo sani omi mo, mo hali noo sani Au ruaku oi.’#Kapatau 82:6 35Omi anei ata sae man waron sio okanure tau Anahatana ne anamanaya mo, pusire manisata. Reiso noo sani Anahatana ruai iasau ata sio wason osupu ne anamanaya mo, no hali sani Ia ruai. 36Anahatana iromaku na iaisosiku uhokaku mai tuniai reini. Reiso, sani uasau ata, ‘Au mo, Anahatana Anai’, pene anomo rasaa. Pene oasau ata Au uanamana sani Au mo, Anahatana rei. 37Sani Au una sae waron Amaku iunare tewa, areimo pene oparisaa tanuku. 38Ne sani Au una sae wan rehiti Amaku uai anoe rei, masike oparisaa tanuku tewa sirinia iae, kahurae oparisaa tau sima-simana waroni Au unare rei. Parisaare na oanei ia-ia ata Au na Amaku mo, uama osa.”

39Oatinu Yesus iasau sani rei, oyo osota rea Yesus honu. Ne Yesus ieui arihonso.

40Oyo Yesus isipu toha Wae Yordan na ieui ria hae, oyo iruei ria rei. Naone Yohanis isohu mansiau ria rei na mansiau oanei ata oarihoni no rosau nea. 41Mansia panesi ohokaso mai tanui. Oahata, “Yohanis mo, iuna sima-simane wan retuhete ata ne kawasa arihon Anahatana isa man tewa oi. Ne sae waron iasau rerihon Ia onate reini mo, pusire manisata.”

42Sio wason oeuso noi Yesus rei, sio panesi oparisaa tanui.

Currently Selected:

Yohanis 10: ANA

Highlight

Copy