Atata 6

Sio ohiti sio itu na oakahai sio maisosia

1Tau muie rei, sio panesi honu ouna sio mampusua sana ua-ua, sana wanu-wanu. Oyo sio Yahudiu wason oanamana sou Yunani oakarupu rerihoni sio Yahudiu wason oanamana sou Yahudi. Oahata, “Taa osama sio pina uhanu mo, osama ami ma sio pina uhanu tewa.” 2Reiso sio maisosia hutusa rahana ua oanaha runa sio mampusua pusiso, oyo oasau san rei, “Mania kakau, mania waniu. Ami arihoni asima na Anahatana ne anamanaya na asama sio tau muaine, areimo iake tewa. 3Reiso nene iake, omi oroma sio itu rerihoni omi reini. Roma sio wason oanei ata Anahatana Ne Inaha irui kawasa osiso nea. Kahurae oanei sae waron iaka, sae waron iaka tewa. Oyo ami ahitiso na onana tanei rei. 4Ne ami ruama ainisi tau Anahatana runa aunauso tau Anahatana ne anamanaya.”

5Oatinu tau rei iake, reiso onini:

Stefanus. Ia rei, iparisaa mainae. Anahatana Ne Inaha irui kawasa osiki.

Pilipus,

Prokhorus,

Nikanor,

Timon,

Parmenas,

Nikolaus. Ia rerihoni kota Antiokhia. Iamrae, ia Yahudi tewasi, ne inusu Yahudi nea.

6Oyo oautue ituso mai sio maisosia, oyo sio maisosia oainisi tau Anahatana runa oahusieso, nanie ohitiso tau sio makahaia.

7Sio panesi honu oatinu Anahatana ne anamanaya, reiso sio mampusua sui Yerusalem okikasi oasinena rotu-tu sio panesi honu. Sio imam panesi oi oparisaa tau Sou Iake rerihoni Yesus.

Sio ona Yahudiu osota Stefanus

8Stefanus rei, Anahatana irui iake osiki. Irui kawasa osiki, reiso iuna sima-simana waron rasiraso runa sima-simana waron retuhete ata ia ne kawasa on roe Anahatana. Sio panesi onoore. 9Ne sio umau nanie otuntana runai. Sio rei rerihoni numa mananoune osi sio Yahudiu wani sio oaoiki tau numa mananoune osi sio manianeu wason naone rei. Sio rei wason sio Yahudiu on pan nia Kirene runa nia Aleksandria, runa sio on poe otoe Kilikia runa otoe Asia. Reiso sio rei otuntana runai. 10Ne okuai tewa. Tau sae, Anahatana Ne Inaha iunai ianamana ianei sae waron iaka, sae waron iaka tewa. 11Reiso oanamana oauhuni runa sio umau onana anoo. Oawaruso na osima oakarota. Oahata, “Ami atinui irati sohi Musa runa Anahatana.”

12Reiso onana sio rei anoo, oawaruso. Oawaru sio matuhete Musa ne maunauna runa sio ona Yahudi nesia rei oi. Oyo osota Stefanus, samatoro ororiki iamanane sio ona Yahudiu. 13Hoka roe oyo, osupu sio umau osima oakarota runa Stefanus. Oahata, “Ia rei, ianamana kahatene rerihoni Anahatana ne numa mainisie wani monne tau Anahatana wain tanui. Ianamana kahatene rerihoni maunauna waron Musa isupure rerihoni Anahatana oi. 14Ami atinui. Iahata, ‘Yesus mo, ia wain on pan nia Nasaret rei, mka ikuka Anahatana ne numa rei, oyo ipesi pusi re monna rairo waron isupure arihoni Musa.’”

15Sio onata pusiso oroui, oyo onoo uai anoe sani Anahatana ne maisosie on roe noiyaha uai anoe.

Currently Selected:

Atata 6: ANA

Highlight

Copy