Atata 16

Timotius ieu ipusu Paulus runa Silas

1Paulus ieu ikata Silas honu rotu-tu ihokai poe nia Derbe, oyo ieui poe nia Listra. Hoka poe oyo, isupu ia mampusue isa nanai Timotius. Inai, ia Yahudi. Iparisaa tau Yesus nea. Ne amai, ia Yunani. 2Sio wason oparisaa poe Listra runa Ikonium oahata Timotius mo, ia iake. 3Paulus inina na Timotius ieu ikatai, reiso irehiki. Tau sae, sio Yahudiu sui otoe rei oanei ata amai, ia Yunani. Sio oanei ata sio orehiki tewasi. Reiso Paulus irehiki. 4Oeu ohori niana sui otoe Galatia osima osi sio wason oparisaa runa maunauna on roe sio maisosia runa sio onata tau sio wason oparisaa roe kota Yerusalem. Sio oaunauso na opusu maunauna rai. 5Reiso sio wason oparisaa, oparisaa ia-ia. Ranie hatae isa, ereeu mai poua tonu rei sio okikasi oasinena sui osa.

Paulus inoo masasua nau Troas

6Anahatana Ne Inaha isopo na pene Paulus sio oaunauso tau Anahatana ne anamanaya nau otoe Asia. Reiso oeuso ria otoe Prigia runa otoe Galatia. 7Hoka ria haineke nenene wani resama otoe Misia runa otoe Bitinia, oyo nanie onusu otoe Bitinia. Onusu rea, ne Yesus Ne Inaha isoposo honu. 8Reiso oniku Misia, oyo oeuso nau nia Troas. 9Hoka nau oyo, nene pumono pan san rei oyo, Paulus inoo masasua. Inoo ia Makedonia isa iooi hainekei iainisi runa anoi pusiki san rei, “Aeua mai otoe Makedonia na akahaima.” 10Paulus inoo masasua rei, oyo isima osi au, Lukas, runa ne netau tamena. Mata hun tewa oyo, ami autotu apia, nanie aeuma nau Makedonia. Tau sae, ami apamata sou ata Anahatana iaisosima asima runa Sou Iake rerihoni Yesus osi sio nau rei.

Lidia iparisaa tau Yesus ria nia Pilipi

11Ami aeu arihoni nia Troas asaa kapane rotu-tu ahokama nau nusa Samotrake. Hoka nau oyo, hanu san rei ahokama nau nia Neapolis. 12Hoka nau oyo, aeuma ria Pilipi, niane isa ria otoe mataanoe pan Makedonia. Sio Romau sahoro onana kota rei. Ami ararane onona inasa rai. 13Tau ranie hatae wan sio Yahudiu oamuira Anahatana ahokama arihoni niane rei nene mitanunue. Ahokama pan mui, oyo aeuma pan waene nusue. Tau sae, ami ata pan rei mka asupu sio Yahudiu naniao na oainisi tanui. Asupui, oyo ami aru-ruema anamana runa sio pinau wason oamanouso pan rei. 14Ia isa rerihoni sio rei nanai Lidia. Iahen nipa msinaya. Nipaya rai hunonia mainaya. Ne niane wani Tiatira. Ia Yunani ne iainisi iainaa runa Anahatana sani sio Yahudiu. Reiso Anahatana irue anoi na ianei Paulus ne maunauna runa iparisaa. 15Sio osohu Lidia runa sio pusiso wason orue tau ne numa na mansiau oanei ata oarihoni no rosau nea. Oyo iainisi tau ami san rei, “Wea amau, wea hotau. Munata omi oahata titue uparisaa tau Yesus nea, mai, oararanemo mai we numa.” Oyo iapamanuma, reiso ararane tau ne numa rei.

Sio onusu Paulus runa Silas pan pui ria nia Pilipi

16Taue isa ami wani aeuma pan naniama wani amanouma na ainisi, oyo asupu ia pina maniane isa. Ia pina rei, sakahatene rerui kawasa osiki na iuna nau, oyo iasau pan muie mka sapan. Iuna nau, oyo sio wason oaisosiki osupu kepen panesi. 17Ia pina rei ieu ipusu-pusu Paulus runa pusima iaka-akapona, “Sio reino mo, sio wason Anahatana wain ia mainae nai osa ne manorina. Sio wason osima osimo runa sapani na Anahatana iapuheumo na oamahaimo rotu-tu ria supan.”

18Iuna san rei rotu-tu onona ate te nima san rei, oyo Paulus iakapuku. Ikuai iapamese ruai tewa nea. Reiso iuniki, oyo iasau osi sakahatene rei, “Tau Yesus Kristus ne kawasa, au uaisosia na ahokaya arihoni ia pina reini.”

Oyo sira tau rehokai rerihoni ia pina rei. 19Sio wason oaisosiki oanei ata mka sio osupu kepen tewa nea rerihoni ia pina rei. Reiso osota Paulus runa Silas onesa uaso pan niane tihue wani huie na sio onata tau niane rei oasei tanso. 20Orori uaso na oamanane Ia Aia Mainae Roma ne mansia mainaya, oyo oasau, “Mania amau, sio reini mo, sio Yahudiu. Reiso sio wason ouna sio panesi otuntana runa umau mai ita re niane reini. 21Ita wani Ia Aia Mainae Roma ne mansiau. Sio onina na ipusu no monna waron re natu rei isopo na pene iunare.”

22Oyo sio hutue pusiso nanie ohitaso nea. Reiso sio onata oaisosiso okiha uaso no papita, oyo onosure. Onosure oyo, osapu-sapuso tau ai anaya. 23Osapu-sapuso mainae, oyo onususo pan pui. Sio oaisosi ia mamsaka pui na isakaso ia-ia. 24Reiso ia mamsaka pui inususo pan kamar hainau pan pui anoe, oyo ikanihoo aio atua rapanaha hini na pene nisuo.

25Tau saa monon tihu san rei oyo, Paulus runa Silas wason oainisi, wason ohete kapatau oainaa runa Anahatana. Sio tamena wason sio osakaso pan pui oatinu. 26Sira tau isu mainae rotu-tu tuamane wani sio onana pui tanui rekoka. Pui mitanunua pusire rahekaso runa ranteu waron sio okanihooso runare, ranosu pusire. 27Ia mamsaka pui rei imaranae. Imaranae oyo, inoo pui mitanunua raheka pusire. Reiso isaru ne tunue nanie ihunu ruai. Iahata sio pusiso wason isakaso pan pui orumaso nea. Ikaitau mka sio oasau isakaso ia-ia tewa, oyo ohunui. 28Ne Paulus iakapona nioi mainae, “Pene ahunu ruam! Ami pusima ami wani sirinia!”

29Iainisi kamana, oyo irumai pan pui anoe. Ikana-kananunui, oyo iamnohoi mai Paulus runa Silas uaso ua anoa, nanie iainisi sae isa. 30Oyo iautunu uaso ohokaso, oyo iasei, “Wea upu, kahurae au una sae na Anahatana iapuheuku na uamahaiku rotu-tu ria supan?”

31Sio on poe oasau san rei, “Parisaa tau Upuri Yesus Kristus, oyo Anahatana iapuheua. Ano runa sio pusiso wason orueso tau me numa.”

32Oyo sio oatuhete ia mamsaka pui runa sio wason noi ne numa pusiso tau maunauna rerihoni Upuri Yesus. 33Oyo nene pumono pan san rei oyo, ia mamsakae rei iautunu uaso, oyo isohu no apata. Isohu no apata, oyo sio osohuso na mansiau oanei ata oarihoni no rosau nea, ia mamsakae rei runa sio wason noi ne numa pusiso. 34Oyo iautunu uaso roe ne numa nanie ipanaso. Ipanaso oyo, ia runa sio wason noi ne numa pusiso anoo miri-mirika tau sio oparisaa tau Anahatana nea.

35Hanroe tau omnanoe oyo, Ia Aia Mainae Roma ne mansia mainaya oaisosi sio polisiu oeuso pan ia mamsaka pui oaisosiso oasau, “Ahoka sio ua rei.” 36Reiso ia mamsakae isima osi Paulus san rei, “Ia Aia Mainae Roma ne mansia mainaya oaisosima nea na ahokamo. Reiso onunimo. Oeu ia-ia.”

37Ne Paulus iasau osi sio polisiu rei, “Masike sio osupu mani isanae isa tewa iae, Ia Aia Mainae Roma ne mansia mainaya oaisosiso ohitama runa sio pusiso onooi. Masike ami mani kawasa sani Ia Aia Mainae Roma ne mansiau iae, sio ohitama, oyo onusuma pan pui anoe. Ne muie reini mo, sio nanie oaisosima anunima auhunima? Ami apenema. Aisosi sio mainaya rei ruao ohokaso na oautunuma ahokama.”

38Sio polisiu oeu osima runa anamanaya rai osi sio mainaya. Sio mainaya oatinu ata Paulus runa Silas sani Ia Aia Mainae Roma ne mansiau, oyo okaitau hun ruao. 39Reiso oeuso pan pui rei oripa koku tau uaso. Oyo oautunso ohokaso rerihoni pui anoe rei oai-ainisi na sio oeu oarihoni kota rei. 40Uaso ohoka rerihoni pui anoe rei, oyo oeuso pan Lidia ne numa. Hoka pan oyo, oamanouso runa sio wason oparisaa pusiso. Oakahaiso tau no maunauna, oyo oeu oarihoni niane rei.

Currently Selected:

Atata 16: ANA

Highlight

Copy