Cong-Mengh Waac 26
26
1Ceng mienh hngongx mienh se maiv puix,
hnangv nqaai gorng duih sorng,
fai siou gaeng-zuangx nyei ziangh hoc duih mbiungc.
2Zioux mienh yaac maiv maaih gorn-baengx yaac zioux maiv zuqc,
hnangv norqc meix fai norqc mba'hinx ndaix mingh ndaix daaih yaac maiv nzopc nor.
3Biaav-bin longc mborqv maaz, hanh kouv fapv lorh nyei nzuih baengx,
biaav longc mborqv mienh hngongx mienh nyei diqc daanz.
4Maiv dungx dau mienh hngongx mienh ziux ninh hngongx nyei waac,
nziex meih ganh ziouc caux ninh fih hnangv.
5Oix zuqc dau mienh hngongx mienh ziux ninh hngongx nyei waac,
nziex ei ninh nyei m'zing mangc, ninh funx ninh ganh maaih cong-mengh.
6Haaix dauh bangc mienh hngongx mienh fungx fienx,
se hnangv hngaqv ganh nyei zaux ndutv ziouc hoic ganh.#26:6 Faan zaqc Hipv^lu waac gorngv hopv doqc nyei sic.
7Cong-mengh waac yiem mienh hngongx mienh nyei nzuih se maiv lamh longc,
hnangv zaux mbai mienh nyei zaux maiv lamh longc.#26:7 Fai “zaux kungx ndiux jienv hnangv”.
8Ceng mienh hngongx mienh
se hnangv zorqv la'bieiv hietv jienv ndopv-hlaang.#26:8 Beiv mangc Domh Jien 20:16.
9Cong-mengh waac yiem mienh hngongx mienh nyei nzuih,
hnangv njimv yiem diuv nquin mienh nyei buoz.
10Haaix dauh cingv jiex jauv nyei mienh hngongx mienh fai diuv nquin mienh,
se hnangv buonv juang-zinx nyei mienh la'guaih buonv bun zuangx mienh zuqc mun.#26:10 Naaiv yiemc Hipv^lu waac se maiv mengh.
11Mienh hngongx mienh zoux hngongx nyei sic, zoux liuz aengx zoux,
se hnangv juv nzuonx mingh nyanc ninh lov nyei ga'naaiv.#2 Bide 2:22
12Meih buatc mienh funx ninh ganh maaih cong-mengh fai?
Mienh hngongx mienh zungv maaih lamh hnamv gauh camv ninh.
13Mienh lueic mienh gorngv, “Maaih sienh yiem wuov jauv!
Maaih dauh sienh yiem wuov jaai-horngc.”
14Gaengh naapc hnangv haaix nor bun gaengh koi mingh koi daaih,
mienh lueic mienh bueix jienv coux hnangv wuov nor mbienv mingh mbienv daaih.
15Mienh lueic mienh nyei buoz dapv bieqc nzormc,
bouh faaux ganh nyei nzuih ninh zungv nqemh kouv haic.
16Mienh lueic mienh ziux ganh nyei m'zing mangc ninh maaih cong-mengh,
gauh camv siec dauh dau duqv horpc nyei mienh.
17Mienh nzaeng jaax nyei sic maiv guen zuqc mbuo, mbuo yaac mingh la'nyauv,
se hnangv juv jiex jauv, mienh la'guaih baeng juv nyei m'normh.
18-19Haaix dauh nduov ninh nyei juangc laangz mienh
yaac gorngv, “Yie gorngv a'nziaauc hnangv lorqc!”
Ninh se hnangv butv-ndin mienh
zoi douz-baav caux forng-cang,
caux bun mienh zuqc daic nyei ga'naaiv.
20Maiv maaih zaangh, douz ziouc daic mi'aqv.
Haaix ndau maiv maaih mienh gorngv waac-sapv waac-huv,
nzaeng jaax nyei jauv ziouc dingh aqv.
21Nzaeng jaax nyei mienh nzaeng jaax bun sic cuotv,
hnangv douz-taanx jaa jienv douz
caux zaangh dapv jienv zieqc jienv douz nyei douz-nzauc.
22Gorngv waac-sapv daanh mienh nyei waac,
se hnangv duqv nyanc aax kuv nyei ga'naaiv,
naqv njiec taux ga'sie.
23Nzuih gaam hnyouv ciouv,
se hnangv nie-mor nzaatv jienv liuc#26:23 Hipv^lu waac gorngv “nyaanh nqaiv”. nor.
24Mienh nzorng mienh yaac longc nzuih ganh nyungc gorngv.
Yiem hnyouv ninh kungx nduov mienh hnangv.
25Ninh gorngv kuh muangx nyei waac meih maiv dungx sienx ninh,
weic zuqc yiem ninh nyei hnyouv maaih siec nyungc#26:25 Hipv^lu waac gorngv siec nyungc mv baac eix leiz se maiv maaih soux mouc. gamh nziev nyei sic.
26Maiv gunv ninh longc guv guaix nyei za'eix buang jienv ninh nzaeng nyei jauv,
ninh nyei orqv sic oix yiem mienh camv gapv zunv nyei dorngx cuotv daaih.
27Haaix dauh wetv kuotv, ganh ziouc ndortv bieqc kuotv gu'nyuoz.
Haaix dauh fongv la'bieiv, la'bieiv aengx oix daaux nqaang ndapv ninh.
28Mienh nyei nzuih gorngv-baeqc hoic ninh nzorng nyei mienh.
Longc nzuih la'guaih ceng mienh yaac baaic waaic mienh.
Currently Selected:
Cong-Mengh Waac 26: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.
