ԱՌԱԿՆԵՐ 18
18
1Մեկուսացած մարդն իր փափագն է որոնում, ընդդիմանում է#18.1 Բռց. Բորբոքվում է։ ամեն ողջամտության։
2Անմիտը խոհեմությունից հաճույք չի ստանում, այլ իր սրտի մեջ եղածն է արտահայտում։
3Անիրավության գալու ժամանակ անարգանքն էլ կգա, իսկ նախատինքի հետ՝ խայտառակությունը։
4Մարդու բերանի խոսքերը խոր ջրեր են, իմաստության աղբյուրը առատաբուխ վտակ է։
5 Հօգուտ անիրավի կողմնապահություն անելը լավ չէ, ոչ էլ արդարին իրավունքից զրկելը#18.5 Բռց. ծռելը։։
6Անմիտի շրթունքները կռվի մեջ կմտնեն, և նրա բերանը ծե՜ծ է կանչում։
7Անմիտի բերանը նրա կործանումն է, իսկ նրա շրթունքները՝ որոգայթ իր անձի համար։
8Քսու մարդկանց խոսքերը քաղցր պատառների նման են. նրանք իջնում են մարմնի խորքերը#18.8 Շտեմարանները, որովայնը։։
9Ով իր գործի մեջ թույլ է, կործանողի եղբայրն է։
10Տիրոջ անունն ամուր աշտարակ է. արդարը վազում է այնտեղ և ապաստան գտնում։
11Հարուստի ունեցվածքն իր ամուր բերդաքաղաքն է և նրա երևակայության մեջ բարձր պարսպի նման է։
12Մարդու սիրտը հպարտանում է իր կործանումից առաջ, բայց խոնարհությունը փառքից առաջ է գնում։
13Ով խոսքին պատասխանում է նախքան լսելը, դա նրա համար հիմարություն և նախատինք է։
14Մարդու հոգին հիվանդության պահին նեցուկ է լինում նրան, բայց կոտրված հոգին ո՞վ կարող է մխիթարել։
15Ողջախոհ միտքը գիտություն է ստանում, իսկ իմաստունների ականջը գիտություն է որոնում։
16Մարդու ընծան տեղ է բացում նրա համար և նրան մեծամեծերի առաջ է տանում։
17 Իր դատն առաջինը ներկայացնողը արդար է երևում, մինչև գալիս է հակառակորդը և քննում նրան։
18Վիճակը դադարեցնում է կռիվները և բաժանում զորավոր հակամարտողներին։
19Դառնացած եղբայրն ամուր քաղաքից անառիկ է, և կռիվները բերդի նիգերի նման են։
20Մարդու բերանի պտղից նրա փորը կկշտանա. նա կհագենա իր շրթունքների արդյունքից։
21Մահն ու կյանքը լեզվի ձեռքին են, և նրան սիրողները կուտեն նրա պտուղը։
22 Առաքինի կին գտնողը բարիք է գտել և Տիրոջից բարեհաճություն ստացել։
23Աղքատն աղաչանքներով է խոսում, բայց հարուստը պատասխանում է խստությամբ։
24Ընկերներ կան, որոնք կործանում են բերում,#18.24 Կամ Շատ ընկերներ ունեցողը կկործանվի։ բայց ընկեր կա, որ եղբորից ավելի հավատարիմ է։
Currently Selected:
ԱՌԱԿՆԵՐ 18: ՆՎԱԱ
Highlight
Share
Copy
Want to have your highlights saved across all your devices? Sign up or sign in
© Bible Society in Armenia, 2018
