ᒪrᐠ 16
16
ᒡᕮᙎᐢᒡᕍ ᑫᓀᕠ ᐁᘛᕦᐃᕠ ᒪᒡᕮ᙮
1ᐠᐤᐊ ᒣᓀjᐃᒡᕠ dᒃᐃᓀᐁ ᑲᐤᐅᐦᒡᒃuᒡ ᘚ, ᒪry ᒪᑊᑕᕃᓀ, ᑲᐦᗱ ᒪry jᐊᒣᐢ ᒪ ᑲᐦᗱ ᐢᐊᕊᒣ, ᐊᕦᑊᗃᑊᗁᕍ ᔪ ᓇᕤᓀᒡᕮ ᘛᐦᐠᕊᒡᕠ, ᐠᐤᐊ ᔪᐦᗰᑊᗃᕦᕞl ᐊᕞ ᔪ ᐃᕫ ᑭᔪᐦᐠᕊᑯᐅᐦ᙮ 2ᐠᐤᐊ ᐅ-ᐅᗰ ᕮᘛ ᕮᒡᕄᐣᑐ ᐅᕄ ᕮᘛ dᒃᐃᓀᐁ, ᑯᐅᐦᓂᐅᓂᒃuᕤᐦ ᓇᕠᓀ ᐠᐤᐊ ᐅᘚᑊᗃᕞᐢᕞᒡl ᐢᐊ ᓂᐃᔭ ᘚ᙮ 3ᐠᐤᐊ ᕤᐤᐁ ᐦᕍᑊᗃᕦᕠ, ᒣᐊ ᒡᐢᔦ ᔪᑊᗃᐃl ᐊᐅᐣᕞ ᓇᕠᓀ ᐠᐤᐊ ᕤᐢᒡᕍ ᐅᘚ? 4ᐠᐤᐊ ᑯᐅ ᐅᑲᕮᓀᐦᒡᕮᗰ, ᐅᑊᗃ-ᐃᐦ ᒡᐢᔦ ᐊᗱᐦᗰ ᓂᗱᓂᕮᐃᕊ: ᐅ-ᐅᗰ ᑊᗁᐣᗴᐃ ᐃᕫ᙮ 5ᐠᐤᐊ ᐠᐤᐁᑊᗃᑊᗁᐣᕞᒡᕊᐅᐦ ᓇᕠᓀ ᐠᐤᐊ ᐅᕦ, ᑭᔭ-ᐃᐦ ᐁᐦᕍᐃᕠ uᐢᑵ ᓄᐅᐦᕠᗰᐣᕞ ᗰᓯᐣᗰ ᐢᐊᕦ, ᕦᐢᐊᕦ ᓇᕞᓱᐦ ᒪᑫᐢᕤᐁ ᕦᑯᕊᐅᐦ: ᐠᐤᐊ ᐅᓂᑊᗃᓂᐣᕞᒡl᙮ 6ᐠᐤᐊ ᕤᐤᐁ ᔦᐦᕠ, ᐊᕤ ᐅᓂᑊᗃᐦᕞl: ᒥᐣᐠᕮᓇᒡᕮ ᙏᓭᐢ ᓇᒃᐊrᐁᒡᐦ ᐅᘚ ᕦᕞᒃuᒡᕠ, ᖉᓂᐃ ᓂᗴᓂᐦᒡᔨᐃᐃ: ᘚᕠᑫ ᑊᗁᐣᕦ-ᐃᐦ; ᐊᕤ ᗱᑌ ᐊᕄ: ᓀᐊ ᓂᑊᗃᓂᐦᒡᔨᐣᕠᐃᐃ᙮ 7ᐊᐦᐤᐅᕃ ᐅᕦᐦᕦᐦ, ᔭᐅᕦᕠᐨᓀ ᕦᕦᐦᕠᐦ ᐯᕞr ᗱ ᓇᑊᗃᑊᗃᑌᐢᕮ ᗃᕄᕃᐁ ᘚ: ᐊᔨᕠ ᐤᐊᕬᐃᐃᐢᓯ, ᓇᑊᗃᕦᕩᑫᕫ᙮ 8ᐠᐤᐊ ᐠᐤᐁᕞ ᐠᕭᐅᑊᗃᕦᐢᕞᒡl, ᑲᐦᗱ ᓇᕠᓀ ᐠᐤᐊ ᐅᘚ ᘚᐣᕞᐢᕞᒡl; ᔭᑊᗃᕠᕊᐣᕊᐣ ᐃᕫ ᑲᐦᗱ ᐠᕮᐅᑊᗃᕄ ᐃᕫ: ᑲᐦᗱ ᐊᕤᕄᓀ ᐊᕤᕍ ᑫᕫ ᐊᑭᔦᐦᕠ; ᐅᓂᑊᗃᓂᐣᕞᒡᕊᐣ ᐃᕫ᙮
9ᑯᐅᕤ ᙏᓭᐢ ᓂᐃᔭᐃᐃ ᐠᐤᐁᕞ ᕮᘛ dᒃᐃᓀ ᘚᐤᐊᘛlᐦu, ᕮᘛ ᔪᐦᓂᔭ ᒪry ᒪᑊᑕᕃᓀ, ᐊᔨ ᕦᔭᗰ ᐊᘚᐣᑌ ᒣᘛᕄᕬ ᔭᒃᐃ ᐅᘚ ᕮᔭᕞᕮ-ᐃᐃ᙮ 10ᐠᐤᐊ ᔭᕦᕠᕊᐣ ᐊᔨᓀ ᔦᐦᑿᕞᐦᗰᐃᓀ, ᒡᓴᑵ ᐊᕤ ᔭᑊᗁᕦ ᒃᐊᐦᒡᕮ ᑲᐦᗱ ᑊᐦuᘔᑯᐅᐦ᙮ 11ᐅᐦ ᐊᕮᕦᓀ, ᐅᑊᗃᕠᒡᓴᐠ ᘚ ᑊᗃᕦ, ᑲᐦᗱ ᔭ-ᐃᕊᐣ ᐊᕤ ᐊ ᑯᐅᑊᗃᕠ᙮
12ᐊᔨ ᑫᐦ ᔪᐦᓂᔭ ᐊᗱ ᐊᑫᕫ ᐅᐣᑫᕞ ᐊᑊᗃᕦᓀ ᐃᕫ, ᑊᗃᕦᐃᐦᕊ ᒃᐊᐦᒡᕮ, ᐊᗱ ᕠᑫ ᘚ ᐅᘚᑊᗃᕦᐃᐦᕊ᙮ 13ᐠᐤᐊ ᑭᕦᕠ ᐊᗱᓀ: ᑲᐦᗱ ᐊᒪ ᑭᔦᐦᕠ ᐊᔨᓀ᙮
14ᐊᕞᗰ ᔪᐦᓂᔭ ᑫᓀᕠ ᐁᐦᕍᐃᕠ ᒪᒡᕮ ᐊᕄᓀ ᑊᗁᐢᑵ ᐁᑊᗀᐦᕦ ᐅᕞ, ᐠᐤᐊ ᔭᗰᐅᕦᕞᐨ ᒪjᐃᐦ ᐅᐣᕤᐁᐃ ᐠᕮ ᑲᐦᗱ ᔭdᒃᔦ ᓇᒡᓴᒡᕠ ᐠᕮ, ᐊᕤ ᐊ ᑭᔪᕠ ᐃᕫ ᐊᔨ ᔭᑫᐦᒡᕮᐃᐃ ᘚᕠᑫ ᓀᐢᕦ᙮ 15ᐠᐤᐊ ᕤᐤᐁ ᔦᐦᕠ, ᐅᘚᕦᐦᕞl ᕠᑫ ᐅᑫᕫ, ᑲᐦᗱ ᒪᕦᕦᐦᕠ ᐅᕠᐨ ᐅᗱ ᐊᓀᕞ ᕦᓀ᙮ 16ᐊᔨ ᐊ ᑯᐅᕞᕠ ᑲᐦᗱ ᕤᒪᑫᗴᑊᗁᐣᖇᕠ ᓇᗴᐤᐅᐦᕞᒃᐃ; ᐊᐦᐤᐅᕃ ᔭᑊᗁ ᐊᕤ ᐊ ᑯᐅᕞᕠ ᗴᐦᕦ ᗱᕃᐁᓯ᙮ 17ᑲᐦᗱ ᕠᑎ ᔭᗴᓇᕮᐃ ᔭᑫᐦ ᐅᕤᐦᓯᕦᐢᓯ ᐊᔨᓀ ᐊ ᑯᐅᕠᓀ; ᓯᐣᑎᒃᐃ ᐃᕫ ᑫᐦᗰ ᑊᗃᑭᕤᕃᕍᐢᓯ ᐊᘚᐣᑌ ᒣᘛᕄᕬ; ᐅᑊᗃᕤᕞᐦᗴᐢᓯ ᐊᘕᐅᑎ ᑯᐅᐣᑎ ᐃᕫ; 18ᓄᐅᕤᒃᐁ ᓂᑊᗃᕤᐦᕞᕍᐢᓯ; ᐅᕄᕦ ᕤᑊᗃᕤ ᐊᕞ ᗱ ᐊᒃᐁᘛ ᐊᕬ, ᐊᕤ ᑯᐅᕤᐦᕠᕮᐢᓯ; ᑭᑲᕤᕠᐊᐢᓯ ᔭᕠᕠᐦᓀ, ᐠᐤᐊ ᐅᗱ ᓇᑭᔭᐅᐦᕞᐃᐢᓯ᙮
19ᐠᐤᐊ ᓇᑊᗃᑊᗃᕦᐃ ᐢᐊᑵᑌᓴᕤᐦ, ᔭᕦᐃ ᐅᘚ ᓂᗴᕠᐦᒡᔨ, ᑲᐦᗱ ᐢᐊᕦ-ᐃᐦ ᓇᑊᗃ ᒡᕮ ᓄᐅᐦᕠᗰᐣᕞ᙮ 20ᐊᐦᐤᐅᕃ ᐊᗱᑊᗃᕞᐢᕞᒡl, ᕠᑫ ᐅᑫᕫ ᕦᓀ ᗰᐤᐅᑊᗃᕠᕬ ᐃᕫ, ᓇᑊᗃᑊᗃᕦᐃ ᑲᐦᑫᐅᑊᗃᕠᐦᗱᐅ, ᑲᐦᗱ ᐢᐊ ᓇᒡᓴᒡ ᐅᕍ ᑲᐅᘕᐅᕄ ᗱ ᐃᐣᒡᕮᓂᐣᐠᕬ᙮ ᐊᒣᐣ᙮
Currently Selected:
ᒪrᐠ 16: BE86SY
Highlight
Share
Copy
Want to have your highlights saved across all your devices? Sign up or sign in
first published by the Society for Promoting Christian Knowledge (SPCK), 1886.
