Johani 14

Ɨnjɨla jaa kʉbʉʉka kwa Kyala

1Jesu alɨnkwendelela ʉkʉbamanyisya alɨnkʉtɨ, “Mulɨngalalamukaga mu ndumbula syɨnu, mummwitɨkege Kyala, kangɨ muunyiitɨkege na niine. 2Ʉbʉjo bʉlimo bwingi mu nyumba jaa Taata. Lɨnga sikaalɨ bo ʉlo, ngalɨ mbabʉʉlile. Lɨɨlɨno nsumwike kʉkʉbatendekekesya ʉbʉjo.#14:2 Lɨnga sikaalɨ bo ʉlo, ngalɨ mbabʉʉlile. Lɨɨlɨno nsumwike kʉkʉbatendekekesya ʉbʉjo Mwa baakalata bamo basimbile Lɨnga sikaalɨ bo ʉlo, bʉle ngalɨ mbabʉʉlile ʉkʉtɨ nsumwike kʉkʉbatendekekesya ʉbʉjo? 3Bo mbʉʉkile nʉ kʉbatendekekesya ʉbʉjo, angwisa kangɨ kʉkʉbeega, ʉkʉtɨ ʉbʉjo ʉbʉ ngʉjangapo, na nuumwe mukʉjaga palapala pamopeene na niine. 4Ʉmwe mujɨmeenye ɨnjɨla ɨjɨ jikʉbalongosya kʉbʉjo kʉno ngʉbʉʉka.”

5Po Tomasi alɨnkʉnndaalʉʉsya Jesu alɨnkʉtɨ, “Gwe Ntwa, ʉswe tʉkakʉmanya kʉno kʉbʉʉka. Bʉle, po tʉbagiile ʉkʉjɨmanya ɨnjɨla bʉleebʉle?” 6Jesu alɨnkwamula alɨnkʉtɨ, “Ʉne ne njɨla, ne bwanalooli, kangɨ ne bʉʉmi. Akajako ʉmundʉ gwesa ʉjʉ abagiile ʉkwisa kwa Taata lɨnga akendela kʉmyangʉ. 7Lɨnga mwalɨɨmeenye, po ngalɨ mummeenye joope Taata. Ʉkwandɨla ʉlʉ, mummeenye, kangɨ mummbwene.”

8Po Filipo alɨnkʉmmbʉʉla alɨnkʉtɨ, “Gwe Ntwa, tukʉkʉsʉʉma ʉtʉnangɨsye Taata. Lɨnga ʉtʉnangiisye bo sitʉfwene.” 9Jesu alɨnkʉmmwamula alɨnkʉtɨ, “Filipo, ndɨ na nuumwe akabalɨlo akatali koosa aka, poope ʉkaalɨ ʉkaamanya ʉne? Ʉmundʉ gwesa ʉjʉ aambwene ʉne, ammbwene na Taata. Po fiki kʉʉndaalʉʉsya ʉkʉtɨ, ‘Tʉnangɨsye Taata?’ 10Bʉle, ʉtikwitɨka ʉkʉtɨ ʉne ndɨ mwa Taata, na Taata alɨ mmyangʉ? Amasyʉ aga ngʉbabʉʉla gatikʉfuma mu nyiinogono syangʉ, looli Taata ikʉbomba ɨmbombo jaake bo alɨ nkatɨ mmyangʉ. 11Mwitɨkege ɨsi ngʉjoba ʉkʉtɨ ndɨ nkatɨ mwa Taata, nʉ kʉtɨ alɨ nkatɨ mmyangʉ. Looli lɨnga ʉmwe mutikwitɨka ɨsi ngʉjoba, po namwitɨkege kʉnongwa jaa mbombo ɨsi ngʉbomba. 12Nalooli nikʉbabʉʉla, ʉmundʉ gwesa ʉjʉ ikʉʉnyiitɨka, ikʉsibombaga ɨmbombo silasila ɨsi ʉne ngʉsibomba. Kangɨ aikʉbombaga nɨ nywamu ʉkʉkɨnda ɨsi ngʉbomba, paapo ngʉbʉʉka kwa Taata. 13Lɨnga mukʉsʉʉma akandʉ kokoosa mu ngamu jangʉ, ʉne angʉbomba bo muno mukʉsʉʉmɨla. Kʉ njɨla ɨjo, ngʉnangɨsya ʉbʉsisya bwa Taata muno bʉjɨɨliile. 14Lɨnga mukʉʉsʉʉma akandʉ kokoosa mu ngamu jangʉ, angʉbomba bo muno mukʉsʉʉmɨla.”

Jesu ikʉjoba ɨsya kwisa kwa Mbepo Mwikemo

15“Lɨnga muunganile mukʉsibombaga ɨmbombo syosa ɨsi naabalagiile. 16Po na niine angʉnsʉʉma Taata ʉkʉtɨ abape ʉNjɨɨli#14:16 ɄNjɨɨli Kokʉtɨ ɄNtʉʉli. Bala iisyʉ ɄNjɨɨli kʉ Ɨsyakʉlɨngaania. ʉjʉngɨ, ʉkʉtɨ ajege pamopeene na nuumwe, kangɨ atiisakʉbaleka sikʉ. 17Mbepo ʉjʉ aikʉbasetʉlɨla abandʉ ʉbwanalooli. Abandʉ aba bikʉnkaana Kyala bakabagɨla ʉkʉmmwambɨlɨla Mbepo ʉjo, paapo batikʉmmbona, kangɨ bakammanya. Looli ʉmwe mummeenye Mbepo gwa Kyala paapo ikʉtʉʉgala pamopeene na nuumwe, kangɨ ikʉjaga nkatɨ mmyɨnu.

18“Ndikʉbaleka mwibeene bo ʉlwa bapɨɨna, looli angwisa kangɨ kʉmyɨnu. 19Pasyele panandɨ andikʉbonekaga kangɨ pakiisʉ apa. Looli ʉmwe aamukʉʉmbona. Kʉnongwa jaa kʉtɨ ʉne angʉja mʉʉmi, nuumwe aamukʉja bʉʉmi. 20Pi isikʉ lɨla, aamukʉmanya ʉkʉtɨ ʉne ndɨ nkatɨ mwa Taata, na nuumwe mulɨ nkatɨ mmyangʉ, niine ndɨ nkatɨ mmyɨnu. 21Ʉmundʉ gwesa ʉjʉ ikʉsimanya nʉ kʉsibomba ɨsi ngʉlagɨla, ʉjo jo ʉjʉ aanganile. Joope ʉmundʉ ʉjʉ aanganile, Taata ikʉnngana. Niine ngʉnngana nʉ kwibonesya kʉmyake.”

22Po ʉmfundigwa jʉmo ɨngamu jaake Juuta, ʉjʉ akaja jo Juuta Isikalyoti, alɨnkʉnndaalʉʉsya Jesu alɨnkʉtɨ, “Gwe Ntwa, bʉle, sibagiile bʉleebʉle ʉkwibonesya kʉmyɨtʉ, looli ʉtikwibonesya kʉ bandʉ abangɨ boosa?” 23Jesu alɨnkʉmmwamula alɨnkʉtɨ, “Ʉmundʉ gwesa ʉjʉ aanganile ikʉsibombelaga ɨsi ngʉnndagɨla. Bʉbʉʉbo Taata ikʉnngana, kangɨ ʉne na Taata aatukwisa kʉmyake, nʉ kʉtʉʉgala pamopeene nagwe. 24Looli ʉmundʉ gwesa ʉjʉ akaangana, atikʉsibombela ɨsi ngʉnndagɨla. Kangɨ, ɨsi ngʉbalagɨla sikaja syangʉ, looli sikʉfuma kʉlɨ ʉjʉ andʉmile kʉmyɨnu.

25“Mbabʉʉlile syosa ɨsyo bo ngaalɨ ngʉtʉʉgala pamopeene na nuumwe. 26Looli ʉNjɨɨli ʉjo, kokʉtɨ Mbepo Mwikemo, ʉjʉ Taata ikʉntʉma kʉmyɨnu mu ngamu jangʉ, jo ʉjʉ aikʉbamanyisyaga nʉ kʉbakʉmbʉsya syosa ɨsi naababʉʉlile. 27Bo ngʉsookapo, ngʉbapa ʉlʉtengaano lwangʉ. Ngʉbapapo ʉlʉtengaano ʉlʉ lʉkaja bo ʉlʉ lukʉfuma kʉ bandʉ aba bikʉnkaana Kyala. Mulɨngalalamukaga mu ndumbula syɨnu, kangɨ mulɨngatiilaga syosyosa. 28Mupɨliike ɨsi mbabʉʉlile ʉkʉtɨ, ‘Ngʉbʉʉka, looli angwisa kangɨ kʉmyɨnu.’ Lɨnga nalooli muunganile, ngalɨ mukʉhoboka ʉkʉpɨlɨka ʉkʉtɨ ngʉbʉʉka kwa Taata, paapo Taata jo nkʉlʉmba ʉkʉngɨnda ʉne.

29“Mbabʉʉlile syosa ɨsyo akabalɨlo aka, bo ɨnongwa ɨsyo sikaalɨ ʉkʉboneka, ʉkʉtɨ bo siboniike mukʉʉnyiitɨkaga. 30Ngabagɨla ʉkʉjoba na nuumwe akabalɨlo akatali, paapo ʉndagɨli gwa pakiisʉ apa, kokʉtɨ Seetano, ikwisa. Looli akaja na maka kʉmyangʉ. 31Ɨsi ngʉsibomba syo ɨsi Taata aalɨɨndagiile ʉkʉbomba, ʉkʉtɨ abandʉ boosa bamanye ʉkʉtɨ nʉnnganile. Ʉlʉ, namwɨme ʉkʉtɨ tʉsookepo apa.”

Currently Selected:

Johani 14: NYAK

Highlight

Copy