Marko 9

1Nɛ e de mɛ ke: “Niinɛ i ngɛ nyɛ dee ke: Ni komɛ ngɛ nihi nɛ daa si ngɛ hiɛ ɔ nɛ ɔ a kpɛti nɛ a be gboe kɛ yaa su be nɛ a maa na Mawu matsɛ yemi ɔ kaa e ba ngɛ he wami mi.”

Yesu nɔmlɔ tso su tsake

(Mateo 17.1-13; Luka 9.28-36)

2Ligbi ekpa se ɔ, Yesu ngɔ Petro kɛ Yakobo kɛ Yohane pɛ, nɛ e kɛ mɛ ya yoku nɛ ya hiɔwe ko nɔ. Nɛ benɛ a ngɛ hyɛe ɔ, e nɔmlɔ tso su tsake ngɛ a hɛ mi. 3Nɛ e tade ɔmɛ kpɛ nɛ a hiɛ futafuta bɔ nɛ nihi a he fɔlɔ ko be zugba nɛ ɔ nɔ nɛ ma nyɛ ma ha a hiɛ ja. 4Nɛ Elia kɛ Mose je a he kpo tsɔɔ mɛ nɛ a kɛ Yesu ngɛ munyu tue. 5Nɛ Petro de Yesu ke: “Rabi (Tsɔɔlɔ), e hi kaa waa hi hiɛ ɔ, nɛ nyɛ ha waa ma bo tsuhi etɛ, o nɔ kake, kɛ Mose nɔ kake, kɛ Elia nɔ kake.” 6Se e li nɔ nɛ e ngɛ dee ɔ, ejakaa a he mi po. 7Nɛ bɔku ko ba ha a nɔ, nɛ gbi ko je bɔku ɔ mi de ke: “Nɔ nɛ ɔ ji ye suɔmi bi ɔ nɛ, nyɛɛ bu lɛ tue!” 8Nɛ amlɔ ɔ, benɛ a hyɛ a he kɛ kpe ɔ, a nɛ nɔ ko nɔ ko hu ja Yesu kɛ mɛ kɛkɛ.

9Nɛ benɛ a ngɛ yoku ɔ kplee ɔ, Yesu wo mɛ si veveeve ke: “Nyɛ ko sɛɛ nihi nɛ nyɛ na a ngɔ ha nɔ ko, ja Nɔmlɔ Bi ɔ te si kɛ je gbeje lolo.” 10A ngɔ munyu nɛ ɔmɛ ngɔ to a yi mi, nɛ a bi a he ke: “Kɛ ji si temi kɛ gbeje jemi nɛ ɔ sisi kɛɛ?” 11Nɛ a bi Yesu ke: “Kɛ pee kɛɛ nɛ mlaa tsɔɔli ɔmɛ deɔ ke ja Elia ba lolo ɔ?” 12E ha mɛ heto ke: “Elia maa ba lolo niinɛ nɛ e ba to nihi kulaa blɔ nɔ ekohu. Se kɛ pee kɛɛ nɛ a ngma ngɛ Nɔmlɔ Bi ɔ he ke e maa na amanehlu babauu, nɛ a maa ngɔ lɛ kaa ma gɔlɔ ɔ? 13Se yi ngɛ nyɛ dee ke: Elia ba momo nɛ a pee lɛ nɔ tsuaa nɔ nɛ a suɔ kaa bɔ nɛ a ngma ngɛ e he ɔ.”

Yesu tsa jokuɛ nyumu ko nɛ mumi yayami ngɛ e mi

(Mateo 17.14-21; Luka 9.37-43)

14Benɛ a ba su e kaseli ɔmɛ a ngɔ ɔ, a na nihi fuu nɛ bu a he kɛ mlaa tsɔɔli ɔmɛ nɛ a ngɛ a he ni bie, 15Amlɔ nɛ asafo ɔ tsuo na Yesu ɔ, e pee mɛ nyakpɛ, nɛ a sa fo kɛ ba e ngɔ ba fɔ lɛ. 16Nɛ e bi e kaseli ɔmɛ ke: “Mɛni nyɛ ngɛ mɛ bie ɔ?” 17Nɛ ni ɔmɛ a ti nɔ kake he nɔ nɛ e de ke: “Tsɔɔlɔ, i kɛ ye binyumu nɛ mumi nɛ tu we munyu ngɛ e mi ba o ngɔ. 18He tsuaa he nɛ e maa nu lɛ ngɛ ɔ, e tsɛɛ lɛ fiaa si nɛ e nya fiaa hwɔli, nɛ e kpeɔ e lungu nya, nɛ e fiaa. I de o kaseli ɔmɛ nɛ a hia lɛ ɔ, a nyɛ we.” 19Yesu ha mɛ heto ke: “Oo yi nɔ bi nɛ he we yi! Mɛni be i kɛ nyɛ maa hi si kɛ ya su? Mɛni be ma to ye tsui si ha nyɛ kɛ ya su? Nyɛɛ ngɔ jokuɛ nyumu ɔ kɛ ba ye ngɔ.” 20Nɛ a kɛ lɛ ba e ngɔ. Nɛ benɛ mumi ɔ na Yesu ɔ, amlɔ ɔ e ha jokuɛ ɔ hua gɛgɛnii, nɛ e nɔ si, nɛ e longo si, nɛ e nya fia hwɔli. 21Yesu bi e tsɛ ɔ ke: “Mɛni be enɛ ɔ bɔni lɛ peemi?” Nɛ e de lɛ ke: “Kɛ je e jokuɛ mi lokoo. 22Bɔɔ kɛ bɔɔ e sakee lɛ fɔɔ la mi kɛ nyu mi konɛ e tane e yi. Se ke o ma nyɛ he nɔ́ ko pee ɔ, o muklii mi nɛ sa mo ngɛ wa he, nɛ o pee he nɔ́ ko ha wɔ.” 23Yesu de lɛ ke: “O ngɛ dee ke: ‘Ke o ma nyɛ!’ A ma nyɛ maa pee nihi tsuo ha nɔ nɛ heɔ yeɔ ɔ! 24Nɛ amlɔ ɔ jokuɛ ɔ tsɛ ɔ ke kɛ e hɛ mi vo nyu, nɛ e de ke: “I heɔ yeɔ; piɛ ye hemi kɛ yemi nɛ pi ɔ he!”

25Se benɛ Yesu na kaa asafo ɔ wo fo kɛ ma e ngɔ ɔ, e ke mumi ɔ yi nɛ e de lɛ ke: “Mo amuɛti kɛ tuekpoku mumi, i ngɛ mo fae ke: Jee e mi nɛ o ko sɛ e mi hu!” 26Nɛ mumi ɔ kpa ngmlaa nɛ e ha jokuɛ ɔ hua gɛgɛnii, nɛ e je e mi; nɛ jokuɛ ɔ plɛ kaa nɔ gbogboe bɔ nɛ nihi fuu de ke e gbo. 27Se Yesu nu e nine si, nɛ e wo e nɔ, nɛ e te si da si.

28Nɛ benɛ Yesu ba we mi ɔ, e kaseli ɔmɛ bi lɛ ngɛ se ke: “Mɛni he je nɛ wɔɔ lɛɛ wa nyɛ we mumi ɔ nɛ waa hia a?” 29Nɛ e de mɛ ke: “Kikɛmɛ a henɔ nɛ ɔ ɔ, a nyɛ we lɛ hiami ngɛ nɔ́ ko nɔ́ ko nya, kaa ja ngɛ sɔlemi nya kɛkɛ.

Yesu tu e gbenɔ he munyu ekohu

(Mateo 17.22-23; Luka 9.43-45)

30A je lejɛ ɔ nɛ a ya gu Galilea, nɛ e sume kaa nɔ ko leɔ, 31ejakaa e ngɛ e kaseli ɔmɛ ni tsɔɔe. E de mɛ ke: “A maa ngɔ Nɔmlɔ Bi ɔ ngɔ wo nimli a dɛ mi, nɛ a maa gbe lɛ, nɛ ke a gbe lɛ ɔ, e maa te si ngɛ ligbi nɛ ji ligbi etɛ ɔ nɔ.” 32Se a nɛ́ jamɛ a munyu ɔ nya, nɛ a ngɛ gbeye yee kaa a ma bi lɛ.

Mɛnɔ ji nɔmlɔ ngua pe nɔ tsuaa nɔ?

(Mateo 18.1-5; Luka 9.46-48)

33Nɛ a ba Kapernaum. Nɛ benɛ e ngɛ we mi ɔ, e bi e kaseli ɔmɛ ke: “Mɛni he munyu nyɛ ngɛ tue ngɛ blɔ ɔ nɔ ɔ?” 34Se a pɛ́ a nya mi, ejakaa benɛ a ngɛ blɔ ɔ nɔ ɔ, a sa nya ngɛ a kpɛti ke mɛnɔ ji nɔmlɔ ngua pe kulaa. 35Yesu be hi si nɛ e tsɛ ni nyɔngma kɛ enyɔ ɔ nɛ e de mɛ ke: “Ke nɔ ko ngɛ hlae nɛ e pee kekle nɔ ɔ, e pee e he nihi kulaa a se kpɛlɔ kɛ nihi kulaa a tsɔlɔ.” 36Nɛ e ngɔ jokuɛ wayoo ko nɛ e kɛ lɛ ba da a kpɛti, nɛ e fua lɛ atuu, nɛ e de mɛ ke: 37“Nɔ tsuaa nɔ nɛ heɔ jokuɛwi nɛ ngɛ kaa ni nɛ ɔmɛ a ti nɔ kake ngɛ ye biɛ mi ɔ, e heɔ mi; nɛ nɔ nɛ heɔ mi ɔ, tsa pi imi nɛ e ngɛ hee, se mohu nɔ nɛ tsɔ mi ɔ.”

Nɔ nɛ ti si wui wɔ ɔ, e piɛ wa he

(Luka 9.49-50)

38Yohane de lɛ ke: “Tsɔɔlɔ, wa na nɔ ko nɛ e kɛ o biɛ ngɛ mumi yayami hiae nɛ wa tsi lɛ blɔ, ejakaa e piɛ we wa he kɛ nyɛɛ o se.” 39Se Yesu ke: “Nyɛ ko tsi lɛ blɔ, ejakaa znɔ ko be nɛ e kɛ ye biɛ ma tsu he wami ni tsumi ko nɛ e ma nyɛ ye he munyu yaya maa tu oya. 40Ejakaa nɔ nɛ ti si wui wɔ ɔ, e piɛ wa he. 41Nɔ tsuaa nɔ nɛ ma ha nyɛ nyu kplu kake maa nu ngɛ ye biɛ mi kaa Kristo nihi ɔ, i ngɛ nyɛ dee anɔkuale mi ke e hiɔwo be lɛ fɔe.”

Nanekpatami he kɔkɔbɔmi

(Mateo 18.6-9; Luka 17.1-2)

42Nɔ tsuaa nɔ nɛ ma kpata nihi tsɔwi nɛ ɔmɛ nɛ heɔ ye nɔ yeɔ ɔ a ti nɔ kake nane ɔ, afani na a kɛ teji wɛ muɔ e kuɛ nɛ a ya sake lɛ fɔ wo mi. 43Ke o nine ngɛ o nane kpatae ɔ, poo; afani nɛ o kɛ nine kake sɛ wami mi pe nɛ o kɛ nine enyɔ maa sɛ gehena (abosiami a je) ngɛ la nɛ gbo we ɔ mi, [ 44he nɛ ‘a gɔgɔ ɔmɛ gbo we, nɛ a la a hu gbo we ngɛ’ ɔ.] 45Nɛ ke o nane ngɛ o nane kpatae ɔ, poo; afani nɛ o kɛ nane kake sɛ wami mi pe nɛ o hɛɛ nane enyɔ nɛ a ma sake mo ngɔ fɔ gehena mi, ngɛ la nɛ gbo we ɔ mi [ 46he nɛ ‘a gɔgɔ ɔmɛ gbo we, nɛ a la a hu gbo we ngɛ’ ɔ.] 47Nɛ ke o hɛngmɛ ngɛ o nane kpatae ɔ, hia nɛ o sake ngɔ fɔ he; afani nɛ o kɛ hɛngmɛ kake sɛ Mawu matsɛ yemi ɔ mi pe nɛ o hɛɛ hɛngmɛ enyɔ nɛ a ma sake mo ngɔ fɔ gehena la a mi, 48he nɛ ‘a gɔgɔ ɔmɛ gbo we nɛ a la a hu gbo we ngɛ’ ɔ.

49Ejakaa nɔ tsuaa nɔ ɔ, a kɛ la maa wo lɛ ngo. 50Ngo ngɔɔ; se ke ngo ngɔmi ta a, mɛni nyɛɛ kɛ maa wo lɛ ngo ekohu? Nyɛ ha ngo nɛ hi nyɛ mi nɛ nyɛɛ hi si ngɛ he jɔmi mi.”

Currently Selected:

Marko 9: DAN77

Highlight

Copy