Marko 7

Blematsɛmɛ ɔmɛ a tsɔɔmihi

(Mateo 15.1-9)

1Farisifo ɔmɛ kɛ mlaa tsɔɔli ɔmɛ a ti ni komɛ nɛ je Yerusalem ba a bua a he nya kɛ ba Yesu ngɔ. 2A na kaa e kaseli ɔmɛ a ti ni komɛ yeɔ ni kɛ he blemi dɛ nɛ ji dɛ nɛ a fɔ we.

3Ejakaa Farisifo ɔmɛ kɛ Yudafo ɔmɛ tsuo ɔ, ja a kɛ nyu fɔ a dɛ saminya loko a yeɔ ni; (a peɔ enɛ ɔ) kɛ yeɔ nikɔtɔma amɛ a blema tsɔɔmi ɔmɛ a nɔ. 4Nɛ ke a je jua nɔ kɛ ba a, ja a du loko a yeɔ ni. Nɛ ni kpahi fuu hu ngɛ nɛ a to ha mɛ nɛ a peɔ ngɛ kplu kɛ buɛhi kɛ ayawahi a he fɔmi he.

5Lɔ ɔ he ɔ Farisifo ɔmɛ kɛ mlaa tsɔɔli ɔmɛ bi Yesu ke: “Mɛni he je nɛ o kaseli ɔmɛ yi nikɔtɔma amɛ a blema tsɔɔmi ɔmɛ anɔ nɛ a kɛ dɛ nɛ a fɔ we yeɔ ni ɔ?” 6Se e he nɔ nɛ e de mɛ ke: “Niinɛ Yesaia gba ngɛ nyɛ osatotsɛmɛ nɛ ɔmɛ a he, kaa bɔ nɛ a ngma a ke:

‘Ma nɛ ɔ, a nya a kɛ puaa mi, se a tsui tsɛ e he

kɛ je ye he kɛ ho lokoo ya.

7Se yaka gu a jaa mi ɔ nɛ, ejakaa a tsɔɔ tsɔɔmihi

nɛ ji nimli a kitahi.’ ”

8“Mawu kita a lɛɛ nyɛ je he, nɛ nimli a blema tsɔɔmi ɔmɛ a nɔ nyɛ yeɔ.”

9Nɛ e de mɛ ke: “Nyɛ pee saminya kaa nyɛ kua Mawu kita a konɛ nyɛɛ ye nyɛ blema tsɔɔmi ɔ nɔ. 10Ejakaa Mose de ke: ‘Buu o tsɛ kɛ o nyɛ;’ kɛ: ‘Nɔ nɛ gbiɛɛ e tsɛ loo e nyɛ ɔ, a maa gbe lɛ!’ 11Se nyɛɛ lɛɛ nyɛ ke: ‘Ke nɔ ko de e tsɛ loo e nyɛ ke: Nɔ́ nɛ jinɛ o ko na kɛ je ye dɛ mi ɔ, Korban’ (nɔ́ nɛ a kɛ ke Mawu) ɔ, 12lɛɛ nyɛ ha we nɛ e pee nɔ ko ha e tsɛ loo e nyɛ kulaa hu; 13nɛ nyɛɛ kɛ nyɛ blema tsɔɔmi ɔmɛ nɛ nyɛ tsɔɔ ɔ gu Mawu munyu ɔ. Nɛ nihi nɛ ngɛ kaa enɛ ɔmɛ fuu nyɛ peɔ.”

Nihi nɛ bleɔ nɔmlɔ

(Mateo 15.10-20)

14Kɛkɛ nɛ Yesu tsɛ asafo ɔ tsuo kɛ ba e ngɔ nɛ e de mɛ ke: “Nyɛ tsuo nyɛɛ bu mi tue konɛ nyɛɛ nu sisi! 15Nɔ́ ko nɔ́ ko be nɛ jee kpo nɔ blɔ sɛɛ nɔmlɔ mi nɛ ma nyɛ lɛ ma yble, se nɔ́ nɛ bleɔ nɔmlɔ ji nɔ́ nɛ jee e mi. [ 16Ke nɔ ko ngɛ tue nɛ e kɛ maa nu ɔ, e nu.]

17Nɛ benɛ e je asafo ɔ ngɔ kɛ ba we mi ɔ, ekaseli ɔmɛ bi lɛ abɛ ɔ sisi. 18E de mɛ ke: “Anɛ kikɛ nɛ ɔ nyɛ hu nyɛ nui nihi a sisi? Nyɛ nɛ kaa nɔ tsuaa nɔ nɛ jee kpo nɔ blɔ sɛɛ nɔmlɔ mi ɔ nyɛ we lɛ blemi, 19ejakaa tsa pi e tsui mi nɛ e sɛɛ, se mohu e muklii mi e yaa, nɛ e ya jee kpo ngɛ agbotso mi.” (Yesu de enɛ ɔ kɛ tsɔɔ kaa) ngma tsuaa ngma he tsɔ. 20Nɛ e ya nɔ nɛ e de ke: “Nɔ́ nɛ jee nɔmlɔ mi ɔ, lɔ ɔ nɔuu lɛ bleɔ lɛ. 21Ejakaa mi mi je nɛ ji nimli a tsui mi ɔ, lejɛ ɔ juɛmi yayahi jee: gba puɛmi, ajuama bɔmi, nɔ gbemi, 22jumi, hɛ kɔmi, je mi yaya bami, sisimi, ya homi, ninye, musu bɔmi, he womi, kuasiahi a sane yemi — 23ni yaya nɛ ɔmɛ kulaa a, mi mi je a jee nɛ a kɛ bleɔ nɔmlɔ.”

Yo ko hemi kɛ yemi

(Mateo 15.21-28)

24Nɛ Yesu si lejɛ ɔ nɛ e pue nɔ kɛ ho Tiro kɛ Zidon ni ɔmɛ a mi ya. E ya sɛ we ko mi, nɛ e sume kaa a le, se e nyɛ we e he nɛ e laa. 25E lejɛ ɔ sumi nɔuu kɛkɛ nɛ yo ko nɛ mumi yayami ngɛ e biyo wayoo ko mi ɔ nu e he nɛ e ba kpla si ngɛ e nane nya. 26Se yo ɔ, maje yo ji lɛ, nɛ he nɛ e je ji Foinike ngɛ Siria. E ba kpa Yesu pɛɛ nɛ e hia mumi yayami ɔ kɛ je e biyo ɔ mi. 27Se Yesu de lɛ ke: “Ha bimɛ ɔmɛ nɛ a tɔ lolo. E dɛ kaa a ngɔɔ bimɛ ɔmɛ abolo ɔ sakee pueɔ si ha gbe bimɛ.” 28Se yo ɔ he nɔ nɛ e ke: “Mawetsɛ e ngɛ mi ja mohu, se tse gbe bi ɔmɛ nɛ ngɛ okplɔɔ ɔ sisi ɔ hu yeɔ bimɛ ɔmɛ a bibli ɔ eko!” 29Yesu de lɛ ke: “O munyu nɛ ɔ he je ɔ, yaa! Mumi yayami ɔ je e mi.”

30Yo ɔ pue nɔ kɛ ho e we mi ya, nɛ e ya na e biyo ɔ nɛ fɔɔ si ngɛ sa nɔ nɛ mumi yayami ɔ je e mi.

Yesu tsa amuɛti tuekpokulɔ ko

31Yesu kpale e se ekohu kɛ je Tiro kpo ɔmɛ a mi kɛ po mi ngɛ Zidon, nɛ e gu Dekapoli kpo ɔmɛ a mi kɛ ba Galilea Wo ɔ nya. 32Nɛ ni komɛ kɛ tuekpokulɔ ko nɛ amuɛti hu ji lɛ ba e ngɔ, nɛ a kpa lɛ pɛɛ konɛ e ngɔ e ninehi ngɔ fɔ e nɔ. 33Nɛ Yesu kɛ lɛ je asafo ɔ kpɛti kɛ ya se, nɛ e kɛ e nine nguɛhi wo e tue puɔ ɔmɛ a mi, nɛ e la lada kɛ sa nyumu ɔ lilɛ he. 34Nɛ e hyɛ hiɔwe, nɛ e ye kɔmɔ ngɛ e mumi mi, nɛ e de amuɛti tuekpokulɔ ɔ ke: “Hefata!” e sisi ji: “Bli!” 35Nɛ amlɔ ɔ, e tue ɔmɛ bli, nɛ e lilɛ kpa amɛ pɛne, nɛ e nyɛ munyu tu pɛpɛɛpɛ. 36Nɛ Yesu wo mɛ si veveeve ke a ko de nɔ ko; se si abɔ nɛ e ngɛ mɛ si woe ɔ, si abɔ nɛ a ngɛ jajee ji kɔlɔ ɔ nɛ. 37Nɛ a nya kpɛ a he nitsɛ nitsɛ nɛ a de ke: “E pee nihi kulaa saminya! E ha tuekpokuli nuɔ nɔ, nɛ amuɛtihi hu tuɔ munyu.”

Currently Selected:

Marko 7: DAN77

Highlight

Copy