Marko 16

Yesu sitemi

(Mateo 28.1-8; Luka 24.1-12; Yohane 20.1-10)

1Nɛ benɛ Hejɔɔmi Ligbi ɔ be ɔ, Maria Magdalena kɛ Yakobo nyɛ Maria kɛ Salome ya he tsopa kɛ e he via konɛ a ba nɛ a kɛ ba kpa Yesu gbogboe ɔ. 2Nɛ otsi ɔ kekleekle ligbi ɔ nɔ mɔtu mla, pu si temi be ɔ, a ba muɔ ɔ nya. 3Nɛ a bi a he ke: “Mɛnɔ ma kpɛne tɛ ɔ kɛ je muɔ ɔ nya ha wɔ?” 4Se benɛ a yaa wo a hɛ nɔ ɔ, a na kaa a kpɛne tɛ ɔ kɛ ho se ya, ejakaa e kle saminya. 5Nɛ benɛ a sɛ yɔkɔ ɔ mi ɔ, a na niheyo ko nɛ hii si ngɛ nɔ hiɛ ɔ nɔ je nɛ e wo tade hiɔ gagaaga; nɛ a hɛli si. 6Se e de mɛ ke. “Nyɛ ko ye gbeye! Nyɛ ngɛ Yesu Nazareno nɛ a sɛu ɔ hlae; e te si, e be hiɛ ɔ; oʼɛ, he nɛ a kɛ lɛ fɔ ɔ ji nɛ ɔ nɛ! 7Jeha nɛ ɔ nyɛɛ ya nɛ nyɛ ya de e kaseli ɔmɛ kɛ Petro, ke e ngɛ nyɛ hlami sɛe kɛ yaa Galilea; lejɛ ɔ nyɛ maa na lɛ ngɛ, kaa bɔ nɛ e de nyɛ ɔ.” 8Nɛ a je kpo oya nɛ a tu fo kɛ je yɔkɔ ɔ he; a nu sawale nɛ a nya kpɛ a he; a de we nɔ ko nɔ́ ko, ejakaa a ngɛ gbeye yee.

Yesu je e he kpo tsɔɔ Maria Magdalena

(Mateo 28.9-10; Yohane 20.11-18)

[ 9Benɛ Yesu te si mɔtu mla ngɛ otsi ɔ kekleekle ligbi ɔ nɔ ɔ, nɔ kekleekle nɛ e je e he kpo tsɔɔ ji Maria Magdalena, nɔ nɛ mi nɛ pe hia mumi yayamihi kpaago kɛ je ɔ. 10Nɛ lɛ e ya nɛ e ya sɛɛ ngɔ ha nihi nɛ kɛ lɛ hi si nɛ a ngɛ kɔmɔ yee nɛ a ngɛ ya foe ɔ. 11Se mɛɛ lɛɛ, benɛ a nu kaa Yesu hɛ ngɛ nɛ e na lɛ ɔ, a he we lɛ yi.

Yesu je e he kpo tsɔɔ kaseli enyɔ

(Luka 24.13-35)

12Ni nɛ ɔmɛ a se ɔ, Yesu je e he kpo ngɛ su kpa mi tsɔɔ a ti ni enyɔ, benɛ a ngɛ si slae kɛ yaa ngmɔ si ɔ. 13Ni nɛ ɔmɛ kpale a se kɛ ho ya de nihi nɛ piɛ ɔ, se a he we mɛ tete po yi.

Yesu je e he kpo tsɔɔ kaseli nyɔngma kɛ kake ɔ

(Mateo 28.16-20; Luka 24.36-49; Yohane 20.19-23; Bɔfo 1.6-8)

14Pee se ɔ e je e he kpo tsɔɔ ni nyɔngma kɛ kake ɔ nitsɛ, benɛ a hii si ngɛ niye ni he ɔ, nɛ e ka a hɛ mi ngɛ hemi nɛ a he we yi kɛ a tsui wami ɔ he, ejakaa a he we nihi nɛ na lɛ ngɛ e sitemi ɔ se ɔ yi. 15Nɛ e de mɛ ke: “Nyɛɛ ya je ɔ tsuo kulaa mi nɛ nyɛ ya fiɛ Sane Kpakpa a ngɔ tsɔɔ nɔ tsuaa nɔ nɛ a bɔ ɔ. 16Nɔ nɛ heɔ yeɔ nɛ a baptisi lɛ ɔ, a ma he e yi wami, se nɔ nɛ he we yi ɔ, a maa bu lɛ fɔ. 17Se okadihi nɛ maa nyɛɛ ninɛmɛ nɛ heɔ yeɔ ɔmɛ a se ji nɛ ɔmɛ nɛ: Ye biɛ mi ɔ, sa maa hia mumi yayamihi; a maa tu munyu hehi; 18a ma wo sinɔhi a nɔ; nɛ ke a nu nɔ́ ko nɛ gbee nɔ ɔ, e be mɛ yayami ko pee; a kɛ a ninehi ma pue hiɔtsɛmɛ a nɔ, nɛ a he maa wa mɛ.

Yesu hiɔweyami

(Luka 24.50-53; Bɔfo 1.9-11)

19Kɛkɛ ɔ, benɛ Mawetsɛ Yesu kɛ mɛ tu munyu se ɔ, a ngɔ lɛ kɛ ho hiɔwe ya nɛ we ya hi si ngɛ Mawu hiɛ ɔ nɔ. 20Kaseli ɔmɛ ho nɛ a ya fiɛ ngɛ he tsuaa he, nɛ Nyɔmtsɛ ɔ kɛ mɛ tsu ni, nɛ e wo munyu ɔ he wami kɛ okadihi nɛ piɛ he ɔ.]

BLEMA NGMAMI NƐ A KƐ GBE NYA A EKO

[ 9 Yi ɔmɛ ya Petro kɛ e huɛmɛ ɔmɛ a ngɔ nɛ a ya bɔ mɛ kpiti nihi kulaa nɛ a de mɛ ɔ. 10 Enɛ ɔ se ɔ, Yesu nitsɛ gu e kaseli ɔmɛ a nɔ ha nɛ munyu klɔuklɔu nɛ ngɛ daa nɛ haa neneene wami ɔ gbɛ fia kɛ je beleku kɛ ya si bonyoku.]

Currently Selected:

Marko 16: DAN77

Highlight

Copy