Marko 13

Sɔlemi we ɔ puemi he gbami

(Mateo 24.1-2; Luka 21.5-6)

1Benɛ Yesu ngɛ kpo jee ngɛ sɔlemi we ɔ, e kaseli ɔmɛ a t inɔ kake de lɛ ke: “Tsɔɔlɔ, hyɛ tɛ komɛ a klemi kake kɛ tsuhi nɛ ngɛ nyakpɛ!” 2Nɛ Yesu he nɔ nɛ e de lɛ ke: “O ngɛ kikɛmɛ a tsu kpetekpleenyɛ nɛ ɔmɛ hyɛe? A be tɛ kake sie ngɛ eko nɔ nɛ a be tsitsɛɛe ngɔ fia si.”

Nɔnami kɛ yiwamihi

(Mateo 24.3-14; Luka 21.7-19)

3Nɛ bene e hii si ngɛ Nuyoku ɔ nɔ ngɛ sɔlemi we ɔ hanɔ ɔ, Petro kɛ Yakobo kɛ Yohane kɛ Andrea bi lɛ ngɛ se ke: 4“Tsɔɔ wɔ be mi nɛ a maa pee ni nɛ ɔmɛ, nɛ ke ni nɛ ɔmɛ tsuo maa ba mi ɔ, mɛni ji a he okadi?”

5Nɛ Yesu he nɔ nɛ e bɔni mɛ demi ke: “Nyɛɛ hyɛ saminya konɛ nɔ ko ko mlɔɔ nyɛ. 6Nihi fuu maa ba ngɛ ye biɛ mi, nɛ a ma de ke: ‘Ami ji lɛ!’ nɛ a maa mlɔɔ nihi fuu. 7Se ke nyɛ nu tahi kɛ ta sanehi a he ɔ, nyɛ ko hao, ejakaa ja a ba mi, se nyagbe ɔ sui lolo. 8Ma maa te si ngɔ wo ma, nɛ matsɛ yemi maa te si ngɔ wo matsɛ yemi, nɛ zugba mimiɛmi maa ba ngɛ hehi slɔɔtohi, nɛ hwɔ maa ba. Enɛ ɔmɛ ji kɔɔmi ɔmɛ a sisi jemi.

9“Se nyɛɛ lɛɛ nyɛɛ le nyɛ he nɔ hyemi, ejakaa a maa ngɔ nyɛ kɛ maa ya guahi a nɔ, nɛ a maa fia nyɛ kpa ngɛ kpe he ɔmɛ, nɛ a kɛ nyɛ maa da ganɔhi kɛ matsɛmɛ a hɛ mi ngɛ ye he, konɛ nyɛɛ ye odase ngɔ tsɔɔ mɛ. 10Nɛ ja a fiɛ Sane Kpakpa a ngɔ tsɔɔ jejemawɛ tsuo lolo. 11Se ke a kpaka nyɛ kɛ ya ha a, nyɛ ko hao nyɛ he ngɔ to ngɛ nɔ́ nɛ nyɛ ma de he; se mohu nɔ́ nɛ a kɛ ma ha nyɛ ngɛ jamɛ a ngmlɛfia a nɔ ɔ, lɔ ɔ nyɛ de ɔ nɛ; ejakaa tsa pi nyɛ nɛ nyɛ ngɛ munyu ɔ tue ɔ, se mohu mumi Klɔuklɔu ɔ ʼi. 12Se nyɛmi maa ngɔ nyɛmi ngɔ ha gbenɔ, nɛ tsɛ hu kɛ bi ma ha; nɛ bimɛ maa te si ngɔ si a fɔli, nɛ a kɛ mɛ ma ha nɛ a gbe mɛ. 13Nɛ nihi tsuo maa nyɛ nyɛ ngɛ ye biɛ ɔ he; se nɔ nɛ hɛɛ mi kɛ gbee nya a, a ma he e yi wami.”

Hehiami ngua a

(Mateo 24.15-28; Luka 21.20-24)

14“Se ke nyɛ na ma doku ninye ni ɔ kaa e maa si ngɛ he nɛ e sɛ kaa e maa a, (nɔ nɛ ngɛ kanee ɔ, e kɔ se,) lɔ ɔ lɛɛ nihi nɛ ngɛ Yudea a, a tu fo kɛ ya yoku ɔmɛ a nɔ; 15nɛ nɔ nɛ ngɛ tsu yi mi ɔ, e ko kple si, aloo nɛ e sɛ we mi ya ngɔ nɔ́ ko; 16nɛ nɔ nɛ ngɛ ngmɔ si ɔ, e ko kpale e se ba ngɔ e tade. 17Se musu tloo yihi nɛ hɛɛ muklii kɛ ninɛmɛ nɛ ngɛ nyɔ hae ngɛ jamɛ a be ɔmɛ a mi. 18Se nyɛɛ sɔle konɛ nyɛ fotumi ɔ nɛ ko ba ngɛ fiɛ be mi. 19Se jamɛ a be ɔ mi ɔ, he hiami nɛ a nɛ́ e nɔ eko hyɛ kɛ je je nɛ Mawu bɔ ɔ sisije hluu kɛ ba su mwɔnɔmwɔnɔ maa ba, nɛ jeha nɛ ɔ hu a be e nɔ nae hu. 20Nɛ ja Nyɔmtsɛ ɔ po ligbi ɔmɛ a nɔ, ke pi jã a, lɛɛ a be he lo ko he lo ko yiwami hee; se nihi nɛ e hla amɛ a he ɔ, e po ligbi ɔmɛ a nɔ.

21“Nɛ lɛ be ɔ mi ɔ, ke nɔ ko de nyɛ ke: ‘Hyɛ, Kristo ɔ ngɛ hiɛ ɔ!’ aloo ‘Hyɛ, e ngɛ lejɛ ɔ!’ ɔ, nyɛ ko he ye. 22Ejakaa lakpa kristohi kɛ lakpa gbali maa te si nɛ a maa pee okadihi kɛ nyakpɛ nihi, konɛ, ke e maa hi ɔ, a mlɔɔ ninɛmɛ nɛ a hla a tete. 23Se Nyɛɛ lɛɛ nyɛɛ hyɛ saminya; i de nyɛ nɔ tsuaa nɔ ngɔ to.”

Nɔmlɔ Bi ɔ bami

(Mateo 24.29-31; Luka 21.25-28)

24“Se jamɛ a be ɔmɛ a mi ɔ, ngɛ he hiami nɛ ɔ se ɔ, pu maa tsɔ diblii, nɛ nyɔhiɔ hu be kpee. 25Nɛ dodoehi ma tsɔ kɛ je hiɔwe ba fia si, nɛ a ma mimiɛ he wamihi nɛ ngɛ hiɔwe ɔ. 26Kɛkɛ ɔ, a maa na Nɔmlɔ Bi ɔ kaa e ma ngɛ bɔkuhi a mi kɛ he wami ngua kɛ nyami. 27Kɛkɛ ɔ, e maa tsɔ e bɔfo ɔmɛ nɛ a ma bua nihi nɛ e hla amɛ a nya kɛ maa je kɔɔhiɔ eywiɛ ɔmɛ a mi, kɛ je zugba nyagbe he kɛ ya si hiɔwe nyagbe he.”

Ngmɔkɔ tso ɔ he nikasemi

(Mateo 24.32-35; Luka 21.29-33)

28“Nyɛɛ kase ngmɔkɔ tso ɔ he abɛ ɔ. Ke e su be nɛ e kɔni ɔmɛ tsɛ̃ nɛ e bɔ ba a, nyɛ le kaa latsa be ɔ su ta. 29Ja nɔuu nyɛ hu ke nyɛ na kaa kikɛmɛ a ni nɛ ɔmɛ ba mi ɔ, nyɛ na nɛ nyɛɛ le kaa be ɔ su agbohi a nya ta. 30Anɔkuale mi i ngɛ nyɛ dee ke, loko yi nɔ nɛ ɔ maa be ɔ, ja ni nɛ ɔmɛ tsuo ba mi lolo. 31Hiɔwe kɛ zugba maa be kɛ ho, se ye munyu ɔmɛ be bee kɛ ho.”

Nɔ ko li ligbi ɔ lo ngmlɛfia a

(Mateo 24.36-44)

32Se jamɛ a ligbi ɔ loo ngmlɛfia a, nɔ ko li; hiɔwe bɔfo ɔmɛ li, nɛ Bi ɔ hu li, ja Tsɛ ɔ. 33Nyɛɛ hyɛ saminya, nyɛɛ fɔ nyɔ nɛ nyɛɛ sɔle, ejakaa nyɛ li be mi nɛ be ɔ maa su. 34E ngɛ kaa nyumu ko nɛ hia blɔ, nɛ e si e we, nɛ e ha e webi ɔmɛ he blɔ kɛ a ti nɔ tsuaa nɔ ni tsumi, nɛ e fã agbo nya hyɛlɔ ɔ ke e bu. 35Lɔ ɔ he ɔ, nyɛɛ huɔ, ejakaa nyɛ li be mi nɛ wetsɛ ɔ ma, eko ɔ gbɔkuɛ, nyɔ mi kpɛti, loo kungwɔ nɔ kpami be, loo mɔtu; 36konɛ e ko ba tlukaa nɛ e ba na nyɛ kaa nyɛ ngɛ mahɛ hwɔe. 37Nɔ́ nɛ i ngɛ nyɛ dee nɛ ɔ, nihi tsuo i ngɛ dee: Nyɛɛ huɔ!”

Currently Selected:

Marko 13: DAN77

Highlight

Copy