Mateo 23

Yesu ka Mlaatsɔɔli kɛ Farisifo ɔmɛ a hɛ mi

(Marko 12.38-39; Luka 11.43, 46; 20.45-46)

1Kɛkɛ nɛ Yesu tu munyu tsɔɔ asafo ɔmɛ kɛ e kaseli ɔmɛ nɛ e de mɛ ke: 2“Mlaa tsɔɔli ɔmɛ kɛ Farisifo ɔmɛ ɔ, Mose sɛ ɔ nɔ a hii si ngɛ ɔ nɛ; 3lɔ ɔ he ɔ, nɔ́ tsuaa nɔ́ nɛ a ma de nyɛ ke nyɛɛ ye nɔ ɔ, nyɛɛ ye nɔ nɛ nyɛɛ pee; se a ni peemi ni ɔmɛ ɔ nyɛ ko pee; ejakaa a deɔ mohu se a pee we. 4Se a boɔ tlomi nɛ jiɔ nɛ tloomi wa kɛ pueɔ nimli a konɔ; se mɛ nitsɛmɛ lɛɛ, a sume kaa a kɛ a nguɛ kake tsɛɛ. 5Se a nihi tsuo ɔ a peɔ konɛ nihi nɛ na. Ejakaa a haa a kaimi sɛbɛ ɔmɛ bliɔ nɛ a peɔ a tade nya fiami ɔmɛ nguahi; 6nɛ a suɔ okplɔɔ yi himi ngɛ niyeni si, kɛ nikɔtɔmahi a sihi hehi ngɛ kpe he ɔmɛ, 7kɛ jua nɔ ngamihi, nɛ a suɔ nɛ nihi nɛ tsɛ mɛ: ‘Rabi, Rabi.’ 8Se nyɛɛ lɛɛ, a ko tsɛ nyɛ ‘Rabi’; ejakaa nɔ kake ji nyɛ tsɔɔlɔ, se nyɛ tsuo kulaa a nyɛmimɛ ji nyɛ. 9Nɛ nyɛ ko tsɛ nɔ ko nyɛ tsɛ hulɔ ngɛ zugba a nɔ; ejakaa nɔ kake ji nyɛ tsɛ, nɔ nɛ ngɛ hiɔwe ɔ. 10Jeha nɛ ɔ a ko tsɛ nyɛ tsɔɔli hulɔ; ejakaa nɔ kake ji nyɛ tsɔɔlɔ, lɛ ji Kristo. 11Se nɔ nɛ ji ngua ngɛ nyɛ kpɛti ɔ, e plɛ nyɛ tsɔlɔ. 12Nɔ tsuaa nɔ nɛ ma wo e he nɔ ɔ, a maa ba lɛ si, nɛ nɔ tsuaa nɔ nɛ maa ba ehe si ɔ, a ma wo e nɔ.”

Yesu gbe a satopeemi ɔ he guɛ

(Marko 12.40; Luka 11.39-42, 44, 52; 20.47)

13“Musu tloo nyɛ, mlaa tsɔɔli kɛ Farisifohi, osatotsɛmɛ, ejakaa nyɛ ngaa hiɔwe matsɛ yemi ɔ nya ngɛ nimli a hɛ mi; se nyɛ nitsɛmɛ ɔ nyɛ sɛ we mi, nɛ ninɛmɛ nɛ hlaa nɛ a sɛ mi ɔ hu ɔ, nyɛ ha we mɛ e mi sɛmi he blɔ.

[ 14“Musu tloo nyɛ, mlaa tsɔɔli kɛ Farisifohi osatotsɛmɛ, ejakaa nyɛ guu sɔlemi gagahi a he lakpa tomi nɔ nyɛ mii yalɔyi a we ɔmɛ. Lɔ ɔ he ɔ nyɛ kojomi maa pe nine!]

15“Musu tloo nyɛ, mlaa tsɔɔli kɛ Farisifohi, osatotsɛmɛ, ejakaa nyɛ bɔlee wo kɛ zugba kɛ kpee, konɛ nyɛ na nɔ kake ne e plɛ Yudafono; nɛ benɛ nɔ ɔ plɛ ja a, nyɛ peɔ lɛ abosiami bi si enyɔ pe nyɛ nitsɛmɛ nyɛ he.

16“Musu tloo nyɛ, blɔt sɔɔli hɛ yuyuili, nyɛ nihi nɛ nyɛ deɔ ke: ‘Nɔ nɛ ma ka sɔlemi tsu ɔ kita a, lɔ ɔ pi nɔ ko; se nɔ nɛ ma ka sɔlemi tsu ɔ he sika a kita a, e tloo musu? 17Kuasiahi kɛ hɛ yuyuili, te nɔ nɛ pe nɛɛ, sika a, aloo sɔlemi tsu ɔ nɛ haa sika a peɔ klɔuklɔu ɔ? 18Nɛ jeha nɛ ɔ hu: ‘Nɔ nɛ ma ka bɔ sami latɛ ɔ kita a, lɔ ɔ pi nɔ ko, se nɔ nɛ ma ka enɔ bɔ ɔ kita a, e tloo musu? 19Hɛ yuyuili, te nɔ nɛ pe nɛɛ, bɔ ɔ, aloo bɔ sami latɛ ɔ nɛ haa bɔ ɔ peɔ klɔuklɔu ɔ? 20Lɔ ɔ he ɔ, nɔ nɛ ma ka bɔ sami lɛta ɔ kita a, e ka kɔlɔ ɔ kɛ nihi nɛ ngɛ nɔ ɔ tsuo kulaa kita. 21Nɛ nɔ nɛ kaa sɔlemi tsu ɔ kita a, e ka kɔlɔ ɔ kɛ nɔ nɛ hii mi ɔ kita. 22Nɛ nɔ nɛ kaa hiɔwe kita a, e ka Mawu sɛ ɔ kɛ nɔ nɛ hii si ngɛ nɔ ɔ hu kita?

23“Musu tloo nyɛ mlaa tsɔɔli kɛ Farisifohi, osatotsɛmɛ, ejakaa nyɛ haa kowɛ kɛ anisi kɛ kumino mi dlami nyɔngma-nyɔngma se Mlaa a mi nihi nɛ he hia nɛ ji dami kojomi kɛ mɔbɔ nami kɛ hemi kɛ yemi ɔ mohu ɔ nyɛ siɔ; se jinɛ e da kaa nyɛ peɔ enɛ ɔmɛ; nɛ nyɛ ko si ekpa amɛ hulɔ. 24Blɔ tsɔɔli hɛ yuyuili, nyɛ tsleɔ nɔ́ nɔ anunui, se nyɛ mii afukpɔngɔ!

25“Musu tloo nyɛ, mlaa tsɔɔli kɛ Farisifohi, osatotsɛmɛ, ejakaa nyɛ tsuo kplu he kɛ kã se; se a mi hyi tɔtɔɔtɔ kɛ ojo fiami kɛ adufude yemi. 26Farisifono hɛ yuyuilɔ, ha kplu ɔ kɛ kã a kekle mi nɛ je, loko e se ɔ hu nɛ je!

27“Musu tloo nyɛ mlaa tsɔɔli kɛ Farisifohi osatotsɛmɛ, ejakaa nyɛ ngɛ kaa yɔkɔhi nɛ a sa he nɛ a he pee fɛu mohu, sɛ a mi hyi tɔtɔɔtɔ kɛ ni gbogboehi a wuhi kɛ mu slɔɔtohi tsuo. 28Ja nɔuu a naa nyɛ hu ngɛ nimli a hɛ mi kaa dali, se osato kɛ mlaa tɔmi hyi nyɛ mi tɔ.”

Yesu gba Farisifo ɔmɛ a tuegblami

(Luka 11.47-51)

29“Musu tloo nyɛ, mlaa tsɔɔli kɛ Farisifohi osatotsɛmɛ, ejakaa nyɛ maa gbali ɔmɛ a yɔkɔ ɔmɛ nɛ nyɛ dlaa dali ɔmɛ a yɔkɔ ɔmɛ, 30nɛ nyɛ deɔ ke: ‘E ji wa tsɛmɛ a yi nɔ ɔ wa ngɛ je mi jinɛ, wa be a he piɛe nɛ a pue gbali ɔmɛ a muɔ si.’ 31Lɛɛ nyɛ ngɛ nyɛ nitsɛmɛ nyɛ he odase yee kaa nihi nɛ gbe gbali ɔmɛ a bimɛ ji nyɛ? 32Nyɛ hu nyɛɛ wo nyɛ tsɛmɛ ɔmɛ a tsimi ɔ fuu tɔ mɔ! 33Sinɔhi kɛ si kpali a nina! Kɛ nyɛ maa pee kɛ tu abosiami a je fɔbu ɔ nya fo kɛɛ? 34Lɔ ɔ he ɔ, oʼɛ; imi i ngɛ gbali kɛ ni leli kɛ mlaa tsɔɔli tsɔe kɛ ba nyɛ ngɔ, nɛ nyɛ maa gbe a ti ni komɛ nɛ nyɛ maa sɛu ni komɛ, nɛ ni komɛ ɔ nyɛ maa fia mɛ kplibi ngɛ nyɛ kpe he ɔmɛ, nɛ nyɛ maa wa mɛ yi mi kɛ maa je ma mi kɛ maa ya ma mi. 35Benɛ pee nɛ dali a muɔ tsuo nɛ a pue si ngɛ zugba a nɔ kɛ je Abel, dalɔ ɔ, muɔ ɔ nɔ kɛ ba su Zakaria, Barakia bi ɔ, nɛ nyɛ gbe ngɛ sɔlemi tsu ɔ kɛ bɔ sami latɛ ɔ kpɛti ɔ, muɔ ɔ nɛ ba nyɛ nɔ. 36Niinɛ, i ngɛ nyɛ dee ke: Enɛ ɔmɛ tsuo maa ba yi nɔ bi nɛ ɔmɛ a nɔ.”

Suɔmi nɛ Yesu ngɛ kɛ ha Yerusalem

(Luka 13.34-35)

37“Oo Yerusalem, Yerusalem, mo nɛ o gbee gbali ɔmɛ nɛ o fiaa nihi nɛ a tsɔ mɛ o ngɔ ɔ tɛ; si nyɛmɛ i hla kaa jinɛ i buaa o bimɛ a nya kaa bɔ nɛ kungwɔ buaa e bimɛ a nya woɔ e pɛlihi a sisi ɔ, nɛ nyɛ kplɛɛ we! 38oʼɛ, a ma si nyɛ we ɔ we doku ha nyɛ! 39Ejakaa i ngɛ nyɛ dee ke: Kɛ je be nɛ ɔ kɛ yaa nɛ ɔ, nyɛ be mi nae hu kɛ maa su be nɛ nyɛ ma de ke: ‘A gbaa nɔ nɛ ma ngɛ Nyɔmtsɛ ɔ biɛ mi ɔ.’ ”

Currently Selected:

Mateo 23: DAN77

Highlight

Copy