Mateo 19

Gbamipomi he nitsɔɔmi

(Marko 10.1-12)

1Benɛ Yesu gbe munyu ɔmɛ a nya a, e je Galilea kɛ ba Yudea kpo ɔmɛ a nɔ ngɛ Yordan se. 2Nihi fuu nyɛɛ e se nɛ e tsa mɛ ngɛ lejɛ ɔ.

3Farisifo ɔmɛ ekomɛ ba e ngɔ nɛ a ba da lɛ de ke: “Anɛ e da blɔ kaa nyumu fieɔ e yo ngɛ munyu tsuaa munyu he lo?” 4Nɛ e he nɔ nɛ e de mɛ ke: “Anɛ nyɛ kane we ke, nɔ hɛ bɔ nɔmlɔ ngɛ sisi je ɔ mi ɔ, nyumu kɛ yo e bɔ mɛ ɔ lo?” 5Nɛ e ke: “Enɛ ɔ he je nɛ nyumu ma si e tsɛ kɛ e nyɛ ne e maa pɛtɛ e yo he, nɛ mɛ ni enyɔ ɔ tsuo a ma plɛ he lo kake? 6Lɛɛ jeha nɛ ɔ, a pi nimli enyɔ hu, se mohu he lo kake; lɔ ɔ he ɔ nɔ́ nɛ Mɛwu ngɔ tsa a, a ko ha nɔmlɔ nɛ gba mi.” 7A bi lɛ ke: “Mɛni he je nɛ Mose wo kita ke a ha yo fiemi womi nɛ a fie lɛ ɔ mɔ?” 8E de mɛ ke: “Nyɛ tsui wami he je nɛ Mose ha nyɛ he blɔ ke nyɛɛ fie nyɛ yi ɔmɛ ɔ nɛ; se sisije ɔ, e be ja. 9Jeha nɛ ɔ i ngɛ nyɛ dee ke: Nɔ tsuaa nɔ nɛ pi ajuama bɔmi he je nɛ e maa fie e yo nɛ e ma ya ngɔ yo kpa a, e puɛ gba; nɛ nɔ tsuaa nɔ nɛ ngɔɔ yo nɛ a fie lɛ ɔ, lɛ hu e puɛ gba.” 10E kaseli ɔmɛ de lɛ ke: “Ke kikɛ ɔ nyumu kɛ yo sane ngɛ ɔ, lɛɛ e sɛ́ kaa a ngɔɔ yo mɔ.” 11Se e de mɛ ke: “Pi nihi tsuo nɛ ma nyɛ munyu nɛ ɔ he maa pɛtɛ, ja nihi nɛ a ngɔ ha mɛ ɔ kɛkɛ. 12Ejakaa puɛhi komɛ ngɛ nɛ a fɔ mɛ ja kɛ je a nyɛmɛ a muklii mi; nɛ puɛhi komɛ ngɛ nɛ nimli lɛ puɛ mɛ; nɛ puɛ kpahi komɛ hu ngɛ nɛ hiɔwe matsɛ yemi ɔ he nɛ mɛ nitsɛmɛ a puɛ a he. Nɔ nɛ ma nyɛ he pɛtɛ ɔ, e pɛtɛ he.”

Yesu kɛ jokuɛwi

(Marko 10.13-16; Luka 18.15-17)

13Kɛkɛ nɛ a kɛ jokuɛwi tsɔwi ba Yesu ngɔ, konɛ e ngɔ e ninehi ngɔ pue a nɔ nɛ e sɔle. Se e kaseli ɔmɛ gbɛ wo mɛ. 14Nɛ Yesu ke: “Nyɛ ha jokuɛwi ɔmɛ nɛ a ba ye ngɔ, nɛ nyɛ ko tsi mɛ blɔ; ejakaa nihi nɛ ngɛ kaa ni nɛ ɔmɛ a nɔ ji hiɔwe matsɛ yemi ɔ nɛ.” 15Nɛ e ngɔ e ninehi pue a nɔ; nɛ e je lejɛ ɔ.

Niheyo niatsɛ ɔ

(Marko 10.17-31; Luka 18.18-30)

16Nɛ oʼɛ nɔ ko ba e ngɔ nɛ e ba bi lɛ ke: “Tsɔɔlɔ, mɛni nɔ́ kpakpa po ma pee nɛ ma na neneene wami?” 17Nɛ Yesu de lɛ ke: “Meni he je o ngɛ mi nɔ́ kpakpa he sane bie? Nɔ kake ngɛ nɛ ji nɔ kpakpa. Se ke o ngɛ hlae kaa o sɛ wami mi ɔ, ye kita amɛ a nɔ.” 18E bi lɛ ke: “Te nihi nɛ ji hu?” Nɛ Yesu ke: “Koo gbe nɔmlɔ; ko puɛ gba; koo ju; koo ye lakpa odase; 19buu o tsɛ kɛ o nyɛ; kɛ suɔ o nyɛmi nɔmlɔ kaa bɔ nɛ o suɔ mo nitse o he.” 20Niheyo ɔ de lɛ ke: “Enɛ ɔmɛ tsuo ɔ, i ye nɔ kɛ je ye jokuɛwi a si; mɛni pa piɛ mi?” 21Yesu de lɛ ke: “Ke o ngɛ hlae kaa o hii kɛ pii si ɔ, yaa nɛ o ya jua nihi nɛ o ngɛ ɔ, nɛ o ngɔ ha ohiafohi, nɛ o ma na juetli ngɛ hiɔwe; nɛ o ba nɛ o ba nyɛɛ ye se.” 22Se benɛ niheyo ɔ nu munyu nɛ ɔ ɔ, e dɔ lɛ nɛ e je kɛ ho; ejakaa e ngɛ nihi babauu.

23Nɛ Yesu de e kaseli ɔmɛ ke: “Niinɛ, i ngɛ nyɛ dee ke: E maa wa ha niatsɛ kaa e maa sɛ hiɔwe matsɛ yemi ɔ mi. 24Se jeha nɛ ɔ hu i ngɛ nyɛ dee ke: E wɛ́ hi afukpɔngɔ kaa e maa gu abui hɛngmɛ mi, kaa bɔ nɛ e waa haa nitsɛ kaa e maa sɛ Mawu matsɛ yemi ɔ mi ɔ.” 25Benɛ e kaseli ɔmɛ nu enɛ ɔ ɔ, a he nya si mɛ tsɔ nɛ a de ke: “Lɛɛ mɛnɔ yi wami a ma nyɛ ma he mɔ?” 26Se Yesu hyɛ mɛ kɛ kpe, nɛ e de mɛ ke: “Nimli a blɔfami ɔ, a be enɛ ɔ nyɛe maa pee; se Mawu blɔfami ɔ a ma nyɛ nihi tsuo maa pee.”

27Kɛkɛ nɛ Petro he nɔ nɛ e de lɛ ke: “Oʼɛ, wɔɔ lɛɛ wa si nɔ́ tsuaa nɔ́ nɛ wa ba nyɛɛ o se, lɛɛ mɛni wa ma na?” 28Se Yesu de mɛ ke: “Niinɛ, i ngɛ nyɛ dee ke; nyɛ nihi nɛ nyɛ nyɛɛ ye se nɛ ɔ ɔ, benɛ Nɔmlɔ Bi ɔ maa hi e nyami sɛ nɔ ngɛ je he ɔ mi ɔ, nyɛ hu nyɛ maa hi sɛ nyɔngma kɛ enyɔ nɔ, nɛ nyɛ maa kojo Israel wetso nyɔngma kɛ enyɔ ɔ. 29Nɛ nɔ tsuaa nɔ nɛ si wehi loo nyɛmimɛ nyumuhi loo nyɛmimɛ yihi loo tsɛ loo nyɛ loo bimɛ loo zugbahi ngɛ ye biɛ ɔ he ɔ, a maa ma lɛ nane mi totoe lafa, nɛ e ma na neneene wami. 30Se kekletsɛmɛ fuu ma plɛ se kpɛli, nɛ se kpɛli ma plɛ kekletsɛmɛ.”

Currently Selected:

Mateo 19: DAN77

Highlight

Copy