Luka 9

Yesu tsɔ kaseli nyɔngma kɛ enyɔ ɔmɛ

(Mateo 10.5-15; Marko 6.7-13)

1Kɛkɛ nɛ Yesu tsɛ kaseli nyɔngma kɛ enyɔ ɔmɛ kɛ kpe nɛ e ha mɛ hewami kɛ he blɔ ngɛ mumi yayami ɔmɛ tsuo nɔ, nɛ a tsa hiɔhi hulɔ. 2Nɛ e tsɔ mɛ Mawu matsɛ yemi ɔ fiɛmi kɛ hiɔtsɛmɛ a tsami 3E de mɛ ke: “Nyɛ ko hɛɛ nɔ́ ko kɛ ha nyɛ blɔhiami ɔ, nyɛ ko hɛɛ dɛ hɛɛmi tso loo kotoku loo abolo loo sika loo tade enyɔ. 4We tsuaa we mi nɛ nyɛ ma ya sɛ ɔ, nyɛɛ hi lejɛ ɔ kɛ yaa su nyɛ maa je. 5Nihi abɔ nɛ he we nyɛ ɔ, ke nyɛ maa je jamɛ a ma a mi ɔ, nyɛ blɛ nyɛ nane si zu ɔ kɛ ye mɛ odase.” 6Nɛ kaseli ɔmɛ pue nɔ kɛ ho nɛ a ya kpa ma amɛ a mi ya fiɛ Sane Kpakpa a nɛ a tsa nihi ngɛ he tsuaa he.

Herode pee yoyooyo

(Mateo 14.1-12; Marko 6.14-16)

7Amlaalo nɔkɔtɔma Herode nu nihi nɛ a pee ɔmɛ tsuo he, nɛ e pee yoyooyo, ejakaa ni komɛ de ke Yohane te si kɛ je gbeje. 8Ni komɛ hu de ke Elia je e he kpo, nɛ ni kpa komɛ hu de ke blema gbali ɔmɛ eko te si ekohu. 9Se Herode ke: “Yohane ɔ, i po e yi; se mɛnɔ ji nɛ ɔ nɛ i ngɛ kikɛmɛ a sane nɛ ɔmɛ nue ngɛ e he nɛ ɔ?” Nɛ e hla kaa e na lɛ.

Yesu ha ni akpe enuɔ niyeni

(Mateo 14.13-21; Marko 6.30-44; Yohane 6.1-14)

10Nɛ benɛ bɔfo ɔmɛ kpale a se kɛ ba a, a ba sɛɛ nihi tsuo nɛ a ya pee ɔ ngɔ ha Yesu. Nɛ e ngɔ mɛ kɛ ho nga a nɔ he ko banee ya ngɛ ma nɛ a tsɛɛ lɛ Betsaida a kasa nya 11Se benɛ asafo ɔ na lɛ ɔ, a bu e nɔ. E he mɛ hɛmuɔ nɛ e fiɛ Mawu matsɛ yemi ɔ he sane tsɔɔ mɛ, nɛ e tsa nihi nɛ tsami he hia mɛ ɔ.

12Benɛ je bɔni jɔmi ɔ, ni nyɔngma kɛ enyɔ ɔ ba e ngɔ nɛ a ba de lɛ ke: “Wo asafo ɔ blɔ konɛ a ya ma amɛ kɛ kɔpehi nɛ bɔle wɔ nɛ ɔmɛ a mi nɛ a ya to lejɛ ɔ nɛ a na niyeni ejakaa nga mi wa ngɛ nɛ ɔ nɛ.” 13Se Yesu de mɛ ke: “Nyɛ nitsɛmɛ nyɛ ha mɛ nɔ́ ko nɛ a ye.” Se a ke: “Abolo enuɔ kɛ lo enyɔ pɛ wa ngɛ, lɛɛ ja wa ya nɛ wa ya he niyeni ba ha asafo nɛ ɔ tsuo.” 14(Ejakaa ni ɔmɛ a yibɔ maa pee nyumuhi akpe enuɔ). E de e kaseli ɔmɛ ke: “Nyɛ ha nɛ a hi si kutuu kutuu nyingmi enuɔ enuɔ nya.” 15A pee ja nɛ a ha ni ɔmɛ tsuo hi si. 16Kɛkɛ nɛ e kukuɔ abolo enuɔ kɛ lo enyɔ ɔ nɛ e hyɛ hiɔwe nɛ e gbaa nɔ, nɛ e kuɔ nɛ e kɛ ha e kaseli ɔmɛ nɛ a kɛ ma asafo ɔ hɛ mi. 17Nɛ a ye nɛ mɛ kulaa a tɔ, nɛ a kukuɔ bibli nɛ piɛ ɔ kusii nyɔngma kɛ enyɔ.

Petro odase nɛ e ye ngɛ Yesu he

(Mateo 16.13-19; Marko 8.27-29)

18Ligbi ko benɛ Yesu nɔ kake ngɛ sɔlee ɔ, e kaseli ɔmɛ ba bua a he nya ngɛ e ngɔ; nɛ e bi mɛ ke: “Ni ɔmɛ deɔ ke mɛnɔ jimi?”

19A ha lɛ heto ke: “Yohane, baptisilɔ ɔ; nɛ ni komɛ deɔ ke: Elia; nɛ ni kpa komɛ hu deɔ ke: Blema gbali ɔmɛ a ti nɔ ko lɛ e te si ekohu.” 20Nɛ e bi mɛ ke: “Se nyɛɛ lɛɛ, nyɛ deɔ ke mɛnɔ ji mi?” Petro he nɔ nɛ e ke: “Mawu we Kristo ɔ.” 21Kɛkɛ nɛ Yesu bɔ mɛ kkɔ ke a ko wo nɔ ta ngɔ de nɔ ko.

Yesu tu e manehlu kɛ e gbenɔ he munyu

(Mateo 16.20-28; Marko 8.30—9.1)

22Nɛ Yesu ke: “Ja Nɔmlɔ Bi ɔ na amanehlu babauu, nɛ ma mikɔtɔma amɛ kɛ osɔfo nikɔtɔma amɛ kɛ mlaatsɔɔli ɔmɛ kua lɛ, nɛ a gbe lɛ, nɛ ligbi nɛ ji ligbi etɛ ɔ nɛ a tle lɛ si ekohu.”

23Nɛ e de ni ɔmɛ tsuo ke: “Ke nɔ ko suɔ kaa e nyɛɛ ye se ɔ, e kua e he nɛ e wo e seumi tso ɔ ngɔ tloo daa ligbi kɛ nyɛɛ ye se. 24Ejakaa nɔ tsuaa nɔ nɛ suɔ kaa e baa e klaa yi ɔ, e maa laa lɛ; se nɔ nɛ laa e klaa ngɛ ye he ɔ, e ma he e yiwami. 25Ejakaa mɛni se nɔmlɔ naa, ke e na je mluku ɔ tsuo, se e laa lɛ nitsɛ e he aloo e sake e he ngɔ fɔ he ɔ? 26Ejakaa nɔ tsuaa nɔ nɛ imi kɛ ye munyu ɔmɛ a he peɔ lɛ zo ɔ, lɛ hu e he maa pee Nɔmlɔ Bi ɔ zo benɛ e maa ba ngɛ lɛ nitse e nyami ɔ kɛ e tsɛ nɔ ɔ kɛ bɔfo klɔuklɔu ɔmɛ a nɔ ɔ mi ɔ. 27Se niinɛ, i ngɛ nyɛ dee ke: ni komɛ ngɛ nihi nɛ daa si ngɛ hiɛ ɔ nɛ ɔ a kpɛti nɛ a be gboe kɛ yaa su be nɛ a maa na Mawu matsɛ yemi ɔ.”

Yesu nɔmlɔ tso su tsake

(Mateo 17.1-8; Marko 9.2-8)

28E ba mi kaa munyu nɛ ɔmɛ a se maa pee ligbi kpaanyɔ ɔ, Yesu ngɔ Petro kɛ Yohane kɛ Yakobo, nɛ e pue nɔ kɛ ho sɔlemi ya ngɛ yoku ɔ nɔ. 29Nɛ benɛ e ngɛ sɔlee ɔ, e hɛ mi tsake nɛ e tade ɔ hiɛ futaa nɛ e ngɛ kpee klaiklai. 30Nɛ oʼɛ, nyumuhi enyɔ kɛ lɛ ba tu munyu, mɛ ji Mose kɛ Elia, 31nihi nɛ ba je a he kpo ngɛ hɛ hii nyami mi nɛ a kɛ lɛ tu munyu ngɛ e je mi nya nɛ e ma ya gbe ngɛ Yerusalem ɔ he ɔ. 32Se mahɛ gbe Petro kɛ nihi nɛ piɛ e he ɔ; nɛ benɛ a hɛ tsɛ kulaa a, a na e hɛ mi nyami ɔ kɛ nyumuhi enyɔ ɔmɛ nɛ a daa si ngɛ e kasa nya a. 33Nɛ benɛ ni ɔmɛ ngɛ Yesu sie ɔ, Petro de Yesu ke: “Tsɔɔlɔ, e hi kaa waa hi hiɛ ɔ, nɛ ha nɛ waa ma bo tsu etɛ, o nɔ kake kɛ Mose nɔ kake kɛ Elia nɔ kake;” se e li nɔ nɛ e ngɛ dee ɔ. 34Nɛ benɛ e ngɛ ni nɛ ɔmɛ dee ɔ, bɔku ko ba ha a nɔ; nɛ benɛ a sɛ bɔku ɔ mi ɔ, a ye gbeye. 35Nɛ gbi ko je bɔku ɔ mi de ke: “Ye suɔmi bi ɔ ji nɛ ɔ nɛ, nyɛɛ bu lɛ tue!” 36Benɛ a nu gbi ɔ se ɔ, Yesu nɔ kake pɛ a na. Nɛ a ma a nya, nɛ jamɛ a be ɔmɛ a mi ɔ a sɛɛ we nihi nɛ a na a eko ha we nɔ ko nɔ ko.

Yesu tsa jokuɛ nyumu ko nɛ mumi yayami ngɛ e mi

(Mateo 17.14-18; Marko 9.14-27)

37Nɛ e ba mi kaa e nɔ je na benɛ a je yoku ɔ nɔ kɛ ngɛ si kplee ɔ, nihi fuu kɛ lɛ ba kpe. 38Nɛ oʼɛ, nyumu ko je ni ɔmɛ a kpɛti kpa ngmlaa ke: “Tsɔɔlɔ, i kpa mo pɛɛ, hyɛ ye bi ɔ, se lɛ pɛ ji ye bi. 39Oʼɛ, mumi ko nuu lɛ nɛ e kpaa ngmlaa tlukaa, nɛ e haa e huaa gɛgɛnii, nɛ e nya fiaa hwɔli, nɛ e gbɔnyɔɔ lɛ hluu loko e jee e mi. 40I kpa o kaseli ɔmɛ pɛɛ ke a hia lɛ, se a nyɛ we.” 41Yesu he nɔ nɛ e ke: ‘Oo yi nɔ bihi nɛ he we yi nɛ be a jebo nɔ! Mɛni be i kɛ nyɛ maa hi si nɛ ma hɛɛ nyɛ kɛ ya su? O kɛ o bi ɔ nɛ ba hiɛ ɔ!” 42Se benɛ jokuɛ ɔ ma a, mumi yayami ɔ po lɛ fɔ̃ si nɛ e ha e hua. Se Yesu nga mumi ɔ yi, nɛ e tsa jokuɛ ɔ, nɛ e ngɔ lɛ ngɔ ha e tsɛ ɔ ekohu. 43Nɛ mɛ tsuo a nya kpɛ a he ngɛ Mawu he wami kpetekpleenyɛ ɔ he.

Yesu tu e gbenɔ he munyu ekohu

(Mateo 17.22-23; Marko 9.30-32)

Se benɛ ni ɔmɛ tsuo a hɛ mi pee mɛ yaa ngɛ nihi tsu nɛ Yesu pee ɔ he ɔ, e de e kaseli ɔmɛ ke: 44“Nyɛɛ lɛɛ nyɛ ha kikɛmɛ a munyu nɛ ɔmɛ nɛ sɛ nyɛ tue mi, ejakaa a maa ngɔ Nɔmlɔ Bi ɔ ngɔ wo nimli a dɛ mi.” 45Se mɛɛ lɛɛ a nɛ́ munyu nɛ ɔ nya, nɛ a kɛ laa mɛ konɛ a ko nu sisi, nɛ a ngɛ gbeye yee kaa a ma bi lɛ munyu ɔ he nɔ ko.

Mɛnɔ ji nɔ ngua pe kulaa?

(Mateo 18.1-5; Marko 9.33-37)

46Nɛ nya sami ko ba te si ngɛ a kpɛti kaa mɛnɔ ji nɔ ngua pe kulaa ngɛ a kpɛti. 47Se benɛ Yesu na le a tsui mi susumi ɔ, e ngɔ jokuɛ nyafii ko nɛ e kɛ lɛ ba da e kasa nya; 48nɛ e de mɛ ke: “Nɔ tsuaa nɔ nɛ maa ngɔ jokuɛ nyafii nɛ ɔ ngɛ ye biɛ mi ɔ, e ngɔ mi; nɛ nɔ nɛ ngɔ mi ɔ, e ngɔɔ nɔ nɛ tsɔ mi ɔ; ejakaa nɔ nɛ ji nyafii ngɛ nyɛ tsuo nyɛ kpɛti ɔ, lɛ nɔuu ji nɔ ngua.”

Nɔ nɛ ti si wui nyɛ ɔ, e piɛ nyɛ he

(Marko 9.38-40)

49Yohane he nɔ ke: “Tsɔɔlɔ, wa na nɔ ko nɛ e kɛ o biɛ ngɛ mumi yayami hiae, nɛ wa tsi lɛ blɔ, ejakaa e kɛ wɔ nyɛɛ we o se.” 50Nɛ Yesu de lɛ ke: “Nyɛ ko tsi lɛ blɔ, ejakaa nɔ nɛ ti si wui nyɛ ɔ, e ngɛ nyɛ blɔfami.”

Samaria kɔpe ko kua Yesu

51Nɛ e ba mi kaa benɛ ligbi nɛ a maa ngɔ Yesu kɛ ho hiɔwe ya su ta a, e ngɔ e hɛ mi ngɔ pi Yerusalem nɛ e yaa lejɛ ɔ. 52Nɛ e tsɔ tsɔli kɛ sɛ e hlami; nɛ a ya sɛ Samariabi a ma ko mi konɛ a ya dla he ko ngɔ to lɛ. 53Se a he we lɛ, ejakaa a na ngɛ e hɛ mi kaa e yaa Yerusalem. 54Nɛ benɛ Yakobo kɛ Yohane kɛ e kaseli ɔmɛ na enɛ ɔ ɔ, a ke: “Nyɔmtsɛ, o suɔ kaa wa de nɛ la nɛ je hiɔwe ba sa mɛ lo?” 55Se Yesu plɛ e he nɛ e ka a hɛ mi, 56nɛ a ho ma kpa ko mi ya.

Yesu senyɛɛmi

(Mateo 8.19-22)

57Nɛ e ba mi kaa benɛ a yaa ngɛ blɔ ɔ nɔ ɔ, nɔ ko ba de lɛ ke: “Nyɔmtsɛ, ma nyɛɛ o se kɛ maa ya he tsuaa he nɛ oyaa.” 58Se Yesu de lɛ ke: “Kɔkɔbohi ngɛ muɔhi, nɛ hiɔwe lohwe pɛlitsɛmɛ hu ngɛ tsuhi, se Nɔmlɔ Bi o lɛɛ e be he nɛ e kɛ e yi fɔɔ.” 59Nɛ e de nɔ kpa ke: “Nyɛɛ ye se!” Se lɛɛ e ke: “Nyɔmtsɛ, ngmɛɛ mi blɔ nɛ ma ya ya pu tsaatsɛ lolo.” 60Se Yesu de lɛ ke: “Ha nɛ ni gbogboehi nɛ pu a ni gbogboehi se mo lɛɛ yaa nɛ o ya fiɛ Mawu matsɛyemi ɔ!” 61Nɛ nɔ kpa hu ke: “Ma nyɛɛ o se, Nyɔmtsɛ, se ngmɛɛ mi blɔ nɛ ma ya ya sɛ ye weli lolo.” 62Se Yesu de lɛ ke: “Nɔ nɛ kɛ e nine pɛtɛɛ na kpakplaa he nɛ e plɛɛ e kuɛ hyɛɛ e se ɔ, e sɛ́ Mawu matsɛyemi ɔ.”

Currently Selected:

Luka 9: DAN77

Highlight

Copy