Luka 14

Yesu tsa hiɔtsɛ ko

1Hejɔɔmi Ligbi ko nɔ ɔ, Yesu ya ni yemi ngɛ Farisifo ɔmɛ a nikɔtɔma amɛ a ti nɔ kake we mi, nɛ a huɔ lɛ. 2Nɛ oʼɛ nyumu ko ngɛ lejɛ ɔ nɛ ngɛ hulemi hiɔ nue. 3Nɛ Yesu de mlaa tsɔɔli ɔmɛ kɛ Farisifo ɔmɛ ke: “Anɛ e da blɔ kaa a tsaa nɔ ngɛ Hejɔɔmi Ligbi ɔ nɔ lo?” 4Se a pui e nya mi. Kɛkɛ nɛ e pɛtɛ e he nɛ e tsa lɛ, nɛ e wo lɛ blɔ ke e ho. 5Nɛ e de mɛ ke: “Nyɛ ti mɛnɔ nɛ ke e teji loo e na ya nɔ vu mi ɔ nɛ e ya be lɛ jee amlɔ ɔ nɔuu ngɛ Hejɔɔmi Ligbi ɔ nɔ?” 6Se a nyɛ we enɛ ɔmɛ a heto nɛ a ha hu.

Nibwɔpeemi kɛ hesibami

7Nɛ benɛ Yesu yo bɔ nɛ a ngɛ nikɔtɔmahi a sihi he hlae ɔ, e bu nihi nɛ a kpee ɔ abɛ, nɛedemɛke? 8“Ke nɔ ko kpee mo kɛ yaa yo kpeemi okplɔɔ he ɔ, ko ya hi yimɛ a je; eko ɔ alinɔ e kpee nɔ ko nɛ hɛ mi ngɛ nyami pe mo, 9konɛ nɔ nɛ kpee o kɛ jamɛ a tsɛ ɔ tsuo ɔ ko ba nɛ e ba de mo ke: ‘Ha nɔ nɛ ɔ blɔ,’ nɛ lɔ ɔ lɛɛ o kɛ zo ma ya hi nane si je. 10Se mohu ke a kpee mo ɔ, yaa nɛ o ya hi nane si je, konɛ ke nɔ nɛ kpee mo ɔ ba a, nɛ e ba de mo ke: ‘Huɛ, ba yimɛ a je.’ Lɔ ɔ lɛɛ o hɛ mi maa ba nyami ngɛ nihi nɛ o kɛ hii si ɔmɛ tsuo a hɛ mi. 11Ejakaa nɔ tsuaa nɔ nɛ woɔ e he nɔ ɔ, a maa ba lɛ si, nɛ nɔ nɛ baa e he si ɔ, a ma wo e nɔ.”

12Kɛkɛ nɛ Yesu de nɔ nɛ kpee lɛ ɔ ke: “Ke o ngmɛ piani loo gbɔkuɛ okplɔɔ ɔ, ko tsɛ o huɛmɛ loo o nyɛmimɛ loo o wekuli loo o kpɔ mi niatsɛmɛ, konɛ alinɔ mɛ hu a ba kpee mo eko ngɔ ma nya. 13Se ke o ngmɛ okplɔo ɔ, tsɛ ohiafohi kɛ glɔtsɛmɛ kɛ pɔtsɛmɛ kɛ heyuyuili mohu, 14nɛ a maa gbaa mo, akɛnɛ a be nɔ́ ko nɛ a kɛ maa to mo nane mi ɔ; ejakaa a maa to mo nane mi ngɛ dali a si temi ɔ mi.”

Okplɔɔ ngua a he abɛ ɔ

(Mateo 22.1-10)

15Nɛ benɛ nihi nɛ kɛ lɛ hii si ngɛ niyeni si ɔ a ti nɔ kake nu ni nɛ ɔmɛ ɔ, e de Yesu ke: “A gbaa nɔ nɛ yeɔ abolo ngɛ Mawu matsɛ yemi ɔ mi!” 16Se Yesu de lɛ ke: “Nyumu ko ngmɛ okplɔɔ ngua, nɛ e kpee nihi fuu; 17nɛ benɛ e su ni yemi be ɔ, e tsɔ e tsɔlɔ ke e ya de nihi nɛ a kpee ɔ ke: ‘Nyɛɛ ba, ejakaa a gbe nihi kulaa nya’ 18Se mɛ tsuo kulaa a bɔni lakpa kake yemi. Kekle nɔ ɔ de lɛ ke: ‘I he ngmɔ ko nɛ e sa kaa ma ya nɛ ma ya hyɛ; i kpa mo pɛɛ nɛ o na ha mi.’ 19Nɛ nɔ kpa ke: ‘I he na blablɛ enuɔ nɛ i yaa ma ya ka mɛ ma hyɛ; i kpa mo pɛɛ nɛ o na ha mi.’ 20Nɛ nɔ kpa hu ke: ‘I kpee yo nɛ lɔ ɔ he ɔ i be nyɛe ma ba.’ 21Nɛ kikɛmɛ a tsɔlɔ nɛ ɔ ba nɛ e ba jaje ni nɛ ɔmɛ kulaa ngɔ tsɔɔ e nyɔmtsɛ ɔ. Kɛkɛ nɛ we tsɛ ɔ muklii mi fu, nɛ e de tsɔlɔ ɔ ke: ‘Jee kpo esɔ kɛ ya ma a mi gbɛjegbɛ ɔmɛ kɛ magbɛ ɔme kɛ puɔ ɔmɛ a kpɛ, nɛ o ya ngɔ ohiafohi kɛ glɔtsɛmɛ kɛ hɛyuyuili kɛ pɔtsɛmɛ kɛ ba hiɛ ɔ.’ 22Nɛ tsɔlɔ ɔ ke: ‘Nyɔmtsɛ, a pee bɔ nɛ o de ɔ, se kɛ ɔ blɔ pa ngɛ.’ 23Nɛ Nyɔmtsɛ ɔ de tsɔlɔ ɔ ke: ‘Jee kpo nɛ o ya nyɛ a nɔ nɛ a ba, konɛ ye we ɔ nɛ hyi tɔ.’ 24Ejakaa i ngɛ nyɛ dee ke: ‘Ke nihi nɛ a kpee ɔmɛ a ti nɔ ko sa e nyɛ ye niyeni ɔ fii!’ ”

Kristo kaselɔ peemi

(Mateo 10.37-38)

25Nihi babauu kɛ Yesu nyɛɛ, nɛ e plɛ e he nɛ e de mɛ ke: 26“Ke nɔ ko ma ye ngɔ nɛ e nyɛ́ e tsɛ kɛ e nyɛ kɛ e yo kɛ e bimɛ kɛ e nyɛmimɛ nyumuhi kɛ lɛ nitsɛ e klaa hu tete ɔ, e be nyɛe ye kaselɔ peemi. 27Nɛ nɔ tsuaa nɔ nɛ wo we e seumi tso ngɔ tloo kɛ nyɛɛ ye se ɔ, e be nyɛe ye kaselɔ peemi. 28Ejakaa nyɛ ti mɛnɔ nɛ ke e ngɛ hlae nɛ e ma mɔ ɔ nɛ e be si hie nɛ e bu nya nɛ e hyɛ lolo kaa e ngɛ nihi bɔ nɛ maa su nya gbemi lo? 29Konɛ e ko ba kaa, benɛ e je sisi nɛ e ya nyɛ we nya nɛ e gbe ɔ, nihi tsuo nɛ na a ba bɔni e he fɛu yemi ke: 30‘Kikɛmɛ a nɔmlɔ nɛ ɔ bɔni mɔ mami, se e nyɛ we nya nɛ e gbe.’ 31Aloo te matsɛ nɛ ke e kɛ matsɛ kpa ko yaa hwu ta a nɛ e be si hie nɛ e susu he nɛ e hyɛ kaa nɔ nɛ hɛɛ nimli akpɛ nyingmi enyɔ kɛ ma e nɔ nɛ ɔ ɔ, e ma nyɛ nɛ e kɛ lɛ ya kpe kɛ nimli akpe nyɔma lo? 32Ke pi ja a, benɛ matsɛ kake ɔ nyɛɛ tsitsa lokoo kɛ ma a, e maa tsɔ tsɔli kɛ ya e ngɔ ya kpa kpatami he pɛɛ. 33Ja nɔuu kɛ nyɛ ti nɔ tsuaa nɔ nɛ kua we nihi kulaa nɛ e ngɛ ɔ, be nyɛe ye kaselɔ peemi.”

Ngo nɛ nya nyu gbo

(Mateo 5.13; Marko 9.50)

34“Ngo hi; se ke ngo nya nyu gbo ɔ, mɛni a ma kɛ wo lɛ ngo ekohu? 35E hi nɛ a maa ngɔ lɛ kaa zu loo kuku tete; a tsɛɛ ngɔ pueɔ he. Nɔ nɛ ngɛ tue nɛ e kɛ maa nu ɔ, e nu.”

Currently Selected:

Luka 14: DAN77

Highlight

Copy