Luka 10

Yesu tsɔ ni nyingmi kpaago kɛ enyɔ

1Ni nɛ ɔmɛ a se ɔ, Nyɔmtsɛ ɔ hia ni nyingmi kpaago kɛ enyɔ kpã hu, nɛ e tsɔ mɛ enyɔenyɔ kɛ sɛ e hlami kɛ ya ma tsuaa ma nɔ kɛ he tsuaa he nɛ lɛ nitsɛ e maa ya a. 2Kɛkɛ nɛ e de mɛ ke: “Ni kpami ɔ hiɛ, se ni tsuli ɔmɛ pi; lɔ ɔ he ɔ nyɛ kpa ni kpami Nyɔmtsɛ ɔ pɛɛ konɛ e tsɔ ni tsuli kɛ ya e ni kpami ɔ he. 3Nyɛɛ ya! oʼɛ, i ngɛ nyɛ tsɔe kaa to bihi ngɛ ogbeteehi a kpɛti. 4Nyɛ ko hɛɛ sika kpɛɛ loo kotoku loo tokotahi, nɛ nyɛ ko nga nɔ ko ngɛ blɔ ɔ nɔ. 5Nɛ we tsuaa we mi nɛ nyɛ maa sɛ ɔ, kekleekle ɔ nyɛ de ke: ‘Manye nɛ ba we nɛ ɔ mi!’ 6Nɛ ke hejɔmi bi ko ngɛ lejɛ ɔ, nyɛ hejɔmi ɔ maa hi e nɔ; se ke pi jã a, e maa kpale e se kɛ ba nyɛ ngɔ ekohu. 7Nɛ nyɛɛ hi jamɛ a we ɔ mi nɔuu, nɛ nyɛɛ ye nɛ nyɛɛ nu nɔ́ nɛ a ma ha nyɛ ɔ ejakaa ni tsulɔ ɔ, e hiɔwo sa lɛ. Nyɛ ko klɛ̃ kɛ je we mi kɛ ya we mi. 8Nɛ ma tsuaa ma mi nɛ nyɛ maa sɛ nɛ a ma he nyɛ ɔ, nɔ́ tsuaa nɔ́ nɛ a kɛ ma nyɛ hɛ mi ɔ nyɛɛ ye. 9Nɛ nyɛ tsa hiɔtsɛmɛ nɛ ngɛ mi ɔ, nɛ nyɛ de mɛ ke: ‘Mawu matsɛ yemi ɔ na nyɛ. 10Se ma tsuaa ma mi nɛ nyɛ maa sɛ nɛ a he we nyɛ ɔ, nyɛɛ je kɛ ho gbɛjegbɛ ɔmɛ a nɔ ya nɛ nyɛ de ke: 11‘Wa ngɛ nyɛ ma nɛ ɔ mi bunyuku tete nɛ ngɛ wa nanehi a he ɔ blɛe kɛ ngɛ nyɛ nɔ puee; se kɛ ɔ nyɛ na le kaa Mawu matsɛ yemi ɔ na nyɛ.’ 12I ngɛ nyɛ dee ke: Jamɛ a ligbi ɔ nɔ ɔ, e maa fani Sodom tete ngɛ jamɛ a ma a he.”

Mahi nɛ he we yi ɔ

(Mateo 11.20-24)

13“Musu tloo mo, Korazin! Musu tloo mo, Betsaida! Ejakaa kaa hewami ni tsumihi nɛ a tsu ngɛ nyɛ mi nɛ ɔ, Tiro kɛ Zidon a tsu ngɛ jinɛ a hii si ngɛ kpekpe kɛ lazu mi nɛ a tsake a tsui momoomo. 14Se kojomi ɔ mi ɔ, e maa fani Tiro kɛ Zidon ngɛ nyɛ he! 15Nɛ mo, Kapernaum, pi hiɔwe nɛ a wo o nɔ kɛ ho? A maa ba mo si kɛ maa ya gbeje lokoo!

16“Nɔ nɛ buɔ nyɛ tue ɔ, imi tue e buɔ ɔ nɛ; nɛ nɔ nɛ kuaa nyɛ ɔ, imi e kuaa a nɛ; nɛ nɔ nɛ kuaa mi ɔ, nɔ nɛ tsɔ mi ɔ e kuaa a nɛ.”

Ni nyingmi kpaago kɛ enyɔ ɔmɛ a sekpalemi

17Ni nyingmi kpaago kɛ enyɔ ɔ kpale a se kɛ ba kɛ buajɔmi nɛ a ba de ke: “Nyɔmtsɛ, o biɛ ɔ he ɔ mumi yayamihi tete baa a he si haa wɔ.” 18Se e de mɛ ke: “I na Satan kaa oslaba nɛ tsɔ kɛ je hiɔwe ba nɔ si. 19Oʼɛ, i ha nyɛ he blɔ nɛ nyɛɛ naa sinɔhi kɛ nyingmogblakotohi kɛ henyɛlɔ ɔ hewami ɔ kulaa nɔ, nɛ nɔ́ ko nɔ́ ko be nyɛ yayami pee. 20Se kɛ ɔ, nyɛ ko na enɛ ɔ he buajɔmi kaa mumi ɔmɛ baa a he si ngɔ haa nyɛ ɔ, se mohu nyɛ na buajɔmi kaa a ngma nyɛ biɛ ngɛ hiɔwe.”

Yesu bua jɔ

(Mateo 11.25-27; 13.16-17)

21Jamɛ a ngmlɛfia a nɔ nɔuu ɔ, Yesu bua jɔ ngɛ Mumi Klɔuklɔu ɔ mi nɛ e ke: “I ngɛ o yi jee, Tsaatsɛ, hiɔwe kɛ zugba Nyɔmtsɛ, kaa o ngɔ ni nɛ ɔmɛ ngɔ laa ni leli kɛ ga leli, nɛ o je ngɔ tsɔɔ bimwɔwi. Ee, Tsaatsɛ, ejakaa jã ji bɔ nɛ sa o hɛ mi.

22“Tsaatsɛ tu nihi tsuo kulaa ngɔ wo ye dɛ, nɛ nɔ ko li nɔ nɛ ji Bi ɔ, ja Tsɛ ɔ kɛkɛ, kɛ nɔ nɛ ji Tsɛ ɔ, ja Bi ɔ kɛ nɔ nɛ Bi ɔ suɔ kaa e je lɛ kpo ngɔ tsɔɔ ɔ.”

23Kɛkɛ nɛ Yesu plɛ e hɛ mi ha e kaseli ɔmɛ nɛ e de mɛ ngɛ se zaa ke: “A gbaa hɛngmɛhi nɛ naa nihi nɛ nyɛ ngɛ nae nɛ ɔ. 24Ejakaa i ngɛ nyɛ de kɛ: Gbali kɛ matsɛmɛ fuu hla kaa a ko na nihi nɛ nyɛ ngɛ nae nɛ ɔ, se a nɛ, kɛ jeha nɛ ɔ kaa a ko nu nihi nɛ nyɛ ngɛ nue nɛ ɔ se a nui.”

Samariano mɔbɔnalɔ ɔ

25Kɛkɛ nɛ mlaatsɔɔlɔ ko te si da si nɛ e tsɔ e nya kɛ bi lɛ ke: “Tsɔɔlɔ, mɛni ma pee nɛ ma na neneene wami?” 26Se Yesu bi lɛ ke: “Mɛni a ngma ngɛ Mlaa a mi ɔ, nɛ kɛ o kaneɔ lɛ kɛɛ?” 27Mlaatsɔɔlɔ ɔ ha lɛ heto ke: “Suɔ Nyɔmtsɛ, o Mawu ɔ kɛ je o tsui kulaa, kɛ o klaa kulaa, kɛ o hewami kulaa, kɛ o juɛmi kulaa mi, kɛ o nyɛmi nɔmlɔ hu kaa bɔ nɛ o suɔ mo nitsɛ o he.” 28Yesu de lɛ ke: “Bɔ nɛ o ha heto ɔ da, pee ja nɛ o yi ma na wami.”

29Se mlaatsɔɔlɔ ɔ, akɛnɛ e ngɛ hlae nɛ e bu e he bemi he je ɔ, e bi Yesu ke: Mɛnɔ ji mami?” 30Yesu he nɔ nɛ e ke: “Nyumu ko pue nɔ kɛ je Yerusalem kɛ yaa Yeriko nɛ e ya nɔ ojo fiali komɛ a kpɛti. A kpɔ e he tade ɔ nɛ a plaa lɛ, nɛ a je, nɛ a si lɛ nɛ e gbo fã kɛ fã. 31E ba mi kaa osɔfo ko ba gu lɛ blɔ ɔ nɔ; nɛ benɛ e na lɛ ɔ, e tsɔ e he kɛ be. 32Nɛ ja nɔuu Levino ko hu, benɛ e su lejɛ ɔ nɛ e na lɛ ɔ, e tsɔ e he kɛ be. 33Se Samariano ko nɛ nyɛɛ blɔ ba su he nɛ e ngɛ ɔ, nɛ benɛ e na lɛ ɔ, e muklii mi sa lɛ, 34nɛ e ya e ngɔ, nɛ e ya fi e pa amɛ a nɔ, nɛ e plɛ nu kɛ wai pue nɔ, nɛ e pa wo lɛ ngɔ hi lɛ nitsɛ e lohwe nɔ, nɛ e ngɔ lɛ kɛ ya nibwɔhi a to he nɛ e ya hyɛ e nɔ. 35Nɛ e nɔ je na, benɛ e yaa a, e je cedi enyɔ ngɔ ha nibwɔhi a tohetsɛ ɔ nɛ e de lɛ ke: ‘Hyɛ lɛ saminya, nɛ nɔ́ tsuaa nɔ́ nɛ o ma pa puɛ ngɛ e he ɔ, ke i kpale ye se kɛ ba a, ma wo mo hiɔ.’ 36Jeha nɛ ɔ, ni etɛ nɛ ɔmɛ a kpɛti mɛnɔ o susu kaa e pee nɔ nɛ ya nɔ ojo fiali a kpɛti nɔ huɛ?” 37E ha heto ke: “Nɔ nɛ na lɛ mɔbɔ ɔ.” Kɛkɛ nɛ Yesu de lɛ ke: “Mo hu yaa nɛ o ya pee ja nɔuu.”

Yesu ya slaa Marta ke Maria

38E ba mi kaa benɛ a yaa a, Yesu ya sɛ kɔpe ko mi. Nɛ yo ko nɛ a tsɛɛ lɛ Marta a ngɔ lɛ kɛ ho e we mi ya. 39Marta ngɛ nyɛmi yo ko nɛ a tsɛɛ lɛ Maria, nɛ lɛ hu e ba hi si ngɛ Yesu nane nya nɛ e bu e munyu ɔ tue. 40Se Marta hao e he fuu tsɔ ngɛ sɔmɔmi babauu he, nɛ e ba Yesu ngɔ ba de ke: “Mawetsɛ, o nɛ́ kaa mami ɔ si mi nɛ ye nɔ kake i ngɛ sɔmɔe nɛ ɔ? Lɔ ɔ he ɔ de lɛ nɛ lɛ hu e ba piɛ ye he.” 41Se Yesu ha heto nɛ e de lɛ ke: “Marta, Marta, o ngɛ o he nya gbae nɛ o ngɛ o he haoe ngɛ nihi fuu he; 42se nɔ́ kake lɛ he hia. Nɔ́ nɛ hi ɔ lɔ ɔ Maria ngɔ ɔ nɛ, nɛ a be kpɔe ngɛ e dɛ.”

Currently Selected:

Luka 10: DAN77

Highlight

Copy