Yohane 8

Yo nɛ a nu lɛ ngɛ ajuamabɔmi mi ɔ

1Kɛkɛ nɛ Yesu pue nɔ kɛ ho Nuyoku ɔ nɔ ya. 2Nɛ mɔtu mla a, e ba sɔlemi we ɔ ekohu, nɛ ma a tsuo ba e ngɔ, nɛ e ya hi si, nɛ e tsɔɔ mɛ ni. 3Nɛ mlaa tsɔɔli ɔmɛ kɛ Farisifo ɔmɛ kɛ yo ko nɛ a nu lɛ ngɛ ajuama bɔmi mi ba e ngɔ, nɛ a ha e ba da a kpɛti, 4nɛ a de Yesu ke: “Tsɔɔlɔ, kikɛmɛ a yo nɛ ɔ ɔ, ajuama bɔmi mi tutuutu a nu lɛ ngɛ. 5Jeha nɛ ɔ Mlaa a mi ɔ, Mose wo wɔ kita ke a fia kikɛmɛ a yihi tɛ; se kɛ mo hu o deɔ kɛɛ?” 6Se enɛ ɔ ɔ, a de kɛ da lɛ konɛ a na nɔ́ ko nɛ a kɛ ya po e nya. Kɛkɛ nɛ Yesu sɔ́ si, nɛ e kɛ e nguɛ ngma ni ngɛ zugba mi. 7Se benɛ a ngɛ nɔ ngɛ lɛ bie ɔ, e wo e he nɔ nɛ e de mɛ ke: “Nyɛ ti nɔ nɛ yayami ko be e he ɔ, lɛ kekle e fia lɛ tɛ ɔ.” 8Nɛ e kpale sɔ̃ si ekohu, nɛ e ngma ni ngɛ zugba mi. 9Se mɛɛ lɛɛ benɛ a nu ɔ, a bɔni kpo jemi kakaaka, kɛ je kekle nɔ ɔ nɔ kɛ ya si sekpɛ nɔ ɔ nɔ, nɛ e ba piɛ Yesu nɔ kake kɛ yo ɔ nɛ daa si ngɛ kpɛti. 10Benɛ Yesu wo e hɛ̃ nɔ nɛ e nɛ́ nɔ ko kaa ja yo ɔ, e bi lɛ ke: “Maa, jije o nya poli ɔmɛ ngɛ? Anɛ nɔ ko bui mo fɔ lo?” 11Nɛ e ke: “Nyɔmtsɛ, nɔ ko bui mi fɔ.” Nɛ Yesu de lɛ ke: “Lɛɛ imi hu i bui mo fɔ mɔ. Yaa nɛ o ko ya pee yayami hu.”]

Yesu ji je ɔ la

12Kɛkɛ nɛ Yesu kɛ mɛ tu munyu ekohu nɛ e ke: “Imi ji je ɔ la a nɛ. Nɔ nɛ nyɛɛ ye se ɔ, e be diblii mi nyɛe gblegbleegblee, se mohu e ma na wami la a.” 13Lɔ ɔ he ɔ Farisifo ɔmɛ de lɛ ke: “Moo lɛɛ, mo nitsɛ o he odase o ngɛ yee; o dase ɔ be mi.” 14Yesu he nɔ nɛ e de mɛ ke: “Ke i ngɛ imi nitsɛ ye he odase yee hu po ɔ, ye dase ɔ ngɛ mi, ejakaa i le he nɛ i je kɛ he nɛ i yaa, se nyɛɛ lɛɛ, nyɛ li he nɛ i je loo he nɛ i yaa. 15Nyɛɛ lɛɛ nyɛ kojoɔ he lo nya; imi lɛɛ i kojo we nɔ ko. 16Nɛ ke i kojoɔ tete po hu ɔ, ye kojomi ɔ anɔkuale ʼi, ejakaa pi ye nɔ kake ʼi, se mohu i kɛ Tsɛ nɛ tsɔ mi ɔ. 17Nɛ pohu nyɛ Mlaa a mi ɔ, a ngma ke: ‘Ni enyɔ a odase ɔ anɔkuale ʼi. 18Imi, lɛɛ i yeɔ imi nitsɛ ye he odase, nɛ Tsɛ ɔ nɛ tsɔ mi ɔ hu yeɔ ye he odase.” 19Jeha nɛ ɔ a bi lɛ ke: “Jije o tsɛ ɔ ngɛ?” Yesu he nɔ ke: “Nyɛ li mi nɛ nyɛ pa li Tsaatsɛ. Kaa nyɛ le mi ɔ, nyɛ ko le Tsaatsɛ hulɔ.”

20Yesu tu munyu nɛ ɔmɛ ngɛ nito he ɔ benɛ e ngɛ ni tsɔɔe ngɛ sɔlemi we ɔ; nɛ nɔ ko nui lɛ, ejakaa e ngmlɛfia a sui.

Nyɛ be nyɛe he nɛ i yaa a maa ya

21Kɛkɛ nɛ Yesu kpale de mɛ ekohu ke: “Imi lɛɛ i yaa, se nyɛ ma hla mi, nɛ nyɛ he yayami mi nyɛ ma gbo ngɛ. He nɛ i yaa a, nyɛ be lejɛ ɔ nyɛe maa ba.” 22Lɔ ɔ he ɔ Yudafo ɔmɛ ke: “Anɛ e yaa gbe e he he je nɛ e deɔ ke: ‘He nɛ i yaa a, nyɛ be lejɛ ɔ nyɛe maa ba’ a?” 23Nɛ e de mɛ ke: “Nyɛɛ lɛɛ nyɛ je sisi nɛ ɔ, se imi lɛɛ hiɔwe i je. Nyɛɛ lɛɛ nyɛ je je nɛ ɔ mi, se imi lɛɛ i ji je nɛ ɔ mi. 24Lɔ ɔ he nɛ i de nyɛ ke nyɛ ma gbo ngɛ nyɛ he yayami ɔmɛ a mi ɔ nɛ; ejakaa ke nyɛ he we yi kaa imi nɛ ɔ ji lɛ ɔ, nyɛ ma gbo ngɛ nyɛ he yayami ɔmɛ a mi.” 25Jeha nɛ ɔ a bi lɛ ke: “Mɛnɔ ji mo?” Nɛ Yesu de mɛ ke: “Lɔ ɔ nɔuu i de nyɛ kɛ je sisi ɔ nɛ. 26I ngɛ nyɛ he sanehi fuu nɛ ma de nɛ ma kɛ kojo nyɛ; se kɛ̃ ɔ, nɔ nɛ tsɔ mi ɔ anɔkualetsɛ ʼi, nɛ imi lɛɛ nihi nɛ i nu kɛ je e nya a, lɔ ɔmɛ nɔuu i deɔ ngɔ tsɔɔ je ɔ nɛ.”

27A li kãa Tsɛ ɔ he munyu e kɛ mɛ ngɛ tue ɔ. 28Lɔ ɔ he ɔ Yesu de mɛ ke: “Ke nyɛ na nyɛ wo Nɔmlɔ Bi ɔ nɔ ɔ, lɔ ɔ loko nyɛ maa le kaa ami ʼi, nɛ kãa i to we ye yi mi i pee we nɔ́ ko, se mohu nɔ nɛ Tsaatsɛ tsɔɔ mi ɔ ja i deɔ. 29Nɛ nɔ nɛ tsɔ mi ɔ kɛ mi ngɛ, Tsɛ ɔ si we ye nɔ kake, ejakaa imi lɛɛ, nɔ́ nɛ sa e hɛ mi i peɔ daa.” 30Benɛ e ngɛ ni nɛ ɔmɛ dee ɔ, nihi fuu he e nɔ ye.

Odehehi kɛ nyɔguɛhi

31Kɛkɛ nɛ Yesu de Yudafo ɔmɛ nɛ he lɛ ye ɔ ke: “Ke nyɛ hi si ngɛ ye munyu ɔ mi ɔ, ye kaseli nitsɛmɛ ji nyɛ, 32nɛ nyɛ maa le anɔkuale ɔ, nɛ anɔkuale ɔ ma ha nyɛ maa ye nyɛ he.” 33A he nɔ ke: “Abraham nina ji wɔ, nɛ wa pee we nɔ ko nyɔguɛhi hyɛ; kɛ pee kɛɛ nɛ mo o deɔ ke: ‘Nyɛ maa ye nya he’ ɔ?” 34Yesu he nɔ ke: “I ngɛ nyɛ dee anɔkuale mi ke: Nɔ tsuaa nɔ nɛ peɔ yayami ɔ, yayami ɔ nyɔguɛ ji lɛ. 35Nyɔguɛ hi we mi kɛ yɛ neneene, se bi hii si kɛ yaa neneene. 36Lɔ ɔ he ɔ ke bi ɔ ha nyɛ ye nyɛ he ɔ, lɔ ɔ loko nyɛ maa ye nyɛ he niinɛ. 37I le kaa Abraham nina ji nyɛ; nɛ kɛ̃ ɔ nyɛ ngɛ mi hlae nɛ nyɛɛ gbe, ejakaa ye munyu sɛ we nyɛ mi. 38Ini lɛɛ nihi nɛ i na ngɛ Tsaatsɛ he ɔ, lɔ ɔ i deɔ; nɛ nyɛ hu nihi nɛ nyɛ nu kɛ je nyɛ tsɛ nya a, kɔlɔ ɔ nyɛ peɔ.”

39A he nɔ nɛ a de lɛ ke: “Wa tsɛ ji Abraham.” Yesu de mɛ ke: “Abraham bimɛ ji nyɛ jinɛ nyɛ ma tsu Abraham ni tsumihi. 40Se jeha nɛ ɔ nyɛ ngɛ mi hlae nɛ nyɛɛ gbe, imi nɔmlɔ ko nɛ i de nyɛ anɔkuale nɛ i nu ngɛ Mawu nya a; Abraham pee we enɛ ɔ. 41Nyɛɛ lɛɛ, nyɛ tsɛ ni tsumihi nyɛ tsuɔ.” Kɛkɛ nɛ a de lɛ ke: “Wɔɔ lɛɛ, a fɔ we wɔ ngɛ ajuama bɔmi mi; tsɛ kake wa ngɛ, lɛ ji Mawu.” 42Kɛkɛ nɛ Yesu de mɛ ke: “Mawu ji nyɛ tsɛ jinɛ nyɛ maa suɔ mi, ejakaa imi lɛɛ, Mawu ngɔ i je kɛ ba; nɛ pohu i to we imi nitsɛ ye yi mi kɛ bɛ, se mohu lɛ nɛ tsɔ mi. 43Mɛni he je nyɛ nɛ́ ye munyu nya a? E je ye munyu tue nɛ nyɛ bui ɔ. 44Nyɛɛ lɛɛ, nyɛ tsɛ nɛ nyɛ je e mi ji abosiami, nɛ nyɛ tsɛ ɔ tsui nya ni nyɛ suɔ kaa nyɛɛ pee. Lɛɛ nɔ gbelɔ ji lɛ kɛ je blema, nɛ e hi si ngɛ anɔkuale ɔ mi, ejakaa anɔkuale be e mi. Ke e ngɛ lakpa yee ɔ, lɛ nitsɛ e nihi a he munyu e tuɔ, ejakaa lakpatsɛ kɛ nya ngɔli a tsɛ ji lɛ. 45Se imi lɛɛ, akɛnɛ i tuɔ anɔkuale he je ɔ, nyɛ he we mi yi. 46Nyɛ ti mɛnɔ buu mi fɔ ngɛ yayami ko he? Se ke anɔkuale i tuɔ ɔ, mɛni he je nyɛ he we mi yi ɔ? 47Nɔ nɛ je Mawu mi ɔ, e nuɔ Mawu munyu; lɔ ɔ he nɛ nyɛɛ lɛɛ nyɛ nui ɔ nɛ, ejakaa nyɛ ji Mawu mi.”

Yesu kɛ Abraham

48Kɛkɛ nɛ Yudafo ɔmɛ he nɔ nɛ a de Yesu ke: “Anɛ e be mi kaa wa ke Samariano ji mo, nɛ mumi yayami hu ngɛ o mi ɔ lo?” 49Yesu he nɔ ke: “Mumi yayami be ye mi, se pe i ngɛ Tsaatsɛ puae, nɛ nyɛɛ lɛɛ, nyɛ ngɛ ye he guɛ gbee mohu. 50I hla we imi nitsɛ ye hɛ mi nyami, se nɔ ko ngɛ nɛ hlaa nɛ e kojoɔ. 51I ngɛ nyɛ dee anɔkuale mi ke: Ke nɔ ko ye ye munyu ɔ nɔ ɔ, e be gboe gblegbleegblee.” 52Kɛkɛ nɛ Yudafo ɔmɛ de lɛ ke: “Kpaako wa na le kãa mumi yayami ngɛ o mi. Abraham gbo, nɛ gbali ɔmɛ hu gbo, nɛ moo lɛɛ o deɔ ke: ‘Ke nɔ ko ye ye munyu ɔ nɔ ɔ, e be gboe ligbi ko ligbi ko kɛ maa ya neneene.’ 53Anɛ o pe wa tsɛ Abraham nɛ gbo ɔ? Nɛ gbali ɔmɛ hu gbo. Kɛ o ngɛ o he tsɛe kɛɛ nɛ ɔ?” 54Yesu he nɔ ke: “Ke i wo imi nitsɛ ye hɛ mi nyami ɔ, ye hɛ mi nyɛmi ɔ pi nɔ́ ko. Tsaatsɛ ji nɔ nɛ woɔ ye hɛ mi nyami, nɔ nɛ nyɛ deɔ ke nyɛ Mawu ji lɛ ɔ, 55nɛ nyɛ yo we lɛ, se imi lɛɛ i le lɛ. Ke i de ke i li lɛ ɔ, ma pee nyangɔlɔ kaa nyɛ; se i le lɛ nɛ i yeɔ e munyu nɔ. 56Nyɛ tsɛ Abraham hia kɛ bua jɔmi kãa e ko na ye ligbi ɔ, nɛ e na nɛ e bua jɔ.” 57Kɛkɛ nɛ Yudafo ɔmɛ de lɛ ke: “O na we nɛ o ye jeha nyingmi enuɔ nɛ o na Abraham lo?” 58Yesu de mɛ ke: “I ngɛ nyɛ dee anɔkuale mi ke: I ngɛ loko Abraham ngɛ.” 59Kɛkɛ nɛ da kukuɔ tɛ nɛ a maa fia lɛ; se Yesu laa e he, nɛ e je sɔlemi we ɔ kɛ ho.

Currently Selected:

Yohane 8: DAN77

Highlight

Copy