Yohane 2

Yokpeemi ngɛ Kana

1E nɔ ligbi etɛ ɔ, a kpee yo ngɛ Kana ngɛ Galilea, nɛ Yesu nyɛ ngɛ lejɛ ɔ. 2Nɛ a kpee Yesu hu kɛ e kaseli ɔmɛ kɛ ya yo kpeemi ɔ. 3Nɛ bene wai ɔ sui ɔ, Yesu nyɛ de lɛ ke: “A be wai.” 4Yesu de lɛ ke: “Maa, mɛni sane i kɛ mo ngɛ? Ye ngmlɛfia a sui lolo.” 5E nyɛ de sɔmɔli ɔmɛ ke: “Nɔ́ tsuaa nɔ nɛ e ma de nyɛ ɔ nyɛɛ pee.”

6Ngmawe ekpa maa si ngɛ lejɛ ɔ ngɛ Yudafo ɔmɛ a he fɔmi he; kake peɔ paya buɛhi enyɔ loo etɛ. 7Yesu de sɔmɔli ɔmɛ ke: “Nyɛɛ wo ngmawe ɔmɛ a mi nyu nɛ a hyi.” Nɛ a wo a mi nyu nɛ a hyi tɔtɔɔtɔ. 8Nɛ e de mɛ ke: “Nyɛɛ yɛ eko ya ha da nya dalɔ ɔ.” Nɛ a kɛ ya. 9Se bene da nya dalɔ ɔ sa e nya nyu nɛ plɛ wai ɔ nɛ e li he nɛ a kɛ je se sɔmɔli ɔmɛ nɛ yɛ nyu ɔ kɛke lɛ a le ɔ, e tsɛ ayɛflo huno ɔ, 10nɛ e de lɛ ke: “Nɔ tsuaa nɔ ɔ, wai kpakpa e kɛ ba maa si kekle, nɛ bene ni ɔmɛ tɔ ɔ, lɔ ɔ se loko a kɛ nɔ́ nɛ ngɔɛ ɔ baa; se moo lɛɛ o ngɔ wai kpakpa a mohu ngɔ to kɛ ba su be nɛ ɔ.”

11Enɛ ɔ Yesu kɛ je e nyakpɛ ni ɔmɛ a sisi ngɛ Kana ngɛ Galilea, nɛ e ngɔ e hɛ mi nyami ɔ ngɔ tsɔɔ, nɛ e kaseli ɔmɛ he e nɔ ye. 12Enɛ ɔ se ɔ, e pue nɔ kɛ ho Kapernaum ya, lɛ kɛ e nyɛ kɛ e nyɛmimɛ kɛ e kaseli ɔmɛ, se a yi ligbi fuu ngɛ lejɛ ɔ.

Yesu ya sɔlemi we ɔ

(Mateo 21.12-13; Marko 11.15-17; Luka 19.45-46)

13Yudafo ɔmɛ a Hetsɔmi ɔ su ta nɛ Yesu ya Yerusalem. 14E ya na nihi nɛ ngɛ nahi kɛ tohi kɛ lahuɛhi juae kɛ nihi nɛ ngɛ sika tsakee hulɔ nɛ a hii si ngɛ sɔlemi we ɔ. 15Nɛ e ngɔ tangme tsɔwi nɛ e kɛ pee kplibi nɛ e kɛ fie mɛ tsuo kɛ je sɔlemi we ɔ, kɛ tohi kɛ na amɛ; nɛ e plɛ sika tsakeli ɔmɛ a sika a ngɔ pue si, nɛ e tsitsɛɛ okplɔɔ ɔmɛ ngɔ fia si; 16nɛ e de ninɛmɛ nɛ ngɛ lahuɛ ɔmɛ juae ɔ ke: “Nyɛ je ni nɛ ɔmɛ kɛ je hiɛ ɔ; nyɛ ko ngɔ Tsaatsɛ we ɔ ngɔ pee jua nɔ.” 17Kɛkɛ nɛ e kaseli ɔmɛ kai kaa a ngma ke: “O we ɔ he hɛdɔ ɔ maa ye mi.”

18Kɛkɛ nɛ Yudafo ɔmɛ he nɔ nɛ a de lɛ ke: “Mɛni okadi o kɛ ngɛ wɔ tsɔɔe kaa o ngɛ he blɔ nɛ o peɔ enɛ ɔmɛ?” 19Yesu he nɔ nɛ e de mɛ ke: “Nyɛɛ ku sɔlemi tsu nɛ ɔ, nɛ ligbi etɛ mi ɔ ma ma ekohu.” 20Kɛkɛ nɛ Yudafo ɔmɛ ke: “Jeha nyingmi eywiɛ kɛ ekpa a kɛ ma sɔlemi tsu nɛ ɔ, nɛ moo lɛɛ ligbi etɛ o kɛ maa ma lo?” 21Se lɛɛ e nɔmlɔ tso sɔlemi tsu ɔ he munyu e ngɛ tue ɔ nɛ. 22Lɔ ɔ he ɔ benɛ e te si kɛ je gbeje ɔ, e kaseli ɔmɛ kai kaa e de enɛ ɔ, nɛ a he ngmami ɔ kɛ munyu nɛ Yesu tu ɔ ye.

Yesu le nihi tsuo

23Jeha nɛ ɔ, benɛ Yesu ngɛ Yerusalem ngɛ Hetsɔmi ligbi ɔmɛ a mi ɔ, nihi fuu na nyakpɛ nihi nɛ e pee ɔ, nɛ a he e biɛ ɔ nɔ ye. 24Se Yesu nitsɛ lɛɛ e kɛ e he fɔɛ a nɔ, ejakaa e le mɛ tsuo. 25Nɛ e hia we lɛ kaa nɔ ko nɛ ye nɔmlɔ he odase ngɔ ha lɛ, ejakaa lɛ nitsɛ e le nɔ́ nɛ ngɛ nɔmlɔ mi.

Currently Selected:

Yohane 2: DAN77

Highlight

Copy