SAN MARCOS 11
11
Jesús aptaxnegwayam tegma apwányam Jerusalén
(Mt 21.1-11; Lc 19.28-40; Jn 12.12-19)
1Xama axta apkelágketchesekmo tegma apwányam Jerusalén, cham'a nátegma ekwesey axta Betfagé tén han ma'a Betania, keto' axta egkexe Olivos ma'a, apkeláphásek axta Jesús apkánet apkeltámeséyak. 2Aptahak axta apkeláneya s'e:
—Kólmohok hana nátegma egmonye nak. Kélántaxnegwokmek sat agkok ma'a nátegma nak, kólwetagwók sat yámelyeheykok kélteté táma m'a, megkántamaxche makham ma'a. Kóllekes sat táma, helyentegkásenta sat ko'o. 3Apkelmaxneyáha sat agkok xama énxet kéltahakxa, kólteme sat kólának se'e: ‘Wese' egegkok xeyk apmokók emha, kaxwo' hek xeyk yáphásekxak makham’.
4Apkelxegkek axta, apwetágwokmek axta xama yámelyeheykok kélteté nekha ámay, keto' axta átog ma'a. Aplekkesekmek axta anhan táma.
5Apkelmaxneyáha axta nápakha énxet'ák ektaha axta apheykha m'a. Aptahak axta apkeláneya s'e:
—¿Yaksak kéllana kéxegke? Yaksak ektaha kéllekesa nak táma yámelyeheykok?
6Aptemék axta apkelátegmoweyak ma'a aptahakxa axta apkeláneya Jesús; apcha'awók axta anhan apyentamákxo. 7Apkeltahanchesek axta apkelaklamap xa yámelyeheykok nak, apyentegkáseykxeyk axta Jesús. Apchánteyk axta nahan Jesús. 8Apxámok axta énxet apkelpeykásegko apkelaklamap ámay awáxok, keñe axta nápakha apnegkenágko yámet aktegák apkelyakténwayam axta yókxexma. 9Apsawhekpók axta apkelyennaktésawo apkelpeywa apkelxega apmonye'e, tén han ma'a apkelxega axta neptámen. Aptahak axta s'e:
—¡Kólpeykesho Dios! ¡Tásek sat katnehek apxénamap xa apwa'a nak eñama apsáyam Dios apwesey!#Sal 118.25-26. 10¡Tásek sat katnehek apxeyenma Dios ma'a aptémakxa nak Wese' apwányam David peya nak kawa', cham'a David aptaha axta negko'o egyap nano'! ¡Apcheymákpoho Dios apha nak néten!
11Aptaxnegwokmek axta Jesús nepyeseksa tegma apwányam Jerusalén, apmahágkek axta tegma appagkanamap. Apsawheyha axta exma apkelanawo kañe' tegma appagkanamap, keñe axta apmeyákxo tegma apwányam Betania yetlo m'a doce apkeltámeséyak axta, hakte taxnakmek axta m'a.
Jesús appakhetcheso ekmaso yámet higo meyke ekyexna
(Mt 21.18-19)
12Mók ekhem axta entahak, apkelxegákxo makham apkeleñama m'a Betania, meyk axta enchakhak Jesús. 13Makhawók axta apwet'ak xama yámet higo ekha áwa'. Apyo'ókmek axta apkeltamho étak ekyexna, axta eyke ét'ak ekyexna, áwa' axta aksa apwet'ak, hakte axta kawokmok ekyexnamakxa. 14Keñe axta aptaha apcháneya Jesús yámet higo s'e:
—¡Méko sat cha'a katwok ekyexna exche'!
Apkelleg'ak axta apkeltámeséyak xa.
Jesús apcháxñeso kañe' tegma appagkanamap
(Mt 21.12-17; Lc 19.45-48; Jn 2.13-22)
15Apkelwákxeyk axta tegma apwányam Jerusalén, aptaxnegwokmek axta Jesús kañe' tegma appagkanamap, apkelántekkesekmek axta énxet'ák apheykha kañe' ektaha axta apkelyanmagkásamap. Apkelyaknegkesásegkek axta mésa m'a énxet'ák apyakmagkasáseykekxoho axta cha'a selyakye pók, axta anhan apkelyaknegkesásegkok ma'a kélxátamakxa axta wáx'ay kélchexeykekxa; 16axta eltamhok elántaxnegwakxak énxet elsakxak aksok ma'a kañe' tegma appagkanamap. 17Keñe axta apkelxekmósa énxet'ák. Aptahak axta apkeláneya s'e:
—Temék eknaktáxésamaxche weykcha'áhak se'e: ‘Pók énxet'ák apkeleñama mók nekha aptamheykegkaxa nempeywa nelmaxnagko#Is 56.7. sat katnekxak se'e exagkok nak’, wánxa agkok apkelyexánegweykenxa apkelmenyexma eyke kéltemesáseykxak kéxegke.#Jer 7.11.
18Xama axta apkelleg'a apkelámha apmonye'e nak appasmo apkelmaxnéseso Dios énxet'ák apagkok xa, tén han ma'a énxet'ák apkelxekmóso axta apnámokkok ektémakxa segánamakxa, aptegyágkek axta yakwánxa etnehek yakhek Jesús, hakte apkelakak axta, apyókxoho énxet'ák axta pelakkásak apkelwet'a m'a ektahakxa axta apkelxekmóso Jesús. 19Xama axta peya kayaktések, aptekkek axta Jesús nepyeseksa tegma apwányam yetlo apkeltámeséyak.
Yámet ekwesey higo étsapma
(Mt 21.20-22)
20Axto'ok axta apkelyeykhágweykxo enmakxa yámet higo, apkelwet'ak axta ekwokmoho kepmenák étsapa m'a yámet nak. 21Xénwákxok axta apwáxok Pedro ektahakxa axta, aptahak axta apcháneya Jesús se'e:
—Sẽlxekmóso, elano hana, ketsekkek yámet appakhetchesa axta ekmaso.
22Aptahak axta apchátegmowágko Jesús se'e:
—Kólteme megkólya'áseyam Dios. 23Kéltemék agkok kéláneya kéxegke egkexe s'e: ‘Kapatyep xa, kataxnegwom wátsam ekwányam’, sat agkok kay'ásekmok kélwáxok, wánxa aksa megkólya'ásemek peya katnehek ma'a kéltahakxa enxoho kélpeywa, katnehek sat nahan ma'a.#Mt 17.20; 1 Co 13.2. Nakso' xa sektahakxa nak seláneya kéxegke. 24Eltennásak ko'o kéxegke m'a ekyókxoho aksok kélmaxnagko nak eñama nempeywa nelmaxnagko, nágkólya'ásem peya kólxawak, kólxawak sat. 25Kéltemek agkok nempeywa nelmaxnagko, nágkólyakmagkásekxa aksa aptemésesakxa ekmaso kélmók, yakwayam enxoho meyakmagkásekxék nahan kéltémakxa megkólya'asáxma m'a Kélyap apha nak néten.#Mt 6.14-15. 26Kélyakmagkásekxeyk sat agkok aptemésesakxa ekmaso kélmók, eyakmagkásekxak sat nahan kéltémakxa megkólya'asáxma m'a Kélyap apha nak néten.
Jesús apxawé apmopwána elának aksok
(Mt 21.23-27; Lc 20.1-8)
27Apkeltakháwok axta tegma apwányam Jerusalén natámen xa. Neyseksa apxega axta Jesús kañe' tegma appagkanamap, apyo'ókmo énxet'ák apkelámha apmonye'e nak appasmo apkelmaxnéseso Dios énxet'ák apagkok, axta nahan ma'a énxet'ák apkelxekmóso nak apnámokkok ektémakxa segánamakxa, tén han ma'a apkelámha apmonye'e nak apchakneykekxexa énxet'ák judíos. 28Aptahak axta apkelmaxneyeyncha'a s'e:
—¿Yaksak eyásenneykha exchep eltémo elának xa aksok nak? ¿Yaksak ekméso apmopwána yakwayam elának xa?
29-30Aptahak axta apchátegmowágko Jesús se'e:
—Peyk ko'o xa almaxneyha kéxegke: ¿Yaksak axta eyáphaso Juan yakwayam eyakpásesagkok yegmen énxet? ¿Diosya axta apcháphaso, énxet enxoho axta eykel'a apcháphaso? Hélategmowák. Elátegmowágkek sat agkok kéxegke, altennaksek sat nahan ko'o xa eñamakxa nak sekmowána.
31Aptahak axta apkelpakhetcháseykpoho s'e: “Nentemék agkok negátegmowágko Dios apcháphaso, keñe sat etnehek hegána', ‘¿yaksak axta ektéma kélya'ásekmo apkeltenneykha?’ 32Magwanchek anxének ektaha énxet apcháphaso...” Enxet'ák axta apkelakak, hakte apyókxoho énxet axta melya'áseykmok apkeltenneykencha'a Juan ekmámnaksoho agko' ma'a amya'a eñama nak Dios. 33Aptahak axta apkelátegmowágko Jesús apkelmaxneyeykha s'e:
—Magya'ásegkok negko'o.
Keñe axta nahan aptaha apchátegmowágko Jesús se'e:
—Maltennaksek nahan ko'o xa eñamakxa sekmowána alának xa.
Currently Selected:
SAN MARCOS 11: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
