SAN LUCAS 9
9
Jesús apkeláphaso apkeltámeséyak yakwayam eltennaha m'a aptémakxa nak Wese' apwányam Dios
(Mt 10.5-15; Mr 6.7-13)
1Apchánchesákxeyk axta Jesús doce apkeltámeséyak, apkelmeyásegkek axta apkelmopwancha'a yakwayam elántekkesek ekyókxoho ektémakxa kelyekhama', tén han yakwayam eltakmelchesók ma'a elháxamáxche. 2Apkeláphásek axta yakwayam enxoho eltennaha m'a aptémakxa nak Wese' apwányam Dios, tén han eltakmelchesók ma'a elháxamáxche. 3Aptahak axta apkeláneya s'e:
—Nágkólsaw aksa xama aksok neyseksa kélxega ámay, cham'a kéltaskapeykha nak, tén han ma'a nahápa, tén han ma'a kélto, tén han ma'a selyakye, nágkólsaw nahan kéltaxno yakwayam kólyakmagkasek pók.#Lc 10.4-11. 4Tegma kélwánxa enxoho, kólhamho sat ma'a ekwokmoho kélxegákxo enxoho makham mók nekha. 5Agkok kólmáxchek takha' nátegma kélwánxa enxoho, kólántep sat ma'a, kólpalches sat kélmagkok xóp ánek, yakwayam enxoho metnatchesek peya ellegásesagkohok Dios xa énxet'ák nak.#Hch 13.51.
6Apkelxegkek axta xa énxet'ák nak, apsawheyha axta nátegma, apkeltennáha axta cha'a m'a amya'a segwagkasamo nak teyp, apkeltakmelchesakmek axta anhan elháxamáxche.
Ektamheykha apwáxok Herodes
(Mt 14.1-12; Mr 6.14-29)
7Apleg'ak axta amya'a Herodes apxénákpo Jesús tén han ma'a ekyókxoho aksok apkelané axta Jesús; axta ey'ásegkok ektahakxa elchetamso apwáxok, hakte nápakha énxet axta apxénak apxátekhágwokmo Juan, 8keñe axta nápakha énxet apxénak apwa'akto makham Elías aptaha axta Dios appeywa aplegaso, keñe axta anhan nápakha énxet apxéna apxátekhágwokmo xama m'a énxet'ák nano' Dios appeywa apkellegaso axta.#Mt 16.14; Mr 8.28; Lc 9.19. 9Keñe axta Herodes aptaha appeywa s'e:
—Ko'o axta seltémo kólyakténchesek apyespok Juan. ¿Yaksak eyke kex'a m'a énxet nak, cham'a seklegayol'a cha'a exénakpok elának aksok ekxámokma.
Axta keñamak apkelenxáneykmo Herodes étak Jesús
Jesús apkeléyak aptéyak cinco mil énxet'ák
(Mt 14.13-21; Mr 6.30-44; Jn 6.1-14)
10Xama axta apkelwákxo aphakxa Jesús ma'a apkeltámeséyak, apkeltennáseyha axta Jesús ma'a ektahakxa axta aksok apkeláneyak. Mók nekha axta apkelya'ásak Jesús apxakcha'awók xa, axta apkelya'áseykxak ma'a nátegma eltamhomaxchexa axta Betsaida. 11Xama axta apkelleg'a amya'a énxet'ák, apkemhágkek axta; apkelápeyha axta Jesús xa énxet'ák nak, apkeltennáseyha axta m'a aptémakxa nak Wese' apwányam Dios, apkeltakmelchesakmek axta anhan énxet apkelháxamap.
12Xama axta ektaxnakmo, apya'awékxeyk axta doce apkeltámeséyak aphakxa Jesús. Aptahak axta apcháneya s'e:
—Eláphés énxet yakwayam enxoho ellókasekxak apkelyampé, tén han etegyagkok aptéyak ma'a nátegma, cham'a apheykegkaxa nak énxet eyágketexa, hakte méko aksok se'e yókxexma nak.
13Aptahak axta apkeláneya Jesús se'e:
—Kólmés kéxegke aptéyak.
Aptahak axta apkeltámeséyak apkelátegmowágko s'e:
Cinco pan akke aksa apyetna negko'o keñe ánet kelasma, apkeltamhok enxeykel'a antegyásekxak negko'o aptéyak apyókxoho xa énxet'ák nak.
14Cinco mil axta apyókxoho m'a énxet'ák nak. Wánxa agkok, aptahak axta apkeláneya Jesús apkeltámeséyak se'e:
—Kólána elyakyesagkok apheykha énxet. Cincuenta sat cha'a etnehek apyókxoho.
15Aptamhágkek axta anhan xa, apháha axta apyókxoho. 16Keñe axta apkelma Jesús ma'a cinco pan nak, tén han ma'a ánet kelasma, apsekhákxok axta néten, apmések axta ekxeyenma apwáxok Dios eñama m'a nento nak, apkelyepteyk axta pan, keñe axta apkelmeyásegko apkeltámeséyak yakwayam enxoho emlaskok énxet'ák. 17Aptókagkek axta énxet'ák xa ekwokmoho apkelyakkanakmo, doce axta anhan wokmok apxata eleymomáxche aptéyak.
Pedro apxeyenma Jesús aptaha Mesías
(Mt 16.13-19; Mr 8.27-29)
18Xama ekhem axta aptahak nempeywa nelmaxnagko apxakko' Jesús, apkeltámeséyak axta anhan apkelxegexma'a, aptahak axta apkelmaxneyeyncha'a s'e:
—¿Háxko aptémakxa énxet sexeyenma ko'o?
19Aptahak axta apkelátegmowágko apkeltámeséyak se'e:
—Nápakha énxet'ák cha'a aptahak apxéna exchep Juan el Bautista, keñe nápakha énxet apxéna exchep aptaha Elías, keñe nahan nápakha énxet apxéna apxátekhágwokmo xama m'a énxet'ák apkellegaso axta Dios appeywa nano' axta.#Mt 14.1-2; Mr 6.14-15; Lc 9.7-8.
20—Háxko eyke kéltémakxa sexeyenma ko'o kéxegke? —axta aptahak apkelmaxneyeyncha'a.
Aptahak axta apchátegmowágko Pedro s'e:
—Xép aptaha Mesías apkeñama Dios.#Jn 6.68-69.
Jesús apxeyenma yakwayam yetsapok
(Mt 16.20-28; Mr 8.30—9.1)
21Wánxa agkok, apkeltamhok axta eyke Jesús mexének apkeltámeséyak aptaha Mesías. 22Aptahak axta apkeláneya s'e:
—Awanhek sat katnehek aplegeykegkoho ektaha nak Apketche énxet, etaknók sat ma'a apkelámha apmonye'e nak apchakneykekxexa énxet'ák judíos, tén han ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Yakhek sat nahan, wánxa agkok, antanxo ekhem sat eyke exátekhágwók.
23Aptahak axta apkeláneya apyókxoho énxet'ák se'e:
—Kélmokók agkok kóltehek kélxama kéxegke selxekmóso, kólwatés xa kélmáheyókxa nak kóltehek kéxegke kélagko', kólpátem kélagko' aksok ektegyéso kélagkok yókxoho ekhem, hélyetlogma ko'o.#Mt 10.38; Lc 14.27; Jn 12.24. 24Kéxegke ektahakxa enxoho kélmasma ektémakxa nak kélyennakte, kamassegwók sat, wánxa agkok, kéxegke ektahakxa enxoho ekmassegwayam ektémakxa kélyennakte eñama ko'o, kólwetágwók sat kélyennakte.#Mt 10.39; Lc 17.33; Jn 12.25. 25¿Kapasmoya énxet ekmassegwokmo enxoho ektémakxa apyennakte m'a apweté nak ekyókxoho aksok keso náxop, cham'a aptawáseykpoho apagko' enxoho? 26Agkok exénak énxet aptaha sétleykha ko'o, tén han meltenneyncha'a enxoho m'a amya'a ahagkok, mexének sat nahan apwesey m'a aptaha nak Apketche énxet, cham'a apwakto sat yetlo apcheymákpoho, tén han apcheymákpoho m'a Apyap, tén han yetlo m'a apkelásenneykha apkelpagkanamap nak. 27Nápakha énxet'ák sat meletsepek apheyncha'a nak se'e met'a enxoho makham kawak ma'a aptémakxa nak Wese' apwányam Dios.
Jesús elyenmeykekxa apyókxa
(Mt 17.1-8; Mr 9.2-8)
28Natámen ekyeykhe axta ocho ekhem xa apkelpakhetcháseykpoho axta, apkenátweykxeyk axta néten egkexe Jesús yakwayam etnehek nempeywa nelmaxnagko. Pedro axta apxegexma, Santiago, tén han ma'a Juan.#2 P 1.17-18. 29Neyseksa apteme nempeywa nelmaxnagko axta yakmagkásak ektémakxa nápát Jesús, apmopé apagko' axta aptamhákxak aptaxno, apkelyenmákxeyk axta anhan; 30Apkelánteyapwa'ak axta anhan apkánet énxet apkelpakhetcháseykpoho Jesús. Moisés axta m'a, Elías axta anhan. 31Wakha'ak axta elseyexma eyeymáxkoho; axta apxénak yakwánxa katnehek apketsapma Jesús ma'a tegma apwányam Jerusalén. 32Apténawók axta Pedro tén han ma'a apkelxegexma'a. Xama axta apnakxétekhágko, apwet'ak axta Jesús apcheymákpoho, tén han apkelwet'a m'a apkánet énxet aptaha axta apkelxegexma'a. 33Xama axta peya ényekxak Jesús ma'a apkánet énxet nak, aptahak axta Pedro s'e:
—Sẽlxekmóso. ¡Ektakmelakxoho agko' nelwa'a negko'oxa s'e! Anlának sat negko'o apkántanxo tegma apketkók: xama sat xép, xama sat nahan Moisés, xama sat nahan ma'a Elías.
Axta ey'ásegkok Pedro m'a aptahakxa axta appeywa. 34Neyseksa appakmeyesma axta eyahapwa'a yaphopé xa apyókxoho nak. Xama axta apyekpelcha apchakneyncha'a kañe' yaphopé, apkelakak axta. 35Keñe axta ektepa kélpeywa neyseksa yaphopé. Entahak axta s'e: “Keso hatte ko'o s'e, aptaha axta selyéseykha,#Is 42.1; Mt 3.17; 12.18; Mr 1.11; Lc 3.22. kóleyxho appeywa.”
36Yetlókók axta aptamheykekxa apxakko' Jesús natámen eklegamaxche xa kélpeywa nak. Axta eyke eltenneykha xa énxet'ák nak, axta eltennáseykha xama énxet ma'a ektémakxa axta aksok apweté, cháxa ektéma axta xa.
Jesús aptakmelcheseyam wokma'ák ekha axta apwáxok espíritu ekmaso
(Mt 17.14-21; Mr 9.14-29)
37Mók ekhem axta entahak, apkelántepa apkeleñama m'a néten egkexe, énxet apxámokma axta apkelanyexágkok Jesús. 38Nepyeseksa énxet axta aptahak apyennaktésawo appeywa énxet se'e:
—Sẽlxekmóso, elano hana hatte. Wánxa ko'o xama hatte s'e; 39Kamok cha'a espíritu ekmaso xa, kapeykesesha nahan cha'a apátog, yetsepekxohok nahan cha'a, katekkesesek nahan cha'a ekyakmopé apwáxok. Katwasagkohok cha'a, yámenyék nahan keynyekxa'. 40Eltamhok xeykhe etekkesek apkeltámeséyak xa espíritu ekmaso nak, mopwancha'ak xeyke.
41Aptahak axta apchátegmowágko Jesús se'e:
—¡Enxet apkelya'áseyam kéxegke tén han kélxegányam! ¿Háxko sat ekwánxa ekhem kammok sekha ko'o kélnepyeseksa kéxegke? ¿Háxko sat ekwánxa ekhem kammok selenmáxamáxkoho kéxegke? Entemegma apketche s'e.
42Xama axta apyepetchegwokmoho Jesús ma'a wokma'ák nak, yaknegkesek axta kelyekhama' náxop xa wokma'ák nak, apketsapákxeyk axta makham, wánxa agkok apakhetchesek axta eyke Jesús ma'a espíritu ekmaso nak, aptakmelchesekmek axta m'a wokma'ák nak, keñe axta apmeyáseykxo m'a apyap. 43Pelakkasek axta apkelwet'a apyókxoho énxet'ák ektémakxa ekyawe apmopwána Dios.
Jesús apxéneykekxoho makham yakwayam yetsapok
(Mt 17.22-23; Mr 9.30-32)
Neyseksa ekpelakkaso apkelweté apyókxoho énxet'ák ektahakxa aksok apkelané Jesús axta aptahak apkeláneya apkeltámeséyak se'e:
44—Kóltakmelchesho kélháxenmo s'e. Nágkalwagkamak nahan: Kólának sat emok énxet'ák ma'a aptaha nak Apketche énxet.
45Axta eyke elya'ásegkok apkeltámeséyak aptahakxa axta apkeláneya Jesús, hakte axta egkeyásak Dios yakwayam elya'asagkoho'; apkelakak axta anhan yának eltennásekxohok Jesús ma'a ektahakxa axta aksok apxeyenma.
¿Yaksak ektaha ekyawe kéláyo?
(Mt 18.1-5; Mr 9.33-37)
46Apkelpakhetchásekpok axta Jesús apkeltámeséyak apxéna, yaksak kexaha ektahakxa ekyawe kéláyo nepyeseksa.#Lc 22.24. 47Xama axta apyekpelcha Jesús ektahakxa axta elchetamso apwáxok apkeltámeséyak, apmeyk axta xama sakcha'a, keñe axta apkenegkesekmo apkenmágkaxa. 48Aptahak axta apkeláneya s'e:
—Enxet ektahakxa enxoho apchápeykha s'e sakcha'a nak eñama apxeyenma ko'o sekwesey, heyahapmakha nahan ko'o xa; keñe énxet ektahakxa enxoho seyápeykha ko'o, yahapmakha nahan ma'a aptaha axta seyáphaso ko'o.#Mt 10.40; Lc 10.16; Jn 13.20. Enxet meyke nak kéláyo kélnepyeseksa kéxegke, cháxa ektahakxa ekyawe kéláyo xa.
Hegweyhénekxohok cha'a m'a énxet mehenmexeykha nak
(Mr 9.38-40)
49Aptahak axta Juan apcháneya Jesús se'e:
—Sẽlxekmóso, negwet'ak axta negko'o xama énxet aptekkesa kelyekhama' yetlo apxeyenma apwesey exchep; axta eyke óg'awok negko'o, hakte háwe nenxegexma.
50Aptahak axta apchátegmowágko Jesús se'e:
—Nágkólnókasha aksa, hakte énxet ektahakxa enxoho mehenmexeykha negko'o, hegweyhenekxohok cha'a.
Jesús apkelpakhetcheso Santiago tén han Juan
51Xama axta eyágketwokmo ekhem yakwánxa emyekxak néten Jesús, xénchek axta apwáxok emyekxak Jerusalén yetlo megyeye. 52Apkeláphásek axta apkeltámeséyak apkeltamho elmahagkok nátegma Samaria yakwayam enxoho etegyaha yakwánxa etyenek; 53axta eyke emokók emok takha' énxet'ák apheykha Samaria, hakte apkelya'ásegkok axta apmeyákxo Jesús ma'a Jerusalén. 54Xama axta apkelwet'a Jesús apkeltámeséyak xa, Santiago axta m'a, tén han Juan, aptahak axta apkelpakmeta s'e:
—Wese', ¿apmenyeya agának negko'o kaweywenták táxa eñama néten yakwayam kasawhohok xa énxet'ák nak?#2 R 1.9-16.
55Appeynchakpók axta eyke Jesús, apkelpakhetchesek axta xa apkeltámeséyak nak. 56Keñe axta apkelmeyákxo mók apheykegkaxa énxet.
Enxet'ák apmáheyo axta etlawha Jesús
(Mt 8.19-22)
57Neyseksa apkelxega ámay axta, aptahak xama énxet apcháneya Jesús se'e:
—Emenyék ko'o eytlawha apmahágkaxa enxoho exchep. 58Aptahak axta apchátegmowágko Jesús se'e:
—Yetneyk máxek axanák yemmáleg, yetneyk nahan axanák náta, méko eyke apteyayam ma'a aptaha nak Apketche énxet.
59Aptahak axta apcháneya Jesús pók énxet se'e:
—Hétlawha exchep
Wánxa agkok, aptahak axta eyke apchátegmowágko énxet se'e:
—Wese', heyho sekxo' wátawónegwakxak táta aphápak.
60Aptahak axta apchátegmowágko Jesús se'e:
—Yoho kalatawónek apkeletsapma m'a nétsapma nak; exeg xép, eltennaha m'a aptémakxa nak Wese' apwányam Dios.
61Pók énxet axta aptahak apcháneya Jesús se'e:
—Wese', ekmokók ko'o eytlawha exchep, heyho sekxo' alpeykesekxak ko'o m'a ekheykha nak exagkok.#1 R 19.20.
62Aptahak axta apcháneya Jesús se'e:
—Appeynchekmek agkok xóp énxet, keñe elenxanmohok apkenmexeykekxoho neptámen, mopwanchek etxek ma'a aptémakxa nak Wese' apwányam Dios.
Currently Selected:
SAN LUCAS 9: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
