SAN LUCAS 7
7
Jesús aptakmelcheseyam xama sẽlpextétamo apkemha apmonye romano apkeláneykha
(Mt 8.5-13)
1Xama axta appenchesa Jesús apkeltennáseykha énxet'ák, apmeyákxeyk axta tegma apwányam Capernaum. 2Apheyk axta xama sẽlpextétamo apkemha apmonye romano m'a. Yetneyk axta xama apkeláneykha apchásekhayókxa. Apháxamakpek axta, keto' axta anhan apketsapmakxa. 3Xama axta apleg'a amya'a apxénákpo Jesús ma'a sẽlpextétamo apkemha apmonye nak, apkeláphásek axta nápakha énxet'ák judíos apkelámha apmonye'e apchakneykekxexa, yakwayam enxoho yának ey'ammok apkeláneykha yakwayam etakmelchesók. 4Apyo'ókmek axta Jesús xa énxet'ák nak, awanhek axta apkeltémo epasmok. Aptahak axta apkelpakmeta s'e:
—Payhawók epasmok xép xa sẽlpextétamo apkemha apmonye nak, 5hakte apchásekhayok negókxa, axta anhan apkeltémo elanakpok tegma negakneykekxexa xa.
6Apkelyetlákxeyk axta Jesús xa énxet'ák nak. Xama axta apkelágketchesákxo tegma, apkeláphásek axta sẽlpextétamo apkemha apmonye apkelxegexma'a, yakwayam etnehek eltennaksek Jesús se'e: “Wese', ná exeg aksa, megkapayhawok etxek xép exagkok; 7ékeso eñamakxa mamoko exchek ko'o ay'ammohok ahagko' xép. Epakhetches aksa makhawo', yakwayam enxoho etakmelwók ko'o seláneykha. 8Hegkéshok nahan cha'a ko'o xa apkelpeywa m'a kelwese'e nak, keñe nahan ko'o xa apyetna sẽlpextétamo ahagkok sekmowána agkések sekpeywa. Ektemék agkok seyáneya: ‘exeg’, ñohok nahan exog. Ektemék agkok nahan seyáneya: ‘empoho’, ñohok nahan exegma'; eltamhok agkok nahan elának aksok ma'a seláneykha, ñohok nahan elána'.”
9Pelakkasek axta apleg'a Jesús xa, keñe axta apkelanawo m'a énxet'ák apkelyetleykha axta. Aptahak axta apkeláneya s'e:
—Mateyk ko'o makham énxet'ák Israel ekyawe mey'áseyam ekhawo mey'áseyam xa énxet nak. Nakso' xa sektahakxa nak seláneya kéxegke.
10Xama axta apkelwákxo sẽlpextétamo apkemha apmonye apxagkok xa énxet'ák nak, apwetágweykxek axta aptakmelwokmo sẽlpextétamo apkeláneykha m'a énxet'ák kéláphaso axta.
Jesús apxátekhaseyam tampe' étche
11Apmeyákxeyk axta Jesús tegma Naín natámen xa. Apkeltámeséyak axta apkelxegexma'a, axta anhan ma'a énxet apxámokma axta. 12Xama axta apwokmo keto' nátegma, apwet'ak axta peya kólatawónek kélhápak. Kelán'a tampe' étche xama apagko' aphápak axta m'a. Apxámok axta anhan énxet apyetlo m'a tampe' nak. 13Xama axta apwet'a Wese' egegkok ma'a tampe' nak, ayósek axta apkelano. Aptahak axta apcháneya s'e:
—Nágkalekxagwaha.
14Ñohok axta apyepetchegwokmoho, appaknegwokmok axta anhan ma'a kéltahanchesa axta kélhápak. Apchánwokmek axta anhan ma'a énxet'ák ektaha axta apso. Aptahak axta apcháneya Jesús kélhápak se'e:
—Wokma'ák, ektahak seyáneya exchep se'e. ¡Etnamha!
15Keñe axta aphákxo néten ma'a ektaha axta apketsapma, appakmétékxeyk axta nahan, apmeyásekxeyk axta nahan Jesús ma'a egken. 16Xama axta ekwetáxko xa, apyókxoho énxet axta nahan apchekak, yetlókók axta apkelpeykesamo Dios. Aptahak axta apkelpakmeta s'e:
—Dios appeywa aplegaso meyke ekhémo aptépak negyeseksa negko'o.
Aptahak axta anhan apkelpakmeta s'e:
—Dios apwa'ak yakwayam epasmok énxet'ák apagkok.
17Ekyókxoho yókxexma Judea axta legáxchek amya'a ektahakxa axta aksok apkelané Jesús, wokmók axta anhan ma'a neyáwa yókxexma nak.
Juan el Bautista apkelápháseykha
(Mt 11.2-19)
18Aplegagweykxek axta amya'a Juan xa, cham'a ekyókxoho ektahakxa axta, hakte apkeltámeséyak axta apkeltennáseyha. Apkelwóneyha axta apkánet apkeltámeséyak Juan, 19apkeláphásek axta anhan aphakxa Jesús, yakwayam etnehek apkelmaxneyeykha s'e:
—¿Xépya nakso' apxénamakpo axta ewa', pók énxet enxeykel'a makham anleyxek? 20Apyo'ókmek axta Jesús ma'a énxet'ák ektaha axta Juan apkeláphaso. Aptahak axta apcháneya s'e:
—Ẽláphásek xeyk negko'o Juan el Bautista yakwayam ólmaxneyha: ¿Xépya m'a apxénamakpo axta ewa', pók énxet enxeykel'a anleyxek makham?
21Chakhawók axta anhan ma'a apkeltakmelchesekmo axta Jesús apxámokma énxet ektémakxa axta apkelháxamap, tén han ma'a ektémakxa axta anhan apkellegeykegkoho, tén han ma'a kelyekhama' eknaktawáseykha axta, apkelwetásekxeyk axta anhan exma apxámokma m'a énxet meyke apakta'ák axta. 22Aptahak axta apchátegmowágko Jesús se'e:
—Kóltakhoho, kóltennásekxa Juan ektahakxa nak kélweté, tén han xa ektahakxa nak kéllegé. Kóltennasha nahan Juan apkelwetákxo exma m'a énxet'ák meyke apakta'ák nak, tén han apkelxegákxo m'a énxet'ák meyke aptapnák nak, tén han apkeltakmelwokmo m'a énxet'ák ektamhéyak axta negmasé ektepelchamáxche egyempehek, tén han apkellegákxo exma m'a énxet'ák ektamhéyak axta meyke apeyk'ák,#Is 35.5-6. tén han apnakxétekhágwokmo m'a énxet'ák apkeletsapma nak, keñe kéltennásencha'a amya'a segwagkasamo teyp#Is 61.1. ma'a énxet'ák meyke nak aksok apagkok. 23¡Kélenyémo kéxegke kélteme nak megkólyenseyam kélteme mehelya'áseyam ko'o.
24Xama axta apkeltakháwo m'a énxet'ák ektaha axta Juan apkeláphaso, keñe axta apkeltennáseyncha'a Jesús énxet'ák apxéna m'a Juan. Aptahak axta apkeláneya s'e: “¿Yaksak axta kélteyánegwokmoho' yókxexma meykexa énxet? ¿Pa'at elyawheyáseykha exchahayamya axta kélteyánegwokmoho'? 25Háwe axta agkok xa ¿Yaksak axta kélteyánegwokmoho'? ¿Kélaneykeya axta kólwetagwók énxet apkeltakmalma apkelnakta m'a? Kélya'ásegkok kéxegke énxet apkeltakmela nak apkelnakta tásek katnehek apheykha, exmakha m'a kelwese'e apxanák nak. 26¿Yaksak axta kélteyánegwokmoho'? ¿Xama Dios appeywa aplegasoya axta kélteyánegwokmoho'? Nakso', kélwetágwokmek axta kéxegke xama énxet apyeykhágweykmoho axta énxet'ák Dios appeywa apkellegaso nak. 27Juan axta m'a ektéma axta ekxeyenma eknaktáxésamaxche s'e:
‘Eyáphásek ko'o seykha amya'a ahagkok
apmonye exchep,
yakwayam enxoho elanaksek ámay.’#Mal 3.1.
28Eltennásek ko'o kéxegke méko xama énxet apyeykhágweykmoho Juan nepyeseksa apyókxoho énxet nak; Keñe m'a énxet ekmasextoho nak kéláyo nepyeseksa énxet'ák apheykha nak ma'a aptémakxa nak Wese' apwányam Dios, mexnawok Juan ma'a.
29“Apyókxoho énxet axta kélyakpasásegkok yegmen, cham'a ektaha axta apháxenmo apkeltenneykha Juan, Juan axta apyakpasáseyak yegmen. Wokmók axta anhan ma'a énxet'ák apkelma axta selyakye yakwayam kólmések wese' Roma, hakte apyekpelchágwokmók axta ektaha ekpéwomo m'a apkeltémókxa nak antehek Dios. 30axta eyke eltamhok eyakpásesagkok yegmen Juan ma'a énxet'ák fariseos, tén han ma'a énxet'ák apkelxekmóso nak apnámokkok ektémakxa segánamakxa. Cháxa ektahakxa axta megkalcha apwáxók apmokókxa axta eykhe etnésesek Dios xa énxet'ák nak.#Mt 21.32; Lc 3.12.
31“¿Yaksak ewanchek ko'o axnéshok énxet'ák keso negwánxa nak? ¿Yaksak aphawo? 32Máxa m'a sakcha'a létkók ekheykegkohol'a kanéwagkok apheykegkaxal'a énxet aptémol'a elyennaktéshok apkelpeywa yának apkelxegexma'a s'e: ‘Nelpáwásek axta negko'o yámámok nempáwasól'a, keñe axta kéxegke megkólnéweyncha'a, nelmeneykmásek axta eykhe negmeneykmaso senlapwagkasamol'a, axta eyke kóllekxagweyha kéxegke.’ 33Apwa'ak axta Juan el Bautista aptaha axta meto apto, tén han meya vino, kélxénchek axta kéxegke ekyetna kelyekhama' apwáxok. 34Keñe axta anhan apwa'a m'a aptaha nak Apketche énxet, aptamo nak apto, apyamo nak han vino, kélxénchek kéxegke aptaha megyéso etwok apto, tén han megyéso ének vino, tén han kélxéna kéxegke aptaha apkelásekhayókxa m'a énxet elmasagcha'a nak apkeltémakxa, tén han ma'a énxet'ák apkelma nak selyakye yakwayam kólmések wese' Roma. 35Kataxkohok cha'a ektaha nakso' ma'a negya'ásegwayam eñama nak Dios eñama m'a énxet'ák ektaha nak apkeláneyak xa negya'ásegwayam nak.”
Jesús apwayam Simón apxagkok, aptaha axta fariseo
36Xama énxet fariseo axta apcháneyáha Jesús yakwayam etáswók apto apxagkok. Apmahágkek axta Jesús apxagkok xa énxet nak. Apheyk axta nekha mésa Jesús, 37cham'a ekwokmo axta xama kelán'a ektaha axta ekmaso ektémakxa, ekha axta m'a tegma apwányam nak. Leg'ak axta amya'a aptaswokmo apto Jesús xama fariseo apxagkok. Sókók axta anhan sokmátsa yetlo axagkok elánamáxche axta meteymog ekwesey axta alabastro. 38Kelekxagweyha axta m'a, hakmek axta ekpayhókxa Jesús apmagkok, kelyásesek axta anhan aktégmenek ma'a Jesús apmagkok, keñe axta ektaha áwa' elyamasáseykxo makham. Kelpetsesesek axta anhan apmagkok, keñe axta éxpakhásesa sokmátsa.#Mt 26.7; Mr 14.3; Jn 12.3. 39Xama axta apwet'a fariseo ektaha axta apcháneyeykha Jesús xa, entahak axta elchetamso apwáxok se'e: “Nakso' agkok aptaha Dios appeywa aplegaso xa, ékpelkohok ektémakxa xa kelán'a ekpaknegwa'awo nak: kelán'a ekmaso ektémakxa xa.” 40Aptahak axta Jesús apcháneya fariseo s'e:
—Simón, yetneyk xama aksok yakwayam altennaksek xép.
Aptahak axta apchátegmowágko fariseo s'e:
—Selxekmóso heltennés.
41Aptahak axta Jesús se'e:
—Apkánet énxet axta yetnak apméyak ma'a xama énxet apmásáseykegkohol'a pók selyakye. Quinientos ekhem ekyanmaga nentamheykha axta apméyak xama, keñe axta pók apméyak cincuenta ekhem ekyanmaga nentamheykha; 42Apmasésesek axta apkelméyak apkánet ma'a énxet ektaha axta apmasáseykha pók selyakye, hakte mopwancha'ak axta apmoko elyanmagkasek apkelméyak. Heltennés hana kaxwo', ¿yaksak sat kayawhok apchásekhayo énxet apmasáseykha pók selyakye xa apkánet nak?
43Aptahak axta apchátegmowágko Simón se'e:
—Ko'o neyk ekyawakxa apchásekhayo m'a kélmasésesa exchek ekyawe apméyak.
Aptahak axta apcháneya Jesús se'e:
—Payhawók apchátegmowéyak.
44Apkelanawók axta makham Jesús ma'a kelán'a, keñe axta aptaha apcháneya Simón se'e:
—¿Apwet'aya xa kelán'a nak? Ektaxnegwa'ak xeyk ko'o apxagkok xép, exchek eyke hegkeyásak xép yegmen yakwayam alyenyeksek emagkok; keñe exchek elyásesa aktégmenek emagkok se'e kelán'a nak, keñe exchek han ektaha áwa' elyamáseykxo makham. 45Exchek hepetsesak xép, keñe exchek so kelán'a nak megkalwáteseykmo elpetsesma emagkok, eyeynawo m'a sekxo' xeyk sektaxna kañe'.
46Exchek héxpakhasásak xép aceite epátek, keñe exchek éxpakha'a sokmátsa emagkok xa kelán'a nak. 47Ekeso eñamakxa seltennasa exchep megkólyakmagkáseykxo ekyókxoho ektémakxa megkay'asáxma xa kelán'a nak, hakte awanhek eyásekhayo; wánxa agkok, kéxegke ekmasextoho nak megkólyakmagkáseykekxa kéltémakxa megkólya'asáxma, asexto nahan katnehek ekha kélásekhayo.
48Keñe axta aptaha apcháneya Jesús kelán'a s'e:
—Megkólyakmagkáseykxak ektémakxa megkay'asáxma.
49Aptahak axta cha'a apkelmaxneyeyncha'a pók énxet'ák ektaha axta kéláneyeykha, apheyncha'a axta m'a:
—¿Yaksak énxet xa ekweykmoho nak meyakmagkáseykekxa nentémakxa mólya'asáxma?
50Wánxa agkok, aptahak axta Jesús apcháneya kelán'a s'e:
—Megkay'áseyam wagkásak teyp xeye'; katakhekxa yetlo meyke ektahakxa awáxok.
Currently Selected:
SAN LUCAS 7: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
