SAN LUCAS 5

Magwetaya katnehek tegye kelasma

(Mt 4.18-22; Mr 1.16-20)

1Apkenmáha axta Jesús neyáwa wátsam ekpayhegwayam ekwesey nak Genesaret, apchahapwokmek axta énxet apxámokma apmáheyo axta yeyxho' Dios appeywa. 2Apwet'ak axta Jesús ekhágko ánet yántakpayhe neyáwa ekpayhegwayam. Méko axta xama énxet ma'a kañe', hakte apkelántekkek axta m'a ektaha axta aptegyéyak kelasma, yakwayam elyenyesagkok yam'én apagkok. 3Xama yántakpayhe axta apchántak Jesús. Simón axta apagkok ma'a, apkeltamhok axta Jesús yakxegkesagkohok Simón yántakpayhe. Keñe axta apha m'a kañe' yántakpayhe awáxok, apkeltennáseyha axta énxet'ák.#Mt 13.1-2; Mr 3.9-10; 4.1. 4Xama axta appenchesa apkeltenneykha, aptahak axta apcháneya Jesús Simón se'e:

—Ey'és hana yántakpayhe etawanyexa nak, kólyenyenta' sat yam'én kélagkok ma'a, yakwayam kólmok kelasma.

5Aptahak axta apchátegmowágko Simón se'e:

—Sẽlxekmóso, yókxoho axta'a exchek negko'o nentegye kelasma, exchek eyke agmak kelasma xama enxoho;#Jn 21.3. eynyentak sat ko'o yam'én neygmen, hakte apkeltamhok xép eynyentak.

6Xama axta apyenyento yam'én, xámok axta apkelma kelasma,#Jn 21.6. peyk axta kalyetyapok yam'én. 7Keñe axta aptemesásencha'a apkelxegexma'a apkelchánte axta mók yántakpayhe, yakwayam enxoho ewhánegwomho'. Apyo'ókmek axta anhan ma'a. Apkellánesagkók axta kelasma m'a ánet yántakpayhe nak, ketsék axta kéméxchek yakwayam kalweywagkok. 8Xama axta apwet'a Simón Pedro xa, apkeltekxekwokmek axta aptapnák apkenmágkaxa Jesús. Aptahak axta apcháneya s'e:

—¡Wese', neyhepetchegwoho aksa, may'asáxma ko'o!#Job 7.19-20; Sal 39.13.

9Hakte pelakkásók agko' axta apwet'a Simón yetlo apkelxegexma'a xa apkelma axta kelasma ekxámokma. 10Hawók axta anhan ektahakxa m'a Santiago, tén han ma'a Juan, aptaha axta Zebedeo apketchek, cháxa aptaha axta apkelxegexma'a Simón xa. Aptahak axta Jesús apcháneya Simón se'e:

—Nágyé' aksa; sakhem eyeynawo exchep yakwayam etnehek aptegye énxet.

11Keñe axta apkelya'áseykxo yántakpayhe m'a néten xóp. Apnegkenakxeyk axta ekyókxoho xa, keñe axta apkelyetlákxo Jesús.

Jesús aptakmelcheseyam xama énxet negmasé ektepelchamáxche egyempehek ekteme

(Mt 8.1-4; Mr 1.40-45)

12Xama ekhem axta aphak Jesús nepyeseksa tegma apwányam, apwokmek axta aphakxa xama énxet negmasé ektepelchamáxche egyempehek ekteme. Xama axta apwet'a Jesús ma'a énxet nak, apháxahanteyk axta ekwokmoho aptekxeya nápát xóp. Aptahak axta apcháneya Jesús apkeltamho epasmok se'e:

—Wese', apmokók agkok xép, apwanchek heyaxñásekxak ektémakxa nak sekháxamáxche.

13Appaknegwokmók axta Jesús xa, keñe axta aptaha apcháneya s'e:

—Emenyék. ¡Yáxñekxoho!

Yetlókók axta ekmasé m'a ektémakxa axta apháxamap ektepelchamáxche apyempehek. 14Aptahak axta apcháneya Jesús se'e:

—Ná eltennaha aksa; exeg, ey'ókxa aphakxa m'a énxet appasmo nak apkelmaxnéseso Dios énxet'ák apagkok yakwayam exekmósakpekxoho, esakxoho sat nahan aksok negmésamol'a Dios ekhawo m'a apkeltémókxa axta antehek Moisés eñama apcháxñeykekxoho exchep,#Lv 14.1-32. yakwayam enxoho elya'asagkohok apyókxoho énxet aptakmelwokmo exchep ma'a ektémakxa axta apháxamap.

15Wánxa agkok, yágwokmók axta eyke ekpayheykekxa apxénamap Jesús. Apxámagwokmek axta anhan énxet yakwayam yeyxhok apkeltenneykha, yakwayam enxoho eltakmelchesók ma'a ektémakxa axta apkelháxamap. 16Mók nekha axta eyke cha'a emhagkohok Jesús yakwayam etnehek nempeywa nelmaxnagko, cham'a meykexa enxoho énxet.

Jesús aptakmelcheseyam xama énxet apkelyakseykekxa megkamopwána eltakheykha

(Mt 9.1-8; Mr 2.1-12)

17Xama ekhem axta apkelxekmowásak Jesús énxet'ák, apháha axta anhan nápakha fariseos ma'a, tén han ma'a énxet'ák apkelxekmóso nak apnámokkok ektémakxa segánamakxa. Ekyókxoho apheykegkaxa énxet yókxexma Galilea axta apkeleñamak xa, tén han ma'a yókxexma Judea, tén han apkeleñama m'a tegma apwányam Jerusalén. Wetáxchek axta ekyetna Dios apmopwána m'a Jesús, cham'a apkeltakmelchesakmo axta apkelháxamap. 18Apkelwokmek axta nápakha énxet, apsokmók axta énxet apháxamap megkamopwána eltakheykha, apyetnama axta néten aptaháno. Apmokók axta eykhe etaxnésók kañe' tegma yakwayam epekkenwók apkenmágkaxa Jesús, 19axta eyke ey'ásegkok yakwánxa etaxnésók, hakte apxámok axta énxet; keñe axta apkelchánta aksa néten tegma, apyagkaxkatchek axta nahan néten tegma, apweykásenteyk axta nepyeseksa énxet'ák yetlo aptaháno m'a énxet apháxamap, cham'a apkenmágkaxa axta Jesús. 20Xama axta apwet'a Jesús ekyetna melya'áseyam xa, aptahak axta apcháneya énxet apháxamap se'e:

—Emók, megkólyakmagkáseykxak xép aptémakxa mey'asáxma.

21Entahak axta elchetamso apwáxók énxet'ák ektaha axta apkelxekmóso apnámokkok ektémakxa segánamakxa s'e, tén han ma'a fariseos: “¿Yaksak énxet xa aptéma nak, megyeye nak exének aksok elmexma Dios? Dios apwánxa apagko' apmopwána meyakmagkásekxék nentémakxa mólya'asáxma.”

22Apyekpelchawók axta eyke Jesús ektahakxa elchetamso apwáxók xa énxet'ák nak. Aptahak axta apkelmaxneyeyncha'a s'e:

—¿Yaksak ektaha, ektaha nak elchetamso kélwáxok kéxegke xa? 23¿Yaksak enyahamo antehek agának énxet?: ‘Megkólyakmagkáseykxak ektémakxa mey'asáxma exchep’ enxeykel'a antehek agának se'e: ‘Exnekxa' néten, emekxa aptaháno, exeg.’ 24Axekmósek sat ko'o ekyetna apmopwána ektaha nak Apketche énxet yakwayam meyakmagkásekxék apkeltémakxa melya'asáxma énxet keso náxop.

Keñe axta aptaha apcháneya énxet apkelyakseykekxa megkamopwána axta eltakheykha s'e:

—Ektahak seyáneya exchep se'e, etnamha, emekxa aptaháno, emyekxa' apxagkok.

25Yetlókók axta apheykekxa néten ma'a énxet apkelyakseykekxa megkamopwána axta eltakheykha nepyeseksa énxet'ák, apmákxeyk axta anhan ma'a aptaháno apyetnama axta néten, apmeyákxeyk axta apxagkok yetlo apkelpeykesamo Dios. 26Apyókxoho énxet'ák axta pelakkásak apkelwet'a xa, apkelpeykásók axta anhan Dios, apchekakxoho axta anhan aptahak apkelpeywa s'e:

—Sakhem negwet'a negko'o aksok eltakmela agko' magwetaya nak katnehek.

Jesús apwóneykha Leví

(Mt 9.9-13; Mr 2.13-17)

27Apxegkek axta Jesús natámen xa, apwet'ak axta xama m'a énxet'ák ektaha axta apkelma cha'a selyakye yakwayam kólmések wese' Roma, apwesey axta Leví. Axta aphak ma'a apkelmomakxa axta cha'a selyakye. Aptahak axta apcháneya Jesús se'e:

—Hétlogma.

28Keñe axta apkempákxo néten Leví, apkexakkek axta ekyókxoho aksok apyetlawa Jesús.

29Nano' axta entahak apkelana Leví ektámáxche ekwányam apxagkok yakwayam yesawáseshok Jesús. Apxámok axta anhan apkelwokmo m'a énxet'ák ektaha axta apkelma selyakye yakwayam kólmések wese' Roma, tén han ma'a pók énxet'ák nak. Apheyk axta xamo' Jesús nekha mésa xa énxet'ák nak. 30Apkelpakmeteyha axta eyke m'a énxet'ák fariseos, tén han ma'a énxet'ák ektaha axta apkelxekmóso ektémakxa segánamakxa, cham'a ektaha axta apkelxegexma'a apancha'awo'. Aptahak axta apkeláneya Jesús apkeltámeséyak se'e:

—¿Yaksak ektaha kéltoko nak xamo' kéxegke énxet apkelmomo nak selyakye yakwayam kólmések wese' Roma tén han kélyenawo xamo' apyenéyak, tén han ma'a énxet'ák melya'asáxma nak?#Lc 15.1-2.

31Aptahak axta apchátegmowágko Jesús se'e:

—Mopmenyék pánakte egyap ma'a énxet apkelyennakte nak, wánxa m'a énxet'ák apkelháxamap nak. 32Axta ko'o aweyk yakwayam alwónmakha énxet apkelpéwomo nak, wánxa m'a énxet'ák melya'asáxma nak, yakwayam enxoho etnekxak melya'áseyam Dios.

Ektémakxa manto nento nelpeykáso enxoho Dios

(Mt 9.14-17; Mr 2.18-22)

33Entahak axta amya'a apcháneyákpo Jesús se'e:

—Hágkaxwe etnahagkok Juan apkeltámeséyak ma'a manto nak nento ólpeykeshok Dios, tén han ma'a apyetleykekxa nak apkeltémakxa fariseos, meyétekkesemek nahan aptamhéyak nempeywa nelmaxnagko, keñe apkeltámeséyak nak xép etawagkok cha'a aptéyak, énagkok nahan cha'a m'a apyenéyak nak.

34Aptahak axta apchátegmowágko Jesús se'e:

—¿Kélwanchek enxeykel'a kéxegke kólának metawagkek aptéyak ma'a énxet'ák kéláneyeykha nak yakwayam epásegwók elyamhopma, cham'a apha enxoho nepyeseksa m'a énxet yakwayam nak kalyamhápok? 35Wánxa agkok, kammok sat eyke ekhem yakwánxa kólyentemekxak ma'a énxet yakwayam nak kalyamhápok, wokmek sat agkok xa ekhem nak, metawagkek sat aptéyak.

36Apkeltennáseyha axta anhan se'e aksok apyetcháseykekxoho nak:

—Méko cha'a kayenyekhak apáwa nápakha aphaxnagkok yakwayam kólyepetchesek ma'a apáwa aphápak nak. Kéltemék agkok xa, kóltawasha m'a apáwa aphaxnagkok nak; megkatxók nahan kólyepetchesek apáwa aphaxnagkok ma'a apáwa aphápak nak. 37Megkólyetmek nahan cha'a vino axnagkok ma'a aksok empe'ék apák kélyetmomol'a, hakte kalpaxkátek aksok empe'ék apák ma'a vino axnagkok nak, keymasaxkohok nahan keynkenaxchek ma'a vino, kasawhaxkohok nahan kalesók ma'a aksok empe'ék apák nak. 38Kólyátem cha'a vino axnagkok ma'a aksok empe'ék axnagcha'ák kélyetmomol'a. 39Megkamayhaxchek nahan vino axnagkok ekyamaxko enxoho m'a vino nano' elánamáxche nak, hakte katnehek cha'a amya'a s'e: ‘Atsók agko' ma'a vino nano' elánamáxche nak.’

Currently Selected:

SAN LUCAS 5: LEGN

Highlight

Copy