SAN LUCAS 21

Kelán'a tampe' meyke aksok agkok ekméso aksok Dios

(Mr 12.41-44)

1Apkeláneyha axta Jesús apxatma cha'a selyakye énxet ekxákma selyakye apagkok ma'a kélxátamakxa axta cha'a selyakye kélméso Dios, 2apwet'ak axta anhan Jesús xama kelán'a tampe' meyke aksok agkok eknegkena ánet sawo selyakye. 3Aptahak axta appeywa Jesús se'e:

—Awanhek ekpekkenma selyakye xa tampe' meyke aksok nak, kaxnók xa pók énxet'ák nak. Nakso' xa sektahakxa nak seláneya kéxegke, 4hakte apyókxoho énxet apnegkenak selyakye eñama ekyeykhágweykmoho, keñe xa tampe' meyke aksok agkok nak, ekpekkena ekyókxoho selyakye agkok yakwayam eykhe kamha neyseksók ekha.

Jesús apxeyenma yakwayam kóltegkesek tegma appagkanamap

(Mt 24.1-2; Mr 13.1-2)

5Nápakha énxet axta apxénak tegma appagkanamap, cham'a ektémakxa nak eltakmalma meteymog tén han ma'a aksok kélméso nak yakwayam kólnáxegkesha. Aptahak axta Jesús se'e:

6—Kawók sat ekhem yakwánxa kalmassegwók ekyókxoho xa kélwet'a nak kéxegke, megkathánekxék sat mók meteymog. Ekyókxoho sat kólmasésók.

Magkenatcheso yakwánxa katnehek néxa ekhem

(Mt 24.3-28; Mr 13.3-23)

7Keñe axta aptaha apkelmaxneyeyncha'a apkeltámeséyak se'e:

—Sẽlxekmóso, ¿Yaksak sat ekhem katnehek xa? ¿háxko sat ekteme aksok magkenatcheso agweta' eyágketwokmo enxoho yakwánxa katnehek xa?

8Aptahak axta apchátegmowágko Jesús se'e: “Kólleyxmakha sat, nágkólho aksa kólyexanchesha. Hakte elwak sat énxet apxámokma sexneyásamákpoho ko'o. Sat etnehek apkelpeywa s'e: ‘Ko'o Mesías’. Etnehek sat nahan se'e: ‘Wokmek kaxwo' ekhem.’ Nágkólyetlakxa aksa kéxegke. 9Kélleg'ak sat agkok kéxegke amya'a ektepa kempakhakma tén han ellókaxko enxoho, nágkólyegwe aksa. Cháxa yakwánxa nak katnehek sekxo' xa; háwe eyke yakwánxa katnehek néxa ekhem ma'a.”

10Aptahak axta makham se'e: “Elnapakpok sat énxet xama yókxexma, yenmexek sat ma'a apheykha nak mók apkelókxa, kampakhaxchek sat nahan mók apkelókxa. 11Katyapok sat ekyawheykha xóp ekyennakte agko' mók xama apkelókxa, tén han meyk segakhe, tén han negmasé, kataxchek sat nahan néten aksok magéso nak agé', kataxchek sat nahan aksok magkenatcheso agweta' ekyawe m'a néten.

12“Kólmaxchek sat kéxegke, kólmenxenmakha sat nahan amonye ekteme xa. Kólnaklók sat nahan kéxegke yakwayam kólyekpelkohok ma'a kañe' apchakneykekxexa énxet'ák judíos, kólxatmok sat nahan sẽlpextétamakxa, kólnaklók sat nahan kéxegke nápakta'awo' ma'a kelwese'e apkelwányam nak, tén han nápakta'awo' ma'a kelwese'e apkelásenneykha apkeláneykha yókxexma nak, ko'o eñamakxa. 13Keñe sat kólyentamaxkohok kólxének sekwesey. 14Nágkaxén kélwáxók kóllánekxak kéltahakxa yakwánxa enxoho kóltehek kélpeywa yakwayam kólátegmowagkok amya'a, 15hakte ko'o sat agkések kéxegke kélpeywa yetlo kélya'áseykegkoho, mopwanchek sat yátegmowagkok kéltahakxa kélpeywa m'a kélenmexma, mopwanchek sat exének ektaha megkamámnaksoho kélpeywa.#Lc 12.11-12. 16Kawomhok sat appelakkaseso yának kólmaxchek kéxegke m'a kélyap, tén han kélchána, kélyáxeg, tén han ma'a kélteme kélnámokkok, tén han ma'a kélxegexma'a nak. Kóltekyók sat nahan kélnápakha kéxegke, 17apyókxoho énxet sat etaknók kéxegke ko'o eñamakxa; 18wánxa agkok, megkaxyenmek sat eyke xama xa kélwa' nak. 19¡Kóllenxanmoho kélyennaktésamo kélteme megkólya'áseyam yakwayam enxoho kólewának kólwagkasaxchek teyp!

20“Kélwet'ak sat agkok apwakheykxo sẽlpextétamo m'a tegma apwányam Jerusalén, kólya'ásegwomho sat peya kólmasésók kaxwo'. 21Natámen, kéxegke kélheykha nak Judea, kólmohok kólenyahagkok ma'a néten xóp elekháhéyak elyawe nak; keñe m'a énxet'ák apheykha nak Jerusalén, tásek elántépok nepyeseksa tegma apwányam, keñe m'a énxet apkeltamheykha nak yókxexma, tásek melmeyekxék nepyeseksa tegma apwányam, 22hakte ekhem yakwánxa hẽllegásesagkohok sat ma'a,#Os 9.7. cham'a yakwánxa sat kasawhaxkohok katnehek ma'a ektémakxa nak eknaktáxésamaxche weykcha'áhak. 23¡Ayósekak sat kelán'ák lós'awók ma'a ekhem sat, tén han ma'a kelán'ák keyetsék étchek nak! Hakte keytek sat apkellegeykegkoho ekmáske énxet ma'a yókxexma nak, sagkok agko' sat nahan katnehek kéllegasáseykegkoho xa énxet'ák nak. 24Nápakha sat etekyók eñama apkempakhe, keñe sat nápakha énxet elmakpok tén han kólya'aksek ekyókxoho apkelókxa; keñe sat énxet'ák metnaha judíos etnekxak apkeláneykha m'a tegma apwányam Jerusalén ekwokmoho ektaha ma'a ekhem apxeyenmakxa axta katnehek Dios.

Ektaha nak Apketche énxet apkexyeyam

(Mt 24.29-35,42-44; Mr 13.24-37)

25“Katlakkasek sat kataxchek katnegwomhoxma ekhem, tén han ma'a pelten, tén han ma'a yaw'a;#Is 13.10; Ez 32.7; Jl 2.31; Ap 6.12-13. melya'asagkek sat aptamhágkaxa énxet'ák apheykha nak keso náxop, elyegweyk sat eñama éxtegyawa yegmen elyakyahayam ma'a wátsam ekwányam. 26Apkelyennákxoho sat eletsapok énxet'ák eñama apkelaye apagko' yakwánxa katnehek keso náxop; kawomhok sat nahan élektamáxche m'a aksok ekhéyak nak néten. 27Keñe sat kólwetak ektaha nak Apketche énxet éxyok neyseksa yaphopé,#Dn 7.13; Ap 1.7. yetlo ekyawe apmopwána, tén han apcheymákpoho. 28Temék sat agkok xa, kólwaskápekxoho sat kólleyxmakha, hakte kaxwo' agko' sat kólmeyawaxchek kéxegke.”

29Aptahak axta anhan apyetcháseykekxoho Jesús se'e: “Kóllano ektémakxa yámet ekwesey nak higo esenhan ma'a mók yámet nak. 30Kélwet'ak agkok ektepékxo axnagkok áwa', kólya'asagkohok kéxegke eyágketwokmo ekméxanmakxal'a. 31Ekhawo nahan ektémakxa m'a kélwet'a sat kéxegke ektaha xa, kólya'asagkohok sat eyágketwokmo m'a aptémakxa nak Wese' apwányam Dios.

32“Kasawhaxkohok sat katnehek ekyókxoho xa amonye apkeletsapma énxet'ák keso negwánxa nak. Nakso' xa sektahakxa nak seláneya kéxegke. 33Kamaskok sat néten, tén han keso náxop, wánxa agkok megkamassegwomek eyke ko'o sekpeywa.

34“Kólawho kéxegke, nágkólho kamhohok agko' kélwáxok ma'a kélyespagkamakxa nak, cham'a kélyeykhásamáxkoho nak kélya anmen, tén han ma'a ekxéneykha nak kélwáxok neyseksók kélha, katlakkasek katnehek kahapwak kéxegke yakwánxa katnehek ma'a ekhem sat 35ektémol'a kélhanma segma. Hakte kahapwak sat apyókxoho énxet apheykha náxop xa yakwánxa sat katnehek. 36Kóllánekxa kéltahakxa kéxegke, nágkólyensem kélteme nempeywa nelmaxnagko, yakwayam enxoho kólegketaxchek kéxegke neyseksa ekyókxoho xa aksok peya nak katnehek, yakwayam enxoho anhan kólchánwók nápakto' ma'a aptaha nak Apketche énxet.”

37Yókxoho ekhem axta cha'a etnehek apkelxekmóso Jesús énxet'ák ma'a kañe' tegma appagkanamap,#Lc 19.47. keñe ekyaktésa enxoho exnakxak ma'a néten egkexe ekwesey nak Olivos. 38Axto'o axta cha'a elmeyekxak énxet'ák kañe' tegma appagkanamap yakwayam yeyxwakxohok Jesús apkeltenneykha.

Currently Selected:

SAN LUCAS 21: LEGN

Highlight

Copy