SAN LUCAS 19

Jesús tén han Zaqueo

1Aptaxnegwokmek axta Jesús tegma apwányam Jericó, nepyeseksa tegma apwányam axta apyeykhágwokmok ma'a. 2Aphegkek axta anhan xama énxet ekxákma axta selyakye apagkok ma'a apwesey axta Zaqueo, apkemha apmonye nepyeseksa énxet'ák apkelma selyakye yakwayam kólmések wese' Roma axta m'a. 3Apmokók axta eykhe étak Jesús xa énxet nak, mopwanchek axta eyke apwet'a, hakte apxámok axta énxet ma'a, apyakwátók axta Zaqueo. 4Ekeso eñamakxa apketchágkoho axta apmahágko apmonye, apkenátwokmek axta yámet ma'a yakwánxa axta eyeykhágwók Jesús, yakwayam enxoho yepwának éta'. 5Xama axta apyeykhágwokmo Jesús ma'a, apsekhákxok axta néten. Aptahak axta apcháneya s'e:

—Zaqueo, etyep heykxa, sakhem sat ko'o axnók apxagkok.

6Ñohok axta apnextegánto Zaqueo, yetlo ekpayheykekxa apwáxok axta anhan apmak takha' Jesús. 7Xama axta apwet'a apyókxoho énxet xa, apyamatcháseyha axta Jesús, apxénákpek axta Jesús peya exnók énxet mey'asáxma apxagkok. 8Apkempákxeyk axta néten Zaqueo. Aptahak axta apcháneya Wese' egegkok se'e:

—Wese', elano, amlaskok sat ko'o énxet meyke aksok apagkok nekha aksok ahagkok ekyetnakxa nak ko'o; ekmenyexchesegkek agkok nahan aksok apagkok xama énxet enxoho, ayeykhásesamhok sat sekmeyáseykekxa makham.

9Aptahak axta Jesús se'e:

—Sakhem ekwa'a nelwagkásamáxche teyp se'e tegma nak, hakte Abraham aptáwen neptámen nahan se'e énxet nak. 10Hakte apwa'ak axta aptaha nak Apketche énxet yakwayam elchetmok ma'a énxet'ák ektaha axta apkelxegányam,#Ez 34.16; Mt 18.11. tén han elwagkasek teyp.

Jesús apyetcháseykekxoho selyakye

(Mt 25.14-30)

11Apkelleg'ak axta énxet'ák aptaha apkeltenneykha Jesús xa, apkeltennáseyha axta Jesús se'e apyetcháseykekxoho nak,#Mt 25.14-30. hakte apchágketchesakxeyk axta Jerusalén, apkeneykek axta anhan énxet'ák kawak heykxa m'a aptémakxa nak Wese' apwányam Dios.

12Aptahak axta apkeláneya s'e: “Aphegkek axta xama énxet aptaha axta wese' apketche, apmaheykegko axta makhawo' mók apkelókxa, yakwayam kóltemésesek wese' apwányam, keñe etakhohok ma'a apkeñamakxa axta. 13Apkelwóneyha axta diez apkeláneykha amonye apxega, apmések axta cha'a selyakye ekyawe xama xa. Aptahak axta apkeláneya s'e: ‘Kóltemésesha sat se'e selyakye nak ekwokmoho sekwakto.’ 14Wánxa agkok, aptaknagkamchek axta eyke énxet'ák ektaha axta apkelenyémeyo xamo'. Kéláphásek axta énxet'ák neptámen kéltémo etnehek yának se'e: ‘Magmenyék negko'o etnehek wese' apwányam egagkok xa énxet nak.’

15“Kéltemésesek axta eyke wese' apwányam xa, keñe axta aptakháwo apchókxa. Xama axta apwákxo, apkeltamhok axta kóltennásekxak apkelásenneykha appekkencháseykxo axta selyakye, yakwayam ey'asagkohok ekwánxa apyáncháseykekxa selyakye xa apkelásenneykha nak. 16Aptahak axta apcháneya wese' apagkok apchásenneykha ektaha axta apmonye apweykekxa s'e: ‘Wese', awanhek eyánte selyakye apagkok.’ 17Aptahak axta apchátegmowágko wese' s'e: ‘Takmelakxoho, xép apteme seyásenneykha ektakmela aptémakxa; atnésesek sat xép wese' apkeláneykha diez yókxexma hakte aptakmelchesegkek xa aptamheykha étkok sekmésa axta.’ 18Keñe axta anhan apwákxo m'a pók. Aptahak axta apcháneya s'e: ‘Wese', yáma chánteyk selyakye apagkok segkéso axta.’ 19Keñe axta aptaha apcháneya wese' s'e: ‘Xép sat etnehek wese' yakwayam elanha cinco yókxexma.’

20“Keñe axta anhan apwákxo pók, aptahak axta s'e: ‘Wese', keso selyakye apagkok se'e. Apáwa axta ekpextetchásak sektakmelchesesa; 21xép axta eyekak, hakte aplamchek xép, eyekhekxohok ma'a aksok megkatnaha nak appekkenma apagko', eneyxwomhok nahan cha'a aksok ekyexna megkatnaha nak apkeneykekxa.’ 22Aptahak axta wese' s'e: ‘Seláneykha ekmaso aptémakxa, atnehek sat sekyekpelchémo exchep eñama eksexnenagko m'a aptahakxa nak appeywa. Apya'ásegkok agkok xép sektaha ko'o megkamopyósa alanok émók, tén han sekyekheykekxoho cha'a aksok megkatnaha nak seknegkenma ahagko', tén han seknakxama cha'a ekyexna m'a aksok megkatnahakxa nak ko'o seneykekxa, 23¿yaksak ektaha meyensakmo selyakye ahagkok ma'a kélnegkenweykenxal'a selyakye?, yakwayam enxoho hegkeyásekxak xép selyakye ahagkok sekwakto enxoho yetlo sekxaweykekxoho néten ekyakmageykekxa selyakye ahagkok kélmeykha?’ 24Aptahak axta wese' apkeláneya apkeláneykha apheyncha'a axta m'a: ‘Kólyementemekxa selyakye, kólmés ma'a ekyetna nak diez sawo selyakye.’ 25Aptahak axta apkelpakmeta apkeláneykha s'e: ‘Wese', ¡yetneyk eyke diez sawo selyakye m'a!’ 26Aptahak axta apchátegmowágko wese' s'e: ‘Kéxegke ekyetnakxa enxoho aksok, kólmeyásekxohok sat makham mók; keñe kéxegke meyke nak aksok, kóltápexcháseshok sat kólyementemekxak ma'a ekyetnakxa enxoho, antawók eykhe katnehek.#Mt 13.12; Mr 4.25; Lc 8.18. 27Enxet'ák apteme nak senmexeykha memáheyo nak hetnehek wese' apwányam apagkok, kólnaklanta s'e, kólnahap nahan nahakto'.’ ”

Jesús aptaxnegwayam tegma apwányam Jerusalén

(Mt 21.1-11; Mr 11.1-11; Jn 12.12-19)

28Apxegákxeyk axta makham Jesús apmeyákxo Jerusalén natámen apteme appeywa xa. 29Xama axta apwákxo keto' nátegma Betfagé, tén han nátegma Betania, keto' axta m'a egkexe ekwesey nak Olivos, apkeláphásek axta apkánet apkeltámeséyak. 30Aptahak axta apkeláneya s'e:

—Kólmohok hana nátegma egmonye nak. Kélwokmek sat agkok ma'a, kólwetagwók sat yámelyeheykok kélteté táma m'a, megkántamaxchek makham ma'a. Kóllekes sat táma, helyentegkásenta sat ko'o. 31Aptemék sat agkok apkelmaxneyeyncha'a énxet se'e: ‘¿Yaksak ektaha kéllekkesa nak táma?’, kólteme sat kólának se'e: ‘Wese' egegkok xeyk apmokók emha.’

32Apkelxegkek axta anhan Jesús apkeltámeséyak, apwetágwokmek axta m'a aptahakxa axta apkeláneya Jesús. 33Neyseksa aplekkeso táma yámelyeheykok axta aptahak apkelmaxneyeyncha'a ótep se'e:

—¿Yaksak ektaha kéllekkesa nak táma?

34Aptahak axta apkelátegmowágko s'e:

—Wese' egegkok apmokók emha.

35Apkeltahanchesek axta apkelaklamap yámelyeheykok, kélyentegkásekxeyk axta Jesús, keñe axta kéltamho yántek. 36Xama axta cha'a apwokmo Jesús apchaknágkaxa énxet'ák, apkelpeykásegkek axta apkelaklamap ámay awáxok. 37Xama axta apchágketchesekmo ekweywekentamxa axta ámay ekmaheyak axta egkexe Olivos, apyókxoho énxet apkelyetleykha axta apkelyennaktésawók apkelpeywa elpayhekxo apwáxók, tén han apkeltemésesa apcheymákpoho Dios eñama apkelweté ekyókxoho m'a aksok sempelakkaso nak agweta'. 38Aptahak axta s'e:

—¡Tásek sat katnehek apxénamap xa Wese' apwányam apwa'a nak yetlo apsáyam Wese' egegkok apwesey!#Sal 118.26. ¡Meyke ektahakxa egwáxok sat keytek ma'a néten, kóltemésesek sat apcheymákpoho Dios apha nak néten!

39Nápakha énxet fariseos axta nahan appaxkeygkok énxet'ák ma'a. Aptahak axta apcháneya Jesús se'e:

—Sẽlxekmóso, elpakhetches énxet'ák apkelyetláyam nak.

40Aptahak axta apchátegmowágko Jesús se'e:

—Eltennásek ko'o kéxegke, apkelwanmeyágkek agkok xa énxet'ák nak, keñe kalpáxamha m'a meteymog.

41Apwákxeyk axta Jesús keto' Jerusalén, xama axta apwet'a tegma apwányam, apkelekxagweyha axta apkelano. 42Aptahak axta s'e: “¡Awanhek ko'o seltémo kólyekpelchágwók aksok ekmowána nak kagkések meyke ektahakxa kélwáxok keso kaxwo' nak! Megkólwanchek eyke kólwetak kaxwo' kéxegke xa, hakte powásexko'. 43Kawók sat ekhem yakwánxa kóllegásesagkohok kéxegke, yahaxtamok sat neyáwa kélheykegkaxa m'a kélenmexma, ewakhak sat nahan, máxa sat nahan kañék kélyátamáxche kéxegke, 44esawhohok sat epalchesegmak tegma. Esawhohok sat nahan ennápok énxet'ák apheykha nak xa, megyohok sat kathánekxak mók meteymog, hakte megkólyekpelchak kéxegke apwa'a Dios yakwayam elwagkasek teyp kéxegke.”

Jesús apcháxñeso kañe' tegma appagkanamap

(Mt 21.12-17; Mr 11.15-19; Jn 2.13-22)

45Aptaxnegwokmek axta Jesús kañe' tegma appagkanamap natámen xa, yetlókók axta apkelántekkeso yókxexma énxet'ák apkelyanmagkásamap axta m'a. 46Aptahak axta apcháneya s'e:

—Temék eknaktáxésamaxche weykcha'áhak se'e: ‘Ektamhomaxchexa nempeywa nelmaxnagko sat katnekxak se'e exagkok nak’,#Is 56.7. apkelyexánegweykenxa apkelmenyexma eyke kéltemesáseykxak kéxegke.#Jer 7.11.

47Yókxoho ekhem axta apkelxekmóso Jesús énxet'ák kañe' tegma appagkanamap,#Lc 21.37. keñe axta m'a énxet'ák apkelámha apmonye'e nak appasmo apkelmaxnéseso Dios énxet'ák apagkok apketamsama yakweykenxa etnehek yakhek Jesús, axta nahan apkelxegexma'a m'a énxet'ák apkelxekmóso nak apnámokkok ektémakxa segánamakxa, tén han ma'a énxet'ák apkelámha apmonye'e axta m'a tegma apwányam nak. 48Axta eyke eteyeykekxak yakweykenxa etnehek yakhek Jesús, hakte apyókxoho énxet'ák axta aptakmelchesamók apháxenmo ektémakxa apkeltenneykha Jesús.

Currently Selected:

SAN LUCAS 19: LEGN

Highlight

Copy