SAN LUCAS 11

Jesús sẽlxekmóso ektémakxa nempeywa nelmaxnagko

(Mt 6.9-15; 7.7-11)

1Aptemék axta nempeywa nelmaxnagko Jesús xama yókxexma; xama axta appenchesa apteme nempeywa nelmaxnagko, aptahak axta apcháneya xama apkeltámeséyak se'e:

—Wese', hẽlxekmos negko'o nentémakxa antehek nempeywa nelmaxnagko, ekhawo m'a aptémakxa axta Juan apkelxekmósama apkeltámeséyak.

2Aptahak axta apkeláneya Jesús se'e:

—Kéltemék agkok nempeywa nelmaxnagko, kólteme sat se'e:

‘Táta, kólpagkanchesek sat apwesey exchep.

Yána sat kawak yakwayam kóltemésesek

Wese' apwányam Xép

3Hegmés cha'a negko'o nento ekyókxoho ekhem.#Pr 30.8-9.

4Ná eyakmagkásekxa nentémakxa mólya'asáxma,

hakte magyakmagkáseykxak cha'a negko'o

sentemésesakxa ekmaso apyókxoho énxet.

Ná egyoho hegahapwak negko'o segyekkónma.’

5Aptahak axta anhan apkeláneya Jesús apyetcháseykxoho s'e:

—Yetneyk agkok kéxegke kélmók apmahágko enxoho axta'a eyseksok kélxagkok, keñe etnehek yának se'e: ‘Hemásesha ko'o apkántanxo pan apagkok, 6kaxwo' apwa'ak exagkok xama émók, méko seyágkaxa ko'o.’ 7Wánxa agkok metnehek eyke yátegmowagkok pók neyseksa apyetno kañe' tegma s'e: ‘Náhexátekhes; kayhek átog, naktenchek ko'o étchek, neghágkek nahan negko'o xa; mowanchek axnekxak néten yakwayam agkések aksok.’ 8Eltennásek ko'o kéxegke, megkeykwomek eykhe exnekxak néten yakwayam egkések aksok pók, exnekxak eyke néten eñama megkalnawagko m'a pók. Egkések ma'a ekyókxoho aksok apkepmenyéxa enxoho. 9Ektahak ko'o seláneya kéxegke s'e: Kólmaxna, egkések sat Dios; kólchetam, kólwetekxak sat; kólpakmeswom nekha átog, kólmeykesesek sat. 10Kéxegke ektahakxa enxoho kélmaxnagko, kólxawak sat; keñe kéxegke ektahakxa enxoho kélchetamso, kólwetekxak sat; keñe kéxegke ektahakxa enxoho kélpakméswayam nekha átog, kólmeykesesek sat.

11“¿Kólméseya kéxegke kélketchek yéwa apkelmaxneya enxoho kelasma, kéxegke kéltaha nak apyepmeyk, 12yettaha' enxeykel'a anhan kólmések apkelmaxneya enxoho tat'appok? 13Kélya'ásegkok agkok kélméso aksok eltakmela kélketchek, kéxegke kéltaha nak ekmaso kéltémakxa, ¡eyagwánxa agkok apmopwána egkések Espíritu Santo énxet ektahakxa enxoho apkelmaxnagko m'a Kélyap apha nak néten!#Jn 14.13-14; 15.7,16; 16.23-24; 1 Jn 3.21-22; 5.14-15.

Jesús apxénamap eñama ekméso apmopwána kelyekhama'

(Mt 12.22-30; Mr 3.20-27)

14Aptekkesek axta Jesús kelyekhama' ektemésesama axta meyke appeywa énxet; xama axta ektepa m'a kelyekhama' nak, appakmétekxeyk axta m'a énxet nak. Pelakkasek axta apkelwet'a énxet'ák xa. 15Wánxa agkok, aptahak axta apkelpakmeta nápakha énxet'ák se'e: “Kelyekhama' wese' agkok ekwesey Beelzebú nak ekméso apmopwána elántekkesek kelyekhama' xa énxet nak.”#Mt 9.34; 10.25.

16Nápakha énxet axta apmokók ékkónek, apkeltamhok axta elának aksok sempelakkaso nak agweta' eñama m'a néten.#Mt 12.38; 16.1; Mr 8.11. 17Apya'ásegkok axta eyke Jesús ektahakxa elchetamso apwáxók xa énxet'ák nak. Aptahak axta apkeláneya s'e:

“Apkexpáncháseykpek agkok énxet xama apkelókxa, keñe etnehek apkelenmexamap, apnaktawásamap apancha'awók etnahagkok, ethánekxak nahan pók apxanák elyaknenagkok. 18Hawók nahan ektémakxa m'a Satanás, cham'a elenmexaxchekxo enxoho, ¿háxko katnehek katepagkok ekmowána? Ektahak seláneya kéxegke xa, hakte kélxénchek kéxegke selántekkesa ko'o kelyekhama' eñama ekmowána m'a Beelzebú; 19Nakso' agkok xa kélxéna nak, ¿Yaksak ekméso apkelmopwancha'a elántekkesek kelyekhama' m'a apkelyetleykekxo nak kéltémakxa kéxegke? Cháxa keñamak ekwetamaxche megkólakhémo kéxegke xa énxet'ák nak. 20Elántekkesek agkok ko'o kelyekhama' eñama Dios apmopwána, cháxa magkenatcheso ekwa'a kélnepyeseksa kéxegke m'a aptémakxa nak Wese' apwányam Dios.

21“Aptakmelchesek agkok apxagkok énxet ekha nak apyennakte yetlo apkelmeykha, méko katnehek ma'a aksok aptakmelcheso nak. 22Wánxa agkok, apwa'ak agkok pók aptaha apyennakte apagko', eyakmaksek nahan, elyementók ma'a ekyókxoho apkelmeykha apchásenneykekxoho axta m'a pók nak, tén han ma'a ekyókxoho aksok apagkok nak, keñe elmekxak ma'a.

23“Helmexmakha ko'o m'a énxet apteme nak mehepasmo,#Mr 9.40. keñe m'a énxet apteme enxoho mehepasmo ko'o seyancháseykekxa nak, yexpánchesek.

Espíritu ekmaso ektakhémo

(Mt 12.43-45)

24“Tekkek agkok xama kelyekhama' énxet apwáxok, kamhagkok ma'a yókxexma ekyamakakxa nak exma meykexa yegmen yakwayam enxoho kategyaha ellókasamakxa ekyampé; agkok nahan kót'ak, keñe katnehek elchetamso awáxok se'e: ‘Amyekxak sat makham exagkok, cham'a sektepakxa axta.’ 25Takháwok agkok, keñe kóteyágwakxak énxet apwáxok ektémol'a tegma kéláxñeso kañe', tén han kéltakmelcháseykekxohol'a ekheyak aksok kañe'. 26Keñe kaxog, kánchesekxak ma'a siete kelyekhama' elmasagcha'a agko', megkaxnawo nak xa mók nak, keñe kasawhaxkohok kalántaxnegwók ma'a énxet apwáxok nak, keñe kayeykhágwomhok ektémakxa axta sekxo' agko' xa énxet nak.”

Ekpayheykekxa egwáxok ekmámnaksoho agko'

27Neyseksa apkeltenneykha Jesús axta entahak ekyennaktésawo ekpeywa kelán'a nepyeseksa énxet se'e:

—¡Eleñémo agko' kelán'a ektegkeso axta exchep, cham'a ektaha axta ekwánegkeso!

28Aptahak axta apchátegmowágko Jesús se'e:

—¡Akke nakso' apkeleñémo m'a énxet apháxenmo nak Dios appeywa, tén han ma'a apkelyaheykekxoho nak ektémakxa!

Enxet ekmasagcha'a apkeltémakxa apkeltémo étak aksok sempelakkaso nak agweta'

(Mt 12.38-42; Mr 8.12)

29Apxámagwokmek axta makham énxet aphakxa Jesús. Aptahak axta Jesús apkeltennáseyncha'a énxet'ák se'e: “Asagkek apkeltémakxa énxet keso negwánxa nak; apkeltamhok étak aksok sempelakkaso nak agweta',#Mt 16.4; Mr 8.12. wánxa sat kólxekmósek ma'a ektémakxa axta Jonás. 30Sat katnehek ma'a apwetaya axta énxet'ák apheykha Nínive#Jon 3.4. ektémakxa Jonás, magkenatcheso nak agweta' yakwánxa katnehek, sat nahan katnehek ma'a ektaha nak Apketche énxet, étak sat énxet magkenatcheso agweta' keso negwánxa nak. 31Kéltemék sat agkok kélyekpelchémo énxet'ák apheykha nak keso negwánxa nak, cham'a ekhem nelyekpelchamáxchexa sat, katnamha sat wese' eñama ekpayho Nepyeyam, kalsexnenak sat nahan énxet'ák; hakte teyépek axta eñémekxa ekmoko keyxwomhok ektémakxa apya'áseykegkoho wese' apwányam Salomón,#1 R 10.1-10; 2 Cr 9.1-12. akke exnawok Salomón aksok ekyetna nak se'e. 32Yaknaha sat nahan ma'a énxet'ák apheykencha'a axta tegma apwányam Nínive ekhem nelyekpelchamáxchexa sat, cham'a kéltaha sat kélyekpelchémo énxet'ák apheyncha'a nak keso negwánxa nak, elsexnenak sat nahan énxet'ák; hakte apkelyakmagkasegkek axta apwáxók énxet'ák apheykha axta tegma apwányam Nínive, cham'a apkellegaya axta apkeltenneykha Jonás,#Jon 3.5. akke exnawok Jonás aksok ekyetna nak se'e.

Chálewaso ekyetno nak negyókxa

(Mt 5.15; 6.22-23)

33“Méko kakpósek chálewaso m'a kélálewasa enxoho, megkólpekkenwomek nahan kóneg yántéseksek, néten aksa kólchexnohok cha'a,#Mt 5.15; Mr 4.21; Lc 8.16. yakwayam enxoho kalsásesexma énxet'ák ektaha apkelántaxnegwayam kañe' tegma. 34Egakta'ák negko'o ekteme chálewaso ekyetno keso negyókxa nak; keltásek agkok kélakta'ák, keytek sat elseyexma agkok ekyókxoho kélyókxa; wánxa agkok, asagcha'awók agkok kélakta'ák, kasawhekxohok sat ekyaktesóxma ekyókxoho kélyókxa. 35Kóllenxánem keytek kéxegke elseyexma, kápok katnehek ekyaktesóxma. 36Sawhékxók agkok elseyexma ekyókxoho kélyókxa, méko enxoho ekyaktesóxma xama enxoho, tásek katnehek kélweté, ektémol'a kalsásesexma m'a chálewaso kélagkok.”

Jesús apxeyenma nápakta'awo' apkeltémakxa énxet'ák fariseos tén han ma'a énxet'ák apkelxekmóso nak segánamakxa

(Mt 23.1-36; Mr 12.38-40; Lc 20.45-47)

37Xama axta apkelwátesa apkeltenneykha Jesús, apcháneyáha axta etáswók apto apxagkok xama énxet fariseo. Aptaxnegwokmek axta Jesús ma'a, aphakmek axta nekha mésa. 38Apkenatchesek axta énxet fariseo apwet'a melyenyesa apmék Jesús amonye yakwayam etwok apto. 39Wánxa agkok, aptahak axta apcháneya Wese' egegkok se'e:

—Kéxegke fariseos kólyenyeksohok cha'a empe'ék egheykok kélmeykha nak, tén han ma'a sokpayhe kélagkok, wánxa agkok, kalánhok eyke aksok kélmenyexma m'a kañe', tén han ma'a eñama nak ekmaso kéltémakxa. 40¡Kéxegke elyéháxma nak! ¿Yagkólya'ásegkok kéxegke m'a aptaha nak apkellané aksok ekyetno nak yókxexmo', tén han ma'a ekyetno nak kañe'? 41Kólmés kéxegke énxet'ák meyke aksok apagkok ekyetno nak kañe', keñe sat kasawhaxkohok ekteme eláxñeyo.

42“¡Kéxegke laye énxet'ák fariseos! kélmésamol'a Dios nekha pánakte áwa' kélenchahayol'a kélto ekweseyl'a menta, tén han ma'a ekweseyl'a ruda, tén han ma'a kélmésamol'a nekha aksok ekyókxoho ektémakxa kélcheneykekxa nenchahayol'a nento,#Lv 27.30. megkólyahakxók eyke m'a nentémakxa ekpéwomo nak, tén han ma'a negásekhayo nak Dios. Cháxa eyéméxko nak kóllának kéxegke xa, meyke kélyenseyam kélméso Dios nekha aksok xama enxoho.

43“¡Kéxegke laye énxet'ák fariseos! kéltémo nak kaltakmelhok kéltaháno kélakneykekxexa nak, kélmámenyého nak han cha'a epeykesek énxet yetlo apcháyo m'a ámay nepyeseksa tegma nak.

44“¡Kéxegke laye kélhémo nak takhaxpop magwetél'a, apkelteyameykencha'awol'a énxet neyseksa mey'áseyak!

45Aptahak axta anhan apchátegmowágko xama énxet apkelxekmóso apnámokkok ektémakxa segánamakxa s'e:

—Sẽlxekmóso, ẽlyamatcháseyha negko'oxa xa aptahakxa nak appeywa.

46Wánxa agkok, aptahak axta apchátegmowágko Jesús se'e:

—¡Kéxegke sat nahan laye kéltaha nak kélxekmóso kélnámokkok ektémakxa segánamakxa! kélyeykhasáseykegkoho nak cha'a m'a kéltémókxa nak etnahagkok énxet, cham'a megkamopwánal'a elának xama énxet enxoho, keñe cha'a megkólanyek kéxegke xa.

47“¡Kéxegke laye kéltaha nak kélláneso takhaxpop apagkok ma'a énxet'ák apkellegaso axta Dios appeywa, cham'a kélyepmeyk nano' axta apkelnapma! 48Kéltemék agkok cha'a xa, keykpelchaxkohok cha'a ekleklamo kélwáxok aptamheykegkaxa axta kélyepmeyk nano', hakte axta apkelnapma m'a, keñe kéxegke kéllánesa takhaxpop apagkok.

49“Ekeso eñamakxa aptaha axta appeywa Dios yetlo apya'áseykegkoho s'e: ‘Aláphaksek sat ko'o énxet'ák apkellegaso nak sekpeywa, tén han ma'a énxet'ák seykha amya'a ahagkok nak, etekyók sat eyke nápakha xa énxet'ák nak, kólmenxenmakha sat nahan nápakha.’ 50Hakte ellegásesagkohok sat Dios énxet'ák keso negwánxa nak, eñama ekyegkenamaxche axta éma apagkok apyókxoho énxet'ák apkellegaso axta appeywa, eyeynamókxa m'a sekxo' axta apkeláneya Dios keso náxop, cham'a aptekyawoma axta, 51eyeynamókxa m'a ekyegkenamaxche axta éma apagkok Abel,#Gn 4.8. ekwokmoho m'a apmatña axta Zacarías,#2 Cr 24.20-21. cham'a apmatñama axta nekha ekwatnamáxchexa aksok tén han nápakha tegma appagkanamap. Ellegásesagkohok sat Dios énxet'ák keso negwánxa nak, eñama aptekyawa xa énxet'ák nak.

52“¡Kéxegke sat laye kéltaha nak kélxekmóso kélnámokkok ektémakxa segánamakxa! kélmeyókásamáxkoho nak kélagko' ma'a negya'ásegwayam nak. Wánxa agkok, akke nahan kólya'ásegweykmok kéxegkáxa, megkólhayok nahan elya'ásegwók ma'a énxet'ák apmáheyo nak elya'ásegwók.

53Xama axta aptaha apkeláneya Jesús xa, apkellókok apagko' axta m'a énxet'ák apkelxekmóso nak apnámokkok ektémakxa segánamakxa, tén han ma'a énxet'ák fariseos, apxámasegkek axta anhan apkelmaxneyeykha, 54apmokók axta ékkónek, yakwayam enxoho etekkesesek appeywa ekmaso keñe esexnena'.

Currently Selected:

SAN LUCAS 11: LEGN

Highlight

Copy