SAN JUAN 20

Jesús apxátekhágwayam

(Mt 28.1-10; Mr 16.1-8; Lc 24.1-12)

1Axto'ok agko' axta ekmeyákxo takhaxpop María Magdalena, cham'a eyeynókxal'a ekxegeykekxa makham ekhem; axta kalsakawo' ma'a, wet'ak axta ekleyáxko meteymog kélapma takhaxpop átog. 2Ketchágkakxók axta ekmeyákxo m'a aphakxa axta Simón Pedro, tén han ma'a pók apkeltámeso axta Jesús, cham'a apchásekhayókxa axta Jesús. Entahak axta eláneya s'e:

—¡kéllekkek Wese' egegkok aphápak kañe' takhaxpop, magya'ásegkok negko'o kélpekkenwánxa!

3Apxegkek axta Pedro, tén han ma'a pók apkeltámeso axta Jesús, apkelmeyákxeyk axta takhaxpop. 4Apnaktémagkakxeyk axta xa apkánet nak; kayhek axta eyke apkenye m'a pók, axta kaxnók ma'a Pedro, apmonye apweykekxa axta aptahak takhaxpop xa pók nak. 5Apteyánñagkók axta kañe' takhaxpop, apwet'ak axta m'a apáwa kélpexteté axta Jesús, axta eyke etaxnak kañe'. 6Apwokmek axta nahan Simón Pedro neptámen xa, aptaxneyk axta nahan kañe' takhaxpop. Apwet'ak axta nahan ma'a apáwa kélpexteté axta Jesús; 7apwet'ak axta nahan ma'a apáwa kélpextetcheso axta apkátek, axta épetcha'ak ma'a apáwa kélpextetma axta Jesús, kélyaksáseykxeyk axta aksa kélpekkena mók nekha. 8Keñe axta nahan aptaxna m'a pók Jesús apkeltámeso axta, cham'a ektaha axta apweykekxa apmonye takhaxpop, apwet'ak axta ektahakxa, axta nahan ey'ásekmok. 9Hakte axta elya'ásegkok makham ma'a ektémakxa nak eknaktáxésamaxche weykcha'áhak ekxeyenma ekmáheyo exátekhágwók Jesús. 10Keñe axta apkeltakháwo apxanák xa Jesús apkeltámeséyak nak.

Jesús apxekmowásamákpekxoho María Magdalena

(Mr 16.9-11)

11Yókxexma axta kenmáha María elekxagweyncha'a m'a nekha takhaxpop. Neyseksa elekxagweykha axta ekteyánñagkoho kañe' takhaxpop yakwayam kalano'. 12Wet'ak axta apkánet Dios apkelásenneykha, apkelmopé apkelántaxno apheyncha'a m'a kélpekkenakxa axta Jesús aphápak; xama axta aphak ma'a ekpayhókxa axta apkátek keñe axta pók apha m'a ekpayhókxa axta apmagkok. 13Aptahak axta apkelmaxneyeyncha'a Dios apkelásenneykha s'e:

—Kelán'a ¿yaksak ektaha elekxagweyncha'a nak?

Entahak axta eyátegmowágko kelán'a s'e:

—Wese' ahagkok ñokxa kélleya s'e, may'ásegkok nahan kélpekkenwánxa.

14Xama axta ektaha ekpeywa xa, keñe axta ekpeyncháxkoho, wet'ak axta Jesús ma'a, axta eyke keykpelchak. 15Aptahak axta apkelmaxneyeyncha'a Jesús se'e:

—Kelán'a ¿yaksak ektaha elekxagweyncha'a nak? ¿yaksak étama?

Aksok kélcheneykekxexa aptakmelcheso axta keneyk ma'a. Entahak axta eyáneya s'e:

—Xép agkok aplekweykta', héltennés ko'o appekkenwánxa enxoho, yakwayam enxoho aktamsók ko'o.

16Aptahak axta Jesús se'e:

—¡María!

Peyncháxkók axta ekpayheykxoho apkenmágkaxa, entahak axta eyáneya hebreo appeywa s'e:

—¡Rabuni! —(nenteme nak nempeywa: “sẽlxekmóso”).

17Aptahak axta apcháneya Jesús se'e:

—Náhepaknegwoho, hakte mamyákxak ko'o makham ma'a aphakxa nak Táta. Katakhoho, kaltennásekxa sat elyáxeg peya amyekxak ko'o kaxwo' ma'a aphakxa nak Táta, aptaha nak kélyap kéxegke, aptaha nak han Dios ahagkok tén han Dios kélagkok kéxegke.

18Takháwók axta María Magdalena eltennáseykxo apkeltámeséyak ekwet'a Wese' egegkok, tén han eltennáseyncha'a m'a aptahakxa axta apcháneya, natámen xa.

Jesús apxekmowásamákpekxoho apkeltámeséyak

(Mt 28.16-20; Mr 16.14-18; Lc 24.36-49)

19Xama axta ekyaktésa m'a émha amonye ekxega ekhem la'a, apchápeykxók axta átog apchaknákxo apkeltámeséyak kañe' tegma, hakte judíos axta apkelakak. Aptaxneyk axta Jesús ma'a, apkenegwokmek axta nepyeseksa apkeltámeséyak. Aptahak axta apkelpeykásegko s'e:

—¡Meyke ektahakxa kélwáxok sat katnehek kéxegke!

20Xama axta aptaha appeywa xa, keñe axta apxekmósa apmék, tén han ma'a nápakha. Kelpayheykxeyk axta apwáxók apkeltámeséyak apwetákxo Wese' egegkok. 21Keñe axta aptaha makham apkeláneya Jesús se'e:

—¡Meyke ektahakxa kélwáxok sat katnehek kéxegke! Eláphásek ko'o kéxegke ekhawo ektahakxa axta seyáphaso ko'o Táta.

22Keñe axta apkelwátekhápégko apkeltámeséyak, aptahak axta apkeláneya s'e:

—Ekmések ko'o kéxegke Espíritu Santo. 23Enxet ektahakxa enxoho megkólyakmagkáseykekxa kéxegke apkeltémakxa melya'asáxma, megkólyakmagkásekxék sat apkeltémakxa xa énxet'ák nak, keñe m'a énxet kélyakmagkásekxexa enxoho apkeltémakxa melya'asáxma, kólyakmagkásekxak sat apkeltémakxa melya'asáxma.#Mt 16.19; 18.18.

Tomás apweté Wese' egegkok apxátekhágwayam

24Tomás axta xama apkeltámeséyak Jesús apkeltamhomakpo axta Apkánet Appalleykmoho, axta exnak xamo' apkelxegexma'a m'a, cham'a apwákxo axta Jesús. 25Aptahak axta apkeltennáseyncha'a apkelxegexma'a s'e:

—Negwetákxeyk xeyk negko'o Wese' egegkok.

Aptahak axta apchátegmowágko Tomás se'e:

—Agkok ko'o ót'ak láwa axta kélyetxakkaso apmék, agkok nahan watchásak ephék ma'a láwa elyagkaxkatma nak, agkok nahan watchásak émek ma'a nápakha, ay'ásók sat ko'o apxátekhágwokmo m'a.

26Ocho ekhem axta entahak ekyeykhe, keñe axta apchaknákxo makham Jesús apkeltámeséyak xama tegma, apheyk axta kaxwo' Tomás ma'a. Apkelápégkakxók axta nahan atña'ák, aptaxnegwokmek axta eyke Jesús ma'a, apkenegwokmek axta nepyeseksa. Aptahak axta apkelpeykásegko s'e:

—Meyke ektahakxa kélwáxok sat katnehek kéxegke.

27Aptahak axta Jesús apcháneya Tomás se'e:

—Yetches apophék se'e. Elano nahan emék. Ey'ásegma nahan apmek se'e, yetches neheykha ko'o. Ná etne aksa apya'áseyam; ¡ná ey'ásem!

28Aptahak axta Tomás se'e:

—¡Wese' ahagkok!, ¡Dios ahagkok!

29Aptahak axta Jesús apcháneya Tomás se'e:

—¿Yahey'ásekmok xép sét'a s'e kaxwo' nak? Apkeleñémo agko' énxet'ák ektaha nak mehey'áseyam ko'o mehét'akxoho.

Ektémakxa keso weykcha'áhak nak

30Xámok axta makham apkelané Jesús aksok sempelakkaso agweta' nápakta'awo' apkeltámeséyak, cham'a megkanaktáxesamaxko nak se'e weykcha'áhak nak. 31Wánxa agkok, naktáxésamaxchek eyke weykcha'áhak xa yakwayam enxoho megkólya'asók kéxegke Jesús aptaha Mesías, aptaha nak Dios Apketche, yakwayam enxoho nahan kólwetak ekyennakte kélnenya'ák eñama Cristo, neyseksa kélteme megkólya'áseyam.

Currently Selected:

SAN JUAN 20: LEGN

Highlight

Copy