SAN JUAN 16

1“Eltennásek xeyk kéxegke xa, yakwayam enxoho megkólyensemek ektémakxa nak mehelya'áseyam ko'o. 2Kólántekkesek sat kéxegke apchakneykekxa nak judíos, keñe sat kammok nahan ekhem yakwánxa nak yának elának énxet ma'a ekleklamókxa nak apwáxok antehek Dios, cham'a apkennapa enxoho kéxegke xa énxet'ák nak. 3Elanagkok sat énxet'ák xa, hakte mehẽlya'ásegkok negko'o, melya'ásegkok nahan ma'a Táta, mehey'ásegkok nahan ko'o xa. 4Eltennásek ko'o kéxegke xa, yakwayam enxoho kaxénwakxohok kélwáxok sektéma selánagkama kéxegke, cham'a, ektaha sat kéxegke xa.

Ektémakxa nak aksok apkelané Espíritu Santo

“Axta eyke altennasók kéxegke sekxo' agko' xa, hakte selxegexma'a axta kéxegke. 5Peyk kaxwo' ko'o ay'ókxak ma'a aptaha axta seyáphaso, mehelmaxneyáha nahan kéxegke yakwánxa amhagkok ko'o; 6Wánxa agkok, kellapwámegkek aksa seltennasa kéxegke xa. 7tásek eyke atakhekxak ko'o yakwayam enxoho kapasmok kéxegke. Hakte agkok atakhákxak ko'o, meweyk yakwayam exnak kélnepyeseksa kéxegke m'a aptaha nak Apmasma kéxegke; ektakhakxeyk sat agkok ko'o, wáphásesek sat kéxegke m'a. Nakso' xa sektahakxa nak seláneya kéxegke. 8Apwa'ak sat agkok ma'a, tásek sat katnehek apxekmóso énxet'ák apheykha náxop ma'a ektémakxa nak mólya'asáxma, tén exekmósek ma'a nentémakxa ekpéwomo nak, tén han exekmósek ma'a yakwánxa nak katnehek apkelyekpelchásesamo Dios énxet'ák. 9Enxet apteme nak sey'áseyam ko'o, cháxa apteme ekha mey'asáxma xa; 10Enxet meyke nak aptémakxa, ko'o neykhe m'a, keso, sekmoko nak kaxwo' amyekxak ma'a aphakxa nak Táta, keñe sat mehelwetekxók cha'a kéxegke; 11kataxchek sat nahan kaxkak Dios apyekpelchásesamo m'a ektaha nak wese' keso náxop, cham'a ektéma axta eksexnánémaxche sekxo' agko'.

12“Xámok eykhe yakwayam altennaksek kéxegke, wánxa agkok, megkólwanchek eyke kólya'ásegwók ekyókxoho nak. 13Apxegakmek sat agkok Espíritu aptaha nak apmámnaksoho, elya'asásegwók sat kéxegke ektémakxa m'a ektaha nak ekmámnaksoho agko'; hakte metnehek sat apxeyenma apagko' ma'a aptahakxa enxoho appeywa, wánxa sat exének ma'a ekyókxoho ektémakxa nak aplegé, elya'asásegwók sat nahan kéxegke m'a peya nak katnehek. 14Sat nahan exekmósek kéxegke ektémakxa nak ko'o seyeymáxkoho m'a, hakte exkak sat ma'a ektaha nak sekpeywa ahagko' ko'o, elya'asásegwók sat nahan kéxegke. 15Ekyókxoho aksok ekyetna nak Táta, ko'o nahan ahagkok ma'a; ékeso eñamakxa sekxéna nak ko'o peya exkak Espíritu m'a ektaha nak sekpeywa ahagko' ko'o, tén han peya elya'asásegwók kéxegke.

16“Kaxwo' sat mehelwetekxók cha'a kéxegke, yáma kawegkohok sat, keñe sat helwetekxak makham.”

Senlapwayam yakwayam kayakmagkasek ekpayheykekxa egwáxok

17Keñe axta aptaha apkelpakhetcháseykpoho Jesús apkeltámeséyak se'e:

—¿Yaksak kexaha apxéna aptaha nak segáneya xa? Ẽltennásek xeyk peya magwetekxók cha'a kaxwo', keñe peya yáma kawegkohok, keñe agwetekxak makham, exchek aptahak appeywa xa, hakte hek xeyk peyk emyekxak ma'a aphakxa nak Apyap. 18¿Yaksak kexaha apxéna aptaha nak appeywa ‘yakwatakxoho’? Magya'ásegkok negko'o aptahakxa nak appeywa.

19Apyekpelchék axta Jesús kélmoko kólmaxneyha. Aptahak axta apkeláneya s'e:

—Eltennásek xeyk kéxegke peya mehelwetekxók cha'a, keñe sekxéna nahan yáma kawegkohok, keñe helwetekxak makham. ¿Keya kélmaxneyeyncha'a nak cha'a kélmók kéxegke kélxéna xa? 20Kóllekxagwaha sat kéxegke, kallapwomagkok sat nahan, keñe sat kalpayhekxak apwáxók ma'a énxet'ák apheykha nak keso náxop. Kallapwomagkok sat eykhe kéxegke, ekpayheykekxa kélwáxok sat eyke kayakmagkasek xa ellapwámeyak nak. Nakso' xa sektahakxa nak seláneya kéxegke. 21Peyk agkok kategkesek étche kelán'a, kayakhapmakha awáxok ma'a ekwokmo enxoho ekhem yakwánxa kategkesek étche; wánxa agkok, apteyekmek agkok étche, kalwagkámak ma'a ekmáske eñama ekpayheykekxa awáxok apteyekmo enxoho xama sakcha'a keso náxop. 22Hawók ektahakxa nak han kéxegkáxa elyakhápeykha kélwáxok keso kaxwo' nak; wánxa agkok, awatak sat eyke yakwayam alwetágwatak kéxegke, keñe sat kayawhok agko' elpayheykekxa kélwáxok, cham'a ekpayheykekxa egwáxok megkólmowána nak kólyementók.

23“Kamaskok sat selmaxneyeyncha'a kéxegke xama aksok ekwokmo enxoho m'a ekhem nak. Egkések sat kéxegke Táta ekyókxoho aksok kélmaxnagko nak eñama sekwesey. Nakso' xa sektahakxa nak seláneya kéxegke. 24Akke kólmaxneyk makham kéxegke Táta xama aksok keso kaxwo' nak, eñama nak ko'o sekwesey; kólmaxna, kólxawak sat, yakwayam enxoho kayágwomhok agko' ma'a ekpayheykekxa kélwáxok nak.#Mt 7.7-11; Stg 1.5-6.

Jesucristo apmalanma ektémakxa keso náxop

25“Eltennásek xeyk kéxegke xa, cham'a sekyetcháseykxoho exchek cha'a, kammok sat eyke ekhem yakwánxa sat maltennasha kéxegke m'a sekyetcháseykekxoho nak, apeykeseshok sat seltennaso m'a aptémakxa nak Táta. 26Kólmaxnak sat kéxegke yetlo kélxeyenma sekwesey ekwokmo sat xa ekhem nak, maxénak ko'o peya almaxnak Táta yakwayam wának epasmok kéxegke, 27hakte apkelásekhayók kéxegke m'a Táta. Apkelásekhayók kéxegke Táta, hakte elásekha'awók ko'o kéxegke, megkólya'aseykmok nahan señama ko'o m'a Táta. 28Axta eñamak ko'o m'a aphakxa nak Táta, yakwayam awak keso náxop, kaxwo' eyke peyk kamaskok makham sekha keso náxop, yakwayam amyekxak ma'a aphakxa nak Táta.

29Keñe axta aptaha apkelpakmeta apkeltámeséyak se'e:

—Appeykásók kaxwo' xép sẽltennaso meyke apyetcháseykekxoho. 30Negya'ásegwokmek kaxwo' negko'o apya'ásegkoho exchep ekyókxoho aksok, negya'ásegwokmek nahan megkeymexko elmaxneyha xama énxet enxoho, cháxa keñamak magya'ásekmo nak negko'o apkeñama exchep ma'a Dios.

31Aptahak axta apchátegmowágko Jesús se'e.

—Neyke kólya'ásekmok kaxwo' kéxegke. 32Wokmek eyke kaxwo' ekhem, keso kaxwo' nak, yakwánxa nak kólexpaknek kéxegke, apmaheyak apagko' sat cha'a etnehek kélmók apmahágkaxa enxoho, exakko' sat nahan helyenyok, háwe eyke exakko', Táta nahan sekxegexma. 33Eltennásek kéxegke ekyókxoho xa, yakwayam enxoho kólwetak meyke ektahakxa kélwáxok neyseksók selyepetcheyo ko'o. Kóllegagkohok sat kéxegke keso náxop; wánxa agkok, kólteme kélwaskápeykekxoho, ekmalanchek ko'o ektémakxa nak keso náxop.#Ro 8.37; 2 Co 2.14; Ap 3.21; 5.5.

Currently Selected:

SAN JUAN 16: LEGN

Highlight

Copy