SAN JUAN 1

Dios appeywa ektamheykekxa énxet

1Aphegkek axta sekxo' agko' ma'a ektaha nak Appeywa, aphegkek axta xamo' Dios, Dios axta anhan ma'a. 2Aphegkek axta xamo' Dios sekxo' agko'. 3Axta keñamak apkeláneya Dios ekyókxoho aksok ma'a, megkalanaxchek axta ekyókxoho aksok ekhágko nak, méko enxoho m'a ektaha nak Appeywa.#Gn 1.1-3; Sal 33.6; Pr 8.22-31; Col 1.15-17; Hch 1.2; 1 Jn 1.1; Ap 19.13. 4Yetnegkek axta nahan ekyennakte egnenyek ma'a. Elseyexma axta m'a ekyennakte egnenyek nak yakwayam enxoho kalsásesexma apyókxoho énxet'ák. 5Chápogwatchek nahan neyseksa ekyaktesóxma xa elseyexma nak, yawanchek nahan ekyaktesóxma kaspanchesek.

6Apwa'ak axta xama énxet apwesey Juan,#Mt 3.1; Mr 1.4; Lc 3.1-2. aptaha axta Dios apcháphaso. 7Apwa'ak axta yakwayam enxoho exének ektémakxa m'a elseyexma, yakwayam enxoho melya'asók apyókxoho énxet'ák ektémakxa apkeltenneykha. 8Háwe axta Juan elseyexma, wánxa agkok kéláphaso axta eyke yakwayam exének ektémakxa elseyexma. 9Wayak axta elseyexma ekmámnaksoho agko' keso náxop ektaha nak elsásesóxma apyókxoho énxet'ák.

10Aphegkek axta náxop xa ektaha nak Appeywa; apkeláneyak axta eykhe anhan Dios keso náxop eñama xa ektaha nak Appeywa, axta eyke elyekpelchék énxet'ák apheykha nak keso náxop. 11Apwayak axta eykhe apheykegkaxa m'a ektaha nak énxet'ák apagkok, wánxa agkok axta eyke yápeykha m'a ektaha nak énxet'ák apagkok. 12Keñe m'a énxet'ák ektaha axta apchápeykha, ektaha axta anhan apteme mey'áseyam, apxénchek axta ekpayhawo etnahagkok Dios apketchek, 13Dios apketchek xa énxet'ák nak, háwe m'a ektémakxal'a appaleyam kélketchek, háwe nahan ma'a ektémakxal'a apmopmenyého apketchek énxet, Dios akke keñamak apteméseso yakwayam etnahagkok apketchek xa.

14Enxet apagko' axta aptamheykekxak ma'a ektaha nak Appeywa, aphegkek axta nahan negyeseksa, negwet'ak axta anhan negko'o ektémakxa apcheymákpoho. Cháxa apcheymákpoho apmésa axta Apyap eñama apteme wánxa xama Apketche xa. Láneyok axta apwáxok segásekhayo tén han ma'a ekmámnaksoho nak. 15Apkeltenneykha axta Juan apxeyenma aptémakxa m'a. Aptahak axta apxéna s'e: “Cháxa sekxeyenma axta cha'a ko'o seltenneykencha'a xa, sektéma axta cha'a sekpeywa s'e. Enxet peya nak ewak netámen, apteme maxnawo ko'o, hakte aphegkek axta meykexa ko'o.”

16Tekxeyagkók axta mók segásekhayo Dios eñama m'a ektémakxa nak ekyawe ektakmeleykha apwáxok. 17Moisés axta keñamak ekteyapma m'a segánamakxa, Cristo axta eyke keñamak segweyktámho negko'o m'a segásekhayo tén han ma'a ekmámnaksoho nak. 18Méko ekwetaya aptémakxa Dios xama enxoho; axta eyke segyekpelcháseseyam negko'o m'a aptaha nak wánxa xama Dios Apketche, aptaha nak han Dios, aptaha nak han cha'a meyenyaweykha Apyap.#Mt 11.27; Lc 10.22; 1 Jn 1.2.

Juan el Bautista apkeltenneykha apxeyenma Jesucristo

(Mt 3.11-12; Mr 1.7-8; Lc 3.15-17)

19Apkeláphásek axta énxet'ák judíos apkeleñama tegma apwányam Jerusalén aphakxa Juan ma'a appasmo nak apkelmaxnéseso Dios énxet'ák apagkok, axta anhan apkeláphásak ma'a énxet'ák Levitas yakwayam elmaxneyha aptémakxa. 20Aptakmelchásók axta eyke apxeyenma Juan. Aptahak axta s'e:

—Háwe ko'o Mesías.

21Apkelmaxneyakxók axta makham xa énxet'ák nak:

—¿Yaksak eyke énxet xép?

—¿Háweya exchep Elías#Mal 4.5. aptaha axta Dios appeywa aplegaso?

—Háwe ko'o, —axta aptahak apchátegmowágko Juan. Apkelenxanakmók axta eyke apkelmaxneyeykha xa énxet'ák nak:

—¿Xeyepya Dios appeywa aplegaso apxénamakpo nak ewa'?#Dt 18.15,18.

—Háwe ko'o, axta aptahak makham apchátegmowágko Juan:

22Kélmaxneyakxók axta makham Juan:

—¿Yaksak énxet xép? Egmenyék negko'o ansakxések amya'a m'a énxet'ák ektaha axta sẽláphaso negko'o.

—¿Háxko sat etnehek hẽltennaksek aptémakxa exchep?

23Aptahak axta apchátegmowágko Juan se'e:

—Ko'o sekteme énxet apkelpáxameykha yókxexma meykexa énxet, sektéma cha'a sekpeywa s'e: ‘Kóllanés Wese' egegkok ámay ekpéwomo’, ekhawo m'a aptémakxa axta cha'a apkeltenneykha Isaías, aptaha axta Dios appeywa aplegaso.#Is 40.3.

24-25Aptahak axta apkelmaxneyeyncha'a énxet'ák ektaha axta apkeláphaso fariseos yakwayam elpakhetchesapohok Juan se'e:

—Háwe agkok xép Mesías, háwe agkok nahan Elías, háwe agkok nahan Dios appeywa aplegaso, ¿Yaksak ektaha apyakpasásegko nak yegmen énxet?

26Aptahak axta apchátegmowágko Juan se'e:

—Yegmen agko' ko'o ekyakpasásegkok kéxegke, wánxa agkok apheyk eyke kélnepyeseksa kéxegke megkólyekpelcha nak, 27cham'a peya nak ewak netámen ko'o. Mehepayhawok nahan ko'o alhexyawásesek axát'ák apkeltéto apmagkok.

28Cháxa ektaha axta yókxexma kéltéma axta Betania xa, ekpayho nak ekteyapmakxa ekhem nekha wátsam Jordán, cham'a apyakpasáseykegkaxa axta yegmen énxet Juan.

Jesús Nekkések Apketkok apkeñama Dios

29Mók ekhem axta entahak apwet'a Juan apxegakmo Jesús, aptahak axta Juan apkeláneya énxet'ák se'e: “¡Kóllano, cháxa Nekkések Apketkok apkeñama nak Dios xa, aptaha nak apmaséseso melya'asáxma énxet'ák keso náxop! 30Cháxa sekxeyenma axta cha'a ko'o xa sektéma axta cha'a sekpeywa s'e: ‘Apxegakmek netámen xama énxet maxnawo nak ko'o, hakte aphegkek axta meykexa ko'o.’ 31Axta ko'oxa ay'ásegkok aptémakxa xa, wánxa agkok ekwa'ak axta eyke ko'o sekyakpasásegko yegmen énxet, yakwayam enxoho elyekpelchágwók énxet'ák Israel aptémakxa m'a sekxéna nak.”

32Aptahak axta anhan Juan apxéna s'e: “Ekwet'ak axta ko'o Espíritu Santo apwéweynto apkeñama néten, máxa axta aptahak wáx'ay apyakwa'a apyetseksek. 33Axta ko'o makham ay'áseykegkok aptémakxa m'a; wánxa agkok, aptahak axta seyáneya ektaha axta seyáphaso yakwayam ayakpásesagkok yegmen énxet se'e: ‘Apwet'ak sat agkok xép apwéweynto Espíritu, tén han apyakwa'a enxoho apyetseksek énxet, cháxa apyakpasáseykegkohol'a yegmen énxet yetlo Espíritu Santo xa.’ 34Ekwet'ak axta ko'o m'a. Ekxénchek nahan ko'o aptaha Dios Apketche m'a.”

Apmonye'e Jesús apkeltámeséyak

35Mók ekhem axta entahak apha makham Juan yetlo apkánet apkeltámeséyak ma'a. 36Xama axta apwet'a Juan apyeyk'a Jesús, aptahak axta s'e:

—¡Kóllano, cháxa Nekkések Apketkok apkeñama Dios xa.

37Xama axta apkelleg'a aptahakxa appeywa Juan apkánet apkeltámeséyak, keñe axta apkemhágko Jesús. 38Appeynchakpok axta neptámen Jesús. Xama axta apwet'a kélemhágko, aptahak axta apkelmaxneyeyncha'a ektaha axta apkemheyak se'e:

—¿Yaksak kélchetama?

—Sẽlxekmóso, ¿háxko aphakxa exchep? axta aptahak apkelátegmowágko.

39Aptahak axta apchátegmowágko Jesús se'e:

—Kólchempoho, kólteyánegwomho.

Apkelxegkek axta apteyánegwokmoho m'a aphamakxa axta Jesús, aphakmek axta xamo' ma'a, hakte las cuatro taxnam axta entahak.

40Apkánet énxet axta apkellegé aptahakxa appeywa Juan, apkelyetlákxeyk axta anhan Jesús, Andrés axta apwesey xama m'a, aptaha axta Simón Pedro apepma'. 41Apxegkek axta Andrés apketama apepma' apwesey Simón, aptahak axta apcháneya s'e:

—Negwetákxeyk negko'o Mesías (kéltéma nak: Cristo)

42Keñe axta Andrés apyentamákxo Simón ma'a aphakxa axta Jesús; xama axta apwet'a Jesús ma'a Simón, aptahak axta apcháneya s'e:

—Xép Simón, Juan apketche, eltamhakpok sat xép Cefas (nenteme nak nempeywa Pedro).

Jesús apwóneykha Felipe tén han Natanael

43Mók ekhem axta entahak ekxéna apwáxok emhagkok Jesús ma'a yókxexma Galilea. Aptahaña'awók axta Felipe. Aptahak axta apcháneya s'e:

—Hétlawha ko'o.

44Nátegma Betsaida axta apkeñamak Felipe, cham'a apkeleñamakxa axta Andrés tén han Pedro. 45Apxegkek axta Felipe apketama Natanael. Aptahak axta apcháneya s'e:

—Negwet'ak negko'o m'a énxet aptáxesama nak apwesey Moisés weykcha'áhak eknaktáxésamaxchexa nak segánamakxa, cham'a aptáxesama nak han énxet'ák Dios appeywa apkellegaso apxeyenma m'a. Jesús apkeñama tegma apwányam Nazaret ma'a, José apketche.

46Aptahak axta appakmeta Natanael se'e:

—¿Awanchek enxeykel'a katyapok aksok ektakmela m'a tegma apwányam Nazaret?

Aptahak axta apchátegmowágko Felipe s'e:

—Empoho, etyánegwoho hana.

47Xama axta apwet'a Jesús apxegakmo Natanael, aptahak axta appakmeta s'e:

—Cháxa apxegakmo aptaha nak nakso' Israel xa, melyexancháseykha anhan xama énxet enxoho.

48Aptahak axta apkelmaxneyeyncha'a Natanael se'e:

—¿Háxko ektahakxa sékpelchawo nak xép? Aptahak axta apchátegmowágko Jesús se'e:

—Ekwet'ak xeyk xép kóneg higo yámet amonye apwóneykha exchek Felipe. 49Aptahak axta Natanael apcháneya Jesús se'e:

—Sẽlxekmóso, ¡Xép apteme Dios Apketche,#Mt 16.15. xép nahan apteme Israel Wese' apwányam apagkok!

50Aptahak axta apchátegmowágko Jesús se'e:

—¿Wánxaya aksa aptaha mehey'áseyam xép ma'a sekxéna exchek sekwet'a kóneg higo yámet? Étak sat xép aksok ektakmela agko' megkaxnawo nak xa.

51Aptahak axta nahan Jesús appeywa s'e:

—Kólwetak sat kéxegke kamayhekxak néten, kólwetak sat nahan elweweykentak#Gn 28.12. cha'a Dios apkelásenneykha apkeleñama néten, tén han elmeyekxak cha'a m'a néten, takhapxet ma'a ektaha nak Apketche énxet. Nakso' xa sektahakxa nak seláneya kéxegke.

Currently Selected:

SAN JUAN 1: LEGN

Highlight

Copy