Luuka 15

Ɨkɨhwananitso kya ngʼolo ɨjyajagile

(Mataayo 18:12-14)

1Avasangʉtsi va songo vongosu na vatulanongwa vaalʉtaga kwa Yɨɨsʉ kukʉmpʉlɨhɨtsa. 2Pwʉ aVafalisayo na vamanyisi va ndagɨlo, vakatengʉla ʉkwɨngʼuula valɨkʉta, “Kɨki ʉmuunu ʉjʉ ikʉvʉʉpɨlɨla avatulanongwa, ikange iilya na veene?”

3Pwʉ ʉYɨɨsʉ akavavʉʉla ɨkɨhwananitso ɨkɨ akata, 4“Angave mpamato pagati paanyie alɨ ni ngʼolo ʉndeevʉlʉ mpamato (100), pwʉ ɨjyɨnge jɨjage, jiivomba kɨki? Jiikʉtsileka itsinge tsilya isitsigo budikakʉpamato na budikakʉpamato (99) pa lʉkɨnga, nʉ kʉbɨha kulonda ɨjyʉ jɨjagile, ʉkʉsikila ʉpwʉ ikʉjɨvona.

5“Kange wʉ ajɨweene, jiihovoka, jiikʉjɨvɨɨka pa mavega ga mwene, 6nʉ kʉvuja najyo kʉ nyumba. Wʉ asiike kʉ nyumba, pwʉ ikʉvɨɨlanga avamanyaani na vambʉtsengelanile va mwene, ikʉvavʉʉla iita, ‘Hekelagi paninie nʉʉne, ʉlwakʉva ndɨjɨweene ɨngʼolo jyango ɨjyʉ jɨkajagile!’

7“Ndikʉvavʉʉla ʉkʉta, vʉvʉle vʉle ava kʉkyanya viiva nʉ lʉhekelo ʉpwʉ ʉntulanongwa mpamato ipela imbiivi tsa mwene. Ʉlʉhekelo ʉlwa jʉlwiva lʉvaha ʉkʉlʉtɨɨlɨla ʉlʉhekelo lwa kʉva navo avaanu isitsigo budikakʉpamato na budikakʉpamato avagolosu, ʉwʉ valɨ vʉvʉle itsa kʉlaata.”

Ɨkɨhwananitso kya hela ɨjyajagile

8ɄYɨɨsʉ akavavʉʉla ɨkɨhwananitso ɨkɨnge, akata, “Ikange, tʉte ʉnʼdala mpamato alɨ ni hela kɨtsigo (10), pwʉ ɨhela mamato jijaga, jiivomba kɨki? Jiipamba ɨnyaale, nʉ kʉkuuna ɨnyumba jyoni, jiikɨkupila ʉkʉlonda ʉkʉsikila ʉpwʉ ikʉjɨvona. 9Pwʉ angajɨvone, jiikʉvɨɨlanga avamanyaani na vambʉtsengelanile va mwene, nʉ kʉvavʉʉla ʉkʉta, ‘Hekelagi paninie nʉʉne, ʉlwakʉva ndɨjɨweene ɨhela jyango ɨjyʉ jɨkajagile!’

10“Ndikʉvavʉʉla ʉkʉta, wʉ jɨlɨwo, ʉNgʉlʉve ihekela pamiiho ga vasuungʼwa va mwene, ʉpwʉ ʉntulanongwa mpamato, ilaata imbiivi tsa mwene.”

Ɨkɨhwananitso kya mwana ʉnʼjagi

11ɄYɨɨsʉ akatsova ɨkɨhwananitso ɨkɨnge akata, “Aalepwo ʉmuunu mpamato, ʉvɨ aale na vanswambe vavɨlɨ. 12Ʉnswambe ʉnʼdebe, akalʉta kwa dadaaje akata, ‘Gwe daada, ndidoova ʉʉme ʉvʉhaale wango.’ Pwʉ ʉdadaaje akanʼgavɨla, nʉ jyʉnge ʉvʉhaale wa mwene.

13“Wʉ silʉtɨngʼiinie isigono sidebe, ʉnswambe ʉnʼdebe akalʉndamania isiinu sya mwene syoni, akahega akalʉta kʉ kɨlʉnga kya kʉvʉtale. Wʉ atsisiike ʉkwa, akatengʉla ʉkʉjesʉlania ɨkyʉma mu mbombo inzyeje, ʉkʉsikila ʉpwʉ imala kyoni. 14Wʉ amalile ɨkyʉma ɨkyo, ɨnzala ɨngʼali jɨkagwa mu kɨlʉnga kɨlya, namwene akava vʉvʉle ɨkyakʉlya. 15Pwʉ akalʉta kʉ muunu mpamato va kɨlʉnga kɨlya, akadoova amalɨmo. Ʉmuunu ʉlya, akammɨlɨka kʉ kɨlɨmɨla kuliisa ingʉbe#15:15 Kuliisa ingʉbe Kʉ Vayahudi ɨmbombo jya kʉliisa ingʉbe jyale mbombo ɨjyʉ navaavombage ʉlwakʉva ingʉbe tsyale sikanu isyʉ vaale mwiko. tsa mwene. 16Ʉnʼdɨɨmi ʉlya akava nɨ nzala. Pwʉ alɨkʉnogwa ʉkʉlya amakoona ʉgwʉ tsyalitsaga ingʉbe. Naavepwo ʉmuunu nʉ mpamato ʉvɨ aampeetsaga ɨkɨɨnu ɨkɨveetsaga.

17“Kʉmbele, akasaaga mu numbula jya mwene akata, ‘Lola, avavombi vooni va daada, viilya nʉ kʉsigatsa, kɨki ʉne ndiiswa apa nɨ nzala! 18Lɨno jʉndikilivuka kwa daada, nʉ kʉmbʉʉla ʉkʉta, “Gwe daada, ndɨtulile ɨnongwa kwa Ngʉlʉve na kwave. 19Lɨno nandɨnogiili ʉkwɨlangwa mwana vaako, ndidoova ʉmbɨɨke ndɨve mpamato va vavombi vaako.” ’

20“Pwʉ akahega alɨkʉvuja kwa dadaaje. Wʉ ahegelye kʉ nyumba jya dadaaje, ʉdadaaje akambona kʉ kʉvʉtale, akankolela ɨkɨsa. Akannyilila, akankumbatɨla nʉ kʉnsaamusa pa kɨpambaga. 21Pwʉ ʉmwana ʉlya, akambʉʉla ʉdadaaje akata, ‘Gwe daada, ndɨtulile ɨnongwa kwa Ngʉlʉve na kwave. Nandɨnogiili ʉkwɨlangwa mwana vaako.’

22“Ʉmwene ʉdadaaje akavavʉʉla avavanda va mwene akata, ‘Muleete ngʼaningʼaani ʉnsabwa ʉnnonu munswalɨtse. Munswalɨtse nɨ pete mu kɨmwana kya kɨvoko, ni silaatu mu silʉnde.#15:22 Munswalɨtse nɨ pete mu kɨmwana kya kɨvoko, ni silaatu mu silʉnde Isiinu isi isyʉ ʉdadaaje aanswaliitse ʉmwana va mwene, syavoniaga ʉkʉta amwʉpɨlye ʉmwana va mwene, ikange nakambɨɨke ʉkʉva mbanda. 23Mutoole ɨsenga jɨlya ɨnonu, muhɨnze, tʉvɨɨke ʉlʉhekelo, 24manya ʉmwana vango ʉjʉ, aajagile, lɨno avoniike, aale ʉta asue, lɨno mwʉmi!’ Pwʉ avaanu valya vooni vakatengʉla ʉkʉhekela.

25“Ʉnsɨkɨ ʉgwa, ʉnswambe ʉmbaha aale kʉ kɨlɨmɨla. Wʉ ivuja alɨ pawiipi na pa nyumba, akapʉlɨka avaanu vikwɨmba nʉ kʉnema. 26Akamwɨlanga ʉmbombi mpamato, akambʉʉtsa akata, ‘Kʉlɨ kɨki?’ 27Ʉmbombi akamwanda akata, ‘Ʉnnunaavo avujile, nʉ dadaajo ammɨnzye ɨsenga ɨjɨdutwive, ʉlwakʉva ambwene ʉmwana va mwene apitsiige mwʉmi ikange innonu.’ 28Ʉnswambe ʉmbaha ʉlya akaviipa, akatsila ʉkwingila mu nyumba. Pwʉ ʉdadaaje akahʉma kʉnzi, akatengʉla ʉkʉnsiima iingile. 29Napeene, ʉmwene akamwanda ʉdadaaje akata, ‘Lola! Ɨmyaka gyoni ɨgɨ ndikʉkʉvombela imbombo, ikange, nakɨgono kɨpamato nandɨgelili ʉkʉbeda ʉgwʉ vukʉndagɨla! Paninie naago nʉgelili ʉkʉʉma ʉne pange kɨpene, pakʉta ndɨhekele paninie na vamanyaani vango. 30Lɨno wʉ itsile ʉmwana vaako ʉjʉ, ʉvɨ atsijeviinie ɨkyʉma kyako paninie na valigu, ʉmmɨnzye ɨsenga ɨnonu!’

31“Ʉdadaaje akambʉʉla akata, ‘Mwana vango, ʉve ʉlɨ nʉʉne isigono syoni, isiinu syoni isyʉ ndɨlɨ nasyo syako. 32Lɨno, patʉnogye ʉkʉvɨɨka ʉlʉhekelo nʉ kʉhovoka ʉlwakʉva ʉnnunaavo aajagile, lɨno avoniike, aale ʉta asue, lɨno mwʉmi!’ ”

Currently Selected:

Luuka 15: zga

Highlight

Copy