Luuka 11

Imanyiiso tsa kʉnʼdoova ʉNgʉlʉve

(Mataayo 6:9-13; 7:7-11)

1Ɨkɨgono kɨpamato, ʉYɨɨsʉ aale apoonu ʉpwʉ ɨɨsajaga kwa Ngʉlʉve. Wʉ amalile ʉkwɨsaja, ʉnkongi va mwene mpamato akata, “Gwe Ntwa, tudoova ʉtʉmanyiise ʉkwɨsaja ndʉwʉ ʉYohana aavamanyiise avakongi va mwene.”

2ɄYɨɨsʉ akavavʉʉla akata, “Wʉ mukɨsaja, muteetsage,

‘Daada viitu va kʉkyanya,#11:2 Viitu va kʉkyanya Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga.

ɨlitaawa lyako lɨvalatsiwaagwe.

ɄLʉdeeva lwako lwitsage.

Ʉvʉnogwe waako vʉkongiwaagwe paasi apa,

nda kʉkyanya. #11:2 Ʉvʉnogwe waako vʉkongiwaagwe paasi apa, nda kʉkyanya Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga.

3Ʉtʉpeetsage isiinu siitu isya sigono syoni.

4Ʉtʉsyɨkɨlage inongwa tsiitu,

manya najyʉwe tukʉvasyɨkɨla vooni avalɨ ni nongwa kwawe.

Ʉlatʉvɨɨkaga ndʉgelo,

apeene ʉtʉpoke kʉ ntavangwa.’ ”#11:4 Apeene ʉtʉpoke kʉ ntavangwa Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga.

Ʉkʉdoova kɨtsila kʉgatala

5Pwʉ akavavʉʉla akata, “Angave ʉmuunu mpamato pagati paanyie ilʉta pakɨlo pagati kʉ nnine ʉvɨ vatsengiinie, ikʉmbʉʉla iita, ‘Gwe lʉgoosi, ndidoova ʉngʼopele ɨmikate gɨdatu, 6manya ʉmmanyaani vango ansikye ɨkɨlo ɨjɨ nʉʉne ndɨlɨ vʉvʉle ɨkyakʉlya kya kʉmpa.’ 7Ʉnnine ʉjwa ikʉmwanda iita, ‘Kwʉ baako ʉkʉngatatsa! Ʉne ndɨmalile ʉkʉdɨnda ʉndyango! Ikange ʉne na vaana vango tʉlɨ pa kʉgona. Nandisisimuki ndɨkʉpe ɨkɨveetsaga!’ 8Lɨno, angave ʉmuunu ʉjwa igendelela ʉkʉnʼdoova, tsa jɨlweli ndikʉvavʉʉla ʉkʉta, ʉnnine ʉjwa jiisisimuka nʉ kʉmpa isyʉ ikʉsilonda. Nakwʉ kʉta ivomba ewo ʉlwakʉva vɨ mmanyaani va mwene, apeene ʉlwakʉva agendelye ʉkʉnʼdoova.

9“Lɨno ndikʉvavʉʉla ʉkʉta, doovagi kwa Ngʉlʉve, pwʉ ʉmwene jiikʉvapa. Londagi, pwʉ jʉmukʉsivona. Dɨndʉtsaagi, pwʉ ʉNgʉlʉve jiikʉvadɨndʉlɨla ʉndyango, 10manya ʉmuunu ʉvaveetsaga ʉvidoova, ʉNgʉlʉve ikʉmpa, ʉvilonda, ʉNgʉlʉve ikʉmbonia nʉ vɨ idɨndʉtsa, ʉNgʉlʉve ikʉnʼdɨndʉlɨla ʉndyango. 11Oogo, vɨ veeni pagati paanyie, ʉvɨ ʉmwana va mwene angadoove ɨsomba, ikʉmpa ɨnzoka? 12Evo angadoove ɨlikaangʼa, ikʉmpa ɨkɨngomilevʉli? 13Ɨngave ʉnyie nyɨ vagalo, mulʉmanyile ʉkʉvapa avaana viinyo isiinu isinonu, ndeeti, ʉDadajiinyo va kʉkyanya nakavombe vʉnonu ʉkʉlʉtɨɨlɨla kwanyie, pa kʉvapa ʉMepo ʉMbalatse valya ʉwʉ vikʉnʼdoova?”

ɄYɨɨsʉ itsowa ʉkʉta iponia avaanu kʉ maka ga Setano

(Mataayo 12:22-30; Maliko 3:22-27)

14Ɨkɨgono kɨpamato, ʉYɨɨsʉ aaswɨmaga ɨmepo ɨmbiivi mu muunu mpamato. Ɨmepo ɨjyo jyampelye ʉmuunu ʉjwa ʉkʉlemwa ʉkʉtsova. Wʉ ɨmepo jɨhʉmile, ʉmuunu ʉlya akatengʉla ʉkʉtsova. Avaanu vongosu avaalepwo, vakadega siitso. 15Napeene, avange pagati pa veene vakata, “Iswɨma imepo imbiivi kʉ maka ga Belizebuli,#11:15 Belizebuli Ɨlɨ litaawa lya Setano, ʉmbaha va mepo imbiivi tsyoni. ʉmbaha va mepo imbiivi.” 16Avange vakava vikʉnʼgela ʉYɨɨsʉ, ʉkʉta avavonie ɨkɨmanyilo ɨkivonia ʉkʉta asuungʼilwe nʉ Ngʉlʉve. 17Ʉmwene ʉYɨɨsʉ akagamanya amasaago ga veene. Pwʉ akavavʉʉla akata, “Avaanu va vʉlongotsi vʉpamato vangapalangʼane, ʉvʉlongotsi ʉwa vutengejʉka. Naveene avaanu va nyumba mamato vʉvʉle vʉle, vangave vipalangʼana, ɨnyumba ɨjyo jitengejʉka. 18Wʉ jɨlɨwo namwene ʉSetano, ɨngave ʉSetano iswɨma ʉSetano,#11:18 ɄSetano iswɨma ʉSetano Apa kwʉ kʉta ʉSetano ihʉmya imepo imbiivi mu vaanu. apo ʉvʉlongotsi wa mwene wiiva vʉtengejwike. Nditsova ɨlyo ʉlwakʉva mutye ndiswɨma imepo imbiivi kʉ maka ga Setano. 19Lɨno, ɨngave mwita ʉne ndiswɨma imepo imbiivi kʉ maka ga Belizebuli, pwʉ avakongi viinyo viswɨma kʉ maka gaani? Pa kulongwi ɨjyo avo wʉ valavahɨga ʉnyie. 20Lɨno, ʉne ndɨngave ndiswɨma imepo imbiivi kʉ maka ga Ngʉlʉve, pwʉ ʉLʉdeeva lwa Ngʉlʉve lʉviitsye ʉnyie!

21“Ʉmuunu ʉnya maka, angave ni silwɨlo jiikʉjɨloleela ɨnyumba jya mwene jiiva mu lʉnotsehetso, nakʉli ʉnya kʉtoola isiinu sya mwene. 22Lɨno ʉmuunu ʉnya maka ʉkʉlʉtɨɨlɨla kʉ mwene, angiitse amwʉvʉkɨle nʉ kʉndema, apo ipoka isilwɨlo sya mwene syoni isyʉ akahʉʉvɨlaga, nʉ kʉtoola isiinu syoni isyʉ mwʉsile mu nyumba nʉ kʉvagavɨla avange. 23Ʉmuunu ʉvaveetsaga ʉvɨ nalɨ paninie nʉʉne, ʉjwa ikʉngenda kʉnsana. Ikange, ʉmuunu ʉvaveetsaga ʉvɨ nilʉndamania avaanu paninie nʉʉne nʉ kʉvahɨlɨka kwa Ngʉlʉve, ikʉvajatsa.

Itsihʉmɨla wʉ ɨmepo ɨmbiivi jɨhʉmile mu muunu

(Mataayo 12:43-45)

24“Ɨmepo ɨmbiivi wʉ jɨhʉmile mu muunu, jibɨha ʉmwonu ʉmutsila magasi kulonda apoonu pa kʉgatalʉka, napeene najikʉpavona. Pwʉ jiita, ‘Jʉndikilivuka kʉʉkʉ kʉ nyumba jyango ɨjyʉ ndɨkahʉmile.’ 25Wʉ jɨkiliwiike, jikʉjɨvona ɨnyumba ɨjyo jɨkuunilwe, ikange jɨnotsiiwe vʉnonu. 26Apo pwʉ jilʉta kutoola imepo imbiivi itsinge lekelakʉpamato (7), itsʉ mbejangi ʉkʉlʉtɨɨlɨla ɨjyene. Pwʉ tsikwingila mu muunu ʉjwa, tsitaamaga. Ʉvʉtaamo wa muunu ʉjwa wa lɨno wiiva vʉviivi ʉkʉlʉtɨɨlɨla vʉlya ʉwʉ akaale nalwo pa vʉtengʉlɨlo.”

Avaanu avagatalʉsu ʉwʉ inogwa ʉYɨɨsʉ

27ɄYɨɨsʉ wʉ itsova ɨlyo, ʉnʼdala mpamato mu kɨpʉga kɨlya, akooveela akata, “Inʼgatalʉsu ʉvɨ aakʉholile nʉ kʉkwosa!” 28ɄYɨɨsʉ akatsova akata, “Tsa jɨlweli, napeene vagatalʉsu siitso ʉwʉ vipʉlɨka nʉ kwibata vʉnonu ɨlimenyu lya Ngʉlʉve!”

Avaanu vinogwa ʉYɨɨsʉ avonie ɨkɨmanyilo

(Mataayo 12:38-42)

29Avaanu wʉ vigendelela ʉkʉlʉndamana, ʉYɨɨsʉ akata, “Avaanu va kɨvʉmbʉkʉ ɨkɨ vavejangi siitso! Vinogwa ndɨvonie ɨkɨmanyilo ɨkivonia ʉkʉta ndɨhʉmile kwa Ngʉlʉve. Lɨno nandɨkavavonie ɨkɨmanyilo ɨkɨveetsaga, apeene jʉvikʉkɨvona ɨkɨmanyilo ɨkɨhwaniine nɨ kya Yoona. 30Lola, ndʉwʉ ʉYoona aale kɨmanyilo kʉ vaanu va vʉtsenge wa kʉ Ninawi, wʉ jɨlɨwo, ʉMwana va Muunu, namwene jiiva kɨmanyilo kʉ vaanu va kɨvʉmbʉkʉ ɨkɨ.

31“Pa kɨgono kya vʉhɨgi namwene ʉnkʉlʉdeeva ʉnʼdala va kɨlʉnga kya Sheba alɨɨma nʉ kʉvahɨga avaanu va kɨvʉmbʉkʉ ɨkɨ ʉkʉta vatulanongwa, manya ʉmwene aahʉmile kʉ kɨlʉnga kya kʉvʉtale pakʉta iitse apʉlɨhɨtse imanyiiso tsa lʉhala lwa nkʉlʉdeeva ʉSolomoni. #1 Vakʉlʉdeeva 10:1-10; 2 Kulongwi tsa Misɨkɨ 9:1-12 Lɨno ndikʉvavʉʉla ʉnyie ʉkʉta apa pwale mpamato ʉvɨ ʉmwene mbaha ʉkʉlʉtɨɨlɨla pa Solomoni! 32Pa kɨgono kya vʉhɨgi avaanu va vʉtsenge wa Ninawi valɨɨma pa vaanu va kɨvʉmbʉkʉ ɨkɨ nʉ kʉvahɨga ʉkʉta vatulanongwa, manya aveene vaalaatile imbiivi tsa veene wʉ vapʉliike ɨlimenyu lya Ngʉlʉve ɨlyʉ aavalʉmbɨlye ʉYoona. #Yoona 3:5 Lɨno ndikʉvavʉʉla ʉnyie ʉkʉta apa pwale mpamato ʉvɨ mwene mbaha ʉkʉlʉtɨɨlɨla pa Yoona!

Ɨnyaale jya mmana

(Mataayo 5:15; 6:22-23)

33“Nakʉli ʉmuunu ʉvɨ ipamba ɨnyaale, nʉ kʉvɨɨka ʉpwʉ pasihamiike evo ʉkʉgubikila nɨ kɨtʉndʉ. Apeene, ivɨɨka pakyanya pa kɨdʉlɨkɨlo kya nyaale, pakʉta avaanu wʉ vikwingila, valolage vʉnonu ʉlwakʉva palɨ lʉmuli. 34Ɨliiho jyʉ nyaale jya mmana gwako. Ɨngave ɨliiho lyako linonu, pwʉ ʉmmana gwako gwoni gwiva nʉ lʉmuli. Lɨno lɨngave lɨboswe, ʉmmana gwako gwiva nɨ ngʼiisi. 35Lɨno, ʉlolage vʉnonu, ʉlʉmuli ʉlwʉ lʉlɨ mu nʼgati mwave, lʉleke ʉkʉva ngʼiisi! 36Gʉngave ʉmmana gwako gwoni gwiva nʉ lʉmuli, kɨtsila kʉva nɨ ngʼiisi apoonu apaveetsaga, apo ʉmmana gwoni gumulikaga, ndʉwʉ ɨnyaale jikʉkʉmulikila.”

Ʉlʉpavɨlo lwa Yɨɨsʉ kʉ Vafalisayo

(Mataayo 23:1-36; Maliko 12:38-40)

37ɄYɨɨsʉ wʉ amalile ʉkʉtsova amamenyu ago, ʉFalisayo mpamato akamwɨlanga abɨhe kwilya ɨkyakʉlya kʉ mwene. Pwʉ ʉYɨɨsʉ akalʉta, akatsikwingila, akataama alɨkʉlya ɨkyakʉlya. 38ɄFalisayo ʉlya wʉ aweene ʉYɨɨsʉ iilya ɨkyakʉlya kɨtsila kʉpuguha isivoko#11:38 Iilya ɨkyakʉlya kɨtsila kʉpuguha isivoko Wʉ gʉsiike ʉnsɨkɨ gwa kʉlya, aVayahudi vaale nʉ lwiho lwa kʉtala ʉkwɨvalatsa kʉ nzɨla jya kʉpuguha isivoko pwʉ vatengʉle ʉkʉlya ɨkyakʉlya. Ʉmuunu ʉvaalitsaga ɨkyakʉlya kɨtsila kʉpuguha isivoko aavalɨlwagwa innangi va nyiiho tsa veene. ndʉ lwiho lwa veene, aadegile siitso. 39Pwʉ ʉNtwa akambʉʉla akata, “Ʉnyie Vafalisayo, mukɨvɨɨka mulɨ vavalatse ʉpwʉ muvomba ʉlwʉtsi lwa kʉsuka kʉnzi kʉ sikombe ni sahani,#11:39 Ʉlwʉtsi lwa kʉsuka kʉnzi kʉ sikombe ni sahani AVafalisayo vaavombaga ʉlwʉtsi lwa kʉsuka kʉnzi kʉ sikongʼolo. Aveene valɨkʉsaaga ʉkʉta ʉkʉvomba ɨlyo kukʉvavɨɨka vave vagolosu pamiiho ga Ngʉlʉve. apeene mu nʼgati mu numbula tsiinyo gʉdɨgile ʉmwojo nʉ vʉgalo. 40Nyɨ vapelwa ʉnyie! Ʉvɨ aapelile kʉnzi, navɨ mwene ʉvɨ aapelile na mu nʼgati? 41Muvatangage avagatsu ni numbula tsiinyo tsyoni, apo syoni siveetsaga sivalatsiiwe kwanyie.

42“Muswe vʉvʉle ʉnyie Vafalisayo, manya mukʉmpa ʉNgʉlʉve nalɨligavo lipamato, mu magavo kɨtsigo (10) ga siinu isidebedebe, ndɨ mboga ni sihato sya kyakʉlya wʉ kʉnʉ namuvɨɨkɨla ʉntɨma ʉkʉvavombela avange inonu nʉ lʉgano lwa Ngʉlʉve. Wɨgane wa Ngʉlʉve ʉkʉta muvombage itsi, paninie nʉ kʉhʉmya ɨligavo lipamato, mu magavo kɨtsigo. 43Muswe vʉvʉle ʉnyie Vafalisayo ʉlwakʉva munogwa ʉkʉtaama mu sitaamilo sya wɨɨmɨkiwa isya kʉvʉlongolo, mu masinagogi. Ikange, munogwa avaanu vavasaamusaage mu soko ʉta mulɨ vɨɨmɨkiwa. 44Muswe vʉvʉle ʉnyie ʉlwakʉva muhwaniine nʉ vʉguli#11:44 Vʉguli Kʉ Vayahudi jyale mwiko ʉkʉkada pakyanya pa vʉguli. Ɨngave ʉmuunu jiivomba ewo, jɨlɨkʉmpelela ave ɨkoleliinie. Mu kɨhwananitso ɨkɨ aVafalisayo valɨ ndʉ vʉguli ʉvʉtsila kɨmanyilo. Aveene vivoneka ʉta vagolosu hʉmbe mu numbula tsa veene vɨkoleliinie. Vooni avɨɨdɨkaga imanyiiso tsa Vafalisayo vaakongaga itsa vʉjagi. ʉvʉtsila simanyilo ʉwʉ avaanu vigenda pakyanya kɨtsila kʉlʉmanya.”

45Ʉmmanyisi mpamato va ndagɨlo akambʉʉla ʉYɨɨsʉ akata, “IMmanyisi, ʉpwʉ witsova itsi, vukʉtʉtsova sivi najyʉwe twɨ vamanyisi va ndagɨlo.” 46ɄYɨɨsʉ akamwanda akata, “Najyʉnyie nyɨ vamanyisi va ndagɨlo, muswe vʉvʉle ʉlwakʉva, mukʉvʉʉmɨɨlɨtsa avaanu vakongage indagɨlo inalamu itsivyʉta mitsigo mitsito. Paninie nɨɨlyo, ʉnyie namukʉvatanga avaanu avo ʉmwakʉkongela indagɨlo itso!

47“Muswe vʉvʉle ʉnyie ʉlwakʉva mutsenga ʉvʉguli wa vanyamalago valya, ʉwʉ avanyienya viinyo vaavabudile! 48Apo muvonia ʉkʉta, mukwɨdɨngʼana nʉ gwʉ avanyienya viinyo vaavombile ʉlwakʉva aveene vaabudile avanyamalago. Ʉnyie mutsenga ʉvʉguli wa veene!

49“Ɨkɨ kyʉ mene ʉNgʉlʉve aatsovile ndee, ‘Ndɨlavasuungʼa avanyamalago na vapositili kʉ veene, napeene avange valavabudaga, avange valavapelelaga ʉvʉkʉvɨlwa.’ 50Lɨno, avaanu va kɨvʉmbʉkʉ ɨkɨ valahɨgwa pa kulongwi tsa vanyamalago vooni ʉwʉ vaabudilwe. Avo wʉ valya avaabudilwe ʉkʉhʉma pa vʉtengʉlɨlo wa kɨlʉnga, 51ʉpwʉ aabudilwe ʉAbeli, ʉkʉsika ʉpwʉ aabudilwe ʉZakaliya,#Vʉtengʉlɨlo 4:8; 2 Kulongwi tsa Misɨkɨ 24:20-22 ʉvɨ aabudilwe pagatinagati pa kɨteekelelo nʉ Vʉtaamo ʉVʉvalatse wa Ngʉlʉve. Tsa jɨlweli! Ndikʉvavʉʉla ʉkʉta avaanu va kɨvʉmbʉkʉ ɨkɨ valahɨgwa pa nongwa itso tsyoni.

52“Muswe vʉvʉle nyɨ vamanyisi va ndagɨlo ʉlwakʉva mukʉvasiga avaanu ʉkʉmmanya ʉNgʉlʉve wʉ ʉnyie jyʉnyie namummanyili, ikange mukʉvasiga avaanu avinogwa ʉkwingila mu Lʉdeeva lwa Ngʉlʉve wʉ ʉnyie jyʉnye namukwingila ʉmwa.”

53ɄYɨɨsʉ wʉ amalile ʉkʉtsova amamenyu ago, akahega palya. Ʉkʉtengʉlɨla apo aVafalisayo na vamanyisi va ndagɨlo vakava vakali kwa Yɨɨsʉ. Pwʉ valɨkʉmbʉʉtsa nyongosu, 54pa vʉsumbe wa kʉntegeeletsa ʉkʉta ipange jiitsova kɨninie ɨkyakʉvapelela vavʉvone ʉwɨɨmɨlo wa kʉmmɨga.

Currently Selected:

Luuka 11: zga

Highlight

Copy