Yohana 7

ɄYɨɨsʉ ilʉta kʉ Yelusalemu kʉ kyaka kya Syeve

1Pwʉ wʉ ago galʉtɨngʼiinie, ʉYɨɨsʉ akatengʉla ʉkʉgendela ʉvʉtsenge ʉvʉ nʉʉvʉ mu kɨlʉnga kya Galilaya. Naanogwe ʉkʉgendela ɨkɨlʉnga ɨkya Yuuda ʉlwakʉva avalongotsi va Vayahudi ʉwʉ vaale mu kɨlʉnga kɨlya, vaagokaga ʉkʉmʼbuda. 2Ʉnsɨkɨ gwa kyaka kya Vayahudi kya Syeve#7:2 Kyaka kya Vayahudi kya Syeve Ʉvʉganulu wa kyaka ɨkɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. gwahegelye. 3Pwʉ avalʉkololwe va Yɨɨsʉ vakambʉʉla vakata, “Hega mu kɨlʉnga ɨkɨ, ʉbɨhage kʉ Yuuda pakʉta avakongi vaako vakasivone isidego isyʉ wiiva vuvomba. 4Ʉmuunu niiva ivomba imbombo tsa mwene kʉvʉtiitu ɨngave inogwa ʉkʉta amanyikike kʉ vaanu. Ɨngave vuvomba gooni aga apa, pwʉ ʉlʉte ʉkɨvonie pavʉvalasu kʉ vaanu vooni va mu kɨlʉnga ɨkɨ pakʉta vakʉmanye.” 5Avalʉkololwe vaatsovile ewo ʉlwakʉva naveene navaamwɨdɨke ʉYɨɨsʉ ʉkʉta vɨ Mesiya. 6Pwʉ ʉYɨɨsʉ akavaanda akata, “Ʉnsɨkɨ gwango gwa kʉlʉta ʉkʉ gʉkaanale ʉkʉsika, lɨno ʉnyie muweesa ʉkʉbɨha ʉnsɨkɨ gʉgwoni.#7:6 ɄYɨɨsʉ ʉpwʉ iita ʉnsɨkɨ gwa mwene gwa kʉlʉta ʉkʉ gʉkaanale ʉkʉsika ivonia ʉkʉta ʉNgʉlʉve vɨ itavʉla ɨkɨveetsaga kɨvombeke kʉ mwene. Ʉmuunu ʉjyʉnge intsila vʉtavʉlɨlwa ʉwa. 7Lola, avaanu va mu kɨlʉnga ɨkɨ naviweesi ʉkʉvasʉʉla ʉnyie, apeene vikʉnsʉʉla ʉne ʉlwakʉva ndikwoleletsa ʉkʉta ʉgwʉ vivomba maviivi. 8Ʉnyie togagi kʉ Yelusalemu kukwɨmba ɨkyaka ɨkyo. Ʉne nanditogi ʉlwakʉva ʉnsɨkɨ gwango nagʉsiiki ʉgwa kʉbɨha ʉkʉ.” 9Wʉ ʉYɨɨsʉ atsovile ago, akasigala mu kɨlʉnga kya Galilaya.

10Lɨno wʉ avalʉkololwe va Yɨɨsʉ valʉtile kʉ Yelusalemu kukwɨmba ɨkyaka, ʉYɨɨsʉ namwene akatoga ʉkʉbɨha kʉ Yelusalemu kɨtsila kwɨvonia. 11Pwʉ wʉ valɨ pa kyaka, avalongotsi va Vayahudi vakava vikʉndonda ʉYɨɨsʉ. Valɨkʉvavʉʉtsa avaanu ʉwʉ vaalepwo palya valɨkʉta, “Ndeeti, alɨ ndaku ʉmuunu ʉjwa ʉvɨ viita vɨ Yɨɨsʉ?” 12Avaanu vongosu ʉkʉhʉma mu kɨpʉga kɨlya vaavugujaga ikulongwi tsa Yɨɨsʉ. Avange vaateetsaga ʉYɨɨsʉ muunu nnonu, lɨno avange vaateetsaga ʉYɨɨsʉ muunu ʉvisyova avaanu. 13Naavepwo ʉmuunu ʉvɨ aantsovaga ʉYɨɨsʉ pavʉvalasu, kʉ nongwa jya kʉvadwada avalongotsi va Vayahudi.

ɄYɨɨsʉ ikʉvamanyiisa avaanu mu tembile

14Wʉ isigono sya kyaka sisiike pagati, ʉYɨɨsʉ akalʉta, akiingila mu mbɨgo tsa tembile, akatengʉla ʉkʉvamanyiisa avaanu. 15Pwʉ avalongotsi va Vayahudi vakakenyemuka kʉ manyiiso tsa Yɨɨsʉ nʉ kʉtengʉla ʉkwɨvʉʉtsa, valɨkʉta, “Ndeeti, ʉmuunu ʉjʉ iweesa ʉkʉlʉmanya ndeeti gooni aga kɨtsila kʉmanyila?” 16Pwʉ ʉYɨɨsʉ akavavʉʉla akata, “Imanyiiso itsʉ ndimanyiisa natsyango ʉne, apeene manyiiso tsʉʉlya ʉvɨ ansuungʼile ʉne kwanyie. 17Ʉmuunu ʉvaveetsaga ʉvɨ inogwa ʉkʉvomba itsa vʉnogwe wa Ngʉlʉve, jiikʉlʉmanya ʉkʉta imanyiiso itsi tsihʉmile kwa Ngʉlʉve, ikange jiikʉlʉmanya ʉkʉta nanditsova kʉ vʉtavʉlɨlwa wango jyʉne. 18Mulʉmanye ʉkʉta, ʉmuunu ʉvaveetsaga ʉlya ʉvɨ itsova kʉ vʉnogwe wa mwene, ikɨlondela ʉwɨɨmɨkiwa wa mwene jyʉmwene. Lɨno ʉvɨ inogwa ʉwɨɨmɨkiwa wʉʉlya ʉvɨ ansuungʼile, itsova itsa jɨlweli, nitsova itsa vʉnuasi.”

ɄMesiya imbaha ʉkʉlʉtɨɨlɨla kwa Moose

19ɄYɨɨsʉ akagendelela ʉkʉtsova akata, “Mulʉmanyile ʉkʉta ʉMoose aavapye indagɨlo tsa Ngʉlʉve. Lɨno nakʉli ʉmuunu pagati paanyie ʉvɨ ikʉtsikonga indagɨlo itso. Pwʉ kɨki munogwa ʉkʉmbuda?” 20Ɨkɨpʉga kya vaanu vakamwanda vakata, “Ʉve ʉlɨ nɨ mepo ɨmbiivi! Veeni ʉvɨ inogwa ʉkʉkʉbuda?” 21ɄYɨɨsʉ akavaanda akata, “Ndyavombile ɨkɨmanyilo kɨpamato mu kɨgono kya Sabato, ʉnyie nyɨ vooni mwakenyemwike.#7:21 Apa ʉYɨɨsʉ itsova ʉnsɨkɨ gʉlya ʉpwʉ aamponiitse ʉntamu pa lisiva lya Betisata, mu kɨgono kya Sabato (Yohana 5:1-15). 22Lola, ʉMoose aavalagye ʉnyie ʉkʉvatahili#7:22 Ʉkʉvatahili Ʉvʉganulu wa limenyu ʉkʉtahili lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. avaana viinyo avadɨɨmi, nʉpwʉ ndajɨve avakʉkʉjiinyo wʉ veene vaatengʉliitse ʉlwiho ʉlʉ, ʉnsɨkɨ wʉ akaanale ʉkwitsa ʉMoose. Ʉkʉkongana nɨɨlyo, ʉnyie mulɨ nʉ lwiho lwa kʉvatahili avaana viinyo namu mu kɨgono kya Sabato. 23Mungave mutsɨngahɨtsa ʉkʉkonga indagɨlo tsa Moose, ʉkʉvatahili avaana viinyo avadɨɨmi mu kɨgono kya Sabato, pwʉ kɨki mukʉmbiipila ʉne ʉlwakʉva ndɨkamponiitse ʉmuunu mu kɨgono kya Sabato? 24Muleke ʉkʉmmɨga ʉmuunu nkyanyakyanya, apeene mummɨgage ʉmuunu ʉkʉkongana nʉ wajɨlweli.”

Avaanu vivʉʉtsania ʉkʉta ʉYɨɨsʉ nda vɨ Mesiya

25Pwʉ avaanu avange va mu Yelusalemu vakatengʉla ʉkʉvʉʉtsania vakata, “Ʉmuunu ʉjʉ navyʉla ʉvɨ avalongotsi vilonda ʉkʉmʼbuda? 26Lola ɨleelo itsova pavʉvalasu, lɨno aveene navitsova ɨkɨveetsaga ɨkya kʉmʼbeetsa! Ndeeti, avalongotsi viweesa vave valʉmanyile ʉkʉta jɨlweli ʉjwa vɨ Mesiya? 27Pwʉ itsi tsiveetsaga ndeeti? ɄMesiya alaava ikwitsa nakʉli ʉmuunu ʉvɨ alakʉmanya ʉkwʉ ahʉmile. Lɨno ʉwe tʉkʉmanyile ʉkwʉ ahʉmile ʉmuunu ʉjʉ!”

28Pwʉ ʉYɨɨsʉ wʉ imanyiisa mu tembile, akapʉlɨsa akata, “Jɨlweli mummanyile ʉne, ikange mukʉmanyile nʉ kwʉ ndɨhʉmile. Ʉne nanditsili kʉ vʉtavʉlɨlwa wango jyʉne! Apeene ʉNgʉlʉve ʉvɨ ansuungʼile va jɨlweli. Ʉnyie namummanyili. 29Ʉne ndɨmmanyile ʉlwakʉva ndɨhʉmile kʉ mwene, ikange vɨ mwene ʉvɨ ansuungʼile kwanyie.” 30Pwʉ vakalonda ʉkʉntikamila, lɨno naalepwo ʉmuunu ʉvɨ aaweesiitse ʉkʉvomba ɨlyo, manya ʉnsɨkɨ gwa mwene nagwasike.#7:30 Ʉnsɨkɨ gwa mwene nagwasike Ʉvʉganulu wa mamenyu aga lola Yohana 7:6.

Avasikali visuungʼwa kukʉmwibata ʉYɨɨsʉ

31Lɨno avaanu vongosu mu kɨpʉga ɨkyale palya vakamwɨdɨka ʉYɨɨsʉ. Valɨkʉvuguja valɨkʉta, “ɄMesiya alaava ikwitsa, nalavombe isidego syongosu ʉkʉlʉtɨɨlɨla isyʉ avombile ʉmuunu ʉjʉ!” 32AVafalisayo vakapʉlɨka itso. Pwʉ aveene na vavaha va vateeketsi vakavasuungʼa avasikali pakʉta vakamwibate ʉYɨɨsʉ. 33Pwʉ ʉYɨɨsʉ akatsova akata, “Ndɨlɨ nʉʉnyie kʉ nsɨkɨ nsupi vʉvʉle, wʉ nagʉsiiki ʉnsɨkɨ gwango gwa kʉkilivuka ikange kʉ mwene ʉvɨ aansuungʼile. 34Mupikʉndonda, napeene namukambone, ikange namukaweese nakʉ kwitsa ʉkwʉ jʉndiiva.”

35Pwʉ avaanu va mu kɨpʉga kɨlya vakɨtsosanza vakata, “Ndeeti, ʉmuunu ʉjʉ ilʉta ndaku ʉkwʉ ʉwe natʉkaweese ʉkʉmbona? Ndeeti, inogwa ʉkʉlʉta kʉ Vayahudi ʉwʉ vahambile kʉ Vayunaani, nʉ kʉvamanyiisa avo? 36Ndeeti, inogwa ʉkʉtʉvʉʉla kɨki kʉ mamenyu ga mwene ʉpwʉ iita, ‘Mupikʉndonda, napeene namukambone, ikange namukaweese nakʉ kwitsa ʉkwʉ jʉndiiva?’ ”

ɄYɨɨsʉ itsova ikulongwi tsa Mepo ʉMbalatse

37Ɨkɨgono kya vʉmalɨlo wa kyaka kya Syeve, kyale kɨgono kɨlʉti siitso. Pa kɨgono ɨkyo, ʉYɨɨsʉ akɨɨma mu tembile, akapʉlɨsa akata, “Ʉnyie mungave mulɨ nɨ kyʉmɨlwa, itsagi kwane munywe.#7:37 Mu kɨgono kya kyaka kya Syeve, aVayahudi vaanʼdoovaga ʉNgʉlʉve ɨsula, nʉ kʉkʉmbʉhɨtsa ʉkʉta ʉNgʉlʉve aavapye avakʉkʉjyavo amagasi mu lʉkɨnga (Kʉhʉma 17:1-16; Mbalɨlo 20:1-11). ɄYɨɨsʉ isimiilitsa ʉkʉta ʉmwene vɨ kɨdwivudwivu kya magasi ga jɨlweli. 38ɄVʉvɨge ʉVʉvalatse vukʉvavʉʉla avaanu ʉkʉta, ʉmuunu ʉvaveetsaga ʉvɨ ikʉnnyɨdɨka ʉne, iiva ni sidwivudwivu sya magasi mongosu siitso mu nʼgati mu mwene.”#Yesaya 44:3; 55:1; 58:11 39Mu mamenyu ago, ʉYɨɨsʉ aatsovaga ikulongwi tsa Mepo ʉMbalatse, ʉvɨ kʉmbele avɨɨdɨki vooni va Yɨɨsʉ vʉʉpɨlye. Ʉnsɨkɨ ʉgwa, ʉNgʉlʉve aale akaanale ʉkʉnsuungʼa ʉMepo ʉMbalatse kʉ veene, ʉlwakʉva ʉNgʉlʉve aale akaanale ʉkʉvonia pavʉvalasu ʉwɨɨmɨkiwa wa Yɨɨsʉ.#7:39 Ʉwɨɨmɨkiwa wa Yɨɨsʉ Ʉvʉganulu wa mamenyu aga kwʉ kʉta ʉYɨɨsʉ aale akaanale ʉkʉtovelelwa pa kɨdamingʼanie ikange aale akaanale ʉkʉtoga kʉkyanya kwa Ngʉlʉve.

Avaanu vilekengʼana pa kulongwi jya Yɨɨsʉ

40Avaanu avange va mu kɨpʉga kɨlya wʉ vapʉliike amamenyu ago, vakatengʉla ʉkʉtsova vakata, “Jɨlweli, ʉmuunu ʉjʉ vɨ nyamalago ʉvɨ tukʉmpʉlɨkɨla ʉkʉhʉma kwa Ngʉlʉve.”#Simiilitso tsa Ndagɨlo 18:15-22 41Avaanu avange vakata, “Ʉmuunu ʉjʉ vɨ Mesiya.” Napeene avange vakata, “Baako, ʉMesiya nakaweese ʉkʉhʉma kʉ Galilaya. 42Ndeeti, ʉVʉvɨge ʉVʉvalatse nawitsova ʉkʉta ʉMesiya alahʉma mu lʉjungu lwa nkʉlʉdeeva ʉDavʉdi? Ikange ʉkʉta alaholwa mu Betelehemu, mu vʉtsenge ʉmwʉ namwene ʉDavʉdi aaholilwe?”#2 Samweli 7:12-16; Mika 5:2 43Ʉkʉhʉmana nɨɨlyo, avaanu vakalekengʼana pa kulongwi jya Yɨɨsʉ. 44Avange vakanogwa ʉkʉntikamila, napeene nakʉli ʉmuunu ʉvɨ aaweesiitse ʉkʉvomba ewo.

Avalongotsi va Vayahudi navaamwɨdɨke ʉYɨɨsʉ

45Kʉ vʉmalɨlo avasikali vakakilivuka ikange kʉ vavaha va vateeketsi na Vafalisayo, kɨtsila kʉndeeta ʉYɨɨsʉ. Pwʉ avavaha avo vakavavʉʉtsa vakata, “Kɨki namumwibiiti nʉ kʉndeeta apa?” 46Avasikali valya vakaanda vakata, “Nakʉli ʉmuunu ʉjyʉnge ʉvɨ iweesa ʉkʉtsova ndʉwʉ itsova ʉmuunu ʉlya.” 47AVafalisayo vakavavʉʉtsa vakata, “Ndeeti, ʉYɨɨsʉ aweesiitse ʉkʉvasyova najyʉnyie? 48Ndeeti, pwale ʉndongotsi va Vayahudi ʉvaveetsaga evo ʉFalisayo ʉvaveetsaga ʉvɨ amwɨdiike? 49Twita, ɨkɨpʉga kya vaanu avamwɨdiike navatsimanyili indagɨlo tsa Moose, vaanu ʉwʉ ʉNgʉlʉve avakootwe.”

50Pwʉ ʉNikodemu, ʉvɨ aale nninie mu valongotsi va Vafalisayo, ʉvɨ kʉ nsɨkɨ gwa kʉnsana aalʉtile pakɨlo kwa Yɨɨsʉ, akavavʉʉtsa avanine avo akata, 51“Ndeeti, indagɨlo tsiitu tsikʉtʉtavʉla ʉkʉmmɨga ʉmuunu wʉ natʉtalili ʉkʉmpʉlɨhɨtsa nʉ kʉtsimanya itsʉ ivomba?” 52Aveene vakamwanda ʉNikodemu vakata, “Ndeeti, najyʉve wihʉma kʉ Galilaya? Bɨhaga ʉkɨɨmbe ikange vʉnonu ʉVʉvɨge ʉVʉvalatse, pwʉ najyʉve jʉvukʉlʉmanya ʉkʉta nakʉli ʉnyamalago ʉvɨ iweesa ʉkʉhʉma kʉ Galilaya.” 53Pwʉ avaanu vooni vakalekengʼana, vakagodoka kʉ myavaavo.

Currently Selected:

Yohana 7: zga

Highlight

Copy