ENtandiika 49

OYaakobbo alaamirya abaanabe

1Awo oYaakobbo nʼayeta abaanabe nʼabakoba ati, “Mukumbaane mbakobere ebyalibatuukaku egibwiza.

2Mukumbaane baana bange,

mumpulisisye nze oitewaanywe oYaakobbo.

3“Lubbeeni, omwana wange omubere,

niiwe ekibala kyʼamaani gange, omwana wange owʼomu maisuka,

akira ekitiisya nʼamaani.

4Tolungamizika ooti maizi gʼamataba, kale tiwalibba mukulu.

Ekyo kityo olwʼokubba weegaitire nʼomukali wange oku buliri bwange

era nʼoyemula obuliri bwange nze oiteewo.

5“Iwe Simyoni nʼoLeevi mufaanana empisa,

mukwata empiima gyanywe okukola obuvuuyo.

6Tintaka okubeegaitaku omu nkiiko gyanywe,

waire okubeegaitaku omu nkumbaana gyanywe.

Ekyo kityo olwʼokubba omu busungu bwanywe, mwaitire abantu,

era omwiralu lyanywe, mwatemere ebigere byʼente endaawo ni mubiremalya olwʼokwesangaalya.

7Kale atyanu obusungu bwanywe tibwirangayo okukola,

nʼobukambwe bwanywe obwʼentiisya tibwirangayo okukola tete.

Eibyaire lyanywe balirisalaanicirya

omwIsirairi mwonamwona.

8“Kaisi iwe Yuda, abagandabo bakuwuujanga.

Bakotamyanga emitwe okukuwa ekitiisya,

olwa iwe okuwangula abalabebo.

9Mwana wange Yuda, oli muzira ooti mpologoma

akangire e giyeegonera ngʼamalire okweriira omuyiigo.

Ompologoma oyo yeegonera ni yeegolola,

nga mpaawo ayezya okumutaganya.#Kub 24:9; Bil 5:5

10Yuda niiwe owakwatanga omwigo ogwʼobufugi,

era omwibyaireryo niimwo omwazwanga abafugi,

paka amawanga owegaligondera eibyaireryo.

Era niiryo abantu eribagonderanga.

11Emizabbibbu gyʼeibyaireryo,

gyabalanga ino.

Nʼoyoza amaganduulago omu nviinyo,

era nʼoyoza eganduulagyo omu mubisi gwʼemizabbibbu.

12Waabbanga nʼemizabbibbu mingi nʼolwekyo amaisogo gatukulikanga okukiraku enviinyo,

era waabbanga nʼamata mangi nʼolwekyo amainogo gatukulanga okukiraku amata.

13“Iwe Zebbulooni, eibyaireryo lyatyamanga kumpi nʼenyanza enene,

eeyo e waabbanga omwalo emeeri egigituukira.

Ensaloyo e mambuka yatuukanga paka mu kibuga e Sidoni.

14“Kaisi iwe Isakaali, oli wʼamaani ooti mpunda,

agonere aakati wʼemigugu mibiri.

15Cooka owaabona ngʼekifo omwawuumuliire kisa,

era nga nʼekyalo kyesiimisya,

agonda nʼaika ni bamuyeekesya emigugu,

atyo nʼasuuka ooti muntu ogubakolesya emirimo emikalanguki.

16“Iwe Daani waabbanga mwekubbemberi owa bantubo owʼamazima,

ngʼebika ebindi ebya Isirairi.

17Daani waabbanga wʼakabbikabbi ooti mpiri ali oku luguudo,

era ooti nfulugundu ali oku nzira

aluma ombalaasi ebigere,

kaisi amutyaimeku nʼayanukaku nʼagwa.”

18Awo oYaakobbo nʼasaba ati,

“Oo Musengwa, nkusaba onnunule.”

19Era oYaakobbo ni yeeyongera okulaamirya abaanabe ati,

“Iwe Gaadi ekibinja ekyʼabanyagi kyalikulumba,

neye walyerwanaku nʼokibbingirira.

20“Aseri, eitakaliryo lyabalanga ebyokulya ebyomutindo ogwʼangulu.

Era ebyokulya ebiwalimanga niibyo okabaka ebiyalyanga.

21“Kaisi iwe Nafutaali waabbanga nʼeidembe okukola ekyotaka ooti kisolo wʼomu kigona ogubeeta bati kimaadu ataayuuka-obutaayuuki,

era nʼabyala abaana ababoneka okusani.

22“Iwe Yusufu waabbanga kibyali ooti kikolo kyʼomuzabbibbu ekibala eino,#49:22 Kibyali ooti kikolo kyʼomuzabbibbu ekibala eino, ooba, oli mpunda omutomuto owʼomu kigona ali okumpi nʼomwala gwʼamaizi. Era oli mpunda ali oku lusozi.

era nga kiri kumpi nʼeiruba erikulumuka amaizi,

era eibyaireryo lyabbanga ooti kikolo ekiri nʼamasaga agalandire ni gawoisya omugingi.

23Abalabebo bakulumbire nʼobukambwe,

era ni bakulwanisya nʼebirwana byabwe nga babula kisa.

24Neye wagumiirye nakimo ekirwanakyo,

nʼengalogyo ni gisuna amaani agazwa eeri oWabwezye oKibbumba wa Yaakobbo, oMulabiriri afaayo oku ntaama, era oMukuumi wa Isirairi.

25OKibbumba oyo oiteewo ogwasinza, akubbeerenge,

era oyo oWabwezye Bwonabwona akuwenge enkabi

egyo egizwa omwigulu,

nʼenkabi egizwa ansi omwitakali,

nʼenkabi egyʼokusuna eibyaire nʼebisolo.

26Oleke enkabi egyosuna okuzwa egiri oiteewo, gikirire nakimo

enkabi egizwa omu nsozi, ensozisozi egibbaawo emirembe nʼemirembe.

Era gikirire kimo nʼebintu ebisa ebizwa oku busozi obwabbairewo okuzwa eira.

Kale Yusufu, nkusabira enkabi egyo obbenge nagyo.

Ekyo kityo olwʼokubba niiwe ogubalitongola okuzwa omu bagandabo,

ngʼomwekubbemberi owʼensikirano.

27“Kaisi iwe Bbenyamini waabbanga ooti musege ogukaavuula omuyiigo amakeezi,

kaisi eigulo ni gumaliiriryawo ogusigaire.”

28Eikumi na babiri abo niibo abazeiza bʼebika eikumi na bibiri ebya Isirairi. Era ebyo niibyo ebibono oitewaabwe ebiyabalaamiirye nabuli moiza ngʼowebimusaaniire.

Okufa kwa Yaakobbo

29Awo oYaakobbo nʼakalaatira abaanabe, nʼabakoba ati, “Ndi kumpi okufa mbe neeyimbirye oku bazeiza bange. Munteekanga aamo nabo omu mpuku eeri omwitakali eryabbaire eryʼEfulooni oMukiiti, 30e Makupera, e buzwaisana bwʼe Mamule, omu kyalo kyʼe Kanani. OIbbulaimu yagulire empuku eeyo nʼeitakali eryo okwEfulooni oMukiiti, okubba ekifo ekyʼokuliikangamu abafu.#Nta 23:3-20 31Era omu mpuku omwo niimwo omu bateekere amagumba ga Ibbulaimu nʼaga Saala omukaliwe. Era niimwo omu bateekere oIsaka nʼomukaliwe oLabbeeka, era niimwo omu nateekere omukali wange oLeeya.#Nta 25:9-10; 35:29 32Eitakali nʼempuku erimu, babigulire ku Bakiiti.”

33Awo oYaakobbo oweyamalire okukalaatira abaanabe, nʼasetula ebigerebye nʼairawo oku buliribwe nʼagona, era nʼafa, atyo nʼabba yeeyimbirye oku bazeizabe.#Bik 7:15

Currently Selected:

ENtandiika 49: GWR

Highlight

Copy