OKuzwa 6

1Awo oMusengwa nʼakoba oMusa ati, “Atyanu wabona ekinakola oFalaawo.#6:1 Falaawo. Kitiisya kya kabaka wʼe Misiri. Njaba okukolesya obwezye bwange mmwazye aleke abantu bange baabe. Era njaba okukolesya obwezye bwange ababbinge-bubbingi okuzwa omu kyalokye.”

OMusengwa asuubiza okununula aBaisirairi

2OKibbumba era nʼatumula nʼoMusa nʼamukoba ati, “Ninze oMusengwa. 3Nabonekeire oIbbulaimu, nʼoIsaka, nʼoYaakobbo, ngʼoKibbumba oWabwezye Bwonabwona. Neye tinabeemanyikisirye nti ninze oMusengwa.#Nta 17:1; 28:3; 35:11; Kuz 3:13-15 4Era nakolere nabo endagaano yange, ni mbasuubiza okubawa ekyalo kyʼe Kanani, e gibabbaire abasenze. 5Era atyanu mpuliire okukunga kwʼaBaisirairi, ibo aBamisiri abebasuucirye abagalama, ni njebukirya endagaano eginakolere nabo.

6“Nʼolwekyo okobere aBaisirairi oti mbakoba nti, ‘Ninze oMusengwa, era nalibanunula ni mbalamya aBamisiri okubagadya, nʼokubba abagalama baabwe. Era nalikolesya obwezye bwange, ni mbonereza ino aBamisiri, ni mbanunula inywe. 7Nalibasuuca inywe bantu bange, era ni mba Kibbumba waanywe. Era awo mwalimanya nga Ninze oMusengwa iye oKibbumba waanywe abanunwire okuzwa omu bugalama omu kyalo kyʼe Misiri. 8Era nalibaingirya omu kyalo ekinalayiire okuwa oIbbulaimu, nʼoIsaka, nʼoYaakobbo. Nalikibawa inywe ni kibba kyanywe. Ninze oMusengwa.’ ”

9Kale oMusa nʼakobera aBaisirairi ebintu ebyo oMusengwa ebiyabbaire akobere. Neye tibamuwulisisirye, olwʼokubba babbaire bawoiremu amaani olwʼokubabitya okubbikubbi omu bugalama.

10Awo oMusengwa nʼakoba oMusa ati, 11“Okange egiri oFalaawo omukobe aleke aBaisirairi bazwe omu kyalokye.”

12Neye oMusa nʼakoba oMusengwa ati, “Obanga nʼaBaisirairi tibampulisisya, dala oFalaawo niiye eyampulisisya nze atali omutumuli omusa?”

13Neye oMusengwa nʼalagira oMusa nʼAlooni ngʼakoba ati, “Mukobe aBaisirairi nʼoFalaawo muti, oMusengwa atulagiire okutoola aBaisirairi omu kyalo kyʼe Misiri.”

Olulyo lwa Musa nʼAlooni

14Atyanu oLubbeeni omwana omubere owa Yaakobbo, abaanabe babbaire niibo banu:

OKanoki, nʼoPalu, nʼoKezirooni, nʼoKalumi. Abo niibo abazeiza bʼabantu bʼebika byʼamaliina gaabwe ago.

15Abaana ba Simyoni babbaire niibo banu:

OYemweri, nʼoYamini, nʼOkaadi, nʼoYakini, nʼoZokali, nʼoSyawulo omwana oguyabyaire nʼomukali oMukanani. Abo niibo abazeiza bʼabantu bʼebika byʼamaliina gaabwe ago.

16Atyanu ganu niigo amaliina gʼabaana ba Leevi ngʼowebairanganaku omu kubabyala:

OGerusoni, nʼoKokasi, nʼoMerali. Era oLeevi yawangaire emyanka 137.

17Abaana ba Gerusoni babbaire niibo banu:

oLibbuni nʼoSemeeyi, era abo niibo abazeiza bʼabantu bʼebika byʼamaliina gaabwe ago.

18Abaana ba Kokasi babbaire niibo banu:

Amulaamu, nʼoIzukali, nʼoKebbulooni, nʼoWuziyeeri. Era oKokasi yawangaire emyanka 133.

19Abaana ba Merali babbaire niibo banu:

OMakuli nʼoMusyi.

Atyanu abo bonabona abʼeibyaire lya Leevi aamo nʼabaizukulu baabwe niibo abazwiremu ebika byʼaBaleevi.#Kub 3:17-20; 26:57-58; 1Mi 6:16-19

20Atyanu Amulaamu yafumbiirwe oYokebbedi oisengawe, era nʼabyala naye Alooni nʼoMusa. Era Amulaamu yawangaire emyanka 137.

21Abaana ba Izukali babbaire niibo banu:

OKoola, nʼoNefegi, nʼoZikiri.

22Abaana ba Wuziyeeri babbaire niibo banu:

OMisairi, nʼErizefaani nʼoSitiri.

23Atyanu Alooni yafumbiirwe Eriseebba, omwala wʼAminadabbu era omwonyoko wa Nakusoni, nʼabyala naye oNadabbu, nʼAbbiku, nʼEryezaali, nʼoIsamali.

24Abaana ba Koola babbaire niibo banu:

Asira, nʼErukaana, nʼAbbiyasaafu.

Abo niibo abazeiza ba bantu abʼebika bya Bakoolakiiti.

25Eryezaali omutaane wʼAlooni, yafumbiirwe omoiza oku baala ba Putiyeeri, era nʼabyala naye oFenekansi.

Abantu abo bonabona aamo niibo ababbaire abakulu abʼekika kya Leevi mu buli mulyango.

26Atyanu Alooni nʼoMusa, niibo abananyere badi oMusengwa abeyakobere ati, “Mutooleyo ebika byʼaBaisirairi omu kyalo kyʼe Misiri.” 27Era oMusa nʼAlooni niibo abakobeire oFalaawo ebikwata oku kutoola aBaisirairi omu kyalo kyʼe Misiri.

28Atyanu oMusengwa oweyatumuliire nʼoMusa omu kyalo kyʼe Misiri, 29yakobere oMusa ati, “Ninze oMusengwa. Okobere oFalaawo nabuli ekinkukoba.” 30Neye oMusa nʼairamu oMusengwa ati, “Omaite nga tindi mutumuli omusa, dala oFalaawo yampulisisya?”

Currently Selected:

OKuzwa 6: GWR

Highlight

Copy