Lucca 13

Cunverta si o piriscia

1È tandu ghjunsinu unipochi chì li parledinu di i Galilei chì Pilatu avia fattu tumbà, mischiendu u so sangui cù quillu di i so sacrifizii. 2È Ghjesù rispundì: «soca criditi ch'elli fussinu stati più gran piccatori cà l'altri Galilei, par essa morti cusì? 3Innò, ma sì voi ùn vi cunvirtiti, eti da piriscia tutti cum'è elli. 4È quilli diciottu chì a torra li caschedi à dossu in Siloè è i tumbedi tutti, criditi ch'elli fussinu stati più culpevuli cà tutti quilli chì stanu in Ghjerusalemi? 5Innò, a vi dicu, ma sì voi ùn vi cunvirtiti eti da piriscia tutti cum'è elli.»

A parabula di a fica chì ùn dava fruttu

6È li dissi issa parabula: «un omu avia una fica chì criscia in la so vigna, è andedi par coglia i fichi ma ùn ni truvedi. 7È dissi à u vignaghjolu: “mì, sò trè anni ch'e' vengu à coglia i fichi d'issa fica è ùn ni trovu; taglia la puri, ch'ella ùn pigli u locu par nulla.” 8Ma quillu li rispundì: “o signò, lascia la stà ancu par quistannu, ch'e a zappitteghji è ch'e l'assuvi 9da veda s'ella farà i fichi un antru annu; sì di nò, a farè taglià.”»

Ghjesù risana una donna inferma u ghjornu di u sabbatu

10Ghjesù insignava ind' una sinagoga u ghjornu di u sabbatu. 11È ci era una donna chì eranu diciottu anni ch'ella era inferma par via di un ispiritu gattivu chì a tinia aghjumpata, è ùn si pudia addirrizzà micca. 12Videndu la Ghjesù a chjamedi è li dissi: «o donna, sè guarita di a to infirmità.» 13È à tempu li missi i mani in capu, è ella s'addirizzò subitu è ludedi à Diu. 14Ma u capisinagoga s'infuriò par via chì Ghjesù l'avia risanata u ghjornu di u sabbatu; dissi à a folla: «sò sei i ghjorni ch'ellu ci voli à travaglià#13,14 Vede Es 20,9-10; Dt 5,13-14.; viniti tandu à fà vi curà, micca u ghjornu di u sabbatu.» 15È u Signori li risposi cusì: «o falsi chì voi seti, soca ugnunu di voi, u ghjornu di u sabbatu, ùn discioglii da a stalla u so boiu o u so sumeri è ùn lu porta à bia? 16È à issa donna chì hè figliola d'Abraamu è chì Satanassu a tinia ligata chì eranu diciottu anni, ùn ci vulia à scioglia li issa pastoghja u ghjornu di u sabbatu?» 17È mentri ch'ellu parlava cusì tutti quilli chì li eranu contru s'avvargugnavanu è tutta a folla si ralicrava videndu i so fatti boni.

I parabuli di u granellu di senapa è di u levitu

(Mt 13,31-33; Mc 4,30-32)

18È li dissi: «à chì s'assumiglia u Regnu di Diu, cù chì l'avaraghju da paragunà? 19Hè cum'è un granellu di senapa, chì un omu hà pigliatu è postu in lu chjosu, è dopu hè crisciutu, hè vinutu arburu è l'acelli anu fattu i nidi in li so rami.»

20È dissi dinò: «cù chì avaraghju da paragunà u Regnu di Diu? 21Hè cum'è u levitu, chì una donna hà pigliatu è impastatu cù un mezu saccu di farina, fin à ch'ella livitessi tutta a pasta.»

A porta stretta

(Mt 7,13-14.21-23)

22È Ghjesù passava pà i cità è i paesi, è insignava fendu strada ver di Ghjerusalemi. 23È unu li dissi: «o Signori, avaranu da essa pochi quilli chì saranu salvi?» Ghjesù rispundì dicendu à a ghjenti: 24«feti i sforzi da entra pà a porta stretta, chì parechji, a vi dicu, pruvaranu à entra è ùn pudaranu. 25Quand'ì u patron di casa si sarà arrittu è ch'ellu avarà sarratu a porta, chì voi stareti fora è chì voi pichjareti à a porta dicendu: “o signò, apri ci”, ellu vi rispundarà: “ùn sò di quali voi ni seti.” 26Tandu l'avareti da dì: “emu magnatu è bitu cù tecu, è insignavi in li nostri piazzi.” 27Ellu vi diciarà “ùn sò di quali voi ni seti; luntan da mè, voi tutti, chì feti a inghjustizia#13,27 Paragunà cù Sal 6,9.!” 28È tandu ci saranu i pienti è i chirchenni, quand'ì voi vidareti à Abraamu, à Isaccu, à Ghjacobbe è à tutti i prufeti, in lu Regnu di Diu, è chì voi sareti lampati fora. 29È vinarà omi da livanti è da punenti, da u nordu è da u meziornu, è si mittaranu à tavulinu in lu Regnu di Diu. 30È mirè, ci sò di l'ultimi chì saranu i prima, è di i prima chì saranu l'ultimi.»

Lamentu di Ghjerusalemi

(Mt 23,37-39)

31Tandu ghjunsinu unipochi di Farusei è li dissinu: «esci è vai ti ni da quì, chì Erodi ti voli tumbà.» 32È Ghjesù li rispundì: «andeti è diti à issa vulpaccia: Cacciu i dimonii è risanu ghjenti oghji è dumani, è u terzu ghjornu avaraghju compiu tuttu. 33Ma mi tocca à fà strada oghji è dumani è u dopu ghjornu, chì ùn pò essa ch'ellu morghi un prufeta for di Ghjerusalemi. 34O Ghjerusalemi, o Ghjerusalemi, chì fai mora i prufeti è tombi à pitrati quilli chì ti sò mandati, quantu volti aghju vulsutu aduniscia i to figlioli, cum'è a ghjallina ascondi i piulelli sottu à i so ali, ma voi ùn eti vulsutu! 35A vostra casa hè lasciata in mani à voi, a vi dicu, ùn mi vidareti più fin'à chì vo dicati: binadettu quillu chì veni in nomi di u Signori#13,35 Paragunà cù Ghjr 22,5; vede Sal 118,26..»

Currently Selected:

Lucca 13: 4EvCors

Highlight

Copy