MATEO 8

Psiaḻ Jesúz to meññ-gayudz gydo lady

(Mr. 1:40-45; Lc. 5:12-16)

1Hor-biaht Jesúz chehsh dahñ, náḻ xtahl meññ leeme. 2Hor-wé to mpyquie-gayudz gydo lady gübigy me Jesúz no bisshiby me lo, no ra me lee:

―Señor, lii ni rtzoo mdad, bâḻ racladzyiꞌ la, beeiy csiaḻiꞌ naa.

3Were pshob ña Jesúz chehsh me, no ra leeme:

―Naa racdadzyaꞌ csiaḻaꞌ lii. ¡Ba biaḻiꞌ we!

Lux günii me ze, biaḻ gahc ni gayudz gydo lady mpyquie-caḻ. 4Byluxu, ra Jesúz leeme:

―Na di guyu lo ndruhty; mazyg güya lo bahl, no güiyno gun mod-bluu Moiséz meññ, lehdy gann yâme ba biaḻiꞌ de xguîlguihdziꞌ.

Psiaḻ Jesúz xmós to capitaṉ-byruu Ṟom

(Lc. 7:1-10)

5Hor-bydzihñ Jesúz guiedzy-Capernaum, to capitáṉ ni byruu Ṟom bydziñgahsh leeme, no günab me gacno Jesúz leeme, 6no ra me lee:

―Señor, lii ni rtzoo mdad, dmósaꞌ nashluꞌn ruꞌ yuꞌ, gayac-ure me, di raḻ gyniꞌby me mbehty no modni gayoob me.

7Ra Jesúz leeme:

―Naꞌ tzan zicsiaḻaꞌ leeme.

8Ra capitáṉ leeme:

―Lii ni rtzoo mdad, ndruhty nehx nacaꞌ par guiaadiꞌ xtâ diryuꞌn. Günihzy guiaḻ dmósaꞌ, no ba gahc biaḻ me we. 9Naa nannaꞌ xnahc rahc mdad, porni nu dxu rtzoo mdad naa, no zegahc nu soldad ni rtzon mdad leeyahc. Hor-gapyaꞌ to lahd yâme tza bahch, zia. No hor-gapyaꞌ sto lahd yâme guiaad, ba gahc ziaad. No hor-rshaalaꞌ dmósaꞌ dzictzoo me behch, rtzoo me leeu.

10Hor-günii capitáṉ ze, ptzunadz Jesúz, no ra me meññ-náḻ leeme:

―Gapyaꞌ laꞌd ni uli, ni to lahd meññ-Isṟael nehx bydzialaꞌ meññ ni rlíladzy beeiy mpyquie-rieꞌ. 11No gapyaꞌ laꞌd, xtahl meññ gyruu ñaz-ru rlahñ ncübidz no ñaz-ru riaaz ncübidz par guiaad goo tohzy ruꞌ miax no Braṉ, Isac no Jacop leññ ru rtzoo Dioz mdad; 12no meññ-nac diidz ñuꞌ ru rtzoo Dioz mdad, gyruu yâme tza yâme lo guibcawy stziuꞌ; uga guun yâme lé gahgü laiy yâme.

13Luxu ra Jesúz capitáṉ:

―Naꞌ gübiꞌ xiryuꞌy, no gacu mod-neꞌy porni bylíladzyiꞌ.

Hor-wé gahc biaḻ xmós capitáṉ.

Psiaḻ Jesúz suegyr Pedr

(Mr. 1:29-31; Lc. 4:38-39)

14Güya Jesúz xiryuꞌ Pedr, no bwieꞌ me nash suegyr-ngünaa Pedr, xle lee. 15Were güdan Jesúz ña me, no biaḻ gahc xixle me; no biahs gahc me, bdee me ni güee Jesúz no xmeññ.

Psiaḻ Jesúz xtahl meññ-gayac-ure

(Mr. 1:32-34; Lc. 4:40-41)

16Hor-ba udziedoo, güiyno yâme xtahl meññ-nu mbenahcsy lee ru zu Jesúz; no tohzy günii Jesúz, byruu gahc gyre mbenahcsy leeyâme; no zegahc psiaḻ Jesúz gyre meññ-gayac-ure. 17Nirieꞌ guhcu lehdy guhc mod-günii profet-Isaíaz, ru ne me: “Leeme bislaa me nó de gyre dguîlné nó, no ziyno me dguîlguihdz nó.”#8:17 Is. 53:4

Meññ-ne tza ru za Jesúz

(Lc. 9:57-62)

18Hor-bwieꞌ Jesúz bydzeꞌ meññ guingybi me, ra me xmeññ me:

―Tedy nó stiby chehsh nisdoo.

19Gübigy to muextr ni ruuḻ xleiy Moiséz, ra me Jesúz:

―Muextr, tzan no lii rutisy tzaꞌy.

20Ra Jesúz leeme:

―Mbiaz rahp xcuev yahc maꞌ, no zegahc mashiily rahp xguehsh yahc maꞌ; per naa, Mpyquie-Pshahl Dioz Lee, nehx rapaꞌ ru rdzíen.

21Sto lahd xmeññ me, ra leeme:

―Señor, lii ni rtzoo mdad, bdee ñahz nier tzan dziycatzyaꞌ dtadaꞌ.

22Ra Jesúz leeme:

―Náḻiꞌ naa naꞌ; psaꞌn meññ-nac yahc beeiy mînguty ycaꞌdzy yâme xmeññ yâme ni ba guhty.

Biscuiahz Jesúz mbedun-ro lo nisdoo

(Mr. 4:35-41; Lc. 8:22-25)

23Güyuꞌ Jesúz leññ barcü no xmeññ me. 24Tohzy guzlo byxuu to mbedun-ro lo nisdoo, no lé ruhtz oḻ chehsh barcü. Per hor-wé nishcahsy Jesúz. 25Were güya xmeññ me bicsiuꞌ lo me, ra yâme leeme:

―¡Señor, byla noꞌ! ¡Nó ba gayaꞌb!

26Ra me xmeññ me:

―¿Bia nacu zehdy rdzie laꞌd? ¿Nehx ziaꞌ rlíladzy laꞌd naa la?

Byluxz günii me ze, biahs me, ptzoo me mdad güyudzie mbeꞌ no nisdoo; no gyreu güyuꞌ dzie. 27Gatzunadz yâme, ganabdiidz saꞌ yâme:

―¿Dxuz‑e leeme mpyquie-rieꞌ? ¡Xnahc‑e xtâ mbedun no nisdoo rzoob xtiidz me!

Meññ-gadaren ni nu mbenahcsy lee

(Mr. 5:1-20; Lc. 8:26-39)

28Hor-bydzihñ Jesúz stiby chehsh nisdoo, lo xilyu meññ-gadaren, byruu chohp mpyquie ni nu lahd baa, bydziñgahsh yâme ru ziaad Jesúz, no nu mbenahcsy leeyâme. Rquelo yâme meññ, no ndruhty nehx beeiy rdedy lo ñahz ru nu yâme. 29No guzlo pquee yâme riedz:

―¿Bia racladzyiꞌ ctzooy no noꞌ, Jesúz, Xiiñ Dioz? ¿Ziaadiꞌ we lehdy ctzoo csahquiꞌ noꞌ, nîcze dgueññ ziaꞌ gydzihñ dze-nac diidz la?

30Gahsh gá de uga nu xtahl ngutzy, gayahgü; 31no günab mbenahcsy yahc lo Jesúz:

―Bâḻ gbooy noꞌ, bdee ñahz tzu noꞌ ngutzy-wé yahc.

32Ra Jesúz mbenahcsy yahc:

―Lâ tza.

Byruu gahcu mpyquie-wé yahc no bictzu yahcu ngutzy; no lo hor-wé gahc guzlo byxuunn yâmaꞌ, byrîbydahñ yâmaꞌ to ruꞌ zaꞌn lo nisdoo, no wé pycawy yâmaꞌ, guhty yâmaꞌ.

33Meññ-gayahp yahc ngutzy byxuunn yâme, no hor-bydzihñ yâme leññ guiedzy, bie yâme gyre ni güxahc no ni guhc meññ-güyuꞌ mbenahcsy lee. 34Byluxu, byruu gyre meññ-guiedzy-caḻ, za yâme ru zu Jesúz; no hor-bwieꞌ yâme leeme, günab yâme tza me zrieñ lad.

Currently Selected:

MATEO 8: zpg

Highlight

Copy