San Juan 2

Las bodas de Caná

1Ni̱ ngaa guisíj gachin hua̱ꞌnij güi, ni̱ huin ꞌngo̱ guiꞌyanj naraꞌa ni ngüi̱ xumanꞌ Caná huin xumanꞌ ngaj estado Galilea. Ni̱ ganꞌanj nni Jesús guiꞌyanj daj. 2Ni̱ gaquínj ni sij ga̱nꞌanj Jesús nga̱ ni tsínj nicoꞌ síꞌ guiꞌyanj da nej. 3Ni̱ ngaa ganahuij vino, ni̱ gataj nni Jesús gunun síꞌ:

―Nitaj nnee vino rian ni sij ga̱ mánj. ―Daj gataj unj.

4Ngaa ni̱ gataj Jesús rian nni sij:

―Ni̱ u̱n sin huin ni̱ gaꞌmí re̱ꞌ daj riānj únj. Achin gui̱sij güi ga̱xiꞌi si-sūnj anj. ―Daj gataj Jesús.

5Ngaa ni̱ gataj únꞌ rian ni tsínj ma̱n ꞌyaj sun daj:

―Gui̱ꞌyaj á re̱ꞌ daranꞌ si ga̱taj sij rian án re̱ꞌ aj. ―Daj gataj nni Jesús gunun ni sij.

6Ni̱ nne hua̱tanꞌ gucuaj yej arasu̱n ni tsínj israelita sisi̱ gui̱man nnee chruhua-áꞌ nania̱ꞌ ni sij da̱j rúnꞌ ataj si-du̱cuanj Moisés. Ni̱ daꞌ go̱ꞌngo gucuaj nicaj ga̱nꞌanj xia lichru nnee aj. 7Ngaa ni̱ gataj Jesús gunun ni tsínj ma̱n ꞌyaj sun daj:

―Ga̱ra á re̱ꞌ nnee chruhua ni gucuaj nan anj. ―Daj gataj Jesús.

Ngaa ni̱ ꞌngo̱ gara ni̱nꞌ rian ni gucuaj, guiꞌyaj ni sij. 8Ngaa ni̱ gataj Jesús:

―Yya̱j ni̱ gui̱ri a ni é re̱ꞌ do̱j nnee ga̱ꞌuiꞌ a ni é re̱ꞌ rian tsínj aꞌninꞌ xiꞌí guiꞌyanj. ―Daj gataj Jesús.

Ngaa ni̱ daꞌngaꞌ daj guiꞌyaj ni sij.

9Ni̱ tsínj daj goꞌo do̱j. Ni̱ xacaj cuenta duꞌua sij sisi̱ hua sa̱ꞌ nnee ganahuin vino daj. Sani̱ nun niꞌi sij ni̱ a̱ ꞌna̱ꞌ aj. Urin ni tsínj ma̱n ꞌyaj sun niꞌi. Daj si hué ni sij huin ni tsínj ri nnee daj. Asíj ni̱ gaquínj tsínj aꞌninꞌ rian guiꞌyanj daj ga̱ꞌnaꞌ tsínj xacaj yunꞌunj xa̱na. 10Ni̱ gataj sij gunun síꞌ:

―Daranꞌ ni ngüi̱ aꞌuiꞌ sini vino sa̱ꞌ. Ni̱ ngaa goꞌo nico ni tsínj ꞌna̱ꞌ guiꞌyanj, ni̱ aꞌuiꞌ ni sij vino nitaj si hua sa̱ꞌ. Sani̱ so̱ꞌ nara sa̱ꞌ vino sa̱ꞌ da yya̱j aj. ―Daj gataj tsínj daj.

11Ni̱ hué daj gaxi̱ꞌi Jesús guiꞌyaj sij si sa̱ꞌ nico xumanꞌ Caná xumanꞌ ngaj estado Galilea. Xiꞌí daj ni̱ xacaj ni ngüi̱ cuenta sisi̱ tsínj sa̱ꞌ ni̱nꞌ ruhua huin Jesús. Ni̱ guxuman ruhua ni tsínj nicoꞌ sij guiniꞌi ni síꞌ sij.

12Asíj ni̱ ganꞌanj Jesús xumanꞌ Capernaum. Ni̱ ganꞌanj nni sij nej, ni jnánj sij nej, ni tsínj nicoꞌ sij nej. Ni̱ do̱j güi guimán ni sij yuꞌuj daj.

Jesús purifica el templo

13Ni̱ ngaa gahuin ni̱chrunꞌ ga̱huin guiꞌyanj pascua, guiꞌyaj ni tsínj israelita, ngaa ni̱ gahui Jesús ganꞌanj sij xumanꞌ Jerusalén. 14Ni̱ chruhua nuhui nico, ni̱ nariꞌ Jesús ni tsínj mán duꞌuej sicuj nga̱ xachij nej, xuꞌma̱n nej. Ni̱ nariꞌ sij ni tsínj naduna sanꞌanj nne ni síꞌ ꞌyaj sun ni síꞌ. 15Ngaa ni̱ guiꞌyaj Jesús ꞌngo̱ xuguati. Ni̱ guiri sij daranꞌ ni síꞌ ne̱ꞌ chrej xe̱ꞌ nuhui daj nga̱ ni xachij nej, ni sicuj nej. Ni̱ gayu si-sanꞌanj ni tsínj naduna sanꞌanj, guiꞌyaj sij. Ni̱ guru ni̱tu sij ni mesa siꞌyaj ni síꞌ. 16Ni̱ gataj sij gunun ni tsínj duꞌuej xuꞌma̱n:

―Gu̱xun a ni é re̱ꞌ si ma̱n nan. Si̱ guiꞌyaj á re̱ꞌ yuꞌue̱ ducuá chrē mánj. ―Daj gataj Jesús gunun ni tsínj daj.

17Ngaa ni̱ nanun ruhua ni tsínj nicoꞌ Jesús si garun ni tsínj gaꞌmi si-nu̱guanꞌ Yanꞌanj asi̱j ná. Ni̱ gataj ni síꞌ: “Ducu huin ruhuāj si ga̱ sa̱ꞌ ducuá re̱ꞌ.” Daj garun ꞌngo̱ tsínj gaꞌmi si-nu̱guanꞌ Yanꞌanj asi̱j ná.

18Ni̱ ngaa guiniꞌi ni tsínj israelita si guiꞌyaj Jesús, ni̱ nachínj snanꞌanj ni síꞌ sij. Ni̱ gataj ni síꞌ:

―Da̱j hua daꞌngaꞌ di̱gyán re̱ꞌ rian ni únj gui̱niꞌi únj sisi̱ hua si-chréj re̱ꞌ guiꞌyáj re̱ꞌ da únj. ―Daj gataj ni sij.

19Ngaa ni̱ gataj Jesús:

―Du̱guane ni é re̱ꞌ nuhui nan, ni̱ chra̱ hua̱ꞌnij güi, ni̱ na̱guiꞌyaj na̱ca ru̱huaꞌ yūnj. ―Gataj Jesús gunun ni sij.

20Ngaa ni̱ gataj ni tsínj israelita:

―Síj hui̱j xia hua̱tanꞌ yya yoꞌ guiꞌyaj sun ni sij nuhui nan. Ni̱ asa̱ꞌ ga̱ꞌue na̱guiꞌyáj re̱ꞌ nuhui nan chra̱ hua̱ꞌnij güi, ruhuá re̱ꞌ únj. ―Daj gataj ni sij gunun Jesús.

21Sani̱ gaꞌmi Jesús xiꞌí nnee̱ cúj manꞌan sij sisi̱ hué-éꞌ huin ducuá Yanꞌanj, ataj sij. 22Xiꞌí daj ni̱ ngaa ganáꞌnij Jesús scanij ni níman, ni̱ gananun ruhua ni tsínj nicoꞌ sij sisi̱ daꞌngaꞌ daj gaꞌmi sij. Ngaa ni̱ guxuman ruhua ni sij nuguanꞌ ataj si-nu̱guanꞌ Yanꞌanj. Ni̱ guxuman ruhua ni sij nuguanꞌ gaꞌmi Jesús nej.

Jesús conoce a todos los hombres

23Ni̱ ngaa gane Jesús xumanꞌ Jerusalén gahuin guiꞌyanj pascua, ni̱ nico ni ngüi̱ guxuman ruhua niꞌyaj manꞌan sij ngaa guiniꞌi ni síꞌ si sa̱ꞌ guiꞌyaj sij. 24Sani̱ nun ga̱ꞌuej ruhua Jesús gui̱nicaj dugüiꞌ sij nga̱ ni síꞌ xiꞌí si hua niꞌi sij da̱j hua niman ni síꞌ. 25Ni̱ nitaj si nanaꞌuiꞌ sij go̱ꞌngo ni tsínj ga̱taj rian sij da̱j hua niman ni ngüi̱ mánj. Daj si hua niꞌi sij da̱j hua niman ni ngüi̱ aj.

Currently Selected:

San Juan 2: trqNT

Highlight

Copy