San Juan 18

Arresto de Jesús

1Ngaa ni̱ guisíj gaꞌmi Jesús ni nuguanꞌ daj, ni̱ gahui sij nga̱ ni tsínj nicoꞌ sij ganꞌanj ni sij anéj chrej xinéj gu̱ꞌnaj Cedrón rian ma̱n ꞌngo̱ nnaa̱ chrun. Ni̱ gatúj sij nga̱ ni síꞌ. 2Ni̱ tsínj gu̱ꞌnaj Judas, huin tsínj nagaꞌuiꞌ Jesús rian ni tsínj nicaj sun, ni̱ guiniꞌi síꞌ yuꞌuj daj. Daj si síj gaꞌi̱ huanꞌanj Jesús yuꞌuj daj nahuin chreꞌ sij nga̱ ni tsínj nicoꞌ sij. 3Ngaa ni̱ nicaj Judas ꞌngo̱ xiꞌninꞌ snado nga̱ go̱ꞌngo policía dugumi nuhui gaꞌna̱ꞌ ni síꞌ rian nne Jesús. Ni̱ gaꞌníj ni chrej aꞌninꞌ nga̱ ni tsínj fariseo ga̱ꞌnaꞌ ni síꞌ. Ni̱ nicaj ni síꞌ espada nga̱ candil nej, caꞌ nej, gaꞌna̱ꞌ ni síꞌ. 4Sani̱ ri̱an hua niꞌi Jesús daranꞌ si gui̱ranꞌ sij, ni̱ gahui sij nachínj snanꞌanj sij ni síꞌ. Ni̱ gataj sij:

―Ni̱ u̱n tsínj nanoꞌ a ni é re̱ꞌ únj. ―Daj gataj Jesús.

5Ngaa ni̱:

―Jesús nazareno nanoꞌ ni únj. ―Gataj ni síꞌ.

Ngaa ni̱ gataj Jesús:

―Huēj huin Jesús. ―Gataj Jesús.

Ni̱ niquinꞌ Judas nga̱ ni síꞌ yuꞌuj daj. Ni̱ huin sij tsínj nagaꞌuiꞌ Jesús rian ni tsínj nicaj sun. 6Ni̱ ngaa gataj Jesús sisi̱ hué sij huin tsínj nanoꞌ ni síꞌ, ni̱ guxun ru̱cu ni síꞌ ni manꞌan ni síꞌ. Ni̱ ganatúj ni síꞌ rian yoꞌój. 7Ngaa ni̱ nachínj snanꞌanj ru̱huaꞌ yún Jesús ni síꞌ. Ni̱ gataj sij:

―Ni̱ u̱n tsínj nanoꞌ a ni é re̱ꞌ únj. ―Gataj Jesús.

Ngaa ni:

―Jesús nazareno nanoꞌ ni únj. ―Gataj ni síꞌ.

8Ngaa ni̱ gataj Jesús:

―Hua gatā gunun a ni é re̱ꞌ sisi̱ huēj huin tsínj daj. Ni̱ sisi̱ nanoꞌ ni é re̱ꞌ manꞌānj, ngaa ni̱ du̱na á re̱ꞌ sisi̱ ga̱nꞌanj ni tsínj nan. ―Daj gataj Jesús.

9Ni̱ daꞌngaꞌ daj gaꞌmi Jesús sisi̱ ga̱huin yya da̱j rúnꞌ hua gaꞌmi sij rian Yanꞌanj: “Nun ga̱ niꞌya ni̱ a̱ ꞌngo̱ ni tsínj riquí re̱ꞌ riānj.” Daj gaꞌmi Jesús gunun Yanꞌanj.

10Ni̱ nicaj Simón Pedro ꞌngo̱ espada. Ni̱ gaꞌninꞌ sij tsínj ꞌyaj sun rian chrej aꞌninꞌ. Ni̱ güéj ni̱nꞌ chraquij síꞌ, guiꞌyaj sij huin síꞌ ꞌngo̱ tsínj gu̱ꞌnaj Malco. 11Ngaa ni̱ gataj Jesús gunun Pedro:

―Na̱ꞌnij re̱ꞌ si-espadá re̱ꞌ chruhua pena. Sisi̱ riqui chrē si gui̱ranꞌānj sayun nan, ni̱ hua nia̱n sisi̱ hué daj gui̱ranꞌānj. ―Daj gataj Jesús gunun Pedro.

Jesús ante el sumo sacerdote

12Ngaa ni̱ guidaꞌa ni snado nej, tsínj aꞌninꞌ rian ni snado nej, ni policía niquinꞌ rian ni tsínj israelita manꞌan Jesús. Ni̱ numíj ni sij síꞌ. 13Ni̱ asi̱j sini nicaj ni sij Jesús ganꞌanj ni sij ducuá tsínj gu̱ꞌnaj Anás. Daj si huin síꞌ chre che̱j Caifás. Ni̱ Caifás huin chrej aꞌninꞌ yoꞌ daj. 14Ni̱ hué Caifás daj huin tsínj gataj snanꞌanj rian ni tsínj israelita sisi̱ sa̱ꞌ huin si ga̱huiꞌ urin tsínj daj xiꞌí daranꞌ ni ngüi̱ israelita.

Pedro en el patio de Anás

15Ngaa ni̱ nicoꞌ Simón Pedro nga̱ ango tsínj nicoꞌ Jesús huaj nu̱ngüej sij nga̱ Jesús. Ni̱ hua niꞌi chrej aꞌninꞌ ango tsínj nicoꞌ Jesús daj. Xiꞌí daj ni̱ gatúj síꞌ rian hua ta rian hueꞌ daj nga̱ Jesús. 16Sani̱ gunáj Pedro ne̱ꞌ chrej xe̱ꞌ niquinꞌ sij rian hueꞌ. Ngaa ni̱ gahui ango tsínj nicoꞌ Jesús daj tsínj niꞌi chrej aꞌninꞌ ganꞌanj ga̱ꞌmi sij nga̱ yunꞌunj dugumi rian hueꞌ. Ni̱ gatúj Pedro, guiꞌyaj síꞌ. 17Ngaa ni̱ nachínj snanꞌanj yunꞌunj dugumi rian hueꞌ daj Pedro. Ni̱ gataj únꞌ:

―Sé re̱ꞌ huin ꞌngo̱ tsínj nicoꞌ tsínj da a̱ꞌ. ―Daj gataj únꞌ gunun Pedro.

Ngaa ni̱:

―Sēj huin mánj. ―Gataj Pedro.

18Ni̱ niquinꞌ ni tsínj ꞌyaj sun nga̱ ni policía dugumi nuhui ne̱ꞌ naranꞌ ni sij yanꞌa̱n. Daj si nuhuij. Ni̱ ma̱n ni sij nahuin gui̱n ni sij xiꞌníj yanꞌa̱n daj. Ni̱ niquinꞌ Pedro nga̱ ni sij nahuin gui̱n síꞌ nga̱ ni sij nej.

Anás interroga a Jesús

19Ngaa ni̱ gaxi̱ꞌi chrej aꞌninꞌ daj nachínj snanꞌanj síꞌ Jesús xiꞌí ni tsínj nicoꞌ sij nga̱ xiꞌí nuguanꞌ digyán sij rian ni ngüi̱ nej. 20Ngaa ni̱ gataj Jesús:

―Gaꞌmi rengāj rian daranꞌ ni ngüi̱. Ni̱ ni̱ganj digyānj rian ni ngüi̱ chruhua si-nuhui ni é re̱ꞌ nga̱ chruhua nuhui nico rian naranꞌ ni tsínj israelita nej. Ni̱ nitaj si garij huīj nuguanꞌ gaꞌmī mánj. 21Ni̱ u̱n sin huin ni̱ nachínj snanꞌánj re̱ꞌ yūnj únj. Na̱chinꞌ snanꞌánj re̱ꞌ ni ngüi̱ gunun si-nu̱guanꞌānj. Hué ni sij niꞌi yya u̱n nuguanꞌ gaꞌmī rian ni sij. ―Daj gataj Jesús.

22Ni̱ ngaa gataj Jesús daj, ni̱ raꞌui raꞌa ꞌngo̱ policía dugumi nuhui rian Jesús. Ni̱ gataj síꞌ:

―Ni̱ hué daj ga̱ꞌmi re̱ꞌ rian chrej aꞌninꞌ níꞌ. ―Gataj síꞌ gaꞌmi huee síꞌ rian Jesús.

23Ngaa ni̱:

―Sisi̱ gaꞌmī ꞌngo̱ nuguanꞌ quij, ni̱ ga̱taj re̱ꞌ u̱n nuguanꞌ quij huin gaꞌmī aj. Sani̱ sisi̱ gaꞌmī nuguanꞌ sa̱ꞌ, ni̱ u̱n sin huin ni̱ raꞌui raꞌá re̱ꞌ riānj únj. ―Daj gataj Jesús gunun tsínj daj.

24Ni̱ anumi Jesús gaꞌníj Anás ga̱nꞌanj síꞌ rian Caifás huin síꞌ chrej aꞌninꞌ.

Pedro niega a Jesús

25Ni̱ niquinꞌ Pedro nahuin gui̱n síꞌ scanij ni sij xiꞌníj yanꞌa̱n. Ngaa ni̱ gataj ni sij gunun Pedro:

―Sé re̱ꞌ huin ꞌngo̱ tsínj nicoꞌ tsínj da a̱ꞌ. ―Gataj ni sij.

Ngaa ni̱:

―Sēj huin mánj. ―Gataj Pedro.

26Ngaa ni̱ nachínj snanꞌanj ꞌngo̱ tsínj ꞌyaj sun rian chrej huin achij ni̱nꞌ Pedro. Ni̱ huin síꞌ dugüiꞌ tsínj gaꞌninꞌ Pedro chraquij. Ni̱ gataj síꞌ:

―Sé re̱ꞌ huin si guiniꞌīnj nga̱ Jesús riqui ni chrun da nej a̱ꞌ. ―Daj gataj síꞌ.

27Ni:

―Sēj huin mánj. ―Gataj ru̱huaꞌ yún Pedro.

Ni̱ ꞌngo̱ hora gaguáj doꞌloj duꞌua xúꞌ.

Jesús ante Pilato

28Ngaa ni̱ nicaj ni sij Jesús gahui ni sij ducuá Caifás. Ni̱ ganꞌanj ni sij ducuasun. Ni̱ ni̱ganꞌ acuanꞌ huin ni̱ nun ga̱ꞌue ga̱tu ni tsínj israelita chruhua ducuasun. Daj si nitaj chrej riqui si-ley ni sij sisi̱ ga̱tu ni sij güi huin guiꞌyanj. Ni̱ sisi̱ hué daj gui̱ꞌyaj ni sij, ni̱ si̱ gaꞌue xa̱ stiꞌni̱ ni sij guiꞌyanj pascua xiꞌí si ga̱huin xi̱ꞌi ni sij rian Yanꞌanj, gui̱ꞌyaj ducuasun daj, ataj si-ley ni sij. 29Yuꞌuj daj ni̱ gahui Pilato gaꞌmi síꞌ nga̱ ni tsínj daj. Ni̱ gataj síꞌ:

―Ni̱ u̱n gaquinꞌ daꞌui tsínj nan, ni̱ aꞌmi gaquinꞌ ni é re̱ꞌ xiꞌí sij únj. ―Daj gataj Pilato.

30Ngaa ni̱:

―Sisi̱ nitaj gaquinꞌ daꞌui sij, ni̱ si̱ nariqui ni únj rián re̱ꞌ mánj. ―Daj gataj ni tsínj israelita.

31Ngaa ni̱ gataj Pilato:

―Ni̱caj ni é re̱ꞌ sij ga̱nꞌanj ni é re̱ꞌ. Ni̱ na̱guiꞌyaj yya ni é re̱ꞌ nga̱ sij da̱j rúnꞌ ataj si-ley ni é re̱ꞌ aj. ―Gataj Pilato.

Ngaa ni̱ gataj ni sij:

―Sani̱ ni únj ni tsínj israelita, ni̱ nitaj chrej hua sisi̱ da̱gahuiꞌ ni únj a̱ ꞌngo̱ ni ngüi̱ mánj. ―Daj gataj ni sij.

32Ni̱ hué daj gataj ni sij sisi̱ ga̱huin yya da̱j rúnꞌ gataj Jesús sisi̱ da̱j ga̱huiꞌ sij.

33Ngaa ni̱ natúj ru̱huaꞌ yún Pilato chruhua ducuasun. Ngaa ni̱ gaquínj sij ga̱ꞌnaꞌ Jesús. Ni̱ nachínj snanꞌanj sij síꞌ. Ni̱:

―Hué re̱ꞌ huin rey rian ni ngüi̱ israelita níꞌ. ―Daj gataj Pilato.

34Ngaa ni̱ gataj Jesús:

―Ni̱ hué daj atáj re̱ꞌ güenda manꞌán re̱ꞌ níꞌ. Asi̱ hua ango tsínj nataꞌ rián re̱ꞌ xiꞌīj sa̱ꞌ. ―Daj gataj Jesús.

35Ngaa ni̱ gataj Pilato:

―Asi̱ huēj huin ꞌngo̱ tsínj israelita, ruhuá re̱ꞌ níꞌ. Ni̱ dugüiꞌ manꞌán re̱ꞌ nga̱ ni chrej aꞌninꞌ hué ni sij nariqui manꞌán re̱ꞌ riānj. Ni̱ u̱n gaquinꞌ daꞌuí re̱ꞌ únj. ―Daj gataj Pilato.

36Ngaa ni̱ gataj Jesús:

―Sé rian xungüi̱ gaquinꞌ nan huin rian nicaj sūnj mánj. Sisi̱ hué daj huin ni̱ gu̱nunꞌ ni tsínj nicoꞌ manꞌānj xiꞌīj. Ngaa ni̱ si̱ nagaꞌuiꞌ ni sij manꞌānj rian ni tsínj israelita mánj. Sani̱ sé rian xungüi̱ gaquinꞌ nan huin rian nicaj sūnj mánj. ―Daj gataj Jesús.

37Ngaa ni̱:

―Hué re̱ꞌ huin ꞌngo̱ rey níꞌ. ―Gataj Pilato.

Ni̱:

―Hué manꞌán re̱ꞌ ataj sisi̱ huīnj ꞌngo̱ rey aj. Xiꞌí nan gaꞌngā chruhua xungüi̱. Ni̱ xiꞌí nan gaꞌnāj sisi̱ ga̱ꞌmī nuguanꞌ xa̱ngaꞌ gu̱nun ni ngüi̱. Ni̱ daranꞌ ni ngüi̱ ruhua gu̱nun nuguanꞌ xa̱ngaꞌ, ni̱ unun ni sij nuguanꞌ xa̱ngaꞌ aꞌmī. ―Daj gataj Jesús gunun Pilato.

38Ngaa ni̱:

―Ni̱ u̱n sin huin nuguanꞌ xa̱ngaꞌ ruhuá re̱ꞌ únj. ―Gataj Pilato.

Ngaa ni̱ gahui ru̱huaꞌ yún sij gaꞌmi sij nga̱ ni tsínj israelita. Ni̱ gataj sij:

―Ni̱ a̱ ꞌngo̱ gaquinꞌ naꞌue na̱riꞌīj xiꞌí tsínj da mánj. 39Sani̱ hué ꞌngo̱ ducuánj ni é re̱ꞌ huin sisi̱ go̱ꞌngo guiꞌyanj pascua, ni̱ gui̱rīj ꞌngo̱ tsínj nu̱n ducuaga̱ꞌ. Ngaa ni̱ huin ruhua ni é re̱ꞌ sisi̱ gui̱rīj tsínj nan tsínj huin si-rey ni tsínj israelita níꞌ. ―Daj gataj Pilato.

40Ngaa ni̱ gaguáj ru̱huaꞌ yún ni sij. Ni̱ gataj ni sij:

―Si̱ guirí re̱ꞌ tsínj nan mánj. Sani̱ sa̱ꞌ huin sisi̱ na̱ꞌnij naj raꞌá re̱ꞌ Barrabás ga̱nꞌanj síꞌ. ―Daj gataj ni sij gaguáj ni sij rian Pilato.

Ni̱ Barrabás huin ꞌngo̱ tsínj tu̱.

Currently Selected:

San Juan 18: trqNT

Highlight

Copy