Marcos 6

Tej tpon Jesús tuj tnam Nazaret

Mateo 13.53-58; Lucas 4.16-30

1Ik'tzun Jesús tuj lugar lu, xi' tuj ttanmi, ex e ok lpe' qe t-xnaq'tzb'en ti'j. 2Tejtzun tul kanun q'ij te ojlab'l, oktzun ten Jesús q'olte xnaq'tzb'il tuj ja te k'ulb'il. Ex nimku xjal e b'inte t-xnaq'tzb'il, in che lab'in ti'j, ex in kyma'n:

—¿Jatum in tzaj tkano'n xjal lu tkyaqil jlu? ¿Ex ti t-xilen ju nab'l lu ma tzaj q'o'n te? ¿Ex tza'n tten in che b'ant qe b'inchb'en nim kyipumal tu'n? 3¿Myapetzun a xjal lu calpinter? ¿Myapetzun tal Mariy jlu? ¿Myapetzun a Jacobo terman, tuk'ix José, tuk'ix Judas tuk'ix Simón? ¿Myapetzun ikx qe tanab' ax ate' qxol? Che chi xjal.

Kyja'tzun mya b'a'n ela tyol Jesús tuj kywitz. 4Xitzun tma'n Jesús kye:

—Jun t-sanjel Dios at toklen tuj kywitz xjal tuj tkyaqil lugar, atzun tuj ttanmi ex kyxol qe terman ex tuj tja minti' toklen tuj kywitz, chi Jesús kye.

5Kyja'tzun minti' tumel tu'n tb'inchante Jesús jun b'inchb'en nim tipumal tuj ttanmi, noq o'kx kab' ox yab' e b'anix tu'n, kub' tq'o'n tq'ab' kyib'aj. 6Ex jaw lab'in Jesús kyi'j xjal tu'nju minti' xi kyoksla'n. Xi'tzun Jesús b'etel kyuj aldey ti'jele tnam, in tq'o'n xnaq'tzb'il kye xjal.

E je'x t-sama'n Jesús qe t-xnaq'tzb'en pakb'al

Mateo 10.5-15; Lucas 9.1-6

7E tzajtzun ttxko'n Jesús qeju kab'laj t-xnaq'tzb'en, e je'x t-sama'n kab'chaq kyb'et, ex xi tq'o'n kyoklen tu'n kyetz qe ju'ẍ tuj kyanmi xjal. 8Ex xi tma'n kye tu'n mi'n t-xi kyi'n jun ti'xti tuj kyb'e, mi pa, mi wab'j, mi pwaq tuj kybols, noq o'kx kyky'aqo'ch tu'n t-xi kyi'n; 9ex tu'n tok kyq'o'n kyxajab', ex tu'n mi'n tok kyq'o'n kab'e kykamiẍ. 10Ex xi tma'n kye:

—Alkye jun ja jatum che okexe, axtzun che posadiyile, maxitzun che ik'ele okxi kyetze tuj tnam. 11Ex qa at jun tnam minti' ẍe k'monjtze kyu'n xjal ex minti' ma kub' kyb'i'n kyyole, kyetze tuj tnam lu ex kychto'mele puj ti'j kyqane te jun yek'b'il kyi'j qa mya b'a'n qe. Ax tok kxel nma'ne kyeye: Tuj tq'ijlalil jwisi, mas nim tcastiw tnam lu kb'el twitz tcastiw tnam Sodoma ex tnam Gomorra.

12E je'xtzun qe xnaq'tzb'en, in che pakb'an ti'j tu'n tajtz ti'j kyanmi xjal. 13Ex e je'tz nimku ju'ẍ tuj kyanmi xjal kyu'n, ex ok kyq'o'n aseyt kyi'j nimku yab', ex e b'anix yab' kyu'n.

Aju tkyimlen Juan, aju in che b'yan xjal tu'n

Mateo 14.1-12; Lucas 9.7-9

14Ex o tb'i rey Herodes tqanil ti'j Jesús, tu'nju otoq tz'el tqanil Jesús kyxol kykyaqil xjal; ex tma Herodes:

—Ate Juan jlu, aju e b'yan xjal tu'n; ma jaw anq'in kyxol kyimni, kyja'tzun at nim tipumal tu'n tb'inchante tkyaqil jlu, chi Herodes.

15At txqantl xjal in kyma'n:

—Ate Elías jlu, aju t-sanjel Dios.

Ex txqantl in kyma'n:

—Jun t-sanjel Dios te jlu ik tza'n qe t-sanjel Dios e ten ojtxi, che chi.

16Tejtzun tb'inte Herodes kyyol xjal, tma:

—Ate Juan jlu, aju el wi'ne twi', ma jaw anq'in kyxol kyimni, chi Herodes.

17Tu'nju axte Herodes q'mante tu'n ttzyet Juan ex otoq tz'okx tq'o'n tuj pres tu'n tlaj xu'j Herodías, ex b'aj k'alo'n tu'n caden; ate Herodías t-xu'jil Felipe nej, aju titz'in Herodes; ex el t-xk'ayin Herodes tu'n tok te t-xu'jil. 18Okx q'o'n Juan tuj pres tu'n tlaj ok tma'n te Herodes kyja':

—Mya q'o'n teya tu'n ley tu'n tok t-xu'jil titz'ina te t-xu'jila, chi Juan.

19Atzunte xu'j Herodías tzaj tlo'ch tk'u'j ti'j Juan, ex o tajb'e tu'n tkub' b'yo'n Juan, ex minti' knet tumel tu'n; 20porke in xob' Herodes twitz Juan; b'i'ntoq tu'n ate Juan jun xjal tz'aqlxix ex tpa'n tib' ti'j tkyaqil mya b'a'n, ex o kolin ti'j. Maske in jolpaje' tk'u'j Herodes tu'n tyol Juan, pero minti'xix nne'l tnik' ti'j, ex at tgan tu'n tb'inte tyol. 21Pontzun jun q'ij tu'n tkamb'ante Herodías alkyeju tajb'il, atzun q'ij tu'n tkub' tik'sa'n Herodes tq'ijlalil titz'jlen. Tb'incha Herodes jun nintz wa'n tu'n kywa'n qe aj sanjelal tuk'il, kyuk'ix qe coronel, kyuk'ix qe xjal ma' kyoklen tuj tx'otx' Galilea. 22Okxtzun ju txin tal Herodías jatum in che wa'n xjal, ex ok ten b'ixal kywitz, ex o tzalaj Herodes ti'j, kyuk'ix qeju ate'toq tuk'il ti'j mes. Xitzun tma'n rey te txin:

—Qanintza weye alkye tajb'ila, jaku txi nq'o'ne teya.

23Tzqan Dios, chi Herodes, noq alkyex ma tzaj tqanina weye jaku txi nq'o'ne teya, ex qa ma tzaj tqanina mij tx'otx' jatum in chin kawine, jaku txi nq'o'ne teya. 24Etztzun ju txin ex xi tma'n te ttxu':

—¿Alkye kxel nqanine?

—Qaninxa twi' Juan, aju in che b'yan xjal tu'n tuj a', chi ttxu', xi tma'n te.

25Jurattzun okx txin tuk'il rey ex xi tqanin te:

—Wajb'ile b'i'x ja'lo tu'n ttzaj tq'o'na twi' Juan tuj jun plat, aju in che b'yan xjal tu'n tuj a'.

26Tzajtzun nim tb'is rey; ex tu'n tlaj otoq txi tma'n tzqan Dios, ex tu'n kylaj qeju ate'toq tuk'il ti'j mes, minti' kub' t-xk'ayin aju o tqani txin. 27Jurat naj xi t-sama'n rey jun soldad, xi tq'o'n orden tu'n ttzaj q'i'n twi' Juan. 28Xi'tzun soldad, el ttamtz'u'n twi' Juan tuj pres ex tzaj ti'n twi' tuj jun plat, xi tq'o'n teju txin, atzunte txin xi tq'o'n te ttxu'.

29Tejtzun kyb'inte qe t-xnaq'tzb'en Juan jlu, e ultzun, xi kyi'n t-ximlal ex okx kyq'o'n tuj jun pantyón.

Xi tq'o'n Jesús kywa jwe' mil xjal

Mateo 14.13-21; Lucas 9.10-17; Juan 6.1-14

30E ultzun meltz'aj qe apostol tuk'il Jesús, ex xi kytx'olb'a'n tkyaqilju otoq kyb'incha ex aju xnaq'tzb'il otoq txi kyq'o'n kye xjal. 31Xitzun tma'n Jesús kye:

—Kytzaje kyjunalxe, qo'qe tuj jun lugar minti' kynajb'il xjal tuj, tu'ntzun qojlan ch'in, chi Jesús kye.

Ex nimku xjal in che ul aj kyuk'il, kyja'tzun minti' ch'in amb'il kye tu'n kywa'n ch'in. 32E je'xtzun kyjunalx tuk'ix Jesús tuj jun barc tu'n kypon tuj jun lugar minti' kynajb'il xjal tuj. 33Ex nimku xjal e ke'yin kye tej kyxi', ex el kynik' ti'j Jesús; ex nimku xjal e tzaj tuj junjun tnam e je'x qelan tu'n kypon jatum tu'n kypon Jesús, ex nej e pon xjal kywitz. 34Tejtzun tetz Jesús tuj barc o til nimku xjal otoq che pon, tzaj q'aq'an tk'u'j kyi'j, porke ik kyten ik tza'n qe ẍne'l minti' pastor kyi'j; oktzun ten Jesús q'ol nimku xnaq'tzb'il kye. 35Ex tu'nju otoq tz'ok qax, e pon laq'e' t-xnaq'tzb'en Jesús ttxlaj, ex xi kyma'n:

—Aju lugar lu minti' kynajb'il xjal tuj, ex ma tz'ok qax. 36Q'manxa kye xjal tu'n kyxi' tuj kojb'il ex kyuj aldey niqayin ate' tu'ntzun tlaq'et kywa, porke minti' kywa q'i'n, che chi.

37Ex xi ttzaq'we'n Jesús:

—Ax qeye che xel q'onte kywa.

Xi kyma'n te:

—¿Okpetzun qo xe'le laq'ol wab'j tu'n 200 denari tu'n t-xi qq'o'ne kywa? Che chi.

38Xi tma'n Jesús kye:

—¿Jte' wab'j at kyuk'ile? Kyxi'ye ke'yil te.

Tejtzun kylonte, xi kyma'n:

—Jwe' wab'j at ex kab'e kyiẍ.

39Xitzun tma'n Jesús kye tu'n t-xi kyma'n kye kykyaqil xjal tu'n kykub' qe' tuj k'lojin kyten tib'aj cha'x ch'im. 40E kub'tzun qe' xjal tuj k'lojin; at junjun k'loj te jun syentchaq kyten, ex at te sinkwentchaq kyten. 41Jawtzun ttzyu'n Jesús aqeju jwe' wab'j kyuk'ix kab'e kyiẍ, jaw tke'yin twitz kya'j, xi tq'o'n chjonte te Dios ti'j, ex e kub' tpiẍk'u'n qe wab'j, xi tq'o'n kye t-xnaq'tzb'en tu'ntzun t-xi kysipan kye xjal; ex xi t-sipan kab'e kyiẍ kyxol kykyaqil. 42E wa'ntzun kykyaqil, ex e b'aj noj. 43Ex jaw kychmo'n kab'laj chi'l nojni tu'n ttx'aqan wab'j ex tu'n ttx'aqan kyiẍ. 44Aju kyajlal xjal e wa'n, jwe' mil xinaq.

In b'et Jesús tib'aj a'

Mateo 14.22-27; Juan 6.15-21

45Ex xi tma'n naj Jesús kye t-xnaq'tzb'en tu'n kyokx tuj barc ex tu'n kyxi' nej twitz tu'n kypon tuj Betsaida jlajxi laguna, atzunte Jesús kyaj ten q'malte kye xjal tu'n kyaj kyja. 46Tejtzun tb'aj tq'olb'en tib' Jesús kyuk'il xjal, xi na'l Dios twi witz. 47Tejtzun tok qax, otoq kanun barc tmijil laguna, atzunte Jesús attoq tjunalx twi witz. 48O til Jesús otoq che sikt qe t-xnaq'tzb'en ti'j barc tu'n tb'et, porke ate kyq'iq' in maqonte kye; pontzun Jesús kyuk'il ch'ixtoq tja'wil q'ij, in b'et Jesús tib'aj a', kyja'toq tik' nej kywitz. 49Tej kylonte qe xnaq'tzb'en in b'et Jesús tib'aj a', ela tuj kynab'l qa jun kylab' jlu, ex e jaw sch'in. 50Ex kykyaqil e ke'yinte, ex tzaj kyxob'il. Ex jurat naj xi yolin Jesús kyuk'il:

—Qe' kyk'u'je, aqine, mi'n che xob'e, chi Jesús kye.

51Okxtzun Jesús kyuk'il tuj barc, ex b'i'x take' kyq'iq'; b'i'xtzun naj kynab'l, ex e lab'in ti'j. 52Tu'nju na'nxtoq tel kynik' ti'j ti t-xilen aju o tb'incha Jesús ti'j wab'j, porke kyuw tu'n tex tuj kywi'.

E b'anix qe yab' tu'n Jesús tuj Genesaret

Mateo 14.34-36

53Tejtzun kykanun jlajxi laguna, atzun e pon ttzi tx'otx' Genesaret tb'i, ex kyaj kyk'alo'n ju barc. 54Tejtzun kyetz tuj barc, jurat naj el kynik' xjal ti'j Jesús. 55E je'x naj xjal tuj tkyaqil lugar, tzaj kyi'n xjal qe yab' twitz kykoẍb'il, pon kyi'n tuk'il Jesús tej kyb'inte jatum ta'. 56Jachaqtum pon Jesús, qa tuj aldey, ex qa tuj tnam, ex qa tuj kojb'il, kub' kyq'o'n xjal qe yab' tuj b'e, ex in che kub'san twitz Jesús tu'n ttzaj tq'o'n Jesús amb'il kye yab' tu'n tok kymako'n ttxa'n t-xb'alun; kykyaqil qeju ok kymako'n ttxa'n t-xb'alun e b'anix.

Currently Selected:

Marcos 6: MAMNO

Highlight

Copy