Marcos 11
11
Tej tokx Jesús tuj tnam Jerusalén
Mateo 21.1-11; Lucas 19.28-40; Juan 12.12-19
1Tejtzun ch'ixtoq kykanun tuj tnam Jerusalén, niqayin kytxlaj qe tnam Betfagé tuk'ix Betania, otoq che pon niqayin t-xe witz Olivos tb'i, xi t-sama'n Jesús kab'e t-xnaq'tzb'en, 2ex xi tma'n kye:
—Kyxi'ye tuj aldey tokx ma chixin, oktzun kyokxe tuj aldey, knetel jun tal bur kyu'ne k'alo'n, aju na'nx tjax jun xjal chejil tib'aj; kypaju'mile ex kyi'ntze tzalu. 3Qatzun at jun xjal ma tzaj q'mante kyeye: ¿Tiqu'n in kyb'incha'ne jlu? qa chi; k'ajb'el te Qajaw, che chikuye, ex jurat k'ajetz t-sama'n.
4E je'xtzun qe xnaq'tzb'en, ex knet tal bur kyu'n k'alo'n ttzi cay niqayin ttzi jun ja, ex eltzun kypaju'n. 5Ex at junjun xjal ax wa'l qe'toq, xi kyma'n:
—¿Ti nb'aj kyeye? ¿Tiqu'n nne'l kypaju'ne tal bur? Che chi.
6Xitzun kyma'n xnaq'tzb'en kye ik tza'n otoq txi q'ma'n kye tu'n Jesús; xitzun q'o'n amb'il kye kyu'n xjal. 7Ultzun kyi'n tal bur tuk'il Jesús, ex jax kyq'o'n kyxb'alun tib'aj, jaxtzun ten Jesús tib'aj. 8Ex nimku xjal kub' kylik'un kyxb'alun tuj b'e, ex txqantl xjal el kytx'emin tq'ab' tze', kub' kyq'o'n tuj b'e. 9Ex aqeju xjal nejni twitz Jesús kyuk'ix qeju lepch qe'k ti'j in che sch'in in kyma'n:
—Qq'onx q'olb'eb'l te. Awt Dios ky'iwlante ju tzul, aju ma tzaj sama'n tu'n Qman. 10Awt Dios ky'iwlante ju kawb'il tzul, aju tkawb'il qxe'chel David. Nimanxwit tb'i Dios tuj kya'j.
11Okxtzun Jesús tuj tnam Jerusalén, ex okx tuj tja Dios; tejtzun tb'aj tke'yin tkyaqil, etztzun tu'n t-xi' tuj Betania kyuk'ix qe kab'laj t-xnaq'tzb'en, tu'nju otoq tz'ok qax.
B'i'x tzqij tqan higo tu'n tyol Jesús tu'nju minti' twitz
Mateo 21.18-19
12Tuj juntl q'ij tej kyetz tuj Betania, tzaj el tk'u'j Jesús. 13Ex xi tke'yin Jesús jun wi' tqan higo najchaq, attoq t-xaq; xi'tzun lolte qa at jun twitz tu'n tknet tu'n; ex tej tpon t-xe tqan higo, minti' jun twitz knet, noq o'kx t-xaq at, porke mya a q'ij at twitz higo. 14Xitzun tma'n Jesús te tqan higo:
—Te jumajx mlayx txi lo'ntl jun twitza tu'n jun xjal, chi Jesús.
O kyb'i qe t-xnaq'tzb'en tej tmante Jesús jlu.
E je'tz tlajo'n Jesús qe k'ayil tuj tja Dios
Mateo 21.12-17; Lucas 19.45-48; Juan 2.13-22
15E pontzun tuj Jerusalén ex okx Jesús tuj tja Dios, e je'tz tlajo'n qeju in che k'ayin ex qeju in che loq'on tuj ttxa'n pe'n tja Dios, ex jaw tpich'q'u'n kymes ch'expul twitz pwaq kyuk'ix kyq'uqb'il qeju in che k'ayintoq paloma. 16Ex minti' o tkuyi tu'n kyik' xjal twitz tja Dios qa q'i'n jun ti'xti kyu'n. 17Ex xi tq'o'n Jesús xnaq'tzb'il kye, xi tma'n:
—¿Myapetzun tz'ib'an tuj Tu'jil: We nja k'okel tb'i ja te nab'l Dios kye kykyaqil xjal, chi tuj Tu'jil? Atzun kyeye ma tz'ok kyq'o'ne te kyjul eleq', chi Jesús kye.
18Ex o kyb'i qe xnaq'tzal ti'j ley ti'j jlu, kyuk'ix qe nejenel kye pal, ex e ok ten jyol tumel tza'n tten tu'n tb'yet Jesús kyu'n, porke in che xob'toq, tu'nju in che lab'in kykyaqil xjal ti'j t-xnaq'tzb'il. 19Tejtzun tok qax etz Jesús tuj tnam.
B'i'x tzqij tqan higo
Mateo 21.20-22
20Te juntl q'ij te prim kyja' kyxi', o kyil otoq tzqij tqan higo tuk'ix tlok'. 21Tzajtzun tna'n Pedro ti otoq b'aj ti'j tqan higo, ex xi tma'n te Jesús:
—Xnaq'tzal, aju tqan higo xi' tyola ti'j, ke'yinxa ma tzqij, chi Pedro.
22Xi tma'n Jesús kye:
—Qe'k kyk'u'je ti'j Dios. 23Ex ax tok kxel nma'ne kyeye, qa at jun xjal ma q'mante teju witz lu: Tik'a tzalu ex xo'n ku'x tib'a tuj mar, qa chi xjal, kb'antel aju kxel tma'n qa minti' xjawje' tk'u'j, noq o'kx q'uql tk'u'j ti'j tu'n tb'ant aju kxel tma'n. 24Kyja'tzun kxel nma'ne kyeye, tkyaqilju kxel kyqanine ok kyna'ne Dios, qe' kyk'u'je ti'j ik tza'n otoq kyk'ame, ex ktzajeltzun q'o'n kyeye. 25Ex ok kykub' tene na'l Dios, qa at jun xjal mya b'a'n kytene tuk'il, kynajsame til, tu'ntzun ikx kyeye tu'n tkub' najsa'n kyile tu'n Kymane aju at tuj kya'j. 26[Qatzun minti' xkub' kynajsa'ne til juntl, ax ikx kyeye mlay kub' najsa'n kyile tu'n Kymane aju at tuj kya'j.]
Aju toklen Jesús
Mateo 21.23-27; Lucas 20.1-8
27E pontzun juntl maj Jesús tuj tnam Jerusalén, ex in b'ettoq Jesús tuj tja Dios. E pontzun qe nejenel kye pal tuk'il, kyuk'ix qe xnaq'tzal ti'j ley, ex kyuk'ix kytijil xjal. 28Xitzun kyqanin te:
—¿Ti toklena tu'n tb'inchanteya jlu, ex alkye saj q'onte toklena tu'n tb'inchanteya tkyaqil jlu? Che chi.
29Xi ttzaq'we'n Jesús:
—Ikx weye at jun nxjele kyeye; qa ma chin tzaj kytzaq'we'ne jakutzun txi nma'ne kyeye ti woklene tu'n nb'inchanteye tkyaqil jlu. 30¿Tu'npe Dios tzaj q'ma'n te Juan tu'n kyb'yan xjal tu'n tuj a', ex qa kyu'n xjal tzaj kyma'n? Chin kytzaq'wentze.
31Atzun kye e ok ten yolil ti'j kyxolx:
—Qa ma txi qma'n, tu'n Dios tzaj tma'n: ¿Tiqu'ntzun minti' xi kyoksla'ne? chilo qe. 32¿Ex qatzun kxel qma'n, kyu'n xjal tzaj kyma'n? che chi.
Pero tzaj kyxob'il kywitz xjal, ex kykyaqil xjal in che yolin ti'j Juan qa ax tok t-sanjel Dios. 33O'kx tzaj kytzaq'we'n:
—Minti' b'i'n qu'ne.
Tzajtzun ttzaq'we'n Jesús:
—Ikx weye, mlay txi nma'ne kyeye ti woklene tu'n nb'inchanteye tkyaqil jlu.
Currently Selected:
Marcos 11: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
