Juan 19

1Kyja'tzun tten xi q'i'n Jesús tu'n Pilato ex xi tma'n kye tu'n tb'aj asyalin. 2Atzun kye soldad b'aj kyb'incha'n jun coron ch'i'x, jax kyq'o'n tuj twi' Jesús ex ok kyq'o'n jun t-xb'alun ẍjulin ke'yin. 3E pon laq'e' twitz ex xi kyma'n te:

—In xi qq'olb'ene, aya Rey kye xjal judiy. Kukxwit tel tq'ija, che chi.

Ex ok kytz'ajan twitz.

4Etztzun juntl maj Pilato, xi tma'n kye xjal:

—K'eletz wi'ne tu'n tel kynik'e ti'j minti' jun til ma knet wu'ne.

5Etztzun Jesús tjax coron ch'i'x tuj twi' ex tok t-xb'alun ẍjulin ke'yin. Xitzun tma'n Pilato kye xjal:

—Lu ju xinaq lu.

6Tejtzun kyke'yinte qe nejenel kye pal kyuk'ix qe polisiy, jaw tq'ajq'ajel kywi':

—E tjaw twitz crus. E tjaw twitz crus, che chi.

Xitzun tma'n Pilato kye:

—Kyi'nxe, ex kyq'o'n jawe twitz crus; porke minti' jun til in knet wu'ne.

7Xitzun kytzaq'we'n xjal judiy:

—At jun qeye qley, ex ik tza'n in tma'n tuj qleye il ti'j tu'n tkyim tu'nju ma tz'ok tq'on tib' te Tk'wa'l Dios, che chi.

8Tejtzun tb'inte Pilato jlu, tzaj mastl t-xob'il. 9Okxtzun juntl maj tuja, xi tqanin te Jesús:

—¿Jatum tzajniya?

Atzunte Jesús minti' xi ttzaq'we'n.

10Xitzun tma'n Pilato te:

—¿Maj minti' in chin tzaj ttzaq'we'na? ¿Minti'petzun b'a'n tu'na at woklene tu'n tjaw nq'o'ne twitz crus, ax at woklene tu'n t-xi ntzoqpi'ne? Chi Pilato.

11Xi tma'n Jesús te:

—Noqwit mya tu'n Dios ma tzaj q'o'n toklena, minti'wtlo toklena wi'je; kyja'tzun, aju ma tzaj q'onte weye tuj tq'ab'a, mas at til, chi Jesús te.

12Tu'ntzunju ok tilil tu'n Pilato tu'n t-xi tzoqpi'n Jesús tu'n; atzun kye xjal judiy jaw tq'ajq'ajel kywi':

—Qa ma txi ttzoqpi'na jlu, mlay tz'oka te tamiw gobierni. Alkye jun xjal nno'k tq'on tib' te rey in jaw ti'n tib' ti'j gobierni, che chi xjal.

13Tejtzun tb'inte Pilato jlu, etz q'i'n Jesús tu'n, kub'tzun qe' tuj q'uqb'il te kawb'il tuj jun lugar Gabata tb'i tuj yol hebreo; atzun t-xilen ju yol lu, lugar b'inchamaj tuj tu'n ab'j. 14Atzun q'ij tu'n tb'ant kyten xjal tu'n tik'set Xjan Q'ij tuj juntl q'ij, ex chilkuq'ijlo. Xitzun tma'n Pilato kye xjal judiy:

—Lu kyreye lu.

15Atzun kye xjal judiy e jaw sch'in:

—E tkub' b'yet. E tkub' b'yet. E tjaw twitz crus, che chi.

Xitzun tma'n Pilato kye:

—¿Maj kjawil nq'o'ne kyreye twitz crus?

Xitzun kytzaq'we'n qe nejenel kye pal:

—Minti' juntl qreye, o'kxte gobierni qreye.

16Kyja'tzun tten xi tq'o'n Pilato Jesús tuj kyq'ab' tu'n tjaw q'o'n twitz crus. Tzyettzun Jesús kyu'n, ex xi kyi'n.

Jaw q'o'n Jesús twitz crus

Mateo 27.32-44; Marcos 15.21-32; Lucas 23.26-43

17Xitzun q'i'n Jesús kyu'n. Jawtzun tiqan Jesús tcrus ex xi' tuj lugar Tb'aqil Wib'aj tb'i, atzun tuj yol Hebreo, Gólgota tb'i. 18Ex atzun jaw q'o'n Jesús twitz crus kyu'n, ex at kab'etl xjal e jaw q'o'n twitz crus tuk'il, jun tuj jun ttxlaj ex jun tuj juntl ttxlaj, atzunte Jesús tuj tmijil. 19Ex kub' ttz'ib'an Pilato jun yol ex jax tq'o'n twitz crus, in tma'n kyja': Jesús aj Nazaret, Rey kye xjal judiy. 20Ex nimku xjal judiy jaw kysch'i'n ju yol lu, porke aju lugar jatum otoq jaw q'o'n Jesús twitz crus niqayintoq ta' ttxa'n tnam, ex aju yol lu tz'ib'antoq tuj yol hebreo, tuj yol griego, ex tuj yol latín. 21Atzun qe nejenel kye pal kye xjal judiy xi kyma'n te Pilato:

—Mi'n kub' ttz'ib'ana ikju: Rey kye xjal judiy; noq o'kx tz'ib'ankuya kyja': Ax o q'mante: Aqine Rey kye xjal judiy.

22Ex xi ttzaq'we'n Pilato:

—Aju ma kub' ntz'ib'ane mlay ch'expet.

23Tejtzun tjaw q'o'n Jesús twitz crus cyu'n soldad, tzaj kyi'n t-xb'alun, kyaje pa'n el kyu'n, jun te junjun soldad. Ax ikx tzaj kyi'n ju tkamiẍ, minti' slapb'il te, junx chemb'en te tkyaqil. 24Kymatzun kyxolx:

—Mi'n kub' qsb'it'un, noq o'kx e tjaw qin swert ti'j tu'ntzun tel qnik' ti'j alkye kxel q'inte.

O kyb'incha jlu tu'ntzun tjapun aju tz'ib'an tuj Tu'jil chi in tma'n: E ok ten q'il swert ti'j nxb'alune ex b'aj kysipan qe nxb'alune kyxolx, chi tuj Tu'jil. Atzun jlu kyb'incha qe soldad.

25Ex wa'ltoq ttxu' Jesús t-xe crus jatum jaw q'o'n Jesús, tuk'ix titz'in ttxu' Jesús, tuk'ix Mariy aju t-xu'jil Cleofas, tuk'ix Mariy aj Magdala. 26Tej tlonte Jesús ttxu' ex tuk'ix ju xnaq'tzb'en aju k'ujla'nxix tu'n ax wa'ltoq, xi tma'n Jesús te ttxu':

—Nan, atzun tala jlu.

27Ax ikx xi tma'n teju xnaq'tzb'en:

—Atzun ttxu'ya jlu.

Ex b'i'x xi ti'n ju xnaq'tzb'en ttxu' Jesús tu'n tten tuj tja.

Kyim Jesús

Mateo 27.45-56; Marcos 15.33-41; Lucas 23.44-49

28Tb'ajlenxitzun jlu, tma Jesús:

—In chin txqete.

O tma jlu tu'ntzun tjapun aju tz'ib'an tuj Tu'jil, porke b'a'ntoq tu'n otoq japun tkyaqil. 29Ex tkub'toq jun xar nojni tu'n vinagre; ku'xtzun kyq'o'n xjal jun esponja tuj vinagre, ok kyk'alo'n twi' jun tal tze' hisopo tb'i, ex jax kyq'o'n tuj ttzi'. 30Tejtzun t-xi ttz'ub'an Jesús ch'in vinagre, tma:

—Ma japun tkyaqil.

Kub'tzun mok'e' twi' ex kyimtzun.

Ok xayu'n ttxlaj t-xu'k Jesús tu'n lans tu'n jun soldad

31Atzun kye xjal judiy e kub'san twitz Pilato tu'n tkub' toqin kyqan qeju otoq che jaw q'o'n twitz crus ex tu'n tku'tz q'i'n kyximlal, ex atzun q'ij tu'n tb'ant kyten xjal judiy tu'n tik'set Xjan Q'ij; kyja'tzun mi'n kyaj tu'n tkyaj ten kyximlal twitz crus tuj q'ij te ojlab'l, porke aju q'ij te ojlab'l lu ma'xix toklen. 32E pontzun qe soldad, ex kub' kytoqin tqan ju tnejel; ax ikx kub' kytoqin tqan ju tkab'in, aqeju e jaw q'o'n twitz crus tuk'il Jesús. 33Tejtzun kypon ti'j Jesús, minti' kub' kytoqin tqan, porke o kyil otoq kyim.

34Ex at jun soldad ok t-xayu'n ttxlaj t-xu'k Jesús tu'n lans, ex etz naj chik' tuk'ix a'. 35Ex aju o ke'yinte jlu in xi tchik'b'a'n ax tok ti'j, ex aju tyol in xi tchik'b'a'n axix tok; porke b'a'n tu'n aju yol in tma'n ax tok, tu'ntzun ikx kyeye tu'n t-xi kyoksla'ne. 36Ex tkyaqil jlu o b'aj ti'j Jesús tu'ntzun tjapun aju tz'ib'an tuj Tu'jil chi in tma'n: Mlay kub' toqin tb'aqil, chi tuj Tu'jil. 37Ax ikx in tma'ntl tuj Tu'jil: K'okel kyke'yin aju xjal b'aj kyxayu'n.

Ku'x maqu'n Jesús

Mateo 27.57-61; Marcos 15.42-47; Lucas 23.50-56

38Tb'ajlenxitzun tkyaqil jlu, at jun xjal José tb'i, aj Arimatea, t-xnaq'tzb'en Jesús jlu, ex minti' xi tma'n kye xjal judiy qa t-xnaq'tzb'en Jesús te tu'nju in xob' kywitz; xi'tzun José kub'sal twitz Pilato tu'n ttzaj q'o'n amb'il te tu'n tku'tz ti'n t-ximlal Jesús; ex tzajtzun q'o'n amb'il te tu'n Pilato. Ultzun José ex xi ti'n t-ximlal Jesús. 39Ax ikx te Nicodemo ul, aju ul aj tuk'il Jesús te qonik'an, ul ti'n tq'olil tze' mirra tb'i t-sem tib' tuk'il tq'olil tze' alóes tb'i, atlo jun syent libr. 40Tzajtzun kyi'n t-ximlal Jesús, ex okx kyb'alq'i'n tuj xb'alun tuk'ix tk'ok'jal t-sem tib', ik tza'nx kymod xjal judiy ok in ku'x maqut jun xjal. 41Ex tuj ju lugar jatum jaw q'o'n Jesús twitz crus at jun tqan awal, ex at jun pantyón ak'aj kyxol tqan awal, na'nxtoq tokx q'o'n jun kyimni tuj. 42Atzun okx kyq'o'n t-ximlal Jesús tuj pantyón lu tu'n tlaj matoq in b'ant kyten xjal judiy tu'n tik'set Xjan Q'ij, porke aju pantyón lu niqayintoq ta'.

Currently Selected:

Juan 19: MAMNO

Highlight

Copy