Génesis 45

Xi tma'n José kye ttzik qa ax kyerman kyib'

1Minti' o tipatl José tu'n mi'n tjaw oq' kywitz kykyaqil qe ajb'el te. Tu'ntzun jlu jaw tq'ajq'ajel twi' ex tma: Kyexe kykyaqile tzalu, chi José. Kyja'tzun, mi jun ajb'el kyaj ten tuk'il tej t-xi tma'n kye ttzik qa kyerman kyib'. 2Oktzun ten José oq'el kyuwxix, o kyb'i kykyaqil aj Egipto, ex pon tqanil jlu max tuj tja Faraón. 3Xitzun tma'n José kye terman:

—Aqine José. ¿Itz'xpe nmane? Chi José.

Atzun kye terman minti' o b'ant ttzaq'wenjtz kyu'n, tu'nju b'i'x e sek'paj twitz José. 4Xitzun tma'n José kye terman:

—Che laq'etze ntxlaje, chi José.

Atzun kye e je'x laq'e', ex xi tma'n kye:

—Aqine José aju kyermaniye, aju tzaj kyk'ayine tuj Egipto. 5Atzun ja'lo, mi'n che b'isune ex mi'n tzaj kyq'oje kyxole ti'j ju ntzajlen kyk'ayine tzalu, tu'nju ate Dios tzaj samante weye tu'n wul neje kywitze tu'n kyklet xjal. 6Ma b'ant-xi kab' ab'q'i ttzajlen we'yaj twitz tx'otx', ex tuj jwe'tl ab'q'i ja'lo mi a'l jun xjal k'awal mi kchmol twitz awal. 7Ate Dios tzaj samante weye tu'n wul neje kywitze tu'n tkyaj klet kyiyjile twitz tx'otx', ex tu'n kykolpete tuj jun tumel ma'xix toklen. 8Tu'ntzun jlu, mya kyu'ne in tzaj kysama'ne tzalu, noq o'kx tu'n te Dios, ex ax te o tz'ok q'onte weye te onil te Faraón, te nejenel tuj tja ex te gobernador tib'aj tkyaqil tx'otx' Egipto. 9Kyxi naje tuk'il nmane ex kymanxe te kyja': Chitzun José aju tky'ajala: Ate Dios o tz'ok q'onte weye te gobernador tib'aj tkyaqil tx'otx' Egipto. Tzaja wuk'ile jurat naj. 10Atzun knajala tuj lugar Gosén, kyuk'ix qe tk'wa'la, qe tal tchmana, kykyaqil qe taluna ex tkyaqilju at teya. Kyja'tzun, niqayin ntxlaje ktela. 11Atzun kxel nq'o'ne twaya tu'nju atx jwe' ab'q'i we'yaj, tu'ntzun mi'n tkyima tu'n meb'yil, aya ex qeju ate' tuj tjaya ex tkyaqilju at teya, che chikuye te nmane. 12Lu witz'ine Benjamín, ax ikx kyeye che okele testiw ti'j, qa aku qine in chin yolin kyuk'ile. 13Kytx'olb'anxe te nmane ti'j tkyaqil woklene tok tzalu tuj Egipto, ex ti'j tkyaqilju ma kyile tzalu. Kyxi naje q'ilte nmane, chi José xi tma'n kye.

14Tzajtzun tchle'n José aju titz'in Benjamín tb'i, ex ok ten oq'el. Ax ikx te Benjamín ok ten oq'el chle'ntoq José tu'n. 15El ttz'ub'an José kywitz kykyaqil qe terman, ex ok ten oq'el tej kytzaj tchle'n. Te tib'ajxi jlu, e ok ten qe terman yolil tuk'il.

16O pon tqanil lu tuk'il Faraón tuj tja, chi kyja': Ma che ul qe terman José, ex o jaw tzalaj Faraón kyuk'ix qe ajb'el te. 17Xitzun tma'n Faraón te José kyja':

—Q'manxa kye termaniya tu'n tok kyq'o'n tiqatz kychej tu'n kyaj tuj Canaán, 18ex e ttzaj kyi'n kyman kyuk'ix qe kyxu'jil ex kyk'wa'l, ex e kyul wuk'ile. Kxel nq'o'ne kye aju tb'anil tx'otx' tzalu tuj Egipto, ex che wa'l ti'j tb'anil wab'j ktzajel tuj tx'otx' lu. 19Q'manxa kye tu'n kyxi kyi'n carwaj tzalu tuj Egipto tu'n ttzaj kyi'n kyxu'jil ex qe kyk'wa'l, tuk'ix kymane, ex e kytzaj tzalu. 20Mi'n che ok we' ti'j aju at kye ma chixin, porke k'okel te kye aju q'inumab'l at tzalu tuj Egipto, chi Faraón.

21B'anttzun kyu'n qe tky'ajal Israel ikju. E je'x tq'o'n José carwaj kye ik tza'nx otoq tma Faraón, ex xi tq'o'n kywa tuj kyb'e. 22Ax ikx xi tq'o'n José jun paq t-xb'alun teyle junjun; atzunte Benjamín xi tq'o'n ox syent saq pwaq te, ex jwe' paq t-xb'alun. 23Ex xi t-sama'n José laj bur tjaq' iqtz tb'anilxix attoq tuj Egipto. Ex lajtl bur xi' tjaq' iqtz triw tuk'ix wab'j ex chib'j, tu'n tb'aj tu'n tman tuj tb'e ok ttzaj. 24B'aj tq'olb'en tib' José kyuk'il qe terman ex xi tma'n kye kyja': Mi'n che q'ojle tuj b'e, chi José.

Kub'tzun b'e kyu'n. 25E ajtztzun tuj Egipto, ex e pon tuj Canaán jatum najltoq Jacob aju kyman. 26Xitzun kytx'olb'a'n te kyman kyja': Itz'x te José, ex a in kawin tib'aj tkyaqil tx'otx' Egipto, che chi. B'i'x naj tnab'l Jacob tu'n jlu, ex minti' xi tniman. 27Tej tb'aj kytx'olb'a'n tkyaqilju otoq tma José kye, ex tej tlonte Israel qe carwaj otoq che tzaj t-sama'n José te q'ib'l te, jaw tzalaj nim, 28ex tma kyja': Ax tok itz'x José aju nky'ajale. Ma chinxe tuk'il, ex ok wila'ye na'nxtoq nkyime.

Currently Selected:

Génesis 45: MAMNO

Highlight

Copy