Génesis 44

Aju tk'ab'l José

1Te tib'ajxi jlu, xi tma'n José te tmayordom: Nojsan ku'xa kysak qe xinaq lu tu'n triw, noq nik'pun jaku txi kyi'n, q'onku'xa tpwaq teyle te junjun ttzi t-sak, 2ex q'onku'xa aju nk'ab'le saq pwaq ttx'otx'il ttzi t-sak ch'i'p, tuk'ix aju pwaq xkyaj tchjo'n twi triw, chi José. B'anttzun tu'n mayordom ik tza'n xi tma'n José te.

3Tej ttzaj t-xe kya'j, e b'aj kawin qe xinaq lu ex e je'tz kyuk'ix qe kybur. 4Na'nxtoq kyetz laq'e' ti'j tnam, xi tma'n José te tmayordom: Lpexa kyi'j qe xjal lu, ex ok tkub' kyi'j tu'na, q'manxa kye kyja': ¿Tiqu'n ma kyb'inchaye mya b'a'n te t-xel b'a'n ma b'inchanjtz kyi'je? ¿Tiqu'n ma tzaj kyelq'a'ne aju tk'ab'l npatrone? 5¿Myapetzun a jlu in ajb'en te tu'n tk'an ex tu'n tq'ijin? Mya b'a'n ma kyb'inchaye, chikuya kye, chi José te.

6Tejtzun tkub' kyi'j tu'n mayordom, xi tma'n kye ax qe yol lu. 7Atzun kye tzaj kytzaq'we'n:

—Tat, ¿Tiqu'n in tzaj tma'na qeye ikju? Aqo'ye tmajena mlayx qb'inchaye jun ti'xti ik tza'n jlu. 8Aju pwaq jatz knet qu'ne kyuj qsake o tz'ajtz qi'ne juntl maj tuk'ila tej qtzaje tuj tx'otx' Canaán. ¿Tza'ntzun tten tu'n tetz qelq'a'ne saq pwaq ex qa q'an pwaq tuj tja tpatrona? 9Aqo'ye ajb'el teya; b'a'n tu'n tkyim alkye ma jatz knet k'ab'l ttzi t-sak; atzun qeye, jaku qo oke te tmajena, che chi.

10Xitzun tma'n mayordom kye:

—B'a'n, e tb'ant ik tza'nx ma kymaye. Aju ma tz'el knet k'ab'l ti'j k'okel te nmajene; atzun txqantl minti' kyil, chi mayordom.

11Teylex te junjun el ti'n naj tiqatz tbur, kub' tq'o'n twitz tx'otx' ex el tpju'n ttzi t-sak. 12Oktzun ten mayordom jyolte, tzaj qe' ti'j tnejel k'walb'aj, ul b'aj ti'j ch'i'p, ex knet k'ab'l ttzi t-sak Benjamín tu'n. 13Eltzun kysb'it'un kyxb'alun kyi'j tu'n b'is, teyle te junjun ok tq'o'n naj tiqatz tbur, ex e aj meltz'aj tu'n kypon juntl maj tuj tnam. 14Tejtzun tpon Judá kyuk'ix qe terman tja José, axtoq ta' tuj tja; e kub' ẍmeje' twitz ex pon takl tib'aj kywitz max twitz tx'otx'. 15Xitzun tma'n José kye kyja':

—¿Ti ma kyb'inchaye? ¿Minti'petzun b'a'n kyu'ne jun xinaq ik tza'n qine b'a'n q'ijin? Chi José.

16Xitzun tma'n Judá:

—¿Alkyetzun qyole ex qa qkolb'il qib'e twitza, tat? Ma tz'el qile tuj q'ancha'l twitz Dios. Ja'lo, tmajena qo'ye tuk'ix aju ma tz'el knet tk'ab'la ti'j, chi Judá.

17Xitzun tma'n José kyja':

—Mlay nb'inchaye ikju. O'kx aju ma tz'el knet nk'ab'le ti'j, atzunju kyjel ten te nmajene; atzun kyeye b'a'n tu'n kyaj meltz'aje tuj txub'txaj tja kymane, chi José.

In kub'san Judá twitz José ti'j Benjamín

18Pon laq'e' Judá twitz José ex xi tma'n te kyja': Tat, in chin kub'sane twitza tu'n tkub' tb'i'na nyole ex tu'n ttzaj tq'o'na twi'ya ti'j, aqine tmajena. Mi'n tzaj tq'oja wi'je, tu'nju aya ik ttena ik tza'n ax Faraón. 19Tzaj tqanina qeye kyja':

—¿Atpe kymane ex qa juntl kyermaniye? Chiya.

20Xitzun qtzaq'we'ne teya kyja':

—At qmane, ma tijin wen, ex at jun qitz'ine ku'xunx ta', ul itz'j tuj ttijil qmane. O'kx te o kyaj ten tej tkyim jun ttzik aju tal ttxu', ex k'ujla'nxix tu'n tman, qo chiye.

21Tzajtzun tma'na qeye, aqo'ye tmajena:

—Kyi'ntze tu'n nlonteye twitz, chiya.

22Xitzun qma'ne teya kyja':

—Mlayx kyaj tkolin ku'xun tman. Qa ma kyaj tkolin, jakulo kyim tman tu'n b'is, qo chiye.

23Tzaj tma'ntla qeye:

—Qa mi'n ma tzaj kyuk'ine kyitz'ine, mlay che k'mete wu'ne, chiya.

24Tejtzun qpone tuk'il qmane, xi qtx'olb'a'ne te tkyaqilju o tmaya qeye. 25Tzajtzun tma'n qmane qeye kyja':

—Kyaj meltz'aje laq'olte ch'intl triw, chi qmane.

26Xitzun qma'ne te:

—Mlayx qo ku'xe. Jaku qo ku'xe o'kx qa ma txi' qitz'ine quk'ile. Qa mi'n ma txi' qitz'ine quk'ile, mlayx qo k'mete tu'n xinaq ma chixin, qo chiye.

27Tzajtzun tma'n nmane, aju tmajena:

—B'a'n kyu'ne, o'kx kab'e nky'ajale e tzaj ti'j nxu'jile. 28O tz'el q'i'n jun kye ntxlaje. Atxixtzun na'nx twile twitz, atzun in kub' nximane ti'j ax tok jun txkuplo o kub' b'yonte te. 29Qa ma tz'el kyi'ne juntl lu ntxlaje, ex qa at jun mya b'a'n ma tzaj ti'j, kyu'ne oklo chin kymele tu'n b'is, porke ma chin tijine, chi nmane.

30Kyja'tzun naq'lo'kxix nmane ti'j q'a lu; qa mya tuk'ix q'a uk'in qu'ne ok qpon meltz'aje tuk'il, 31kymel nmane ok ttil qa mya tuk'ix q'a uk'in qu'ne; kyja'tzun at qile twitz qmane qa ma kyim tu'n b'is, porke ma tijin wen. 32Tuj nkwente tzaj q'a lu tu'nju xi nma'ne te nmane kyja': Qa mi'n ma tzul meltz'aj ku'xun wu'ne, atzun qine at wile twitza te jumajx, nchiye te. 33Tu'ntzun jlu in chin kub'sane twitza tu'n nkyaje te tmajena te t-xel ku'xun. Tzoqpinxtzuna tu'n taj meltz'aj kyuk'il qe ttzik. 34¿Tza'n tten tu'n waj meltz'aje tuk'il nmane qa mya uk'in ku'xun wu'ne? Mlay chin aje tu'ntzun mi'n tik' nwitze ti'j k'ixk'oj ktzajel ti'j nmane, chi Judá.

Currently Selected:

Génesis 44: MAMNO

Highlight

Copy