Génesis 42

E ku'x qe ttzik José tuj Egipto

1Tejtzun tb'inte Jacob attoq triw tuj Egipto, xi tma'n kye tky'ajal: ¿Ti in b'ant kyu'ne tzalu, noq nno'k kyke'yine tuj kywitze? 2Ma nb'iye at triw tuj Egipto. Kyku'xe tuj, ex kylaq'ontze triw te qwa, tu'n qanq'in ex tu'n mi'n qkyim, chi Jacob.

3E ku'xtzun laj ttzik José laq'ol triw tuj Egipto, 4atzunte Benjamín aju titz'in José, minti' xi tzoqpi'n tu'n Jacob tu'n t-xi' kyuk'il ttzik, tu'nju o ximan Jacob ti'j, mya yajku tzaj jun mya b'a'n ti'j tuj b'e. 5Xi kyuk'in kyib' qe tky'ajal Israel kyuk'il txqantl xjal, aqeju xi'ynitoq laq'ol triw tuj Egipto, tu'nju attoq we'yaj tuj tkyaqil tx'otx' Canaán.

6Atoq José tok te gobernador tuj tx'otx' Egipto, ex ax in k'ayintoq triw kye xjal in che tzaj kyuj kykyaqil tnam. Tej kypon qe ttzik, e kub' ẍmeje' twitz, ex pon takl tib'aj kywitz twitz tx'otx'. 7Tej tke'yinte José qe ttzik el tnik' kyi'j, ex o tb'incha ik tza'n minti' ojtzqi'ntoq kywitz tu'n. Kyuwxix o yolin kye ex xi tqanin kye kyja':

—¿Jatum ẍe tzaje? Chi José.

Xitzun kytzaq'we'n:

—Xqo tzaje tuj tx'otx' Canaán laq'olte triw, che chi.

8El tnik' José kyi'j qe ttzik; atzun kye, minti' el kynik' ti'j. 9Ultzun ti'j tk'u'j José qe twitzik' otoq che ok kyi'j, ex xi tma'n kye kyja':

—At kyeye nnik' tuj kyk'u'je ma che ule tzalu. Noq ma che tzaje ke'yilte jatum b'a'n tu'n kyoktze q'ojlel ti'j tnam lu, chi José.

10Xitzun kyma'n te kyja':

—Mi'n, tat. Aqo'ye ajb'el teya. Laq'ol triw ma qo ule tzalu. 11Qkyaqile junx qmane, ex b'a'n xjal qo'ye. B'ajx qo ke'yine jatum b'a'n tu'n qokxe q'ojlel ti'j jun tnam, che chi.

12Xi tma'n José kye:

—Noq tten kyu'ne. Ma che tzaje ke'yilte jatum b'a'n tu'n kyoktze q'ojlel ti'j tnam lu, chi José.

13Xitzun kyma'n te kyja':

—Ajb'el qo'ye teya, kab'laj qb'ete qerman qib'e ex junx qmane. Atzun najl qo'ye tuj tx'otx' Canaán. Aju qitz'ine mas ch'in o kyaj ten tuk'il qmane; atzun juntl noq o kub' naj, che chi qe terman José.

14Xitzun tma'ntl José kye kyja':

—Ik tza'n ma txi nma'ne, noq ke'yil ti'j tnam ma che ule. 15Atzun k'elel nnik'e kyi'je: Kxel nma'ne jun yol ax tok kyeye twitz Faraón, mlay che exe tzalu qa na'nxtoq tul kyi'ne kyitz'ine. 16E taj jun kyeye q'ilte kyitz'ine, atzun qe txqantl e kykyaj ten tuj pres. Kyja'tzun k'elel nik' kyi'je qa ax tok aju ma kymaye; qatzun mi'n, at nnik' tuj kyk'u'je, chi José.

17E okx tq'o'n José ox q'ij tuj pres. 18Tuj toxin q'ij xi tma'n kye kyja': In chin xob'e twitz Dios, kyja'tzun kyb'inchame jlu ex che anq'ile: 19Qa ax tok b'a'n xjal qeye, e tkyaj ten jun kyeye tuj pres; atzun txqantl e kyaj, ex e taj kyi'n triw te kywa qeju ate' tuj kyjaye tu'nju at we'yaj ma chixin. 20Kyi'ntz naje aju kyitz'ine tu'n tel nnik'e qa ax tok kyyole, ex mlaytzun che kyime, chi José.

Atzun kye, kyb'incha ikju. 21In kyma'ntoq kyxolx kyja':

—Ax tok mya b'a'n o qb'incha ti'j qitz'in. Minti' xi qb'i'n tyol tej tkub'san qwitz maske o qil yajb'il te ex tb'is. Tu'ntzun jlu ma tzaj mya b'a'n lu qi'j ja'lo, che chi.

22Xitzun tma'n Rubén kyja':

—¿Myapetzun o txi nma'ne kyeye kyja': Mi'n kyb'inchaye mya b'a'n ti'j q'a, nchiye? Atzun kyeye minti' xi kynimane nyole. Lu ja'lo in xi qchjo'n tu'n tlaj tkamik, chi Rubén.

23Atzun kye minti'toq b'a'n kyu'n qa nne'ltoq tnik' José ti'j kyyol, tu'nju ajb'en jun xjal pjulte yol kyxol. 24Eltzun tpa'n tib' José kyi'j ex ok ten oq'el. Te tib'ajxi ul meltz'aj jatum ate'toq, ok ten yolil kyuk'il, etz ti'n Simeón kyxol, ex kywitzx qe, b'aj tk'alo'n. 25Xitzun tma'n José kye majen tu'n kyku'x nojsa'n kysak tu'n triw ex tu'n taj q'o'n tpwaq teyle te junjun ttzi t-sak, tuk'ix kywa tu'n tajb'en tuj kyb'e tu'n t-xi q'o'n kye. Iktzun b'ant kyi'j. 26Oktzun kyq'o'n kyiqatz kybur ex e ajtz meltz'aj.

27Tej kypon tuj lugar jatum tu'n tex aq'b'il kyu'n, el tpju'n jun ttzi t-sak tu'n tjatz ti'n ch'in triw te twa tbur, ex o til tpwaq tku'xtoq ttzi t-sak. 28Xitzun tma'n kye terman: Ma tz'ajtz q'o'n npwaqe, lu tku'x ttzi nsake. Kykyaqiltzun tzaj nim kyxob'il, in che lu'luntoq wen tu'n kyxob'il ex in kyma'ntoq kyxolx: ¿Titzun ma tb'incha Dios qi'j ja'lo? Che chi.

29Tejtzun kypon tuk'il Jacob aju kyman tuj tx'otx' Canaán, xi kytx'olb'a'n te tkyaqilju otoq b'aj kyi'j, che chi kyja':

30—Aju xinaq in kawin tuj tx'otx' ma chixin o yolin kyuwxix quk'ile ex o qo ok q'o'ne tu'n qa noq ke'yilte jatum b'a'n tu'n qokxe q'ojlel ti'j ttx'otx'. 31Atzun qeye xi qma'ne te kyja': B'a'n xjal qo'ye. B'ajx qo ke'yine jatum b'a'n tu'n qokxe q'ojlel ti'j jun tx'otx'. 32Kab'laj qb'ete qerman qib'e ex junx qmane. Jun o kub' naj, ex aju mas ch'in o kyaj ten tuk'il qmane max tuj tx'otx' Canaán, qo chiye. 33Atzunte xinaq, aju kawil tuj tx'otx' ma chixin, tzaj tma'n qeye kyja': Atzun k'elel nnik'e kyi'je qa ax tok kyyole: Kyq'onkje jun kyermaniye wuk'ile, kyi'nxe kywa qeju ate' tuj kyjaye tu'nju at we'yaj ma chixin, ex kyxi'ye. 34Kyi'ntze kyitz'ine tu'ntzun tel nnik'e kyi'je qa b'a'n xjal ex mya ke'yil ti'j tx'otx' qeye. Maxitzun k'elex ntzoqpi'ne juntl kyermaniye. Ax ikx kyeye, jakutzun txi q'ot amb'il kyeye tu'n kyb'ete noq jatumchaq tuj tx'otx' lu, chi xinaq qeye, che chi.

35Tejtzun tetz kyqo'n triw tuj kysak, lu tch'u'ẍil tpwaq teyle te junjun tku'xtoq ttzi t-sak. Tej kyke'yinte qe tch'u'ẍil kypwaq, tzaj t-xob'il kyi'j, ax ikx tzaj t-xob'il kyman. 36Xitzun tma'n Jacob kye kyja':

—Che elel b'aj kyi'ne qe nk'wa'le; José mi a'l qxol, ax ikx Simeón. Kyajtle tu'n t-xi kyi'ne Benjamín. Tkyaqil jlu mya b'a'n te weye, chi Jacob.

37Xi tma'n Rubén te tman kyja':

—B'ix kub' tb'yo'na kab'e nky'ajale qa mi'n ma tz'ajtz wi'ne Benjamín tuk'ila. Q'ontza tuj nkwente ex k'ajetz wi'ntle tuk'ila juntl maj, chi Rubén.

38Xi tma'n Jacob te:

—Mlay ku'x nky'ajale kyuk'ile. O kyim José ex o'kx te Benjamín atx. Qa at jun ti'xti ma tk'ulb'a tuj kyb'eye, kyu'ne chin kymele tu'n b'is, porke ma chin tijine.

Currently Selected:

Génesis 42: MAMNO

Highlight

Copy