Génesis 40

El tnik' José kyi'j kab'e witzik'

1Te tib'ajxi jlu, aju q'ol tk'a rey ex aju b'inchal pan e kub' tz'aq tuj jun kyil twitz kypatrón, aju rey te Egipto. 2Tzaj tq'oj Faraón kyi'j kab'e tmajen lu, ti'j nejenel kye q'ol tk'a ex ti'j nejenel kye b'inchal pan, 3ex e okx tpresin max tja nejenel kye soldad kwentil te, tuj pres jatum tokxtoq José. 4Atzunte nejenel kye soldad kwentil te Faraón e je'x tq'o'n qe kab'e xjal lu tuj tkwent José, ex nim q'ij e ten tuj pres.

5At jun aq'b'il kykab'il pres lu, aju q'ol tk'a rey ex aju b'inchal pan, ok jun kywitzik' ex attoq t-xilen teyle te junjun witzik'. 6Tejtzun tpon José ke'yilte kye te prim, o til in che b'isuntoq. 7Xitzun tqanin José kye qeju ajb'el te Faraón, aqeju ate'toq tuk'il tuj pres max tuj tja tpatrón:

—¿Tiqu'n b'is ta' kywitze ja'lo? Chi José.

8Xitzun kytzaq'we'n te kyja':

—At jun qwitzik'e sok may', ex mi a'l jun chik'b'alte qeye ti t-xilen, che chi.

Xitzun tma'n José kye kyja':

—¿Myapetzun a Dios in tzaj chik'b'ante kyxilen witzik'? Kytx'olb'antze weye tza'n tten kywitzik'e sok, chi José.

9Atzunte nejenel kye q'ol tk'a rey xi ttx'olb'a'n twitzik' te José, ex xi tma'n te kyja':

—Tuj nwitzik'e xwile jun wi' tqan uva tkub'toq nwitze, 10ex attoq ox tq'ab'. Jurat ẍe tzaj t-xul, ẍe japun t-xmakal, ex sul kyq'ij twitz. 11Q'i'ntoq wu'ne tuj nq'ab'e aju tk'ab'l Faraón. Ẍe tzajtzun wi'ne qe uva, xku'x nyatz'o'ne kya'l tuj tk'ab'l Faraón ex xi nq'o'ne tuj tq'ab', chi nejenel kye q'ol tk'a rey.

12Xitzun tma'n José te kyja':

—Aju t-xilen twitzik'a, atzun jlu: Qe ox tq'ab' uva, atzun in kyma'n kyi'j ox q'ij. 13Ok kyb'aj ox q'ij, k'elex q'i'na tu'n Faraón tuj pres, k'okel q'o'na juntl maj ti'j taq'una ex kxel tq'o'na tk'a ik tza'n nej. 14Oktzun texa tzalu, b'ix chin tzaj tna'na, b'ix tzaj q'aq'an tk'u'ja wi'je, b'ix yolina wi'je twitz Faraón ex b'ix chin ex ti'na tzalu, 15tu'nju noq o chin tzaj elq'a'ne tuj kytx'otx' aj Hebreo, ax ikx noqx gan in oktz q'o'ne tuj pres, porke minti' jun il o b'ant wu'ne tzalu, chi José.

16Tej tb'inte nejenel kye b'inchal pan tb'aniltoq tb'inx t-xilen witzik' otoq txi tchik'b'a'n José, xi tma'n te José kyja':

—Ax ikx weye sok nwitzky'a'ne, xwile tjaxtoq ox chi'l tuj nwi'ye ex tku'xtoq saq pan kyuj. 17Aju chi'l tjaxtoq tib'ajxi, nojnitoq tu'n tkyaqil wiq pan in xi twa'n Faraón; atzun qe chyu'j in che wa'ntoq ti'j pan tku'x tuj chi'l tjaxtoq tuj nwi'ye, chi nejenel kye b'inchal pan.

18Xitzun ttzaq'we'n José te kyja':

—Aju t-xilen teya twitzik', atzun jlu: Qe ox chi'l, atzun in kyma'n kyi'j ox q'ij. 19Ok kyb'aj ox q'ij, k'elel q'i'n twi'ya tu'n Faraón, kjawil yob'ina ti'j jun tze' ex kxel chyo'n tchib'jala kyu'n chyu'j.

20Tujtzun toxin q'ij japun tab'q'iyil Faraón, ex kub' tik'sa'n jun ninq'ij junx kyuk'il qe aj sanjelal ate'toq ttxlaj. Kywitz kykyaqil xjal otoq che tzaj txko'n tuj ik'sab'l q'ij, xi tma'n tu'n tetz q'i'n tuj pres aju nejenel kye q'ol tk'a, tuk'ix nejenel kye b'inchal pan. 21Xi tq'o'n Faraón juntl maj taq'un nejenel kye q'ol tk'a, ex ok ten q'ol tk'a Faraón ik tza'nx nej; 22atzunte nejenel kye b'inchal pan, jaw tyob'an ik tza'nx otoq txi tchik'b'a'n José. 23Minti' tzaj na'n José tu'n nejenel kye q'ol k'ab'j, noq o'kx ik' tna'njtz tu'n.

Currently Selected:

Génesis 40: MAMNO

Highlight

Copy