Génesis 31

Kub' t-ximan Jacob tu'n tel tpa'n tib' ti'j Labán

1O tb'i Jacob in che yolintoq tky'ajal Labán ti'j kyja': O tz'el ti'n Jacob tkyaqilju tetoq qman ex ma tz'ok q'inun ti'j ju tetoq qman, che chi. 2Ax ikx el tnik' Jacob ti'j twitz Labán minti'xix in tzalaj ti'j ik tza'n nej. 3Tzajtzun tma'n Qman te Jacob: Taja max tuj tx'otx' jatum najl tmana, jatum ate' qe xjal at t-xilena kyuk'il, ex chin tele tuk'ila, chi Qman.

4Xi txokb'aj Raquel ex Lea tu'n Jacob, tu'n kyul tuj kojb'il jatum ta'toq Jacob kyuk'il qe t-ẍne'l, 5ex xi tma'n kye kyja': Ma tz'el nnik'e ti'j, minti'xix in tzalaj kymane wi'je ik tza'n nej; atzunte Dios, aju Tdios nmane, kukx at wuk'ile. 6B'a'n kyu'ne, o chin aq'nane tuk'il kymane tu'n tkyaqil wipune, 7atzunte kymane, o chin kub' t-sb'u'n, ex laj maj o ch'expaj twi nk'u'je tu'n, ex minti' xi tq'o'n Dios amb'il te tu'n tb'inchante mya b'a'n wi'je. 8Qa in tzaj tma'ntoq kyja': Kchjetel twi tk'u'ja wu'ne kyu'n qe alumaj pint kyi'j qa chi, oktzun tkub' kyal alumaj, kub' kyal pint kyi'j; ex qa in tzaj tma'ntoq kyja': Kchjetel twi tk'u'ja wu'ne kyu'n qe alumaj at tb'eyil kytzmal, qa chi, oktzun tkub' kyal, kykyaqil kub' kyal at tb'eyil kytzmal. 9Kyja'tzun e je'l ti'n Dios kykyaqil qe talun kymane, ex e tzaj tq'o'n weye.

10At jun q'ij, tej tpon kysaqch alumaj, ok jun nwitzik'e, ex o wile qe ttxu chip in che saqchantoq kyu'n tman chip at tb'eyil kytzmal ex qe pint kyi'j. 11Tzaj tma'n t-anjel Dios weye tuj witzik':

—Jacob, chi anjel.

—Lu qine lu, nchiye xi ntzaq'we'ne.

12Tzaj tma'n weye:

—Ke'yinxa ex ok tila'ya, kykyaqil qe tman chip at tb'eyil kytzmal ex pint kyi'j in che saqchan qe ttxu chip kyu'n, porke ma tz'ok nq'o'ne kwent ti'j tkyaqilju o tb'incha Labán ti'ja. 13Aqine aju Dios kub' tyek'un tib' twitza tuj Betel, jatum kub' tqo'na aseyt tib'aj ab'j ex tzaj ttziyana jun tyola weye. Ja'lo, we'ktza, texa tzalu ex taja tuj tx'otx' jatum itz'ja, chi Dios.

14Xi ttzaq'we'n Raquel ex Lea kyja': ¿Atpetzun qoklene ex qa qetzb'ile tuj tja qmane? 15¿Myapetzun ik tza'n stranjer xjal qo'ye tu'n? O qo etz k'ayine tu'n, ax ikx o txi tk'a'chin tk'u'j tu'n chojb'il qeye kyaj tq'o'na tej tmoje'ya quk'ile. 16Ax tok, tkyaqil q'inumab'l o tz'el ti'n Dios te qmane, qeye jlu ex kye qale. Tu'ntzun jlu b'inchama tkyaqilju ma tzaj tma'n Dios teya, che chi.

Ajtz oq Jacob tuj Padan-aram

17E jax tq'o'n Jacob qe tk'wa'l ex qe t-xu'jil kyib'aj chej camey, 18tzaj ti'n tkyaqilju attoq te, kub' b'e tu'n kyuk'ix kykyaqil qe alumaj, aqeju otoq che tkamb'a tu'n taq'unb'en tuj Padan-aram, ex ajtz tu'n tul juntl maj tuj Canaán jatum najltoq Isaac aju tman. 19Atzunte Labán otoq txi' matzol ttzmal t-ẍne'l. Ik' telq'a'n Raquel qe sant ate'toq tuj tja tman. 20Kub' sb'u'n Labán aju aj Arameo tu'n Jacob, tu'nju minti' xi tma'n qa tu'n tetz. 21Etz oq Jacob tuk'ix tkyaqilju attoq te. Jurat naj ik'tz jlajtzi nima Éufrates ex tzaj b'et tu'n tul kywi' qe witz tuj Galaad.

Tzaj lpe' Labán ti'j Jacob tu'n tul kanun ti'j

22Tujxi toxin q'ij, tb'i Labán otoq tz'etz oq Jacob. 23Qe xjal attoq kyxilen tuk'il Labán e tzaj ti'n te tuk'il tu'n tul kanun ti'j Jacob, ex tujxi twuqin q'ij tb'e ul knet tu'n kywi' qe witz tuj Galaad. 24Kub' tyek'un tib' Dios twitz Labán aju aj Arameo tuj witzik' te qonik'an, ex tzaj tma'n te kyja': Ten tkwenta ti'ja. Mi'n txi yolina te Jacob tuj tx'u'jb'il, chi Dios. 25Atzun ul knet Jacob tu'n Labán kywi' qe witz tuj Galaad, jatum otoq kub' tq'o'n Jacob tja, xb'alun ja. Ax kub' tq'o'n te Labán tja, kyuk'ix qe xjal at t-xilen kyuk'il. 26Xitzun tma'n Labán te Jacob kyja':

—¿Ti ma tb'inchaya? ¿Tiqu'n ma chin kub' t-sb'u'na? Ma che tzaj ti'na qe nme'jele mer ik tza'n qe xjal in che tzyet tuj q'oj ex in che'x q'i'n pres. 27¿Tiqu'n ma chin kub' t-sb'u'na, ex ma tz'etza tuj ewaj? ¿Tiqu'n mi'n ma tzaj tma'na weye tu'n tb'aj nq'olb'e'ne tuk'il tzalajb'il, tuk'il b'itz ex tuk'il tq'ajq'ajel tanpor ex arpa? 28Minti' ma tzaj tq'o'na amb'il tu'n tel ntz'ub'ane kywitz qe nme'jele ex qe tal nchmane. Ma tb'inchaya jlu mer ik tza'n jun xjal minti' tnab'l. 29At wipumale tu'n nb'inchanteye jun mya b'a'n kyi'je; atzunte Tdios tmana saj tma'n weye qonik'an may' kyja': Ten tkwenta ti'ja. Mi'n txi yolina te Jacob tuj tx'u'jb'il, chi Dios. 30Qa tajb'ilxixa tu'n tajtza tja tmana ex tu'ntzun jlu sajtza, ex ¿tiqu'n setz telq'a'na qe nsante?

31Xitzun ttzaq'we'n Jacob te Labán kyja':

—Tu'nju tzaj nxob'ile twitza. Kub' nximane, yaqa nne'lku t-xk'ayina qe tme'jela nwitze, nchiye. 32Qatzun at jun qxole tzalu ma che el knet qe t-santa ti'j, b'a'n tu'n tkyim. Qe xjal at qxilen kyuk'il jaku che ok testiw. Q'mantza weye qa at jun ti'xti teya wuk'ile, ex q'inxa, chi Jacob.

Minti'toq b'a'n tu'n Jacob qa atoq Raquel otoq tz'etz elq'ante qe sant.

33Okxtzun Labán tuj tja Jacob, aju xb'alun ja, ex tuj tja Lea, ax ikx okx tuj kyja qe kab'e majen xu'j, pero minti' e knet qe sant tu'n. Tej tetz tuj tja Lea, okx tuj tja Raquel. 34Atzunte Raquel otoq che tzaj ti'n qe sant ex otoq che okx tq'o'n tjaq' tarkiy jun chej camey ex kub' qe' tib'aj. B'aj tjyo'n Labán tuj tkyaqil ja, pero minti' e knet tu'n. 35Xitzun tma'n Raquel te tman: Tat, mi'n tzaj tq'oja wi'je. Mlay b'ant tu'n njaw we'ye twitza tu'nju yab' qine tu'n ẍwo'j, chi Raquel. E b'ajtzun tjyo'n Labán qe sant ex minti'x e knet tu'n. 36Tzajtzun tq'oj Jacob ex xi yolin kyuwxix te Labán, ex xi tma'n te kyja':

—¿Titzun ma nb'inchaye? ¿Alkye il ma b'ant wu'ne tu'nju ma tzaj lpe'ya wi'je? 37Ma b'aj tjyo'na t-xol tkyaqilju at weye. ¿Alkyetzun ti'xti teya ma knet tu'na? Q'on kub'a tzalu kywitz qe t-xjalila ex kywitz qe weye, tu'ntzun kymante alkye at til. 38Tuj winqin ab'q'i o chin aq'nane tuk'ila, mi jun t-ẍne'la noq o tz'el tal, mi qe ttxu' tchipa, ex mi jun tman t-ẍne'la o txi nchyo'ne; 39minti' ul wi'ne tuk'ila jun taluna otoq kub' b'yo'n tu'n txkup, noq o'kx o txi nchjo'ne aju otoq naj; qa q'ijl ex qa qonik'an ok t-xi elq'a'n jun alumaj, noq o'kx ok tel tqanina twi' wi'je. 40Q'ijl, noq ch'ixmi o chin kyime tu'n ta'w kyaq; atzun qonik'an, noq ch'ixmi o chin kyime tu'n ta'w che'w, ex minti' okx watl tuj nwitze. 41Winqin ab'q'i o chin tene tjaya. Kyajlaj ab'q'i o chin aq'nane tuk'ila kyi'j kab'e tme'jela, qaq ab'q'i o chin aq'nane kyi'j qe taluna, ex o b'aj tch'expu'na laj maj twi nk'u'je. 42Noqwit mi a'ltoq Dios wuk'ile, aju Tdios nchmane Abraham ex aju Dios o k'ulun nmane Isaac twitz, ax tok owtlo chin etz tlajo'na minti' jun ti'xti q'i'n wu'ne. Ex ma til Dios aju nb'ise ex waq'unb'ene tuk'ila. Tu'ntzun jlu, sok mayo'na tu'n qonik'an may'.

Kyaj b'ant ti'j jun tyol Jacob tuk'il Labán

43Xi ttzaq'we'n Labán te Jacob kyja':

—Qe xu'j lu nme'jele qe; qe k'wa'l lu tal nchmane qe; ex qe ẍne'l ax weye qe. Tkyaqilju nno'k tke'yina lu weye. ¿Titzun b'a'n tb'ant wu'ne kyi'j qe nme'jele ex kyi'j qe kyal o che ul itz'j? 44Ja'lo e tkyaj b'ant ti'j jun yol qxol, tu'ntzun tajb'en te jun testiw qxol qkab'il, chi Labán.

45Jawtzun ti'n Jacob jun ab'j, kub' twalb'a'n te jun techal, 46ex xi tma'n kye xjal attoq kyxilen tuk'il: Kychmontze ab'j, chi Jacob. Kykyaqiltzun e ok ten chmol ab'j tu'n tb'ant jun b'yuj kyu'n. Atzun e kub' ten wa'l ttxlaj b'yuj ab'j otoq b'aj kyb'uyin. 47Oktzun tq'o'n Labán tb'i lugar lu tuj tex tyol, Jegar Sahaduta; atzunte Jacob ok tq'o'n juntl tb'i tuj tex tyol, Galaad. 48Tmatzun Labán: Aju b'yuj ab'j lu, atzunju k'okel te testiw qxol qkab'il, chi Labán. Tu'ntzun jlu, Galaad tb'i ok q'o'n, 49ex Mispa juntl tb'i ok, tu'nju o tma Labán kyja': Awt Qman k'okel ten xq'uqil qe qkab'il ok tb'aj qpa'n qib' jun ti'j juntl, chi Labán. 50Qa ma che kub' tyajla'na qe nme'jele ex qa ma moje'ya kyuk'il txqantl xu'j, maske minti' jun testiw qxol, ex axte Dios testiw qi'j.

51Ax ikx xi tma'ntl Labán te Jacob: Lu b'yuj ab'j lu, ex lu techal lu, aqeju ma che kub' nq'o'ne qxol qkab'il. 52Aju b'yuj ab'j ex aju techal lu che ajb'el tu'n mi'n wokxe tujxi tmojona b'inchalte jun mya b'a'n ti'ja, ax ikx teya, tu'n mi'n toktza tujxi nmojone b'inchalte jun mya b'a'n wi'je. 53Aju Tdios tchmana Abraham, ex aju Tdios nchmane Nacor, awttzun b'inchante qi'j, chi Labán.

Xitzun tma'n Jacob jun yol axix tok twitz Dios, aju o k'ulun Isaac twitz. 54Kub'tzun tb'yo'n Jacob alumaj te jun oyaj te Dios twi witz lu, ex e tzaj ttxko'n qe xjal attoq kyxilen tuk'il tu'n kywa'n junx. Kykyaqiltzun e wa'n, ex ax e kub' tan twi witz tuj qonik'an lu.

55Te prim te juntl q'ij jaw we' Labán ex el ttz'ub'an kywitz qe tal tchman, ax ikx kye tme'jel; ex te tib'ajxi e kub' tky'iwla'n ex aj meltz'aj tu'n tpon tuj ttanmi.

Currently Selected:

Génesis 31: MAMNO

Highlight

Copy