Génesis 2
2
1Iktzun tten e b'aj b'ant kya'j ex tx'otx' tuk'ix tkyaqilju at kywitz. 2Tujtzun twuqin q'ij ojlan Dios, tb'antlenxi tkyaqil taq'un. 3Kub' tky'iwla'n Dios twuqin q'ij, ex el tpa'n tu'n tajb'en o'kx te, tu'nju atzun q'ij ojlan, tb'antlenxi tkyaqil taq'un.
Tokxsa'n xjal t-xol txqan awal tuj Edén
4Iktzun tten tx'olb'ab'l ti'j kya'j ex tx'otx' tej kyb'ant tu'n Qman Dios.
Tej tkub' tb'incha'n Dios tx'otx' ex kya'j, 5minti'toq jun awal twitz tx'otx', ex na'nxtoq ttzaj poq'l k'ul, tu'nju na'nxtoq ttzaj tq'o'n Qman Dios jb'al, ex mi a'ltoq jun xjal tu'n tok ten aq'nal twitz tx'otx'. 6Maske minti'toq jb'al, ex ax tuj tx'otx' in jatz jlettoq xmu's, ex atzun jlu in a'lin twitz tx'otx'. 7Kub'tzun tb'incha'n Qman Dios xinaq ti'j tquqil tx'otx', ex okx t-xupin Dios t-xew tuj ttxa'n tu'n tq'onte tchwinqlal. Iktzun tten ok xjal te itz'.
8Kub'tzun tq'o'n Qman Dios txqan awal tuj Edén tuj tjawitz q'ij, ex atzun kub' tq'o'n aju xinaq otoq kub' tb'incha'n. 9Jawtzun tch'isan Qman Dios tuj tx'otx' lu tkyaqil wiq tze' tb'anilxix ke'yin ex b'a'n tlo'njtz twitz, ax ikx jaw tch'isan tuj tmij awal aju tze' in tq'o'n chwinqlal, tuk'ix aju tze' tu'n tel nik'b'aj ti'j b'a'n ex ti'j mya b'a'n.
10Tuj Edén nne'tztoq jun nima, atzun in b'aj a'lintoq t-xol awal. Tetzlenxi tuj Edén, nne'ltoq tpa'n tib', kyaje nima nne'ltoq. 11Aju tnejel nima Pisón tb'i; atzunju in b'aj tb'etintoq ti'jele tkyaqil tx'otx' Havila tb'i, jatum at q'an pwaq. 12Tb'anilxix aju q'an pwaq at tuj tx'otx' lu, ax ikx atzun in knet tq'olil tze' tb'anilxix tk'ok'jal, tuk'ix ab'j tb'anilxix, ónice tb'i. 13Aju tkab'in nima Gihón tb'i; atzunju in b'aj tb'etintoq ti'jele tkyaqil tx'otx' Cus tb'i. 14Aju toxin nima Tigris tb'i; atzunju in b'aj tb'etintoq tuj tjawitz q'ij ttzi'yile tx'otx' Asiria. Aju tkyajin nima Éufrates tb'i.
15Tejtzun tokx tq'o'n Qman Dios aju xinaq t-xol awal tuj Edén tu'n tok ten aq'nal ti'j ex tu'n tok tk'ujla'n, 16xi tma'n te kyja': B'a'n t-xi tlo'na twitz tkyaqil tze' at tuj tqan awal; 17atzunju twitz tze' tu'n tel nik'b'aj ti'j b'a'n ex ti'j mya b'a'n, mi'n txi tlo'na; qatzun ma txi tlo'na, ax tok kymela, chi Dios te.
18Tmatzun Qman Dios kyja': Mya b'a'n tu'n tten xinaq tjunal. Kb'el nb'incha'ne jun tuk'il te onil te, chi Dios. 19Tkyaqil txkup ex tkyaqil chyu'j, tuk'ix tkyaqil jil in che lipan twitz kya'j, aqeju otoq che kub' tb'incha'n Qman Dios ti'j tx'otx', e tzaj ti'n twitz xinaq, Adán#2.19 Adán. Tuj yol ebrey a jlu in tma'n xjal, ex chi'ixmi junx tb'inx tuk'il aju yol tx'otx'. tb'i, tu'ntzun tok tq'o'n Adán kyb'i; ex teyle te junjun ok tb'i ik tza'nx ok tq'o'n. 20Ok tq'o'n Adán kyb'i alumaj, kyb'i chyu'j ex txqantl jil in che lipan twitz kya'j ex kyb'i txqantl txkup ate' tjaq' k'ul, ex kyxol kykyaqil txkup lu, minti' knet jun tuk'il te onil te. 21Tzajtzun ti'n Qman Dios nim watl tuj twitz Adán, ex tej in tantoq, jatz ti'n Dios jun t-xu'k ex kyaj tmojb'a'n jatum otoq jatz ti'n. 22Ti'jtzun xu'kb'aj lu, kub' tb'incha'n Qman Dios jun xu'j. Tzajtzun ti'n twitz Adán. 23Tej ttil Adán aju xu'j, tma kyja':
Ate jlu k'okel tb'i xu'j, tu'nju ti'jx xinaq ma jatz q'i'n, chi Adán.
24Tu'ntzun jlu, kyjel tq'o'n xinaq tman ex ttxu', k'okeltzun moje' tuk'il t-xu'jil, ex kykab'il che okel te junx.
25Kykab'il xjal lu, ate Adán ex t-xu'jil, minti'toq kyxb'alun toksa'n, ex minti'toq in tzaj kych'ixwi.
Currently Selected:
Génesis 2: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
