Hechos 4

Pon q'i'n Pedro tuk'ix Juan kywitz aj sanjelal

1Matoq in yolin Pedro tuk'ix Juan kyuk'il qe xjal, e ul tilj qe pal kye judiy tuk'ix nejenel kye polisiy xq'uqil tja Dios ex kyuk'ix qe saduceo. 2Tzaj kyq'oj kyi'j tu'nju in kyq'o'ntoq xnaq'tzb'il kye xjal, ex tu'nju in kypakb'a'n tu'n kyjaw anq'in qe kyimni ik tza'n te Jesús jatz anq'in. 3Tzyettzun Pedro kyu'n, tuk'ix Juan, okx kyq'o'n tuj pres, texi juntl q'ij e je'tz q'i'n, tu'nju otoq tz'ok qax. 4Ex nimku xjal kyb'i kyyol, ex e okslan; japuntzun kyajlal xinaq b'alo jwe' mil.

5Texi juntl q'ij b'aj kychmon kyib' qe nejenel kyxol xjal judiy tuj Jerusalén, kyuk'ix qe kytijil xjal, ex kyuk'ix qe xnaq'tzal ti'j ley, 6ex tuk'ix Anás aju nejenel kye pal, tuk'ix Caipás, tuk'ix Juan, tuk'ix Alejandro, ex kyuk'ix kykyaqil kyiyjil nejenel kye pal. 7Tzajtzun q'i'n Pedro tuk'ix Juan ex kub' kyq'o'n kyxol, ex xi kyqanin kye:

—¿Ti kyoklene, ex alkye saj q'mante kyeye tu'n kyb'inchanteye jlu?

8Atzunte Pedro, nojni tuj tanmi tu'n Xewb'aj Xjan, xi tma'n kye:

—Aqeye nejenel kyxol xjal ex kytijil aj Israel qeye: 9Ma qo oke tuj xjel kyu'ne ti'j jun b'a'n xqb'inchaye te jun xjal yab', tza'n tten xb'anix. 10Kxe'ltzun qchik'b'a'ne kyeye ex kye kykyaqil xjal aj Israel: Ate xjal lu aju wa'l kywitze ma b'anix noq tu'n tipumal Jesucrist aj Nazaret, aju jaw kyq'o'ne twitz crus, ex o jatz anq'in kyxol kyimni tu'n Dios. 11Ate Jesús aju ab'j el kyik'une aqeye b'inchal ja, ex ma tz'ok te skyini te simyent. 12Ex mi a'l juntl klol qe; porke tuj tkyaqil twitz tx'otx' minti' ma tzaj tma'n Dios qa at juntl tu'n qklet tu'n, chi Pedro xi tma'n kye.

13Tejtzun kyke'yinte aj sanjelal minti' kyxob'il Pedro tuk'ix Juan, e lab'in kyi'j, porke b'a'n kyu'n qa mya xnaq'tzamni qe tuj skwel, ex tal aq'nal xjal qe; ex el kynik' kyi'j qa otoq che ten tuk'il Jesús. 14Ex ok kyke'yin aju xjal otoq b'anix wa'l ttxlaj Pedro ex Juan, ya minti'tl tumel tu'n kyyolin mastl kyi'j. 15O'kx xi kyma'n aj sanjelal kye tu'n kyex laq'e' kyxol; ex e ok ten yolil ti'j kyxolx, 16in kyma'n:

—¿Ti k'okel kyi'j xjal lu? Porke ma b'aj kyb'i'n kykyaqil xjal, aqeju najl tuj Jerusalén, ti'j jun señ nim tipumal ma kyb'incha, ex mlay b'ant tu'n tkub' qewan jlu. 17Ex tu'n mi'n tel mastl tqanil kyxol xjal, qxob'tza'n ok qe tu'n mi'n kyyolin mastl ti'j Jesús, che chi.

18E tzajtzun kytxko'n ex xi kyma'n kye: Mi'n che yoline ex mi'n txi kyq'o'ntle xnaq'tzb'il ti'j Jesús, che chi. 19Atzunte Pedro tuk'ix Juan xi kytzaq'we'n:

—Kyximankuye qa b'a'n tuj twitz Dios tu'n t-xi qnimane kyyole ex mya ate Dios tu'n t-xi qnimane; 20ex mlay b'ant tu'n t-xi qkoline tu'n t-xi qma'ne aju ma qile ex ma qb'iye, che chi.

21Atzun kye aj sanjelal e ok kyxob'tza'n juntl maj, e je'tztzun kytzoqpi'n, minti' knet tumel kyu'n tu'n tkub' kysentens tu'n kylaj xjal, ex kykyaqil xjal in jaw kynimsa'n tb'i Dios ti'j ju xjal kox otoq b'anix. 22Porke ate xjal lu otoq japun 40 ab'q'i tu'n tej tb'anix tu'n tipumal Dios.

Xi kyqanin okslal tuj na'j Dios tu'n ttzaj q'o'n kyipumal tu'n kyyolin

23Tejtzun kyetz tzoqpi'n Pedro tuk'ix Juan, e je'xtzun kyxol kyuk'il, ex xi kytx'olb'a'n tkyaqilju otoq q'manjtz kye kyu'n nejenel kye pal ex kyu'n kytijil xjal. 24Tejtzun kyb'inte qe okslal, jaw tq'ajq'ajel kywi' junx, ex e yolin tuk'il Dios ex kyma:

—Aya Tajaw Tkyaqil, ex aya Dios b'inchal kya'j, tx'otx' ex mar ex tkyaqilju at kywitz. 25Tu'n Xewb'aj Xjan o tma tmajena David jun tyola chi kyja':

¿Tiqu'n ma che jaw tilj qe xjal? ¿Ex tiqu'n in kub' kyximan aju noqx gan?

26B'aj kytxolb'an kyib' qe rey te twitz tx'otx', ex qe nejenel kyxol xjal b'aj kychmon kyib' junx tu'n kyq'ojin ti'j Qman ex ti'j Crist aju at toklen tu'n Dios, chi David tuj Tu'jil.

27Ex ax tok tuj tnam lu kymojb'a kyyol Herodes tuk'ix Poncio Pilato, kyuk'ix qe xjal aj Israel ex kyuk'ix txqantl xjal, tu'n kyq'ojin ti'j Jesús aju Tk'wa'la xjan, aju ok tq'o'na toklen. 28Ex ma kyb'incha tkyaqilju ximamaj tu'na ojtxi tu'n tipumala, ik tza'nx tajb'ila. 29Ja'lotzun Tat, b'intza kyyol te xob'tzab'l qeye, ex q'ontza qipumale tu'n t-xi qma'ne tyola kye xjal, ex tu'n mi'n qxob'e, porke aqo'ye tmajena. 30Ex q'ontza tipumala tu'n kyb'anix qe yab' ex tu'n kyb'inchet nimku b'inchb'en nim kyipumal ex nimku señ noq tu'n tipumal Jesús aju Tk'wa'la xjan, che chi.

31Ex tej kyb'aj na'n Dios, tzaj yukch ja jatum kyb'uyin kyib'; ex kykyaqil o noj tuj kyanmi tu'n Xewb'aj Xjan, ex xi kyma'n tyol Dios minti' kyxob'il.

Qe nej okslal, tkyaqilju at kye in b'aj kysipan kyxolx

32Ex kykyaqil qeju otoq che okslan, junx kyximb'etz ex junx tb'is kyk'u'j tuj kyokslab'l; ex mi jun in q'mante qa noq teku aju at te, noq o'kx in b'aj kysipan kyxolx tkyaqilju at kye. 33Ex nim tipumal kyyol apostol, in kychik'b'a'n qa axix tok otoq jatz anq'in Qajaw Jesús; ex nimxix t-xtalb'il Dios kub' ten kyib'aj. 34Kyja'tzun mi a'l jun kye atxwit taj aju in ajb'en te; ex kykyaqil qeju at kytx'otx' ex qa kyja, in xi kyk'a'yintoq, ex tzaj kyi'n twi' aju otoq txi kyk'ayin, 35ex xi kyq'o'n tuj kyq'ab' apostol; atzun kye apostol xi kysipan kye qeju at tajb'enxix kye. 36Attoq jun xjal José tb'i, tiyjil Leví ex aj Chipre, Bernabé juntl tb'i ok kyq'o'n apostol. (Aju tnab'l tb'i, Q'uqb'alte kyk'u'j txqantl.) 37Ate xjal lu attoq jun ttx'otx' xi tk'a'yin, ex tzaj ti'n twi tx'otx', ex xi tq'o'n tuj kyq'ab' apostol.

Currently Selected:

Hechos 4: MAMNO

Highlight

Copy