Mattaayo 28

Yeesso omoot kasookaha

(Marko 16:1-10, Luuka 24:1-12, Yoohana 20:1-10)

1Inkoo Seeri Lanaso kute, baryoti ibeenki oraate teebataas ka, Maariyati ilkerengeetti Magdaala ichoow Maariyati addan irteene, goꞌddi Yeesso lakahawwaale sooyeyeen.

2Harra weyti sesseehte, a mehe hertoo Kamur goobi Waakhe katimiyye goꞌd iratte, daddaab ꞌdembeleeliite, daddaab sarche koorrommatte. 3Herta fooliche iꞌdi ankhad u a ababa, darfohiche la a waha dakhane iꞌdi yooleete. 4Iskarti meel yuubisso Herta Waakh karoorte nahtim ka hamarte sussuuhte.

5Herti Waakh wihi iche deyyeho itidah, “Roorro akhabina! A mehe saggi atin Yeessohi goorat massalaaba lakakaahe iyowattaan a gardaa. 6Inta ma kijiro, iꞌdi goorat us yidah u, omoot a kasookahe. Kaaleya, inti goorat us jiife yeya. 7ꞌDeerka dowwa irda, abattitiis mehe itadeehiin ya, ‘Us omoot a kasookahe, ortiin ili Gaalilaaya a irta. Intaas ka la a agartaan.’ Toolla an a atin isoocheeke.”

8ꞌDeerka oboorri usuhi roorro khabo iꞌdaasenyi hamaado goꞌd kabahe, oryeen abattitiissa icheekaanee. 9Chirraas on Yeesso icho ꞌhele, “Waakh ba nebey atin kakaala,” iyidah. Icho la soonyaameene, luhlohiis khabteene, usu wahteen. 10Yeesso ꞌdeerka wihi us icho iyidah, “Roorro akhabina! Nyaama ꞌdooꞌdi irummeeste wihi atin itadeehiin, ‘Gaalilaaya irda, intaas ka ꞌdee a iagartaan.’ ”

Iskare wihi yitah kuhaaniyyo icheekta

11Oboorri ꞌdulaayi, iskarti kootte hawwaal yaakhisso ilkerengeet goya iratte, kuhaaniyyohi wewween wihi yitah tuumman icheekte. 12Kuhaaniyyohi wewween ichoow ewweenki Yaꞌhuud ba tossateene, iskar chasteene, chilimmeti buure siicheen. 13Wihi icho iyidaaheen, “ꞌDooꞌd mehe itadeehiin ya, ‘Abatti Yeesso ibeen uꞌdurraayi timiyye sartiis hatte!’ 14Chirri gaafana waha daage la, uus ꞌdee sina atin kawaarinne, nahe yeed tuumman haagginna, atin ribna.” 15Iskare ꞌdeerka chilimme khaatte, wihi kootte yeela liiyidah yeesse. Yeedaas beenaate sartiisti lahate miinsan la ichoow uliba laka, yaafohi Yaꞌhuud goyaka a sohta.

Yeesso abattitiis isoobaha

(Marko 16:14-18, Luuka 24:36-49, Yoohana 20:19-23, Hilassi Ergaano 1:6-8)

16Abattiti tomon ichoow koowe iratte hali goorat Yeesso boroofenhi Gaalilaaya ka idowdowe iratte. 17Chirri icho usu argeen ka, usu wahteene, iꞌdaasenyi gaasichokoo usu kamalaleen. 18Yeesso la icho iyimiyye wihi us iyidah, “Serey ichoow harra ka anto tuumman a liisiiche. 19Maantaka nyaama ꞌdooꞌdi harra tuumman abattiteey kayeela. Magah Aabba ka ichoow ki Weel ka ichoow ki Rubeyti Munyee ka baattissiya.#28:19 Hilassi Ergaano 8:16, 19:5, Rooma 6:3, 1 Koriinto 1:13, 10:2, Galaatiya 3:27. 20Toro la amuri tuummane an atin ibahche abcha a raaheen. Rumanka la an a atin leejira ichoowka ibeenki ꞌdaꞌddaboot yateeh.”

Currently Selected:

Mattaayo 28: rel

Highlight

Copy