Mattaayo 22
22
Mammahti daawti mindischo miinsan
(Luuka 14:15-24)
1Yeesso toro ewweenki Yaꞌhuud imammahte, wihi us iyidah, 2“Dakhi goobi Waakh iyookkoka, a iꞌdi karnati inankiis min disti ulla oroosi buure ibahcho. 3Ilbooyyetiis ergate, ꞌdooꞌdi tuummane oroos liiwahe, a lasoowaho, iꞌdaasenyi icho tuumman emeet ꞌdiiꞌdeen.
4“Toro ilbooyyetiistoo addan ergate, wihi us iyidah, ‘Nyaama, ꞌdooꞌdi mindischota liiwahe tuumman toro leeyyeeda, “Kaaleya golol a bissaate, heerasseey ichoow maaroheeyki rurruusan a khale, walah a lahaaggiche, kaaleya mindischo amiita,” idaha.’
5“Iꞌdaasenyi icho wahaas nabah ma isudine, ebba hiliissa on gele. Koo gosiis goya irte, koo la meessi us koororsati irte. 6Gaasoo laka ilbooyyeti lasooergate khabteene, jaheene, sina kawaaricheene, yigaaseen. 7Karnat weyti hollowe, iskartiis erge, iskare la ꞌdooꞌdi kootte ilbooyyetiis yigis ꞌdabbaasse, toro ilkerengeetticho tuumman laka gubte.
8“Ulla ꞌdeerka wihi us ilbooyyetiis iyidah, ‘Mindischo kola a titah, iꞌdaasenyi ꞌdooꞌdi goorat lawahe koo kalday laka ma imalin. 9Toollaka nyaama, ilkerengeet irda, ꞌdooꞌdi atin ꞌhessaan tuumman mindischo isoowaha.’ 10Ilbooyye ꞌdeerka ilkerengeet goya itabte, ꞌdooꞌdi icho argeen tuumman soowaheen. ꞌDooꞌdi hahhaaggan ichoow ki sussuuje ba wahte, minki daawti mindischo lakahaaggicho marti buuhisse.
11“Iꞌdaasenyi chirra karnat yamiite marti sooyeyo, etoo darfohi mindischo ikhabin arge. 12Karnat la, ‘Eta, at saggoh inta darfohi mindischo laan isoogesse?’ worsate. Ulla walah us ilaabe mele.
13“Karnat ꞌdeerka wihi us ilbooyyetiis iyidah, ‘Dahano ichoow luhlo ba hida, mugꞌdihi kharaat iseya. Intaas ka la enenyet a ooya, toro la bolokh ka ilko iskaroba.’ 14A mehe ꞌdooꞌdi Waakh waho a ittaawe, iꞌdaasenyi ki Waakh soobahsati a koo rucchul.”
Farissaayo Yeesso wori kooddihi Kaaysar liiguto worsatta
(Marko 12:13-17, Luuka 20:20-26)
15Yomboka Farissaayotoo iratte, tossatte, jiti iche Yeesso yeediis on ka angey igelisso yowatte. 16Abattitiche ichoow ꞌdooꞌd ꞌHerood koo Yeesso iergateen. Iche la wihi iche tidah, “Eti ween, nah saggi at rum ikanokhan a garanna. Jiti Waakhe at enenyet abisso ichoow runti Waakh a israahaan. At et at ibaasso mele, weyneetteey ichoow kuus ka ba. 17Bal nah isoocheek, malaah a mehe? Kaaysarhi weene kooddi liiguto a mujjum a bal mujjum mee?”
18Iꞌdaasenyi Yeesso malichoki suuje garte, wihi us iyidah, “Iskaayyeessooy! A iꞌdoh ani angey igelin iꞌdoontaan? 19Bal chilinkoo Rooma atin kooddi kaguttaan itusa.” Iche la chilinkoo Rooma ikeente. 20Yeesso la wihi us icho iyidah, “Foola ichoow magaha kachiiran a keyya?”
21Wihi icho ilaabeen, “A koo Kaaysar.”
ꞌDeerka wihi us iyidah, “Kaaysar wihi wihiise iguta, Waakh la wihi wihiise iguta.”
22Chirri iche waha daagte ka, weyti girmeysatte, ꞌdeerka usu katabte iratte.
Yeesso saggi ꞌdooꞌdi tuume liisookahcho ꞌdooꞌd abcha
(Marko 12:18-27, Luuka 20:27-40)
23Maalinkaas goya ꞌdooꞌdoo Sadukaayo ꞌdooꞌdi tuume berri ma sookaho essi Yeesso iyimiy. 24Wihi icho yidaaheen, “Eti ween, amurre Muusa wihi iche inno abisso, chiꞌ etoo nyaakhut laan yumuy, walaaliis muunkhotaas a disti, walaaliis nyaakhut a idelo. 25Reeroo teebeenye isleedesse goyteenyo kijire. Ki ween min diste, nyaakhut ma ꞌheline, buje. Nyaakhut us khabe mele gone, makhaabassiis walaaliis ikatabe. 26Ki lammaatteet ichoow ki seyyahnaatteet ichoowka ki teebanaatteet laka iꞌdaas on eheet. 27ꞌDaꞌddaboka makhaabale laka tumuy. 28ꞌDeerka maanti ꞌdooꞌdi tuume lasookahcho, reeri teebee goyaka, etichokoh makhaabassiis tateeh, icho tuumman la a disteenee?”
29Yeesso wihi us ilaabe, “Atin jeenteti atin wihi Chiirnaanneti Waakh enenyet abisso ichoow miigti Waakh igaran u, jiti baabulenye kijirtaan. 30Maanti ꞌdooꞌdi tuume omoot kasookaho, min ma distaane ommos mindischo ka ma ladiibo. Icho tuumman iꞌdi herti Waakhe goobi Waakh kijirto yateehiin. 31Iꞌdaasenyi wori ꞌdooꞌdi tuume omoot lakasookahcho miinsane Chiirnaanneti Waakh buuggiis goyaka atin liidowo, a soonteen menya? 32Waakh mehe yidah ya, ‘Ani a Waakh Aburaaham, a Waakh Isakh, a Waakh Yaakoobo.’#22:32 Guuram 3:6. Usu Waakkhi ꞌdooꞌdi tuume menye, iꞌdaasenyi a Waakkhi ꞌdooꞌdi jiro.”
33Urur la chirri us waha daage ka, saggi us walah mujjum ꞌdooꞌd iabcho weyti kagirmeeste.
Amuri amurre kussan
(Marko 12:28-34, Luuka 10:25-28)
34Farissaayo la chirri iche saggi Yeesso Sadukaayo yeedi us ilaabe ka itoolliche daagte ka, iswahte, aytoo iche Yeesso worsatti kamalatte. 35Kichekoo a tagaanki amurree, waha us worsati ka Yeesso kaje.
36“Eti ween, amurre Muusa goyaka, koh weyti ween?” 37Yeesso wihi us ilaabe, “ ‘Kamuri Waakkhaahe uuraah tuumman ka ichoow rubeytaah tuumman ka ichoow malaah tuumman ka ꞌdoon.’#22:37 Deewutoronomi 6:5. 38Amuri oraate toro amurre tuumman kussan a kan. 39Ki lammaatteet la a iꞌdiissa, ‘Ollokkaah geeddi at isꞌdoonto ꞌdoon.’#22:39 Laawi 19:18. 40Chiirnaanneti Amurre tuumman ichoow ti ꞌdooꞌdi Waákh íyeyyeedo tuumman, amurreta lammacheeda kadisanyahiin.”
Ki Lasubhe a ínam nyaakhut nyaakhut Dawuude toro a Kamur
(Marko 12:35-37, Luuka 20:41-44)
41Farissaayo isifiddiittaayi, Yeesso wihi us icho worsate, 42“Ki Lasubhe mehe ikhaattaan? A ínam eyya?”
Iche la wihi iche ilaabte, “A hiiy Dawuud.”
43Wihi us icho iyidah, “ꞌDeerka saggoh Dawuud Rubeyti Munyee ka yeyyeedaayi, usu ‘Kamur,’ ikawaha? A mehe us mehe essa ya,
44“‘Waakkhi Kamure wihi us Kamureey iyidah,
“Dabankeeyki miigeete antoot orrommo,
ichoowka chiiytaah tuum
dahanohaah a soogesso.” ’#22:44 Sabuur 110:1.
45Chirri Dawuud rubeytiis ba usú, ‘Kamur,’ kawaho, saggoh toro Ki Lasubhe hiiy Dawuud iyahe?”
46Eticho yeedoo kalday laka ilaabo mele, uus maalinkaas la et usu wohoo addan worsan iggo mele.
Currently Selected:
Mattaayo 22: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
